Mbaʼeporã: ¿mbaʼéichapa ikatu jahechauka?

ENTÉRONTE oipota ojeʼe hese imbaʼeporãha. Péro koʼág̃arupi ndahaʼéi la ifasilpáva jahechauka hag̃ua ñanembaʼeporãha, pórke umi hénte ndohayhúi “mbaʼeve iporãva” (2 Tim. 3:3). Umi hénte ikatu hína ojegia umi mbaʼe opensávare oĩ porãha, ha heta oĩ heʼíva “oĩ porãha pe oĩ vaíva, ha oĩ vaiha umi mbaʼe iporãva” (Is. 5:20). Entéronte ñaneimperfékto ha ñañehaʼã ani hag̃ua ñandeafekta upéva ni umi mbaʼe jahasa vaʼekue yma. Ikatu voi ñañeñandu oñeñanduháicha peteĩ ermána oservímava Jehovápe heta tiémpore. Haʼe heʼi: “Ijetuʼu chéve arovia hag̃ua che haʼeha peteĩ persóna imbaʼeporãva”.

Péro javyʼa entéro ikatu haguére jahechauka ñanembaʼeporãha. Ko kualida ningo ou Ñandejára espíritu sántogui, ha upéva ipoderosove oimeraẽ mbaʼe ikatúvagui ñandejoko ñanembaʼeporã hag̃ua. Jahechamína mbaʼépa heʼise ñanembaʼeporãha ha mbaʼéichapa ikatu jahechauka porãve ñande rekovépe.

Mbaʼeporã haʼe hína peteĩ kualida ohechaukáva umi ivuénova, ndaikorrúptoiva ni naiñañáiva ha ikonsiénsia nopermitíriva chupe ojapo la ivaíva. Umi imbaʼeporãva siémpre oñehaʼã oipytyvõ hapichápe ha ohecha mbaʼéichapa ikatu ojapo umi mbaʼe porã hesehápe.

Oiméne katuete jaikuaa umi persóna siémpre oĩvape dispuésto ojapóvo umi mbaʼe porã ihénte ha iñamigokuéra rehehápe. Péro ndahaʼéi upéva añónte la ojapóva umi imbaʼeporãva. Añetehápe ningo ijetuʼu la tódo el tiémpo ñanembaʼeporã hag̃ua, pórke la Biblia heʼi voi ndaiporiha “ni peteĩ kuimbaʼe ihústova siémpre ojapóva iporãva ha núnka ndopekáiva” (Ecl. 7:20). Apóstol Pablo ohechakuaa voi upéva heʼívo: “Aikuaa che pype, che rete imperféktope, ndaiporiha mbaʼeve iporãva” (Rom. 7:18). Upévare tekotevẽ jasegi Jehová ehémplo pórke chugui ou pe mbaʼeporã. Péicha ikatúta ñanembaʼeporãve jahávo.

Jehová hína la heʼíva mbaʼépa la iporãva. Iñeʼẽme ningo heʼi: “Ñandejára, nde ningo nevuéno ha opa mbaʼe rejapóva iporã. Chemboʼemína ne mandamientokuéra” (Sal. 119:68). Ko téxto omensiona mokõi mbaʼe ohechaukáva Jehová imbaʼeporãha. Jahechamína umíva.

Jehová ivuéno. Haʼe ningo siémpre ohechauka imbaʼeporãha. Jahechamína mbaʼépa oiko kuri heʼírõ guare Moiséspe: “Che ahechaukáta ndéve mbaʼeichaitépa chembaʼeporã”. Jehová ohechauka aja umi mbaʼe porãita, ha umíva apytépe imbaʼeporãha, Moisés ohendu koʼã mbaʼe: “Jehová, Jehová, che hína peteĩ Dios oporoporiahuverekóva ha oporombyasýva, ndaipochyreíriva, oporohayhuetereíva ha nopyrũiva iñeʼẽre, ohayhu añetéva hetaitereípe, operdonáva umi ojavývape, hembiapo vaíva ha opekávape, péro ni mbaʼevéicharõ ndohejareimoʼãiva umi ofallávape” (Éx. 33:19; 34:6, 7). ¿Mbaʼérepa jaʼekuaa Jehová ohechaukaha ivuenoha entéro mbaʼe ojapóvape? Jesús oĩrõ guare ko yvy ape ári ohechauka porãiterei vaʼekue imbaʼeporãha, ndaipóri voi ótro yvypóra haʼeichagua. Upéicharõ jepe heʼi kuri: “Ñandejára añoite ningo pe imbaʼeporãva” (Luc. 18:19).

Jehová ojapo iporãva. Opa mbaʼe haʼe ojapóva ningo iporã. La Biblia heʼi: “Jehová, nde ningo nevuenoiterei enterovéndi, siémpre oreporiahuvereko, upéva ojekuaa opa mbaʼe rejapóvape” (Sal. 145:9). Jehová imbaʼeporã enterovévandi, pórke omeʼẽ yvypórape hekove ha opa mbaʼe oikotevẽva osegi hag̃ua oikove hikuái (Hech. 14:17). Avei ohechauka imbaʼeporãha operdona jave umi opekávape. Peteĩ salmísta heʼi vaʼekue: “Jehová, nde ningo nevuenoiterei ha reime oreperdona hag̃uáicha” (Sal. 86:5). Añetehápe haʼe “núnka ndojokomoʼãi mbaʼeve iporãva umi iñeʼẽrendúvagui” (Sal. 84:11).

Jehová ningo ñandeapo ijoguahárõ, upévare ñande ikatu ñanevuéno ha avei ikatu jajapo umi mbaʼe iporãva (Gén. 1:27). Upéicharõ jepe, Ñandejára Ñeʼẽ heʼi ñandéve: “Peñehaʼã peaprende umi mbaʼe iporãva” (Is. 1:17). Péro, ¿mbaʼéichapa ikatu jajapo upéva? Jahechamína mbohapy mbaʼe.

Primero, ikatu jajerure ñane ñemboʼépe pe espíritu sánto, upéva ñanepytyvõta ñanembaʼeporã hag̃ua ñande pyʼaite guive (Gál. 5:22). Añetehápe, Ñandejára espíritu ikatu hína ñanepytyvõ jahayhu hag̃ua umi mbaʼe iporãva ha ñanembojeguaru hag̃ua la ivaíva (Rom. 12:9). La Biblia ningo heʼi voi Jehová ñanemombaretetaha ‘ikatu hag̃uáicha akóinte jaʼe ha jajapo iporãva’ (2 Tes. 2:16, 17).

Segundo, tekotevẽ jalee Ñandejára Ñeʼẽ. Jajapo jave péicha, Jehová omeʼẽta ñandéve konsého ikatu hag̃uáicha jahechakuaa ‘mbaʼépa jajapo vaʼerã jaha hag̃ua tape porãre’, ha ‘jarekopaite hag̃ua ñaikotevẽva guive jajapo hag̃ua iporãva’ (Prov. 2:9; 2 Tim. 3:17). Jalee jave la Biblia ha jajepyʼamongeta hese, ñane korasõ henyhẽte umi mbaʼe porã ñaaprendéva Ñandejáragui ha hembipotágui. Koʼã mbaʼe haʼete peteĩ tesóro ñanepytyvõtava ñaikotevẽ jave (Luc. 6:45; Efes. 5:9).

Tercero, ñañehaʼãmbaite jasegi umi ehémplo iporãva (3 Juan 11). La Bíbliape oñemombeʼu umi ehémplo iporãva ikatúva jasegi. Jaikuaaháicha, Jehová ha Jesús ehémplo la iporãvéva, péro oĩ avei ambue ehémplo ikatúva jasegi. Umíva apytépe oĩ Tabita ha Bernabé (Hech. 9:36; 11:22-24). Jahechamína mbaʼépa heʼi la Biblia hesekuéra ha mbaʼépa ojapo hikuái oipytyvõ hag̃ua ótrope. Ñapensa mbaʼépa ñande ikatu jajapo ñaipytyvõ hag̃ua ñane famíliape ha kongregasiónpe. Avei jahecha umi vendisión ohupytýva koʼã mokõi kristiáno imbaʼeporã haguére. Ñande ningo ikatu avei jahupyty heta mbaʼe porã.

Ñapensamína umi persóna ñane tiempopeguáre ojapóva avei heta mbaʼe porã ótro rehehápe. Por ehémplo, umi ansiáno kongregasiongua ombaʼapo jejopy ha ohayhu umi mbaʼe porã. Ani ñanderesarái avei umi ermána ifieletévagui omboʼéva iporãva umi mbaʼe heʼíva ha ojapóva rupive (Tito 1:8; 2:3). Peteĩ ermána hérava Roslyn heʼi: “Areko peteĩ che amíga tódo el tiémpo oñehaʼãva oporopytyvõ ha oporomokyreʼỹ kongregasiónpe. Haʼe opensa umi ótro situasiónre ha pyʼỹinte omeʼẽ umívape rregaloʼi térã oipytyvõ chupekuéra ótro hendáicha. Chéverõ g̃uarã ivuenaiterei ko che amíga”.

Jehová omokyreʼỹ isiervokuérape ojapo hag̃ua “pe iporãva” (Amós 5:14). Ñaneñeʼẽrendúramo chupe, ndahaʼéi jahayhútanteva imandamientokuéra síno ñanekyreʼỹvéta avei jajapo hag̃ua la iporãva.

Péro jajapo hag̃ua la iporãva natekotevẽi jajapo peteĩ mbaʼe tuichaitereíva térã jajogua álgo hepýva. Ñamoĩmína peteĩ ehémplo. Peteĩ artísta opintáva kuádro ningo ndahaʼéi ombohasa hasánteva ipinsél ha osẽtava peteĩ kuádro iporãitereíva, síno haʼe ojesareko umi detálle mimíre. Péicha avei ñande ikatu jahechauka ñanembaʼeporãha jajapo jave ótro rehehápe heta mbaʼe porã ndahaʼéiva katuete la tuichaitereíva.

La Biblia heʼi ñandéve ñaime hag̃ua preparádo ha ñanekyreʼỹ vaʼerãha jajapo hag̃ua la iporãva (2 Tim. 2:21; Tito 3:1). Ñañeinteresáramo ñande rapicha situasiónre, ikatúta jajapo “umi mbaʼe ideprovéchotava ha iporãtava omombarete hag̃ua chupe” (Rom. 15:2). Sapyʼánte upéva heʼise ñakomparti vaʼerãha hendive álgo jarekóva (Prov. 3:27). Por ehémplo, ikatu ñainvita chupe jakaru hag̃ua térã jahasa porã hag̃ua oñondivepa. Oĩramo hasýva ikatu jarahaka chupe peteĩ tarhetíta, peteĩ mensáhe, javisita térã ñahenói chupe. Iporãiterei ningo jaheka oportunida jaʼe hag̃ua “umi mbaʼe iporãva ha oporomombaretétava oñekotevẽ jave”. Péicha umi mbaʼe jaʼéva ideprovéchota umi ñanerendúvape (Efes. 4:29).

Jehová ojapoháicha, ñande avei ñañehaʼã jajapo la iporãva tahaʼe haʼéva rehehápe. Upévare jatrata enterovévape peteĩchapa. Japredikávo umi héntepe pe marandu porã oñeʼẽva Ñandejára Rréinore, jajapo hína peteĩ mbaʼe iporãitereíva. Jesús omanda haguéicha, ñande jajapo vaʼerã la iporãva umi ndochaʼéivare ñanderehe jepe (Luc. 6:27). Núnka ndajajavymoʼãi ñanembaʼeporã ha ñanevuénoramo ótrondi, pórke heʼiháicha la Biblia “ndaipóri léi oñemoĩva koʼã mbaʼére” (Gál. 5:22, 23). Jajapóramo la iporãva jahasa asy térã oĩramo jepe oñemoĩva ñanderehe, ikatu hína ñaipytyvõ umi héntepe oasepta hag̃ua pe añetegua, ha péicha ñambotuicha avei Ñandejárape (1 Ped. 3:16, 17).

Proverbios 14:14 heʼi: “Pe ivuénovape ohaʼarõ heta mbaʼe porã”. ¿Mbaʼépa oĩ koʼã mbaʼe porã apytépe? Por ehémplo ifasilvéta ñande rapichápe ñandetrata porã hag̃ua avei (Prov. 14:22). Péro ndojapóiramo jepe hikuái upéva ha lomímonte jasegíramo ñanembaʼeporã, ikatu hína umi persóna ñandetrata porãmie ha ndaipyʼahatãvéima jepiveguáicha (Rom. 12:20).

Heta persóna ikatu hína omombeʼu mbaʼeichaitépa ideprovécho chupekuéra ojapo haguére pe iporãva ha oheja rupi umi mbaʼe vai. Jahechamína mbaʼéichapa oiko kuri upéva Náncyre. Haʼe heʼi: “Che ningo haʼe vaʼekue peteĩ persóna iñirresponsávleva, hekovaíva ha ndorrespetáiva avavépe. Péro upéi aaprende la Ñandejára omandáva ha añehaʼã ajapo umi mbaʼe, upéicha rupi añeñandu porãve. Koʼág̃a cherekopotĩ ha avyʼa oiko haguére chehegui peteĩ persóna hekoporãva”.

¿Mbaʼérepa iñimportantete ñañehaʼã ñanembaʼeporã? Pórke péicha ñambovyʼa Jehovápe. Avave ndohecháiramo jepe umi mbaʼe jajapóva, Jehová ohecha. Haʼe ningo oikuaa entéro mbaʼe porã jajapóva ha ñapensáva (Efes. 6:7, 8). ¿Mbaʼépa jahupyty upe haguére? La Biblia heʼi: “Jehová oguerohory pe persóna ivuénovape” (Prov. 12:2). Jasegíkena ñanembaʼeporã. Péicha jahupytýta la Jehová oprometéva: “Enterove ojapóvape mbaʼe porã katu oñemeʼẽta tekomimbipa, ñemombaʼe ha pyʼaguapy” (Rom. 2:10).