Ñanesãso Ñandejára mbaʼeporã ijojahaʼỹva rupive

1, 2. ¿Mbaʼéichapa ikatu ñanepytyvõ Romanos 5:12?

ROMANOS 5:12 heʼi: “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi”. Ñande ningo jaikuaa porãiterei ko versíkulo heʼíva, ha pyʼỹinte jaipuru ñamboʼe jave la Biblia umi héntepe.

² Lívro ¿Mbaʼépa ñanemboʼe la Biblia? heta vése osita Romanos 5:12. Jastudia jave ñane famíliandi térã ambue persónandi kapítulo 3, 5 ha 6, oime vaʼerã katuete jalee ko téxto. Por ehémplo, jajapo jepi upéva ñamyesakã hag̃ua mbaʼérepa ko yvy ndahaʼéi gueteri peteĩ paraíso, mbaʼérepa tekotevẽ kuri Jesús omano ñanderehehápe, ha mbaʼérepa ñamano. Péro ko versíkulo ikatu avei ñanepytyvõ jaagradese hag̃ua ñandepyʼaite guive Jehovápe haʼe haguére ñane amígo. Avei ñanemomýi jajedesidi hag̃ua jajapo opa mbaʼe haʼe oguerohorýva, ha jasegi hag̃ua ñahaʼarõ oñekumpli umi mbaʼe opromete vaʼekue.

 3. ¿Mbaʼe situasiónpepa ñaime yvyporakuéra?

³ Ñambyasýramo jepe, entéronte ñande pekadór ha káda día jajavy. Péro Jehová ñandeporiahuvereko. Haʼe oikuaa porã ñaneimperfektoha, ha oĩ dispuésto ñaneperdonávo (Sal. 103:13, 14). Jesús omboʼe vaʼekue jajerure vaʼerãha Ñandejárape ñaneperdona hag̃ua (Luc. 11:2-4). Upévare, oiméramo Jehová operdonáma raʼe umi mbaʼe vai jajapo vaʼekue yma, ndovaléi jasegi ñañeñandu vai umívare. Jahechamína mbaʼéicha rupípa Jehová ikatu ñaneperdona.

4, 5. a) ¿Mbaʼépa ñanepytyvõ ñantende hag̃ua Romanos 5:12? b) ¿Mbaʼépa heʼise “mbaʼeporã ijojahaʼỹva”?

⁴ Lívro de Romanos, por ehémplo pe kapítulo 6 ñanepytyvõ ñantende hag̃ua mbaʼérepa Jehová ikatu ñaneperdona. Kapítulo 3-pe katu heʼi “opavave” japekaha. Upéi Pablo omyesakã yvyporakuéra ikatuha hekojoja Ñandejára renondépe “Cristo Jesús opaga haguére osalva hag̃ua chupekuéra. Péva peteĩ rregálo Ñandejára omeʼẽva imbaʼeporãiterei rupi” (Rom. 3:23, 24). Pe palávra griéga ojepurúva ko téxtope ha ojetradusíva “rregálo Ñandejára omeʼẽva imbaʼeporãiterei rupi”, heʼise Jehová ojapoha peteĩ mbaʼe iporãitereíva ñanderehe nañamereséiramo jepe, ha nohaʼarõi ñamyengovia chupe.

⁵ Peteĩ expérto omombeʼu ojepuru jave la Bíbliape pe palávra “mbaʼeporã ijojahaʼỹva” ohechaukáva Ñandejára ha Cristo, heʼiseha umi mbaʼe ojapóva hikuái ikatu hag̃uáicha yvyporakuéra ojei pekádo ha ñemano poguýgui. Upéicha rupi Traducción del Nuevo Múndope oñemoĩ “mbaʼeporã ijojahaʼỹva”. Jahechamína mbaʼépa Ñandejára ojapo ñanderehehápe, ha mbaʼéichapa imbaʼeporã ijojahaʼỹva ikatu ñanevenefisia koʼág̃a ha amo gotyove.

 6. ¿Mávapa ikatu oñevenefisia Ñandejára imbaʼeporãiterei haguére, ha mbaʼéichapa?

⁶ Adán káusare pe pekádo oike ko múndope ha oafekta entéro yvypórape. Upévare la Biblia heʼi: “Peteĩ kuimbaʼe káusare ningo pe ñemano ogoverna”. Péro Jehová ohechauka mbaʼeporã ijojahaʼỹva ha ojapo tekotevẽva guive ikatu hag̃uáicha yvyporakuéra ojesalva “peteĩ kuimbaʼe rupive: Jesucristo” (Rom. 5:12, 15, 17). “Peteĩ kuimbaʼe iñeʼẽrendúgui heta héntere ojeʼéta hekojojaha”. Avei ikatúta ohupyty hikuái “jeikove opaveʼỹva ñande Ruvicha Jesucristo rupive” (Rom. 5:19, 21).

 7. ¿Mbaʼérepa jaʼekuaa pe rreskáte haʼeha peteĩ rregálo nañamereséiva ha ohechaukaha Ñandejára imbaʼeporãitereiha?

⁷ Ñapensamína ko mbaʼére: Jehová noĩri vaʼekue ovligádo omeʼẽ hag̃ua Itaʼýra rekove ñanderehehápe. Péro haʼe imbaʼeporã enterovévandi nañamereséiramo jepe, ha ojapo tekotevẽva guive ikatu hag̃uáicha jajei pekádo ha ñemano poguýgui. Ndaipóri ni peteĩva ñandeapytépe omereséva Ñandejára ha Jesús ojapo vaʼekue. ¡Ajépa jaagradesete chupekuéra ñaneperdona haguére, ha omeʼẽ rupi ñandéve esperánsa jaiko hag̃ua pára siémpre! Upévare, jahechaukákena opa mbaʼe jajapóvape ñamombaʼeha Ñandejára mbaʼeporã ijojahaʼỹva.

 8. ¿Mbaʼéichapa ndovaléi ñapensa?

⁸ Ñande jaikuaa Ñandejára siémpre oĩha dispuésto ñaneperdonávo, japeka vaíramo jepe. Péro arakaʼeve nañapensái vaʼerã Jehová imbaʼeporãiterei haguére ñaneperdonatanteha voi jasegíramo ñanerembiapo vai. Síglo primérope, umi apóstol oikove aja gueteri, oĩ vaʼekue kristiáno opensáva upéicha (elee Judas 4). Ñane tiémpope oĩ avei ojaprovechaséva Ñandejára mbaʼeporã ijojahaʼỹvagui, upévare tekotevẽ jajekuida ani hag̃ua mbeguekatúpe ñapensa avei upéicha.

9, 10. ¿Mbaʼéicha rupípa Pablo ha umi ótro kristiáno ojei kuri pekádo ha ñemano poguýgui?

⁹ Pablo heʼi vaʼekue umi kristiáno unhídope tuichaiterei ojavyha opensáramo Ñandejára operdonataha chupekuéra osegínterõ opeka. Oĩ aja ko yvy ape ári, omboyke vaʼerã hikuái umichagua pensamiénto, pórke Ñandejára siervokuéra “jajeíma pekádogui” (elee Romanos 6:1, 2). ¿Mbaʼépa heʼise upéva?

¹⁰ Jehová ombou rupi Itaʼýra omano hag̃ua ñanderehehápe, operdona kuri Pablo ha ambue kristiáno síglo primeropegua pekádo. Jehová ounhi chupekuéra espíritu sánto rupive oiko hag̃ua chuguikuéra itaʼýra. Haʼekuéra osegíramo iñeʼẽrendu, oikóta yvágape ha ogovernáta Crístondi. Umi kristiáno oikóramo jepe ko yvy ape ári, Pablo heʼi chupekuéra: “Pepensa vaʼerã pemanomaha ha ndaikatuveimaha pepeka”. Haʼe oipuru peteĩ komparasión ohechauka hag̃ua umi kristiáno okambiaite vaʼerãha oiko lája. Pablo heʼi Jesús omano rire, orresusita hague peteĩ espíritu ikatuʼỹvaicha omano, upévare “pe ñemano ndaipuʼakavéima hese”. Péicha avei umi kristiáno haʼete ku omanómava, pórke okambiaite ha ndohejavéima umi deséo vai odomina chupekuéra. Upe guive haʼekuéra oñehaʼãmbaite oiko hag̃ua Ñandejára oipotaháicha. Pablo heʼi vaʼekue chupekuéra: “Peẽ avei pepensa vaʼerã pemanomaha ha ndaikatuveimaha pepeka. Pepensa vaʼerã avei pende rekove ojeporutaha ojejapo hag̃ua Ñandejára oipotáva, peẽ haʼégui Cristo Jesús disípulo” (Rom. 6:9, 11).

11. ¿Mbaʼe sentídopepa umi orekóva esperánsa oiko hag̃ua ko yvy ape ári omanóma ha ndaikatuvéima opeka?

¹¹ ¿Ikatúpa jaʼe ñande ñamanomaha avei ha ndaikatuvéima japeka? Oiko mboyve ñandehegui kristiáno, oiméne jajapo raʼe heta mbaʼe vai ndajaikuaái rupi Ñandejára ndoguerohoryiha umíva. Upérõ ñande haʼe vaʼekue “tekokyʼa ha tembiapo vai” rembiguái, upéva heʼise “pekádo rembiguái” (Rom. 6:19, 20). Upéi ñaaprende mbaʼéichapa Jehová oipota jaiko, jaju ñakambia, ñañemeʼẽ chupe ha jajevautisa. Jadesidi kuri ñaneñeʼẽrendutaha chupe ha jaikotaha haʼe oipotaháicha. Ñande jajei rire pekádo poguýgui, oiko ñandehegui “hustísia rembiguái” (Rom. 6:17, 18).

12. ¿Mbaʼépa jadesidi vaʼerã káda uno?

¹² Ñapensamína Pablo heʼi vaʼekuére: “Ani peheja pe pekádo osegi ogoverna pende rete, ani hag̃ua pejapo meme pende rete oipotáva” (Rom. 6:12). Upéva heʼise jadesidi vaʼerãha jahejátapa umi deséo vai ñanedomina, térãpa nahániri. Upévare iñimportánte ñañeporandumi: “¿Ahejápa umi deséo vai ipuʼaka cherehe, térãpa pyaʼe voi amboyke umíva?”. Ñamombaʼéramo Ñandejára mbaʼeporã ijojahaʼỹva, ñañehaʼãmbaitéta jajapo chupe ogustáva.

13. ¿Mbaʼérepa ñaĩ segúro ikatuha jajapo Ñandejára oipotáva?

¹³ Síglo primérope, Coríntope oĩ vaʼekue kuimbaʼe oikóva kuimbaʼéndi, kuña oikóva kuñándi, omondáva, oporomoakãratĩva, omombaʼeguasúva taʼanga ha ikaʼúva. Péro oikuaa rire Jehovápe, ohayhu chupe ha ou okambia. Haʼekuéra ombyasy umi mbaʼe vai ojapo vaʼekue yma (Rom. 6:21; 1 Cor. 6:9-11). Umi kristiáno Romagua tekotevẽ vaʼekue avei ojapo koʼãichagua kámbio. Pablo heʼi chupekuéra: “Anive pemeʼẽ pende rete pekádope ojapo hag̃ua ivaíva. Upéva rangue peñemoĩ Ñandejára pópe, peikove jeyramoguáicha omanóva apytégui. Pemoĩ pende rete Ñandejára pópe ojapo hag̃ua iporãva” (Rom. 6:13). Pablo oĩ kuri segúro koʼã kristiáno ikatuha ojapo pe iporãva, ha osegitaha oñevenefisia Ñandejára mbaʼeporã ijojahaʼỹvagui.

14, 15. ¿Mbaʼépa iporã ñañeporandu?

¹⁴ Ñane tiémpope, oĩ avei heta ermáno ha ermána hembiapo vai vaʼekue ojapo haguéicha umi persóna Corintogua. Péro oikuaa rire Jehovápe, haʼekuéra okambiaite ha hekopotĩ. Entéro jaservíva Jehovápe jajapo vaʼekue heta kámbio jaipotágui haʼe ñandeguerohory. Upévare siémpre jahechaukase jaagradeseha chupe imbaʼeporãiterei haguére ñanendive. Katuete ningo ñaime desidído ñamboykévo umi deséo vai ha jaipurúvo ñande rekove Jehová servísiope.

¹⁵ Añetehápe ningo ñande ñañehaʼãmbaite ani hag̃ua ñanerembiapo vai umi hénte Corintogua ojapo haguéicha. Jasegírõ ñanerembiapo vai, ndaikatúi ñahaʼarõ Jehová ohechauka ñandéve imbaʼeporã ijojahaʼỹva ha ñaneperdona. Upévare, ¿mbaʼépa ñapensa umi pekádo algúno heʼívare ndaigraveiha? ¿Ñaĩpa desidído ñaneñeʼẽrendúvo Jehovápe opa mbaʼépe? (Rom. 6:14, 17).

16. ¿Mbaʼérepa ndovaléi ñapensa ñamboyke haguére umi mbaʼe heʼíva 1 Corintios 6:9-11 ovalemaha la jajapóva?

¹⁶ Ñapensamína apóstol Páblore. Haʼe heʼi vaʼekue: “Che yvypórante, añevende vaʼekue pekádo poguýpe. Che nantendéi la ajapóva, ajaposéva ndajapói, upéva rangue ajapo umi mbaʼe chembojeguarúva” (Rom. 7:14, 15). Pablo ndojapóiramo jepe umi mbaʼe oñemensionáva 1 Corintios 6:9-11-pe, orrekonose haʼeha pekadór. Haʼe ombovyʼase Jehovápe, upévare oñehaʼãmbaite ani hag̃ua ojapo umi mbaʼe vai (elee Romanos 7:21-23). Iporãta avei jasegíramo iñehémplo ha jajapo ikatúva guive ñaneñeʼẽrendu hag̃ua Jehovápe.

17. ¿Mbaʼérepa ñaneonrrádo vaʼerã?

¹⁷ Ñande jaikuaa jaservi porã hag̃ua Jehovápe tekotevẽha ñaneonrrádo (elee Proverbios 14:5 ha Efesios 4:25). Upévare ñande kristiáno nañandejapúi. Arakaʼeve ningo ndajajoguaséi Satanáspe, haʼéva hína “pe japu ruvicha”. Avei ñanemanduʼa porã Ananías ha hembireko omano hague ijapu rupi (Juan 8:44; Hech. 5:1-11). Péro ndahaʼéi nañandejapúi haguérente ojeʼétamava ñanderehe ñaneonrradoha. Añetehápe jaagradeséramo Ñandejára mbaʼeporã ijojahaʼỹva, ñañehaʼãta ñaneonrrádo opa mbaʼépe.

18, 19. ¿Ikatu piko jaʼe ñaneonrradoha oimérõ ndasiertopái la jaʼéva?

¹⁸ Peteĩ persónare ikatu ojekuaa naiñonrradoiha ndaijapúiramo jepe. ¿Mbaʼéichapa ikatu oiko upéva? Jehová heʼi vaʼekue umi israelítape: “Neremondái vaʼerã, nereporombotavýi vaʼerã, ha ndereikói vaʼerã reletradea nde rapicháre”. ¿Mbaʼérepa tekotevẽ kuri iñeʼẽrendu hikuái? Jehová heʼi chupekuéra: “Peẽ penepotĩ ha penderekoporã vaʼerã, pórke che Jehová pende Jára Sánto hína” (Lev. 19:2, 11, TNM). Ñapensamína: ikatu hína nañandejapúi, péro jagueroviakáramo ótrope peteĩ mbaʼe ndasiértoiva jahechauka nañaneonrradoiha.

¹⁹ Ñamoĩmína peteĩ ehémplo: Peteĩ karai heʼi ipatrónpe térã umi ombaʼapóvape hendive, tekotevẽha osẽ voive pórke oho vaʼerã doktórpe. Péro upéva ndasiertopái. Haʼe ningo opoi voisénte ikatu hag̃uáicha og̃uahẽ tempranove hógape pórke oviaha vaʼerã ifamíliandi. Umi itravahopegua opensa ohotaha okonsulta doktór ndive, péro haʼe ohótante sapyʼaite orretira peteĩ rreséta idoktórgui. ¿Iñonrrádopa hína ko karai térãpa oporombotavyse? Haʼe ningo ogueroviaka peteĩ mbaʼe ndasiértoiva. Sapyʼánte oĩ persóna ombotavýva ótrope okonsegi hag̃ua la oipotáva, térã ojecha vai jave. Péro kristianokuéra ñaneñeʼẽrendu vaʼerã Jehovápe. Haʼe heʼi: “Nereporombotavýi vaʼerã”. Ha heʼi avei: “Koʼág̃a pemeʼẽ vaʼerã pende rete hustísia rembiguairã ikatu hag̃uáicha penderekopotĩ” (Rom. 6:19).

20, 21. ¿Mbaʼe mbaʼépa ñamboykéta jaagradeséramo Ñandejára mbaʼeporã ijojahaʼỹva?

²⁰ Katuete ningo oiméne ñañehaʼãmbaite jajehekýi umi pekádo igrávevagui, upévare nañaporomoakãratĩri, nañandekaʼúi, ha umícha. Péro oĩ hetave mbaʼe jajapo vaʼerã. Ñande ñamboykete vaʼerã opa mbaʼe Jehovápe ndogustáiva. Por ehémplo, nañanderekovaiséi péro avei jajehekyiete vaʼerã umi entretenimiénto tieʼỹgui. Upéicha avei, ndahaʼéiramo jepe la ñandekaʼúva, lomímonte jajejoko vaʼerã ani hag̃ua jaʼu vevída jakaʼu lénto peve. Katuete ningo ijetuʼu ñandéve ñamboyke koʼã práktika vai, péro upéva ndeʼiséi ndaikatumoʼãiha ñakonsegi.

²¹ Jajapose Pablo heʼi hagueichaite: “Ani peheja pe pekádo osegi ogoverna pende rete, ani hag̃ua pejapo meme pende rete oipotáva” (Rom. 6:12; 7:18-20). Añetehápe ningo ndaikatumoʼãi jajapo porã entéro mbaʼe. Péro ñañemoĩramo opaichagua pekádore, ojekuaáta hína jaagradeseha ñandepyʼaite guive pe mbaʼeporã ijojahaʼỹva ohechaukáva ñandéve Jehová, itaʼýra Cristo rupive.

22. ¿Mbaʼépa ohupytýta umi omombaʼéva Ñandejára mbaʼeporã ijojahaʼỹva?

²² Jehová operdona ñande pekádo ha ikatu osegi ñaneperdona. Jaagradesete ningo chupe imbaʼeporãiterei haguére ñanendive nañamereséiramo jepe. Upévare, jajapókena ikatúva guive ñamboyke hag̃ua umi mbaʼe noĩporãiva, jepe ótro opensa ndaivairiha jajapo umíva. Pablo ñanemomanduʼa mbaʼépa jahupytýta ñañehaʼãramo jajapo iporãva. Haʼe heʼi: “Péro koʼág̃a pejei pekádogui ha peiko Ñandejára rembiguáirõ, upévare pehupyty tekomarangatu ha ipahápe jeikove opaveʼỹva” (Rom. 6:22).