Ndete ikatu edesidi evyʼátapa amo gotyove

¿IKATÚPA AÑETE NDETE REDESIDI REVYʼÁTA AMO GOTYOVE? Oĩ heʼíva ojedesidipamaha voi mbaʼeichaguátapa ñande, ótro katu heʼi haʼeha Ñandejára la okontroláva ñande rekove. Upévare nosẽporãi jave chupekuéra peteĩ mbaʼe haʼekuéra heʼi: “Oĩmbáma desidído oiko vaʼerãha ñanderehe”.

Algúno oñedesepsiona ohechávo ndaikatuiha oñesolusiona umi mbaʼe vai ohasáva umi hénte oĩ rupi inhustísia. Heta oĩ avei oñehaʼãva oiko porãve hag̃ua, péro heta vése operdepa umi mbaʼe orekóva oĩ rupi umi gérra, mondaha, mbaʼasy térã oiko rupi umi sarambi. Ha amo ipahápe haʼekuéra heʼi: “Maʼerã la ñañehaʼã reíta”.

Añetehápe umi mbaʼe oikóva ko múndope heta vése okambiapa umi mbaʼe ñaplanea vaʼekue (Eclesiastés 9:11). Upéicharõ jepe, entéro ikatu ohechauka ovyʼasépa pára siémpre amo gotyove. Ha la Biblia ñanemboʼe voi upéva odependeha umi mbaʼe jadesidívare. ¿Mbaʼérepa jaʼe upéva?

Umi israelita oike potaitérõ guare pe yvy oñepromete vaʼekuépe, Moisés rupive Ñandejára heʼi chupekuéra: “Koestedía amoĩ testígoramo pe yvága ha pe yvy, amoĩ hague pene renondépe pe jeikove ha ñemano, pe vendisión ha maldisión. Ha peiporavo vaʼerã pe jeikove ikatu hag̃uáicha peikove peẽ ha umi pene familiare, pehayhúgui Jehová pende Járape, pehendu rupi iñeʼẽ, ha peñakarama hatãgui hese” (Deuteronomio 30:15, 19, 20).

“Amoĩ testígoramo pe yvága ha pe yvy, amoĩ hague pene renondépe pe jeikove ha ñemano, pe vendisión ha maldisión. Ha peiporavo vaʼerã pe jeikove” (Deuteronomio 30:19)

Ñandejára olivera umi israelítape Egipto poguýgui ha omeʼẽ chupekuéra oportunida oiko porã hag̃ua pe yvy oñepromete vaʼekuépe, ha heʼi avave ndorekomoʼãveimaha chupekuéra ipoguýpe. Péro haʼekuéra tekotevẽ kuri ojapo peteĩ mbaʼe ohupyty hag̃ua umíva. ¿Mbaʼépa upéva? Haʼekuéra oiporavo vaʼerã pe jeikove. Tekotevẽ ohayhu Ñandejárape, iñeʼẽrendu chupe ha oñakarama hatã hese.

Nde avei ereko oportunida edesidi hag̃ua mbaʼépa rejapóta. Edesidíramo ehayhu Ñandejárape, neñeʼẽrendu chupe ha reñakarama hatã hese, upéicharõ reiporavo hína pe jeikove ha ikatúta reiko pára siémpre peteĩ paraísope ko yvy ape ári. Péro, ¿mbaʼéichapa ikatu jajapo koʼã mbaʼe?

Apóstol Juan oskrivi vaʼekue espíritu sánto rupive Ñandejára haʼeha mborayhu, upéva haʼe pe kualida iñimportantevéva haʼe orekóva (1 Juan 4:8). Jesús oikuaa porã vaʼekue upéva, upéicha rupi oñeporandúrõ guare chupe mbaʼépa pe mandamiénto iñimportantevéva, haʼe heʼi: “Rehayhu vaʼerã Jehová nde Járape nde pyʼaite guive, ne álma rugua guive, ha opa ne arandukue reheve” (Mateo 22:37). Ñande jahayhúgui Jehovápe jaikose iñamígoramo, ndahaʼéi jakyhyjégui chugui, avei jaikuaa porã vaʼerã mbaʼérepa ñaneñeʼẽrendu chupe. Péro, ¿mbaʼérepa jahayhu vaʼerã chupe?

Peteĩ túa ningo ohayhueterei ifamiliakuérape ha Ñandejára upeichaite avei ñanderayhu. Umi tuakuéra haʼéramo jepe imperfékto, oñehaʼãmbaite ifamiliakuéra rehehápe, upévare omboʼe, omokyreʼỹ ha okorrehi chupekuéra mborayhúpe oipotágui ovyʼa ha osẽ porã hikuái. Ha, ¿mbaʼépa pe túa ohaʼarõ ifamíliagui? Haʼe oipota ifamília ohayhu ha iñeʼẽrendu chupe ha ontende hikuái haʼe oñemoñeʼẽha chupekuéra ohayhúguinte ifamiliakuérape. Ñande Ru yvagapegua ningo perfékto, upévare haʼe koʼýte omerese jahayhu ha jaagradese chupe opa mbaʼe ojapóvare ñanderehehápe.

Umi idióma ojeskrivi ypy haguépe la Biblia, pe palávra ñahendu heʼise avei “ñaneñeʼẽrendu”. Ha añetehápe upéva haʼe la ojeruréva umi tuakuéra heʼi vove ifamiliakuérape “cherendumína”. Upéicharamo ñahendu Ñandejárape heʼise hína jaikuaaha mbaʼépa haʼe ohaʼarõ ñandehegui ha jajapo upéva. Ñane tiémpope ningo Ñandejára noñeʼẽvéima yvyporakuérandi, upévare ikatu hag̃uáicha ñahendu chupe tekotevẽ jalee la Biblia ha jajapo la ñaaprendéva chugui (1 Juan 5:3).

Jesús ohechauka vaʼekue mbaʼeichaitépa iñimportánte ñahendu Ñandejárape, upévare heʼi: “Yvypóra noikotevẽi pan rehe añónte oikove hag̃ua, oikotevẽ guei opaite mbaʼe Jehová heʼívare” (Mateo 4:4). Jaikuaaháicha iñimportanteterei ñañealimenta, péro iñimportanteve jey ñaaprende ha jaikuaa porã umi mbaʼe oúva Ñandejáragui. ¿Mbaʼérepa jaʼe upéva? Pe rréi iñaranduetéva hérava Salomón heʼi vaʼekue: “Pe arandu ha pe pláta ningo ideprovécho. Péro reikuaáramo Ñandejárape ha nearandúramo iporãvéntema, pórke upéva nepytyvõta reikove hag̃ua” (Eclesiastés 7:12). Ñanearandúramo ha jaikuaa porã Ñandejárape ikatúta jajeprotehe koʼág̃ama voi ha avei ñanepytyvõta jahupyty hag̃ua pe vída etérna.

Pe ótro artíkulope jahecha kuri peteĩ ehémplo Jesús oipuru vaʼekue, peteĩ pártepe upe ehémplogui haʼe heʼi: “Michĩ pe okẽ ha ipoʼi pe tape oporogueraháva jeikove opaveʼỹvape, ha saʼi umi ojuhúva upe tape” (Mateo 7:13, 14). Ajépa javyʼaitéta jaguerekóramo peteĩ gía ivaléva ñanepytyvõtava jaha hag̃ua upe tape ñandeguerahávare pe jeikove opaveʼỹvape. Upearã tekotevẽterei ñañakarama hatã Ñandejárare (Salmo 16:8). Péro, ¿mbaʼéichapa ikatu jajapo upéva?

Káda día ningo jaguereko heta mbaʼe jajapo vaʼerã ha oĩ hetave mbaʼe hiʼãva avei jajapo. Ha ñanerembiapoiterei rupi, ikatu hína nahembyvéi ñandéve tiémpo ñapensa hag̃ua umi mbaʼe Ñandejára oipotávare jajapo. Upévare ideprovechoiterei ñandéve ko konsého oĩva la Bíbliape: “Peñatende porãke peiko lájare, ani hag̃ua peiko itavývaicha, síno iñarandúvaicha. Ha peipuru porãke pene tiémpo, cháke jaiko hína tiémpo ijetuʼúvape” (Efesios 5:15, 16). Upéicharõ, ñañakarama hatã Ñandejárare heʼise hína ñamotenonde memeha ñane amista hendive (Mateo 6:33).

Ndaikatúiramo jepe rekambia umi mbaʼe oikopáma vaʼekue, si oĩ heta mbaʼe rejapokuaáva ikatu hag̃uáicha nde ha ne família pehupyty heta mbaʼe porã amo gotyove. La Biblia ohechauka ñande Ru yvagapegua Jehová ñanderayhuetereiha, ha upévare heʼi ñandéve mbaʼépa oipota jajapo. Emañamína mbaʼépa heʼi vaʼekue proféta Miqueas:

“Haʼe ningo omombeʼu porã ndéve mbaʼépa la iporãva. ¿Mbaʼépa hína la Jehová ojeruréva ndehegui? Haʼe oipota ndehústo, neumílde reguatávo Ñandejára ndive, ha ndoipotái refalla avavépe” (Miqueas 6:8).

Ñandejára neinvita reguata hag̃ua hendive, ha reaseptáramo upéva, rehupytýta umi mbaʼe porã odurátava pára siémpre haʼe opreparáva iñamigokuérape g̃uarã. Upéicharõ, ¡ndete ikatu redesidi rehupytýtapa koʼã vendisión!