Tuvakuéra, pemboʼékena pene famíliape michĩ guive

“ÑANDEJÁRA niko [ñanevendesi] hína omeʼẽvo ñandéve ñande raʼy ha ñande rajykuerarã.” (Sal. 127:3.) ¡Ndareíri umi sy ha túva oservíva Jehovápe ovyʼaite onasévo ifamília!

Péro ovyʼaitereíramo jepe, tuvakuéra oikuaa avei orekoha tuicha rresponsavilida. Ikatu hag̃uáicha ifamília hesãi ha okakuaa porã, tekotevẽ avei oalimenta porã chupe. Péicha avei, pe mitã ojerovia mbarete hag̃ua ohóvo, haʼekuéra oipytyvõ ha omboʼe meme vaʼerã chupe la Biblia heʼíva. Tekotevẽ oñehaʼãmbaite hikuái omoinge ifamília korasõme Ñandejára Ñeʼẽ omboʼéva (Prov. 1:8). Péro, ¿arakaʼe guivépa tuvakuéra oñepyrũ vaʼerã omboʼe pe mitãme, ha mbaʼéichapa ojapo vaʼerã upéva?

Jahechamína mbaʼépa oiko peteĩ karai danítare, hérava Manóah, oiko vaʼekue Zorápe, peteĩ táva oĩva Israel yma guarépe. Hembireko ningo ndaikatúi imemby, péro peteĩ árape Jehová ánhel heʼi chupe orekotaha peteĩ mitã (Juec. 13:2, 3). ¡Oiméne upéva ombovyʼaite upe karai ha hembirekópe! Upéicharõ jepe, haʼekuéra katuete ojepyʼapýne raʼe. Manóah ojeroviaiterei Jehováre ha oñemboʼe chupe: “Ajerure ndéve rembou jey hag̃ua ore rendápe upe kuimbaʼe ikatu hag̃uáicha heʼi oréve mbaʼépa rojapo vaʼerã pe mitã oútavagui” (Juec. 13:8). Haʼe ha hembireko oñehaʼãmbaite omongakuaa hekoitépe ifamíliape. Ojapo hikuái opa ikatúva omboʼe hag̃ua Ñandejára Léi ifamíliape hérava Sansón, ha Jehová ovendesi chupekuéra. La Biblia omombeʼu “ñande Ruete espíritu” oñepyrũ hague oipytyvõ Sansónpe. Upéicha rupi oiko chugui peteĩ hués Israélpe ha Ñandejára podér rupive ojapo heta mbaʼe tuicháva (Juec. 13:25, ÑÑB; Juec. 14:5, 6; 15:14, 15).

¿Arakaʼe guivépa tuvakuéra oñepyrũ vaʼerã omboʼe ifamíliape? Oñeʼẽvo Timotéore, la Biblia omombeʼu isy Eunice ha ijavuéla Loida omboʼe hague chupe ‘imitã guive’ “Ñandejára Ñeʼẽ” (2 Tim. 1:5; 3:15, NM). Jahechaháicha, Timotéope oñehekomboʼe Ñandejára rapére michĩete guive.

Umi sy ha túva kristiáno ojerure vaʼerã Jehovápe toipytyvõ chupekuéra. Avei ojepreparáma vaʼerã hikuái ohekomboʼe hag̃uáicha ifamíliape michĩ guive. Proverbios 21:5 heʼi: “Ikatupyrýva rembiapo, mbaʼe porã memete”. Tuvakuéra oñepyrũma vaʼerã ojeprepara onase mboyve pe mitã. Por ehémplo, ikatu omoĩ peteĩ lístape umi mbaʼe oikotevẽtava pe mitã. Avei iñimportánte opensa mbaʼéichapa omboʼéta ifamíliape oñemoag̃ui hag̃ua Jehováre. Ojeprepara porã vaʼerã hikuái omboʼe hag̃ua chupe voi guive.

Peteĩ lívro heʼi “mésente onase rire umi mitãraʼy, iñapytuʼũ ombaʼapoha 20 vése pyaʼeve”. Upéva oipytyvõ chupekuéra “oiporukuaa hag̃ua iñakã” ha ikatu hag̃uáicha oaprende heta mbaʼe (El desarrollo del niño en la primera infancia: echar los cimientos del aprendizaje). ¡Ajépa iñimportantete tuvakuéra oaprovecha upe tiémpo ndaipukúiva oñepyrũ hag̃ua omboʼe ifamíliape ikatu hag̃uáicha ohayhu Jehovápe!

Peteĩ prekursóra rregulár omombeʼu: “Che membykuñaʼi orekórõ guare un mes agueraháma chendive predikasiónpe. Haʼe ningo ni nontendéi moõpa oho ni mbaʼépa ojejapo upérupi, péro che apensa upéva oipytyvõma hague chupe michĩramo jepe. Upéi, tuichavemi rire, ijeheguíntema omeʼẽ tratádo umi héntepe”.

Umi mitã oñehekomboʼéva michĩ guive, katuete osẽ porã. Upéicharõ jepe, heta sy ha túva heʼi ijetuʼuha jepi ñamboʼe umi mitãme oguata hag̃ua Ñandejára rapére.

Heta vése sy ha túvape ijetuʼu omboʼe hag̃ua ifamíliape. Umi mitã sapyʼaiténte oñatende peteĩ mbaʼére ha upéi ikueráima. Haʼekuéra ningo oaprende ohóvo heta mbaʼe ipyahúva, upévare ikuriosoiterei ha omaña ápe ha pépe. ¿Mbaʼépa ikatu ojapo tuvakuéra oipytyvõ hag̃ua ifamíliape oñatende hag̃ua omboʼe jave chupe?

Pehechamína Moisés heʼi vaʼekue Deuteronomio 6:6, 7-pe: “Ani nderesarái arakaʼeve koʼã [mandamiéntogui] che ameʼẽva ndéve koʼág̃a. Ehekomboʼe umíva rehe nde raʼykuérape, nemanduʼa hese manterei chupekuéra, nde rógape, tapére, reñenonguévo ha repuʼãnguévo”. Ko téxtope pe ñeʼẽ “ehekomboʼe”, heʼise remboʼe jey jey vaʼerãha ne famíliape oaprende peve. Pe mitã ojogua peteĩ yvyraraʼýpe tekotevẽva ojerrega pyʼỹi. Peteĩ kakuaa jepe oikotevẽ jepi ojeʼe jey jey chupe peteĩ mbaʼe ikatu hag̃uáicha imanduʼa. Upévare umi mitã koʼýte oikotevẽ oñemboʼe chupekuéra heta vése peteĩ mbaʼe.

Remboʼe hag̃ua ne famíliape Ñandejára Ñeʼẽ, rehasa vaʼerã tiémpo hendive. Upéva hasy heta vése ñanerembiapoiterei rupi. Péro apóstol Pablo heʼi ñandéve ‘jaiporu porã vaʼerãha ñane tiémpo’, ikatu hag̃uáicha ñakumpli umi mbaʼe oñehaʼarõva kristianokuéragui (Efes. 5:15, 16, NM). ¿Mbaʼéichapa ikatu jajapo upéva? Por ehémplo, peteĩ ansiánope ijetuʼu vaʼekue okumplipa hag̃ua umi rresponsavilida orekóva: ohekomboʼe vaʼerã itajyraʼi, heta hembiapo kongregasiónpe ha ombaʼapo vaʼerã. Hembireko katu prekursóra rregulár ha hembiapo heta avei. ¿Mbaʼépa ojapo hikuái oñemotiémpo hag̃ua ifamíliape g̃uarã? Pe ermáno omombeʼu: “Káda día aha mboyve che travahohápe, che ha che rembireko roleeʼimi che rajyʼípe Che lívro omombeʼúva istória oĩva Ñandejára Ñeʼẽme, térã pe folléto Ñahesaʼỹijo Ñandejára Ñeʼẽ ára ha ára. Upéi, pyhare oñeno mboyve, rolee jey chupe michĩmi. Ha rosẽ jave ropredika, katuete rogueraha orendive. Roñehaʼãmbaite rohekomboʼe chupe michĩ guive”.

Opavave ningo oipota ifamília osẽ porã. Péro opa mbaʼégui iñimportanteve ñahekomboʼe chupekuéra ohayhu hag̃ua Jehovápe ipyʼaite guive (Mar. 12:28-30).

Salmo 127:4 heʼi: “Ku [fléchaicha] soldádo pópe, péicha umi taʼýra oúva peteĩ kuimbaʼe rekovépe haʼe ipyahu ha imbarete aja” (ÑÑB). Ko téxtope oñembojoja fléchare umi mitãme. Pe opoíva oapunta porã vaʼerã ikatu hag̃uáicha ojaserta. ¿Mbaʼérepa? Opoi jepe guive, ndaikatuvéima omboguevi pe flécha. Tuvakuéra ningo ndorekomoʼãi hendivekuéra ifamília heta tiémpore. Upévare oaprovechapaite vaʼerã oĩ aja hendivekuéra omoheñói hag̃ua iñakã ha ipyʼapýpe la Biblia omboʼéva.

Apóstol Juan oipytyvõ vaʼekue hetápe oservi hag̃ua Ñandejárape, ha upéi ohai imanduʼávo hesekuéra: “Chéngo avyʼaiterei ahendu jave che raʼykuéra osegiha oiko pe añetegua rapére” (3 Juan 4, NM). Umi sy ha Túva oservíva Jehovápe oñeñandu avei upéicha ohechávo ifamiliakuéra “osegiha oiko pe añetegua rapére”.