Peteĩ palávra ohechaukáva rrespéto ha mborayhu

JESÚS tiémpope, heta vése umi kuimbaʼe oñeʼẽta jave umi kuñáme oipuru jepi pe palávra “kuña”. Péicha umi hebreo ohechauka iñamavleha hendivekuéra. Jesús osegi vaʼekue avei ko kostúmbre ohechauka hag̃ua opororrespetaha. Por ehémplo, omonguerárõ guare peteĩ kuña 18 áñorema hasýva ha oikóva ikarapã, Jesús heʼi chupe: “Nde kuña, rekueráma ne mbaʼasýgui” (Luc. 13:10-13, SBP). Ótra vuéltape, haʼe oipuru avei pe palávra “kuña” oñeʼẽrõ guare isýpe, oĩháicha pe téxto griégo orihinálpe. Upe tiémpope péicha ojehechauka ojerrespetaha umi kuñáme (Juan 19:26; 20:13). Péro oĩ avei ótra palávra ojepuru vaʼekue ndahaʼéi ojehechaukánte hag̃ua rrespéto, síno avei ambue mbaʼe.

Sapyʼánte, la Biblia oñeʼẽ jave umi kuñáre oipuru peteĩ palávra ikariñósova. Por ehémplo, Jesús oipuru kuri upe palávra oñeʼẽrõ guare peteĩ kuñáme 12 áñorema iñemorráhiava. Ñandejára Léi heʼi vaʼekue peteĩ kuña oĩva upe situasiónpe, ikyʼaha ha ndaikatuiha oñemoag̃ui avavére. Péro pe kuña oñembojávo Jesús ypýpe nokumplíri pe Léi heʼíva (Lev. 15:19-27). Haʼe ningo ojedesesperaiterei. La Biblia heʼi voi hese hetáma ombohasa asy hague chupe “umi doktór ha ogastapáma orekomíva guive, péro ndokuerái, ivaive guei la ipórte” (Mar. 5:25, 26).

Pe kuña kirirĩhaitépe oike umi hénte apytépe, oñemboja Jesúsre hapykuéguio ha opoko ijao ruguáire. Upepete pe huguy opytaite. Haʼe oimoʼã kuri avave ndopillamoʼãiha la ojapo vaʼekue, péro Jesús oporandu: “¿Máva piko opoko cherehe?” (Luc. 8:45-47). Pe kuña “oryrýi osusũ, ou oñesũ Jesús renondépe ha omombeʼupaite upe oiko vaʼekue” (Mar. 5:33).

Jesús ombopyʼaguapy pe kuñáme heʼívo chupe mborayhúpe: “Anína rekyhyje che rajy” (Mat. 9:22). Umi ostudiáva umi palávra bíblica heʼi pe palávra evréa ha griéga ojetradusíva “tajýra”, ojepuruha jepi ojehechauka hag̃ua mborayhu. Upe rire, Jesús okonsola pe kuñakaraípe heʼívo chupe: “Rejerovia rupi ningo rekuera ko mbaʼasy nembohasa asyetévagui. Tereho katu pyʼaguapýpe” (Mar. 5:34).

Peteĩ karai ipláta hetáva hérava Boaz ohenói vaʼekue avei “che rajy” peteĩ kuña Moabguápe hérava Rut. Ko kuñáme ningo oñemeʼẽ kuri permíso omonoʼõ hag̃ua seváda peteĩ kokue ahénope, péro haʼe lomímonte ojepyʼapy. Péro Boaz ohenói rire Rútpe “che rajy”, omokyreʼỹ chupe osegi hag̃ua omonoʼõ ijyvýpe. Upémarõ Rut oñesũ henondépe, ha oporandu Boázpe mbaʼérepa otrata porãite peteĩ extranhérape. Boaz ombopyʼaguapy chupe heʼívo: “Oñemombeʼupaite kuri chéve pe rejapo vaʼekue nde suégra rehehápe. [...] Jehová tomyengoviapaite ndéve ko mbaʼe porãite rejapo vaʼekue” (Rut 2:8-12, TNM).

Umi ansiáno ningo ikatu osegi Jesús ha Boaz ehémplo. Sapyʼánte mokõi ansiáno oñerreuni peteĩ ermána oikotevẽvandi oñemokyreʼỹ ha ojechauka chupe umi konsého oĩva la Bíbliape. Umi ansiáno oñemboʼéramo Jehovápe ha ojapysaka porãramo pe ermánare, katuete oanimáta ha okonsoláta chupe la Biblia rupive (Rom. 15:4).