“¿Mávaguipa akyhyjéta?”

‘Jepeve oñemopuʼã cherehe ñorairõ guasu, che aiméta jeroviapópe.’ (SAL. 27:3, ÑÑB)

¿MBAʼÉICHAPA KOʼÃ VERSÍKULO ÑANEPYTYVÕTA ÑANDEPYʼAGUASU HAG̃UA?

Salmo 27:1

Salmo 27:4

Salmo 27:11

 1. ¿Mbaʼépa ñambohováita ñahesaʼỹijóvo Salmo 27?

¿MBAʼÉREPA hetave ojepredika koʼág̃a rupi ivaivéramo jepe opa mbaʼe ko múndope? ¿Mbaʼérepa jaiporu ñane tiémpo ha ñane mbaretekue jajapo hag̃ua ko tembiapo ijetuʼuetereíramo jepe jahupyty ñane remikotevẽ? ¿Mbaʼépa ñanepytyvõta ani hag̃ua jakyhyje hetaite hénte ojepyʼapýramo jepe henonderãre? Pe purahéi rréi David ojapovaʼekue espíritu sánto rupive, oĩva Salmo 27-pe, ombohovái koʼã porandu.

 2. ¿Mbaʼéichapa oiko umi okyhyjetereíva, péro mbaʼe rehépa ñande jajerovia?

² David oñepyrũ pe purahéi kóicha: “Jehová haʼe upe cheresape ha chesalváva. ¿Mávaguipa akyhyjéta? Jehová oñangareko cherehe, ¿máva piko chemongyhyjéta?” (Sal. 27:1, NM). Peteĩ okyhyjetereíva ningo ikangy jepi ha ndaikatúi ojapo mbaʼeve. Péro peteĩ oservíva Ñandejárape ipyʼaguasu ha ndokyhyjéi (1 Ped. 3:14). Opavave ojeroviáva Ñandejárare “oikovéta pyʼaguapýpe, okyhyjeʼỹre mbaʼevégui” (Pro. 1:33; 3:25). Jahechamína mbaʼérepa.

“JEHOVÁ HAʼE UPE CHERESAPE HA CHESALVÁVA”

 3. ¿Mbaʼéichapa Jehová ñanderesape, péro mbaʼépa jajapovaʼerã?

³ Pe ñeʼẽ ‘Jehová haʼe upe cheresapéva’, heʼise haʼe ñaneguenohẽha pytũmbýgui (Sal. 27:1). Pór ehémplo, ojehesapéramo ñandéve ñande rape, katuete jahecha oĩrõ pelígro térã peteĩ mbaʼe ñandejokoséva. Péro ojehesape haguére ñandéve ndeʼiséi ojeitamaha upe pelígro, síno ñanepytyvõ jajei hag̃ua chugui. Péicha avei Jehová omyesakã ñandéve heta mbaʼe oikóva ñande jerére, heʼi mbaʼéguipa ñañeñangarekovaʼerã ko múndope, ha omeʼẽ heta konsého iporãva katuete ñanepytyvõva. Péro tekotevẽ jajapo umi mbaʼe ñaaprendéva. Upéicha jahechaukáta ñanearanduha, pe salmísta ohechauka haguéicha. Haʼe ohai: “Ne [mandamiénto] rupi chearanduve umi cherehe ijaʼeʼỹvagui [...]. Aikuaave umi chéve chemboʼévagui” (Sal. 119:98, 99, 130).

 4. a) ¿Mbaʼérepa David ikatuvaʼekue heʼi: “Jehová haʼe upe [...] chesalváva”? b) ¿Arakaʼépa Jehová ñandesalváta?

⁴ Jaleévo Salmo 27:1, ikatu jaʼe David imanduʼáne hague Jehová osalvárõ guare chupe heta vése. Pór ehémplo, Jehová oguenohẽ chupe “león ha óso” jurúgui. Avei oipytyvõ chupe ojuka hag̃ua Goliátpe. Upe rire oñangareko hese, rréi Saúl heta vése oñehaʼãrõ guare ojuka chupe peteĩ lánsape (1 Sam. 17:37, 49, 50; 18:11, 12; 19:10). Ndareíri ningo David heʼivaʼekue: “Jehová haʼe upe [...] chesalváva”. Jaikuaaháicha, pe “jehasa asy guasu” hiʼag̃uimbaitéma, ha upe aja Jehová oñangareko ha osalváta isiervokuérape, ojapo haguéicha David rehe (Rev. 7:14, NM; 2 Ped. 2:9).

ÑANEMANDUʼÁKENA ÑANEPYTYVÕ HAGUE

5, 6. a) ¿Mbaʼéichapa ñanepytyvõ ñanemanduʼáramo umi mbaʼe jahasavaʼekuére? b) ¿Mbaʼérepa ñandepyʼaguasu ñahesaʼỹijóramo Jehová ojapovaʼekue hembiguaikuéra rehehápe?

⁵ Peteĩ mbaʼe ñanepytyvõva ñandepyʼaguasu hag̃ua jatopa Salmo 27:2, 3-pe (elee). David imanduʼa Jehová heta vése osalva hague chupe (1 Sam. 17:34-37). Upéicha rupi ipyʼaguasuve ombohovái hag̃ua umi mbaʼe ijetuʼuvéva jepe. ¿Nemanduʼápa mbaʼéicha Jehová nepytyvõ ymave? ¿Nemombaretépa koʼã mbaʼe? Pór ehémplo, ¿nemanduʼápa reñemboʼe hague chupe tuicha neprovlémarõ guare ha upéi rehecha mbaʼéichapa nemoarandu térã nemombarete regueropuʼaka hag̃uáicha upe provléma? ¿Térãpa nemanduʼa mbaʼéichapa okambia umi situasión ndohejaivaʼekue reservi Jehovápe reserviseháicha, ỹrõ “ija porã” ndéve reiporuve hag̃ua ne tiémpo iservísiope? (1 Cor. 16:9, BNP.) ¿Mbaʼéichapa reñeñandu rejepyʼamongetávo koʼã mbaʼére? Katuete rejeroviave Jehová nepytyvõtaha rembohovái hag̃ua umi mbaʼe ijetuʼúva (Rom. 5:3-5.)

⁶ ¿Ha mbaʼépa oikóta peteĩ goviérno imbaretéva oñehaʼãramo ohundi Jehová puévlo? Ñane tiémpope oĩ heta oñehaʼãvaʼekue ojapo upéva, upéicharõ jepe ndaikatúi ohundi hikuái Ñandejára puévlo. Jajepyʼamongetárõ mbaʼéichapa Jehová ymave oñangareko ipuévlore, ndajakyhyjemoʼãi umi mbaʼe ikatuvaʼerãgui oiko ñane renonderãme (Dan. 3:28).

ÑAMOMBAʼÉKENA JEHOVÁ SERVÍSIO

7, 8. a) Heʼiháicha Salmo 27:4, ¿mbaʼépa David ojerure Jehovápe? b) ¿Mbaʼépa pe témplo espirituál, ha mbaʼéichapa ñamombaʼeguasu Jehovápe upe témplope?

⁷ Ñandepyʼaguasu hag̃ua tekotevẽ avei jahayhu Jehová servísio (elee Salmo 27:4). David tiémpope, pe tavernákulo haʼevaʼekue ‘Jehová róga guasu’. Upéi David oprepara umi mbaʼe oñekotevẽva ikatu hag̃uáicha upe rire Salomón omopuʼã pe témplo tuichaitéva. Heta tiémpo rire, Jesús omyesakã natekotevẽmoʼãveimaha oñemombaʼeguasu Jehovápe peteĩ témplope (Juan 4:21-23). Hebréospe, kapítulo 8 guive 10 peve, apóstol Pablo ohechauka oñemoñepyrũha peteĩ témplo espirituál áño 29-pe, Jesús ojevautisárõ guare. Upérõ haʼe oñepresenta ojapo hag̃ua Ñandejára rembipota (Heb. 10:10). ¿Mbaʼépa pe témplo espirituál? Upéva hína opa mbaʼe Ñandejára oiporúva ikatu hag̃uáicha ñañemoag̃ui hese jajerovia rupi Jesús sakrifísiore. ¿Ha mbaʼéichapa ñamombaʼeguasu chupe pe témplope? Ñañemboʼévo “pyʼaporã ha jerovia mbaretépe”, ñamombeʼúvo jakyhyjeʼỹre umi mbaʼe jahupytýtava, ñamokyreʼỹvo ñane ermanokuérape rreunionhápe ha jastudia jave ñande rogayguakuérandi (Heb. 10:22-25). Ñamombaʼéramo Jehová servísio katuete ñanembaretevéta ñambohovái hag̃ua koʼã tiémpo ijetuʼuetéva.

⁸ Oparupiete oĩ heta ermáno oñehaʼãva ombaʼapove Jehovápe g̃uarã. Pór ehémplo, oĩ oaprendéva ótro idióma térã ováva ambue hendápe oñekotevẽvehápe opredikavaʼerã. Ojapo haguéicha pe salmísta, ohechauka hikuái opa ojapóvare oĩ porãseha Ñandejárandi, ha oserviseha chupe toiko la oikóva (elee Salmo 27:6).

JEHOVÁ KATUETE ÑANEPYTYVÕTA

9, 10. ¿Mbaʼépa ñanemboʼe Salmo 27:10?

⁹ David ohechaukavaʼekue ojeroviaitereiha Ñandejárare ohaívo: “Che ru ha che sy cherejáramo jepe tyreʼỹ, Nde, che Ruete, nde reñangareko porãta cherehe” (Sal. 27:10, ÑÑB). Umi mbaʼe oñemombeʼúva 1 Samuel kapítulo 22-pe, ohechauka David tuvakuéra ndohejareíri hague chupe. Koʼág̃a rupi oĩ heta Jehová siérvo ohasa asýva ihénte omboykégui chupekuéra, péro kongregasiónpe katuete ojuhu oipytyvõ ha oñangarekóva hesekuéra.

¹⁰ Jehová ningo oipytyvõta katuete hembiguaikuéra iñeʼẽrendúvape oĩramo oheja reíva chupekuéra. Upéicharõ, ¿ikatúpa jaʼe noipytyvõmoʼãiha chupekuéra ohasáramo ambue situasión ijetuʼúva? Pór ehémplo, rejepyʼapýramo ndereikuaáigui mbaʼéichapa remantenéta ne família, nemanduʼavaʼerã Jehová katuete nepytyvõtaha rejapo hag̃ua upéva (Heb. 13:5, 6). Jehová ontende opa mbaʼe isiervokuéra ohasáva ha oikotevẽva.

11. ¿Mbaʼépa opensa heta tapicha ohechávo jajeroviaha Jehováre? Emoĩ peteĩ ehémplo.

¹¹ Jahechamína mbaʼépa oiko Victoria rehe, peteĩ kuñakarai Liberiaygua ostudiáva la Biblia. Haʼe oñehaʼãmbaite ojapo umi mbaʼe oaprendéva ikatu hag̃uáicha ojevautisa. Upe jave ikompañéro oheja chupe haʼeño mbohapy imemby reheve. Haʼe ningo ndahógai ni ndaitraváhoi, upéicharõ jepe oñehaʼãmbaite ojevautisa. Upe riremínte imembykuña orekóva 13 áño ojuhu peteĩ villetéra henyhẽtéva plátagui. Haʼekuéra ndoipapái mboýpa oĩ pype ani hag̃ua ni oipota pe pláta, upéva rangue oheka hikuái pe villetéra járape, haʼéva peteĩ soldádo. Ko kuimbaʼe heʼi chupekuéra opavave tapicha iñonrrádorire umi testígo de Jehováicha, ko múndope jaiko porãve vaʼerãmoʼã ha oĩvéta pyʼaguapy. Upéi Victoria ohechauka chupe la Bíbliape, Ñandejára omoĩtaha peteĩ múndo pyahu. Pe soldádo ohecharamoiterei mbaʼéichapa ko ermána iñonrráda, upémarõ omeʼẽ chupe heta pláta. Añetehápe, jajerovia rupi Jehová omeʼẽtaha ñandéve ñane remikotevẽ, ñande testígo de Jehová opárupi jajekuaa ñaneonrrádo haguére.

12. ¿Mbaʼépa jahechauka jaservi memérõ Jehovápe japerdéramo jepe ñande traváho? Emoĩ peteĩ ehémplo.

¹² Ñapensamína mbaʼéichapa oñeñandu Tomás, peteĩ maranduhára neʼĩrava ojevautisa oikóva Sierra Leónape. Haʼe ningo oñepyrũvaʼekue omboʼe peteĩ koléhiope, péro ndaikatúi okovra haimete un áño pukukue, oĩmba peve ikuatiakuéra. ¿Mbaʼépa ojapovevaʼerã ikatu hag̃uáicha okovrapa umi suéldo ojedevéva chupe? Ohovaʼerã oñeʼẽ peteĩ saserdóte omoakãvandi pe koléhio. Ko karai heʼi chupe pe koléhio ndoaseptaiha umi mbaʼe Testigokuéra ogueroviáva, ha oiporavomantevaʼerãha upe puésto térã osegi irrelihión. Tomás ohejánte itraváho ha pe ojedevevaʼekue chupe un áño repy. Péro otopa ótro traváho oñemyatyrõhápe rrádio ha teléfono. Koʼãichagua ehémplo ohechauka jajeroviavaʼerãha pe ojapovaʼekuére opaite mbaʼe ha oñangarekóva ipuévlore. Jajapóramo upéva ndajakyhyjemoʼãi jahasa asýrõ g̃uarã, hetaite hénte okyhyjeháicha.

13. ¿Mbaʼéicha rupípa ojepredikave umi tetã hetavehápe imboriahúva?

¹³ Heta tetãme umi hénte imboriahueterei, upéicharõ jepe umi ermáno ikyreʼỹ opredika hag̃ua. ¿Mbaʼérepa? Peteĩ sukursál omombeʼu: “Heta umi ostudiaséva la Biblia ndaitraváhoi ha upévare itiempove ostudia hag̃ua arakuépe. Ermanokuéra avei itiempove opredika hag̃ua. Umi lugár hetavehápe imboriahúva, umi hénte koʼýte ohechakuaa jaikomaha umi ára pahápe, haʼekuéra voi ohaságui heta mbaʼe ijetuʼúva”. Peteĩ tetãme ojekalkula káda puvlikadór ombostudiaha la Biblia mbohapy tapichápe rupi. Peteĩ misionéro oĩmava upépe 12 áñore ohai: “Heta ermáno oikokuaa umi mbaʼe orekomívarente ha péicha rupi itiempove opredika ha ojapo hag̃ua estúdio”.

14. ¿Mbaʼéichapa Jehová oñangareko umi ohasátavare pe jehasa asy guasu?

¹⁴ Ñandejára oprometéma oñangarekotaha ipuévlore ani hag̃ua oñehundi ni oñemomombyry chugui. Haʼe heʼi oipytyvõta ha osalvataha chupekuéra. Ha ñande jaguerovia okumplitaha upéva (Sal. 37:28; 91:1-3). Umi ohasátava “pe jehasa asy guasu” ningo hetaitereíta (Rev. 7:9, 14). Upévare jaʼekuaa ko aty noñehundimoʼãiha koʼã ára pahápe. Oñemeʼẽta chupekuéra opa mbaʼe oikotevẽva ikatu hag̃uáicha ogueropuʼaka umi mbaʼe ijetuʼuetéva ha ani hag̃ua oñemomombyry Ñandejáragui. Ha opakuévo pe jehasa asy guasu, koʼýte Jehová oñangarekóta iñorganisasión rehe.

“ÑANDEJÁRA, EIKUAAUKA CHÉVE NDE RAPE”

15, 16. ¿Mbaʼéichapa ñanepytyvõta jajapóramo Jehová heʼíva? Emoĩ peteĩ ehémplo.

¹⁵ Akóinte ñandepyʼaguasu hag̃ua, jahejavaʼerã Jehová ñanemboʼe, ohechaukaháicha David ñemboʼe: “Ñandejára, eikuaauka chéve nde rape ha tape porã rehe chesãmbyhy, cháke oĩ cherayhuʼỹva” (Sal. 27:11). Jajapo hag̃ua heʼíva ko téystope, tekotevẽ ñañatende opa mbaʼe heʼívare Jehová organisasión ha pyaʼe porã ñaneñeʼẽrendu. Heta ermáno ohecha ideprovechoha koʼã konsého. Pór ehémplo, la Biblia heʼi jaikovaʼerãha ñaikotevẽmívarente, upévare opagapa hikuái ideveha ha ovende umi mbaʼe noikotevẽiva, upéicha rupi ndohasaʼasýi ivaíramo jepe la situasión. Ojapo rupi koʼã mbaʼe haʼekuéra ohechakuaa ikatuha oiporuve itiémpo oservi hag̃ua Jehovápe. Upévare iporã ñañeporandu: “¿Ajapo pyaʼépa umi mbaʼe aleéva la Bíbliape ha umi puvlikasiónpe omeʼẽva pe tembiguái jeroviaha ha iñarandúva, tekotevẽramo jepe amboyke heta mbaʼe?” (Mat. 24:45).

¹⁶ Jahejáramo Jehová ñanesãmbyhy ha ñanemboʼe jaiko hag̃ua hekoitépe, ndajakyhyjemoʼãi mbaʼevégui. Peteĩ prekursór rregulár oikóva Estados Unídospe ha ombaʼapóva peteĩ emprésape, ojerure ombaʼapo hag̃ua ótro puéstope oipytyvõtava chupe ha ifamíliape osegi hag̃ua iprekursorádope. Péro isupervisór heʼi chupe arakaʼeve ndohupytymoʼãiha upe puésto ndorekóiramo peteĩ título universitário. Oikórire nderehe upéva, ¿rembyasýnepa raʼe ndereguerekói haguére upe título rejapógui nde prekursorádo? Dos semána haguépe, pe supervisór oñemosẽ ha isupervisór pyahu oporandu chupe mbaʼépa ohupytyse upe emprésape. Upepete pe ermáno heʼi chupe haʼe ha hembireko haʼeha testigo de Jehová ha oiporuha heta tiémpo Jehová servísiope ha akóinte ojaposeha upéva. Upémarõ pe supervisór heʼi: “¡Haʼe voi kuri nde nediferenteha! Che túva omanombotárõ guare, mokõi Testígo oho hógape káda día ha olee chupe la Biblia. Upévare haʼémi chejupe: ‘Ikatúrõ aipytyvõ peteĩ testígo de Jehovápe, ajapóta upéva’”. Pe ótro día, oñemeʼẽ pe ermánope pe puésto isupervisór nomeʼẽseivaʼekue chupe. Añetehápe, ñamotenondéramo Jehová rembipota, haʼe katuete omeʼẽta ñandéve ñane remikotevẽ (Mat. 6:33).

TEKOTEVẼTEREI JAJEROVIA HA JAREKO ESPERÁNSA

17. ¿Mbaʼépa ñanepytyvõta ani hag̃ua jakyhyje umi mbaʼe oikótavagui tenonderãme?

¹⁷ David ohechauka tekotevẽha jajerovia ha jareko esperánsa, upévare heʼi: ‘Che ajerovia ahechataha Ñandejára poriahuvereko umi oikovéva retãme’ (Sal. 27:13, ÑÑB). Epensamíntena: ¿mbaʼe piko oikovaʼerãmoʼã ñandehegui Ñandejára nomeʼẽirire ñandéve esperánsa ha nañamombaʼéiramo Haʼe ojapóva ñanderehehápe, heʼiháicha Salmo 27? Upéicharõ, jasegíkena jajerure Jehovápe tañanemombarete ha toñangareko ñanderehe ikatu hag̃uáicha ñambohovái porã umi mbaʼe oikótava Armagedón mboyve (elee Salmo 27:14).

[Nóta oĩva taʼanga ndive páhina 23]

David ipyʼaguasu imanduʼávo mbaʼéichapa Jehová osalva chupe heta vése

[Nóta oĩva taʼanga ndive páhina 25]

¿Jaaprovechápa umi tiémpo ijetuʼúva jaservi porãve hag̃ua Jehovápe?