¿Ovalépa jaiko vai?

¿REIKUAÁPA peteĩ mitã heʼíva ijehe imbareteveha umi ótrogui ha pyʼỹinte oiko vaiséva hapichakuéra ndive?... ¿Revyʼápa umichaguándi? ¿Térãpa revyʼave umi mitã ivuénova ha ipyʼaguapýva ndive?... Pe Mboʼehára Guasu heʼi vaʼekue: “Ovyʼa umi ipyʼaguapýva, chupekuéra oñehenóita Ñandejára raʼy” (Mateo 5:9).

Péro sapyʼánte oĩ ojapóva umi mbaʼe ñanembopochýva, ¿ajépa?... Upéicha jave ikatu ñañevengase. Jesús disipulokuérare oiko vaʼekue upéva ohokuévo hendive Jerusalénpe. Jahechamína mbaʼépa oiko upérõ.

Jesús omondo henonderã idisipulokuérape peteĩ puévlo oĩva Samáriape, oheka hag̃ua peteĩ lugár opyta hag̃ua hikuái pe pyhare. Péro umi oikóva pe puévlope ndoipotái opyta hikuái upépe, pórke haʼekuéra oreko ótro rrelihión. Umi samaritáno ndochaʼeiete voi umi ohóvare Jerusalénpe oadora hag̃ua Ñandejárape.

Oikórire nderehe upéva, ¿mbaʼépa rejapo vaʼerãmoʼã? ¿Ndepochýnepa? ¿Reñevengasénepa?... Santiago ha Juan ipochyeterei ha oñevengase kuri. Haʼekuéra heʼi Jesúspe: “¿Reipotápa rojerure yvágagui hoʼa hag̃ua tata ha tohundi koʼãvape?”. Ndareíri ningo Jesús ohenói Santiago ha Juánpe Arasunu Raʼy. Upérõ guare, Jesús heʼi chupekuéra ndovaleiha otrata péicha hapichakuérape (Lucas 9:51-56; Marcos 3:17).

Heta vése oĩ hénte iñañáva ñanendive. Ikatu umi ótro mitã ndoipotái rehuga hendivekuéra. Ha heʼi voi ndéve hikuái: “¡Anive reju koʼápe!”. Péicha jave oiméne reñeñandu vai ha upévare ikatu reñevengase hesekuéra. Péro, ¿ovalépa rejapo upéva?...

¿Ikatúpa rehekami nde Bíbliape peteĩ téxto? Jaleemína Proverbios, kapítulo 24, versíkulo 29. Upépe heʼi: “Ani ere: ‘Ajapóta hese ojapo haguéicha cherehe’”.

¿Mbaʼépa heʼise ko téxto?... Ohechauka ndovaleiha ñañevenga. Oĩramo ñandetrata vaíva ndovaléi ñaneñaña hendive upe haguére. Péro ¿mbaʼépa rejapóta haʼe voi oikóramo ndereka oiko vai hag̃ua? Ikatu nemomarkánte ndeapoʼi hag̃ua, oñembohory nderehe ha heʼi rekyhyjeha chugui. Ñamoĩmi chupe teʼi ndéve ndepyʼajuha, ¿mbaʼépa rejapo vaʼerã? ¿Ovalépa reñorairõ?...

Jahechami jeýna ótro téxto. Ehekami Mateo, kapítulo 5, versíkulo 39. Jesús heʼi upépe: “Ani peñemoĩ iñañávare, upéva rangue, oĩramo nderovapetéva un ládo, emoĩ avei chupe pe ótro ládo”. ¿Mbaʼépa heʼise raʼe Jesús? ¿Heʼisépa oĩramo ñanderovapetéva un ládo, jaheja vaʼerãha ñanenupã avei pe ótro ládo?...

Nahániri, ndahaʼéi upéva la heʼise vaʼekue. Peteĩ ñanderovapetéva ndahaʼéi ñanembyepotivaipáva. Haʼe ojapo upéva oipotágui hína ñandepochy, ojapoháicha peteĩ ñandepécho myañáva. Ha ñandepochýramo ha ñamyaña avei chupe, ¿mbaʼépa ikatu oiko?... Ikatu kangue jaiko vai ha ñañombyepoti.

Péro Jesús ndoipotái jaiko vai avavéndi. Upévare heʼi vaʼekue oĩ jave ñanderovapetéva, ndovaleiha ñande avei jajapo hese upéva. Ndovaléi ñandepochy ni jaiko vai. Péicha jahechaukáta ndajajoguaiha pe tapicha oiko vaisévape.

Upéicharõ, ¿mbaʼépa iporãve rejapo oĩ jave oiko vaiséva nendive?... Iporãvéta rehónteramo upégui. Ikatu nde rapicha nemyaña jey, péro upépente opáta nerepenáiramo hese. Rehóramo upégui ndeʼiséi ndepyʼajuha síno ndepyʼaguasuha, pórke tekotevẽ ndepyʼaguasu rejapo hag̃ua iporãva.

Péro ¿mbaʼépa oikóta reiko vaíramo ha nde regana? ¿Mbaʼépa ikatu oiko upéi?... Haʼe ikatu oho ohenói iñamigokuérape ha oupaite hikuái. Ikatu voi oĩ nenupãva garrótepe térã ndekutúva. ¿Rehechápa mbaʼérepa Jesús ndoipotái jaiko vai?...

¿Mbaʼépa jajapo vaʼerã jahechárõ ótro oñombyepotiha? ¿Iporãtapa ñañentremete ha ñasẽ peteĩva ládo?... La Biblia heʼi mbaʼépa ikuentave jajapo. Jaleemína Proverbios, kapítulo 26, versíkulo 17 (NM). Upépe heʼi: ‘Pe oñentremetéva oĩháme oñorairõva, haʼete ojagarráva peteĩ jaguápe inambígui’.

¿Mbaʼépa oikóta rejagarráramo peteĩ jaguápe inambígui? Hasýta chupe ha ndesuʼuséta, ¿ajépa? Ha repoi hag̃ua chugui oñepyrũta ojetyvyro ndehegui, ha upépe hatãve rejoko vaʼerã ha haʼe ipochyvétantema. Upéi, repoíramo chugui ikatu ndesuʼu vaipaite. Péro, ¿rejoko arénepa pe jaguápe inambígui?...

Upéicharõ, jahecháramo oiko vaíva ha jaha ñañentremete, katuete ñasẽ vaíta. Ikatu ndajaikuaái mbaʼérepa oñombyepoti hikuái ni mávapa omoñepyrũ. Ikatu avei pe tapicha oligáva omonda kuri, ha ñaipytyvõramo chupe ñadefendéta hína peteĩ mondahápe. Ha upéva ivaíta, ¿ajépa?

Péro ¿mbaʼépa upéicharõ rejapo vaʼerã rehecháramo oñombyepotíva?... Oimérõ eskuélape hína, ikatu pyaʼe reho ere nde profesórpe. Ha ndahaʼéiramo eskuélape, ikatu rehenói nde tuvakuérape térã polisíape. Oĩramo jepe oñorairõséva, ñande ñañehaʼã vaʼerã jaiko porã opavavéndi.

Ñande jajapose Jesús omboʼe vaʼekue, upévare ndajaikói ñañorairõ ñande rapichakuérandi. Ha péicha jahechauka ñandepyʼaguasuha jajapo hag̃ua iporãva. La Biblia heʼi voi ñande ‘natekotevẽiha ñañorairõ avavéndi, síno ñanembaʼeporã vaʼerãha enterovéndi’ (2 Timoteo 2:24).