Jesús ohechauka mbaʼéichapa ñanderekomirĩvaʼerã

1, 2. ¿Mbaʼépa Jesús omboʼe ijapostolkuérape pe pyhare omano mboyve?

PE PYHARE Jesús omano mboyve, ijaty ijapostolkuéra ndive peteĩ ógape segundo pisohápe, táva Jerusalénpe. Osena aja hikuái, Jesús opuʼã, oipeʼa ijao joʼaha ha omoĩ ikuʼáre peteĩ toálla. Upéi omoĩ y palangánape, ombojepyhéi peteĩteĩ ijapóstolpe ha omokã chupekuéra ipy. Ojapopa rire upéva, omonde jey ijao joʼaha. ¿Mbaʼérepa Jesús ojapo upe tembiguái rembiapo? (Juan 13:3-5.)

² Haʼe voi omombeʼu: “¿Peikuaápa mbaʼépa heʼise pe ajapovaʼekue penderehe? [...] Che ningo pene Mboʼehára ha pende Ruvicha, ha upéicharamo jepe pombojepyhéi, upéicharõ peẽ avei pejoheivaʼerã ojupe pende py. Che ahechauka peẽme mbaʼéichapa pejapovaʼerã, ha che ajapo haguéicha, peẽ avei pejapovaʼerã” (Juan 13:12-15, NM). Ojapóvo upéicha, Jesús omboʼe ijapostolkuérape peteĩ mbaʼe arakaʼeve ndahesaraimoʼãiva ha oipytyvõtava chupekuéra hekomirĩ hag̃ua oikove aja pukukue.

 3. a) ¿Mbaʼéichapa Jesús omboʼe tekotevẽha ñanderekomirĩ? b) ¿Mbaʼépa ñahesaʼỹijóta ko artíkulope?

³ Haʼe ningo omboʼe jepi voi chupekuéra hekomirĩvaʼerãha. Upe mboyve, ohechakuaárõ guare oĩha ijapytypekuéra oñemoimportantesevéva, omoĩ peteĩ mitãʼípe ijykére ha heʼi: “Oimeraẽ orresivíva ko mitãme che rérape, cherresivi avei chéve. Ha oimeraẽ cherresivíva, orresivi avei pe chembouvaʼekuépe. Pe oñemomichĩvéva pende apytépe, upéva hína pe tuichavéva” (Luc. 9:46-48, NM). Tiémpo rire, oikuaágui umi fariséo oñembotuichaseha, Jesús heʼi: “Enterove oñembotuichávape, ojeapoʼíta; ha pe oñemomirĩvape katu oñembotuicháta” (Luc. 14:11, NM). Jesús oipota opavave omoirũva chupe hekomirĩ, ndoipotái oñemombaʼeguasu ni ojechaukase. Jahechamína mbaʼéichapa haʼe ohechaukavaʼekue iñumildeha ha avei ñaaprendéta mbaʼéichapa ñanderekomirĩramo ñanepytyvõ ñandéve ha ambue tapichápe.

 4. ¿Mbaʼéichapa Ñandejára Raʼy ohechaukáma vaʼekue hekomirĩha ou mboyve ko yvy ape ári?

⁴ Ñandejára Raʼy peteĩete ohechaukáma vaʼekue hekomirĩha oikórõ guare Itúva ndive yvágape hetaiterei tiémpo ou mboyve ko yvy ape ári. Lívro de Isaías omombeʼu mbaʼéichapa oikovaʼekue hikuái: “Ñande Ruete, yvága Jára, omeʼẽ chéve peteĩ juru amokyreʼỹkuaa hag̃uáicha ikaneʼõvape; Haʼe chemombáy meme pyhareve ha oñeʼẽ che apysápe ahendukuaa hag̃uáicha [peteĩ] hemimboʼe teéramo. Ñande Ruete, che Jára [oavri che apysa] ha che añemomirĩ ha namboykéi Iñeʼẽ” (Is. 50:4, 5, ÑÑB). Jesús ningo hekomirĩ ha oaprendeseterei Ñandejára omboʼéva chupe. Ha katuete ohechakuaáne raʼe Jehová voi iñumildeha oiporiahuverekóvo yvyporakuéra imperféktope.

 5. ¿Mbaʼéichapa arkánhel Miguel omoĩ peteĩ ehémplo iporãva?

⁵ Péro naentéroi Ñandejára raʼykuéra hekomirĩ. Oĩvaʼekue peteĩ ánhel ndorrespetáiva Jehovápe. Haʼe oñemombaʼeguasu ha ojechaukase. Upéi ou oñemoĩ hese ha oiko chugui Satanás ha Diablo. Jesús katu ndaupeichaiete, nopensái omereseha oñemeʼẽve chupe autorida ni ndoiporuvaíri pe puésto ojapo hag̃ua haʼe oipotávante. Pór ehémplo, “arkánhel Miguel [térã Jesús] oiko vaírõ guare Aña ndive Moisés retekuére”, ohechauka hekomirĩha ha ohejánte Ñandejára ohusga Satanáspe. Jesús orrekonose Jehová haʼeha pe Hués tuichavéva, upévare oheja ikárgope upe provléma ikatu hag̃uáicha haʼete osolusiona itiémpope ha iporãveháicha (elee Judas 9).

 6. ¿Mbaʼéichapa Jesús ohechauka hekomirĩha oúvo ko yvy ape ári?

⁶ Jesús oĩrõ guare yvágape katuete oaprendéne raʼe heta mbaʼe, ha avei oiméne oikuaáma umi profesía heʼíva pe Mesías ohasa asy ha ojejukataha ou vove ko yvy ape ári. Upéicharõ jepe, hekomirĩ ha oasepta upe tembiapo. Apóstol Pablo heʼi voi hese: “Haʼéramo jepe Ñandejáraicha, noñembojojái hese ha nopensái oipeʼávo chugui ilugár. Nahániri, upéva rangue oheja opa mbaʼe orekovaʼekue ha oiko tembiguáiramo. Oiko chugui peteĩ yvypóra” (Filip. 2:6, 7, NM).

7, 8. ¿Mbaʼéichapa Jesús ohechauka iñumílde hague imitãme ha oporomboʼérõ guare?

⁷ Pablo heʼivaʼekue Jesús rehe: “Oikórõ guare chugui yvypóra, haʼe oñemomirĩ ha iñeʼẽrendu omano meve, ha omano pe yvyra pohýire” (Filip. 2:8, NM). Imitã guivéma haʼe ohechauka iñumildeha. Omongakuaáramo jepe chupe mokõi yvypóra imperfékto, José ha María, haʼe “osegi iñeʼẽrendu chupekuéra” (Luc. 2:51, NM). Umi imitãva osegíramo iñehémplo ha iñeʼẽrendu ituvakuérape, Ñandejára ovendesíta chupekuéra.

⁸ Okakuaapa rire, Jesús ohechauka hekomirĩha omotenondévo Jehová rembipota ojapo rangue haʼe oipotávante (Juan 4:34). Oporomboʼérõ guare, oiporu Ñandejára réra ha oipytyvõ umi hénte ipyʼaporãvape oikuaave hag̃ua Jehovápe. Avei omombeʼu chupekuéra mbaʼépa Ñandejára ojapóta yvyporakuéra rehehápe. Jesús ndahaʼéi heʼínteva umi héntepe mbaʼépa ojapovaʼerã, síno haʼe voi ojapo umi mbaʼe omboʼéva. Pór ehémplo, ohechaukavaʼekue mbaʼéichapa oñeñemboʼevaʼerã: “Ore Ru reiméva yvágape, toñemomarangatu nde réra” (Mat. 6:9, NM). Péicha ohechauka iñimportanteveha oñembotuicha Jehová réra, ha haʼe voi ojapo upéva. Upéicha rupi, omohuʼãmbotaitévo hembiapo ko yvy ape ári, heʼi Itúva yvagayguápe: “Che aikuaauka chupekuéra [umi apóstolpe] nde réra ha aikuaaukáta gueteri” (Juan 17:26, NM). Hiʼarive heʼi Jehová rupínte ojapo porãha hembiapo ko yvy ape ári (Juan 5:19).

 9. ¿Mbaʼépa oprofetisavaʼekue Zacarías, ha mbaʼéichapa Jesús okumpli upéva?

⁹ Zacarías oprofetisavaʼekue Mesías rehe: “Evyʼaitékena Sión rajy, epurahéi vyʼapópe Jerusalén rajy, péina ápe ne retã ruvicha oúta nerendápe, nde Salvadór, hustísia reheve. Haʼe oñemomirĩta ha oúta peteĩ vúrro raʼy rusu ári” (Zac. 9:9, ÑÑB). Ko téysto oñekumpli áño 33-pe, Jesús oikérõ guare Jerusalénpe pe Páskua mboyve. Umi hénte omoĩmba ijao ha palméra rogue pe tapére orresivi hag̃ua chupe, opavavénte ovyʼajoa haʼe oikévo ohóvo. Péro Jesús ni michĩmi noñembotuichái, umi hénte oipotáramo jepe oiko chugui Rréi (Mat. 21:4-11).

10. ¿Mbaʼépa Jesús ohechauka iñeʼẽrendúvo omano meve?

¹⁰ Oĩ aja ko yvy ape ári, Jesús hekomirĩ ha iñeʼẽrendu omano meve peteĩ yvyráre. Upéicha ohechauka porã yvyporakuéra ikatuha iñeʼẽrendu Jehovápe ohasa asyetereíramo jepe. Avei ohechauka Satanás ijapuha heʼírõ guare yvyporakuéra oserviha Ñandejárape okonveni rupínte chupekuéra (Job 1:9-11; 2:4). Jesús iñeʼẽrendúvo ipahaite peve ohechauka Jehová orekoha derécho ogoverna hag̃ua opa mbaʼe ári, ha haʼe añoite ikatuha ojapo porã upéva. Oiméne Jehová ovyʼaite ohechávo Itaʼýra hekomirĩha ha ojapoha hembipota oiko aja ko yvy ape ári (elee Proverbios 27:11).

11. ¿Mbaʼe esperánsapa oreko yvyporakuéra iñeʼẽrendúva Jesucristo sakrifísio rupive?

¹¹ Jesús sakrifísio rupive yvyporakuéra ikatu ojei pekádo ha ñemano poguýgui (Mat. 20:28). Upéicha yvypóra imperfékto ikatúta ohupyty jeikove opaʼỹva ha oñekumpli Jehová hustísia ojerureháicha. Apóstol Pablo ohaivaʼekue: “Peteĩ tembiapo porã rupive opaichagua yvypórare ojeʼe hekojojaha oikove hag̃ua” (Rom. 5:18, NM). Jesucristo sakrifísio rupive umi kristiáno unhído ikatu oho yvágape, ha nomanomoʼãvéima arakaʼeve. Ha “ambue ovechakuéra” ikatu oikove opa ára g̃uarã ko yvy ape ári (Juan 10:16, NM; Rom. 8:16, 17).

12. ¿Mbaʼéichapa Jesús ohechauka hekomirĩ ha ipyʼaporãha otratávo yvyporakuéra imperféktope?

¹² Jesús heʼivaʼekue: “Peju che rendápe enterove peẽ pembaʼapo jejopy ha pendekárga pohýiva, ha che pombopiroʼýta. Pehupi pende atiʼy ári che júgo ha pejesareko cherehe, che pomboʼe hag̃ua. Che ningo chepyʼaporã ha añemomirĩ che pyʼaite guive, upévare katuete pombopiroʼýta” (Mat. 11:28, 29, NM). Haʼe hekomirĩ ha ipyʼaporã, upévare otrata porã yvyporakuéra imperféktope ha nomboykéi avavépe. Ndojeruréi hemimboʼekuérape peteĩ mbaʼe ikatuʼỹva ojapo, ndaipyʼahatãi ni ndojopýi hendivekuéra. Haʼe ndoapoʼíri chupekuéra, upéva rangue oguerohory ha omokyreʼỹ enterovépe, ha heʼi oñemoag̃uíramo hese ha ojapo umi mbaʼe oaprendéva chugui, oñeñandu porãtaha hikuái. Heʼi haguéicha, ijúgo ndoforsamoʼãi chupekuéra ha ikárga katu ivevýi. Opavavénte oñeñandu porã Jesús ndive, tahaʼe imitãva, ijedáva, kuña térã kuimbaʼe (Mat. 11:30).

13. ¿Mbaʼéichapa Jesús ohechauka oiporiahuverekoha umi ohasa asývape?

¹³ Jesús oiporiahuvereko umi despresiadomíme oĩva Israélpe ha mborayhúpe oñangareko hesekuéra. Jericó ypýpe ojotopa mokõi siégo ndive, peteĩva héra Bartimeo, ha ojerure hikuái Jesúspe oipytyvõ hag̃ua chupekuéra. Péro umi henteita ojaʼo ha omokirirĩ koʼã kuimbaʼépe. Jesús ikatúnte kuri oñembotavy koʼã siégogui, péro ombyasy chupekuéra ha ojerure tojegueru henondépe omonguera hag̃ua mokõivévape. Jahechaháicha, Jesús hekomirĩ ha oiporiahuvereko umi ohasa asývape, Itúva ojapoháicha (Mat. 20:29-34; Mar. 10:46-52).

14. ¿Mbaʼépa ojehupyty Jesús iñumílde rupi oiko aja ko yvy ape ári?

¹⁴ Jesús akóinte hekomirĩ, ha upéva ogueru heta mbaʼe porã ha oporombovyʼa. Pór ehémplo, Jehová ovyʼaiterei ohechávo Itaʼýra oñemeʼẽmbaiteha ojapo hag̃ua hembipota. Jesús apóstol ha ambue hemimboʼekuéra katu oñeñandu porãiterei hendive ohechakuaágui iñumílde ha imbaʼeporãha. Haʼe omombarete idisipulokuéra jerovia iñehémplo rupive, ha avei omboʼe ha oguerohorývo chupekuéra. Hekomirĩ rupi oipytyvõ, ohekomboʼe ha omokyreʼỹ opaichagua héntepe. Enterovete yvypóra iñeʼẽrendúva ohupytýta heta mbaʼe porã ijojahaʼỹva Jesús sakrifísio rupive.

15. ¿Mbaʼépa ohupyty Jesús hekomirĩ haguére?

¹⁵ ¿Mbaʼépa ohupyty Jesús hekomirĩ haguére? Haʼe heʼi hemimboʼekuérape: “Pe oñemomirĩvape katu oñembotuicháta” (Mat. 23:12, NM). Ko téysto oñekumpli hesete voi, upévare Pablo ohai: “Ñandejára ombotuicha Jesúspe, omeʼẽ chupe peteĩ puésto ijyvatevéva, ha pyʼaporãme omeʼẽ chupe pe téra iporãvéva entéro umi ótro téragui. Péicha, Jesús rérape oñesũta enterovéva umi oĩva yvágape, umi oĩva yvy ape ári ha umi oĩva yvyguýpe, ha enterovéva ohechakuaáta Jesucristo haʼeha ñande Ruvicha, ha péicha oñembotuicháta ñande Ru Ñandejárape”. Iñeʼẽrendu ha iñumílde rupi oikórõ guare yvypóraicha, Jehová omeʼẽ chupe autorida opa mbaʼe ári, tahaʼe oĩva yvágape térã yvy ape ári (Filip. 2:9-11, NM).

16. ¿Mbaʼéichapa jaikuaa Ñandejára Raʼy akóinte iñumildetaha?

¹⁶ Ñandejára Raʼy akóinte hekomirĩta. Peteĩ salmísta oprofetisavaʼekue mbaʼépa ojapóta iñenemigokuérare oiko rire chugui Rréi yvágape: ‘Rejajaipa ne renda ári reñorairõvo añetegua, tekomirĩ ha tekojoja rehehápe’ (Sal. 45:4). Armagedónpe, Jesucristo oñorairõta odefende hag̃ua umi hekomirĩva, hekojojáva ha ohayhúvape pe añetegua. ¿Mbaʼépa oikóta omohuʼãvo igoviérno ipukútava mil áño, “ohundipaite rire entéro goviérno, autorida ha podér”? Jesús ohechauka jeýta iñumildeha omeʼẽvo “pe Rréino Itúva Ñandejárape” (elee 1 Corintios 15:24-28).

17, 18. a) ¿Mbaʼérepa tekotevẽterei ñaneumílde Jesús iñumílde haguéicha? b) ¿Mbaʼépa oñembohováita pe artíkulo oúvape?

¹⁷ ¿Ha ñande? ¿Jasegítapa Jesús ehémplo ha ñanderekomirĩ? ¿Mbaʼéichapa ñaiméta pe Rréi Jesucristo ou vove oporohusga hag̃ua Ñandejára rérape Armagedónpe? Haʼe ningo oñorairõta osalva hag̃ua umi hekojoja ha hekomirĩvape añoite. Upévare tekotevẽterei jahechauka ñaneumildeha ikatu hag̃uáicha jajesalva. Jahecha haguéicha, Jesús ohupyty heta mbaʼe porã hekomirĩ haguére ha avei upéicha oipytyvõ hetápe. Jahechaukáramo ñaneumildeha, ñasẽ porãta ñande voi ha avei ñaipytyvõta hetápe.

¹⁸ ¿Mbaʼépa ñanepytyvõta jasegi hag̃ua Jesús ehémplo ha ñanderekomirĩ? ¿Mbaʼéichapa jahechaukáta ñaneumildeha jahasáramo jepe heta mbaʼe ijetuʼúva? Koʼã porandu oñembohováita pe artíkulo oúvape.