Jastudia la Biblia ideprovechoiterei, péro algúna vése ikatu ijetuʼu ñandéve jajapo upéva. Ikatu oime sapyʼánte repensámava voi ndaikatumoʼãiha resegi restudia. Péro, ¿mbaʼérepa ikatu jaʼe ovaleha la péna resegi reñehaʼã? ¿Ha mbaʼépa nepytyvõta ani hag̃ua reheja nde estúdio sapyʼánte ijetuʼúramo jepe?

1. ¿Mbaʼérepa ideprovécho jastudia la Biblia?

“Ñandejára ñeʼẽ oikove ha oreko podér” (Hebreos 4:12). La Biblia ningo ideprovechoiterei pórke ohechauka mbaʼéichapa opensa Ñandejára, ha mbaʼeichaite pevépa nderayhu. Avei nepytyvõta ikatu hag̃uáicha nearandu añete ha ereko esperánsa, ndahaʼéi reikuaa hag̃uánte heta mbaʼe. Ha iñimportanteveha, nepytyvõta oiko hag̃ua ndehegui Jehová amígo. Restudiávo la Biblia, repermitíta hína pe podér orekóva okambia nde rekove.

2. ¿Mbaʼérepa iñimportánte ñarrekonose ideprovechoha jastudia la Biblia?

Umi enseñánsa verdadéra oĩva la Bíbliape ojogua peteĩ tesóro iporãitereívape. Upévare la Biblia ñanemokyreʼỹ enterovépe heʼívo: “Ejogua pe añetegua ha ani núnka evende upéva” (Proverbios 23:23). Ñarrekonoséramo mbaʼeichaitépa iñimportánte pe añetegua oĩva la Bíbliape, jasegíta ñañehaʼã jastudia hag̃ua sapyʼánte ijetuʼúramo jepe (elee Proverbios 2:4, 5).

3. ¿Mbaʼéichapa Jehová nepytyvõta resegi hag̃ua restudia?

Jehová ningo haʼe pe Kreadór Todopoderóso ha ne Amigoite, upévare haʼe nepytyvõse reaprendeve hag̃ua chugui. La Biblia heʼi voi haʼe ikatuha omeʼẽ ndéve ‘pe deséo ha pe podér ejapo hag̃ua entéro mbaʼe chupe ogustáva’ (elee Filipenses 2:13). Upévare, sapyʼánte ijetuʼu léntoramo ndéve restudia térã rejapo hag̃ua umi mbaʼe reaprendéva, haʼe ikatu nepytyvõ. Avei ikatu omeʼẽ ndéve pe fuérsa reikotevẽva rembohovái hag̃ua oĩ jave oñemoĩva nderehe, térã ndejokoséva anivéma hag̃ua restudia. Upévare, eñemboʼe memékena Jehovápe ha ejerure chupe tanepytyvõ resegi hag̃ua restudia la Biblia (1 Tesalonicenses 5:17).

EJEPYʼAMONGETAMÍNA

4. Emotenonde memékena nde estúdio de la Biblia

Sapyʼánte ningo ñanerembiapoiterei ha haʼete voi ni nañanetiempovéimava jastudia hag̃ua la Biblia. ¿Mbaʼépa ikatu jajapo péicha jave? Elee Filipenses 1:10, ha upéi erresponde koʼã porandu:

• Ehechakuaa rire “umi mbaʼe iñimportantevéva”, ¿mbaʼépa rejapo vaʼerã?

• ¿Mbaʼépa rejapo vaʼerã remotenonde hag̃ua nde estúdio de la Biblia?

1. Rekargáramo yvykuʼi peteĩ mbaʼyrúpe ha upéi ekarga umi ita, nahembymoʼãvéima lugár umi itápe g̃uarã

2. Remoĩramo primero umi ita pe mbaʼyrúpe hembyvéta avei lugár oikepa lénto hag̃ua pe yvykuʼi. Upéicha avei, remotenondéramo “umi mbaʼe iñimportantevéva”, hembýta avei ndéve tiémpo rejapo hag̃ua ótra kósa upe rire

Amáske jastudia la Biblia jahechakuaáta ñaikotevẽha Ñandejárare, ha tekotevẽha jaikuaa ha ñamombaʼeguasu chupe. Elee Mateo 5:3, ha upéi erresponde ko porandu:

• ¿Mbaʼe iporãvapa rehupytýta remotenondéramo nde estúdio de la Biblia?

5. Esegíkena estudia oĩramo jepe oñemoĩva nderehe

VIDÉO: Umi noñentregáiva ohupyty heta mbaʼe porã (5:22)

• Ohechaukaháicha pe vidéo, ¿mbaʼéichapa orreaksiona kuri Francesco amigokuéra ha isy haʼe omombeʼúrõ guare chupekuéra ostudiaha la Biblia?

• ¿Mbaʼe mbaʼépa ohupyty Francesco noñentregái rupi?

Elee 2 Timoteo 2:24, 25, ha upéi erresponde koʼã porandu:

• ¿Mbaʼépa opensa ne hénte ha ne amigokuéra restudia haguére la Biblia?

• Ohechaukaháicha ko téxto, ¿mbaʼéichapa rerreaksiona vaʼerã oĩ jave oñembohorýva nderehe restudia haguére la Biblia? ¿Mbaʼérepa repensa upéicha?

6. Ejeroviákena Jehová nepytyvõtaha

VIDÉO: Jehová ñanepytyvõ ñakambia hag̃ua (3:56)

• Según pe vidéo, ¿mbaʼe mbaʼépepa okambia Jim Jehová oguerohory hag̃ua chupe?

• ¿Mbaʼépa nde rehecharamove iñexperiénsiagui?

Elee Hebreos 11:6, ha upéi erresponde koʼã porandu:

• ¿Mbaʼépa Jehová opromete umi oñehaʼãvape ojerovia hese ipyʼaite guive?

• Ohechaukaháicha ko téxto, ¿mbaʼéichapa oñeñandu Jehová ohecha jave reñehaʼãmbaiteha restudia hag̃ua la Biblia?

RRESÚMEN

Sapyʼánte ningo ijetuʼu jastudia hag̃ua la Biblia, péro upéva nepytyvõta ikatu hag̃uáicha reiko vyʼápe pára siémpre. Esegínte ejerovia Jehováre ha haʼe katuete nepytyvõta.

Rrepáso

• ¿Mbaʼérepa nde revalora umi mbaʼe reaprendéva la Bíbliagui?

• ¿Mbaʼéichapa ikatu rejasegura remotenondeha “umi mbaʼe iñimportantevéva”?

• ¿Mbaʼérepa iporãta rejerure Jehovápe tanepytyvõ resegi hag̃ua restudia la Biblia?

EINVESTIGA HAG̃UA

Ehecha 4 konsého oipytyvõmava heta héntepe oipuru porã hag̃ua itiémpo.

“Mbaʼéichapa ikatu reipuru porã ne tiémpo” (¡Despertad! Febrero de 2014)

Ehecha mbaʼéichapa Jehová oipytyvõ peteĩ kuñakaraípe iména oñemoĩramo jepe hese ostudia haguére la Biblia.

Jehová ñanepytyvõ jaraha hag̃ua ñande kárga pohýi (5:05)

Ehecha mbaʼéichapa peteĩ karai ou okambia opensa lája hembireko oipytyvõ meme rupi chupe.

Peteĩ avogádo oheka la verda (6:30)

Umi testígo de Jehová rehe ojeʼe jepi oseparaha umi famíliape, ¿siértopa upéva?

“¿Umi testígo de Jehová piko osepara umi família?” (Artíkulo oĩva jw-pe)

Enterove jadesidi vaʼerã heta mbaʼe. Umíva apytépe oĩ umi desisión ñanemoag̃uítava Jehováre, térã ñanemomombyrýtava chugui. Por ehémplo jadesidi vaʼerã moõpa jaikóta, mbaʼépepa ñambaʼapóta ha ñamendátapa térãpa nahániri. Jadesidi porãrõ, jaikóta vyʼápe ha Jehová ñandeguerohorýta.

1. ¿Mbaʼéichapa ikatu nepytyvõ la Biblia edesidi porã hag̃ua?

Edesidi mboyve peteĩ mbaʼe, ejerure Jehovápe tanepytyvõ ha ehecha mbaʼépa heʼi la Biblia upe témare (elee Proverbios 2:3-6). Sapyʼánte Jehová omeʼẽ voi peteĩ léi oñeʼẽva peteĩ mbaʼére. Upéicha jave iporãvéta rejapónterõ la heʼíva upe léi.

Péro, ¿mbaʼépa ikatu rejapo ndaipóriramo la Bíbliape peteĩ léi oñeʼẽva upe redesidítavare? Jehová lomímonte ikatu ndegia “reho hag̃ua tape porãre” (Isaías 48:17). ¿Mbaʼéichapa ojapo upéva? Iñeʼẽ rupive haʼe omeʼẽ heta enseñánsa ikatúva ndegia. Koʼã enseñánsa ohechauka mbaʼépa Ñandejára opensa ha mbaʼéichapa oñeñandu. Por ehémplo, jaleévo peteĩ rreláto bíblico ikatu hína jahechakuaa mbaʼéichapa Ñandejára oñeñandu upe oiko vaʼekuére. Ha jahechakuaávo upéva, ikatúta jadesidi umi mbaʼe ombovyʼátava chupe.

2. ¿Mbaʼe mbaʼépa ereko vaʼerã enkuénta edesidi mboyve peteĩ mbaʼe?

La Biblia heʼi: ‘Pe iñarandúva opensa porã ojapo mboyve álgo’ (Proverbios 14:15). Upéva heʼise jadesidi mboyve peteĩ mbaʼe tekotevẽha japytaʼimi ha ñapensa porã hese. Ehecha rire mbaʼe mbaʼépa rejapokuaa, ikatu reñeporandu: “¿Mbaʼe enseñánsa bíblicapa ikatu chegia ko kásope? ¿Ikatútapa apyta trankílo adesidi rire ko mbaʼe? ¿Ikatúpa oipytyvõ térã operhudika ótrope upe adesidíva? Ha iñimportanteveha, ¿ombovyʼátapa Jehovápe?” (Deuteronomio 32:29).

Jehová oreko pe derécho heʼívo ñandéve mbaʼépa iporã ha mbaʼépa ivai. Ñañehaʼãramo jaikuaa porã umi léi ha enseñánsa ñandegiáva oĩva Iñeʼẽme ha jajedesidi jasegitaha umíva, ikatúta ñahekomboʼe porã ñane konsiénsia. Ñane konsiénsia haʼe hína pe ohechaukáva ñandéve oĩ vaípa térãpa oĩ porã umi mbaʼe jajapóva (Romanos 2:14, 15). Ñahekomboʼe porãramo ñane konsiénsia, upéva ñanepytyvõta jadesidi porã hag̃ua.

EJEPYʼAMONGETAMÍNA

3. Ehejákena la Biblia tandegia

VIDÉO: Jahejákena la Biblia tañandegia (5:54)

• ¿Mbaʼe rregálo iporãitereívapa omeʼẽ ñandéve Jehová?

• ¿Mbaʼérepa Jehová omeʼẽ ñandéve pe liverta jadesidi hag̃ua?

• Según pe vidéo, ¿mbaʼe mbaʼépa Jehová omeʼẽ ñandéve ñanepytyvõva jadesidi porã hag̃ua?

¿Mbaʼe enseñánsa oĩva la Bíbliapepa ikatu ñandegia? Emañamína por ehémplo ko konséhore: elee Efesios 5:15, 16. Upéi ekalkula mbaʼéichapa ikatu eipuru porã ne tiémpo koʼã kásope:

• elee hag̃ua la Biblia káda día.

• rejapo porãve hag̃ua la oñehaʼarõva ndehegui ogapýpe.

• reho meme hag̃ua rreunionhápe.

4. Ehekomboʼe ne konsiénsia edesidi porã hag̃ua

VIDÉO: “Peñehaʼãkena akóinte penekonsiénsia potĩ” (5:13)

• Según pe vidéo, ¿mbaʼe mbaʼépa ojapo pe ermána ohekomboʼe hag̃ua ikonsiénsia ha odesidi hag̃ua umi mbaʼe ogustáva Jehovápe?

¿Mbaʼérepa naiporãmoʼãi jajeruréramo ótrope odesidi hag̃ua ñande vése? Elee Hebreos 5:14, ha upéi erresponde koʼã porandu:

• Heta vése ifasilve jajerure ótrope odesidi hag̃ua ñande vése. Péro, ¿mbaʼépa ñaaprende vaʼerã ñadiferensiakuaa ñandejeheguínte?

• ¿Mbaʼe mbaʼépa ikatu nepytyvõ ehekomboʼe porã hag̃ua ne konsiénsia ha edesidi porã hag̃ua?

5. Jarrespetákena ñande rapichakuéra konsiénsia

Enterovéva ningo ikatu jadesidi diferénte ojuehegui. ¿Mbaʼéichapa ikatu jahechauka jarrespetaha ñande rapichakuéra konsiénsia? Jahechamína mokõi ehémplo:

Ehémplo 1: peteĩ ermána oñemakilláva ha ogustaitereíva chupe umi makilláhe, ova peteĩ kongregasión oĩháme heta ermána ndogustaguasúiva chupekuéra upéva.

Elee Romanos 15:1 ha 1 Corintios 10:23, 24, ha upéi erresponde koʼã porandu:

• Orekóvo enkuénta koʼã téxto, ¿mbaʼépa ikatu odesidi pe ermána?

• Ñamoĩ chupe reimeha peteĩ ne amígo térã ne amígandi, ha ikonsiénsia nopermitíri chupe ojapo peteĩ mbaʼe nde repensáva oĩ porãha. ¿Mbaʼépa rejapóne upe situasiónpe?

Ehémplo 2: peteĩ ermáno oikuaa la Biblia ndeʼiriha ndovaleiha jaʼu vevída, péro haʼe odesidi ndoʼumoʼãiha ni michĩmi. Upéi ótro ermáno oinvita chupe oho hag̃ua okaru hógape ha ohecha upépe oĩha hoʼúva vevída.

Elee Eclesiastés 7:16 ha Romanos 14:1, 10, ha upéi erresponde koʼã porandu:

• Orekóvo enkuénta koʼã téxto, ¿mbaʼépa ikatu odesidi pe ermáno oñeinvita vaʼekue?

• Ñamoĩ chupe peteĩ ne amígo térã ne amíga ojapoha peteĩ mbaʼe ne konsiénsia nopermitíriva ndéve rejapo, ¿mbaʼéichapa rerreaksionáta?

¿Mbaʼe mbaʼépa rejapo vaʼerã redesidi porã hag̃ua?

1. Ejerure Jehovápe tanepytyvõ edesidi hag̃ua mbaʼépa rejapóta (Santiago 1:5).

2. Einvestiga mbaʼépa heʼi la Biblia ha umi puvlikasión etopa hag̃ua umi enseñánsa ikatúva ndegia upe kásope. Avei, ikatu ejerure konsého umi ermáno ha ermána iñexperiénsiavape.

3. Epensa mbaʼépa oikóta edesidi rire. ¿Oafektátapa upéva ne konsiénsia, térã ótro konsiénsia?

RRESÚMEN

Ikatu hag̃uáicha jadesidi porã jareko vaʼerã enkuénta mbaʼéichapa oñeñandu Jehová, ha avei mbaʼéichapa upe jadesidíva ikatu oipytyvõ térã operhudika ótrope.

Rrepáso

• ¿Mbaʼépa ejapo vaʼerã edesidi hag̃ua umi mbaʼe ombovyʼáva Jehovápe?

• ¿Mbaʼéichapa ikatu ehekomboʼe ne konsiénsia?

• ¿Mbaʼéichapa ikatu rehechauka rerrespetaha nde rapichakuéra konsiénsia?

EINVESTIGA HAG̃UA

¿Mbaʼéichapa ikatu edesidi umi mbaʼe nepytyvõtava eñemoag̃uive hag̃ua Ñandejárare?

“Ñamombaʼeguasúkena Jehovápe umi mbaʼe jadesidívare” (Ñemañaha 15 de abril de 2011)

Entende porãve mbaʼéichapa Jehová ñaneakonseha.

Jehová ogia ipuévlope (9:50)

Ehecha mbaʼépa oipytyvõ peteĩ karaípe odesidi porã hag̃ua ijetuʼúramo jepe chupe upéva.

Jasegírõ Jehová gía ñasẽ porãta katuete (5:46)

Ehecha mbaʼéichapa ikatu edesidi umi mbaʼe ogustáva Jehovápe ndaipóriramo jepe peteĩ léi oñeʼẽva upe edesidítavare.

“¿Mbaʼéichapa ikatu ndegia la Biblia?” (La Atalaya 1 de diciembre de 2003)