¿Jaasegurápa ñande futúro ñanevuénonteramo?

Heta tiémporema umi hénte opensa imbaʼeporãramo hapichándi oaseguramaha ifutúro. Por ehémplo umi hénte Asiapegua omombaʼeterei la heʼi vaʼekue peteĩ profesór ha filósofo ifamosoitereíva hérava Confucio. Haʼe heʼi vaʼekue: “Ani rejapo ótrore la ndereipotáiva ojejapo nderehe”.a

HETA HÉNTE OJAPÓVA JEPI

Heta hénte oguerovia ikondúkta porãramo oaseguratamaha ifutúro. Upévare oñehaʼã irrespetuóso, iñamávle, okumpli irresponsavilida ha ojapo iporãva ikonsiénsia potĩ hag̃ua. Upéicha opensa vaʼekue peteĩ kuñakarai oikóva Vietnámpe, haʼe heʼi: “Che siémpre añehaʼã vaʼekue cheonrráda ha chesinséra, pórke apensa vaʼekue upéicha oho porãvetaha chéve”.

Pe kuñakarai oservi tembiʼu umi imboriahu ha ndahógaivape.

Ótro katu oñehaʼã ivuéno pórke upéva oaprende irrelihiónpe. Peteĩ karai oikóva Taiwánpe omombeʼu: “Che aaprende vaʼekue amano rire ikatutaha avyʼa o ahasa asy pára siémpre asegún la ajapóva koʼág̃a aikove aja”.

MBAʼE LA RRESULTÁDO

Pe kuñakarai og̃uahẽma hógape kaneʼõnguére ha oreko ijyva ári imembýpe.

Siérto ningo, ñanembaʼeporãrõ ñande rapichándi oho porãve ñandéve. Péro heta hénte ohechakuaa oipytyvõramo jepe ótrope, ndahaʼéi upe haguére osẽ porãmbáva entéro mbaʼe haʼekuéra ohaʼarõ haguéicha. Por ehémplo, peteĩ kuñakarai oikóva Hong Kóngpe heʼi: “Che ikatu haʼe la nevuénoramo, ndahaʼéi upe haguére umi ótro ivuénotava nendive katuete. Che añangareko porã vaʼekue che famíliare ha siémpre añehaʼã chembaʼeporã, péro amo ipahápe che ména ou orereja rei chéve ha che membykuimbaʼépe”.

Avei heta persóna ohechakuaa pe rrelihión ndahaʼeiha katuete oipytyvõva umi persónape ivuenove hag̃ua. Peteĩ kuñakarai oikóva Japónpe omombeʼu: “Che aĩ vaʼekue peteĩ rrelihiónpe ha aorganisámi vaʼekue heta aktivida umi mitãrusukuérape g̃uarã. Péro upéi añesorprendete voi ahechávo mbaʼéichapa umi hénte oĩva che rrelihiónpe hekokyʼa, oiko vaipa omandaségui hikuái ha oipuru vaipa pe pláta oikéva pe organisasiónpe”.

“Che añangareko porã vaʼekue che famíliare ha siémpre añehaʼã chembaʼeporã, péro amo ipahápe che ména ou orereja rei chéve ha che membykuimbaʼépe” (PETEĨ KUÑAKARAI OIKÓVA HONG KÓNGPE)

Oĩ hénte irrelihiósova ha siémpre oñehaʼãva imbaʼeporã, péro upéi ou jepi oñedesepsiona, pórke lomímonte oiko hesekuéra umi mbaʼe vai. Péicha oñeñandu vaʼekue peteĩ kuñakarai oikóva Vietnámpe. Haʼe omombeʼu: “Che káda día amoĩmi vaʼerã tembiʼu, yvoty ha frúta umi che hénte omano vaʼekuépe g̃uarã, aipotágui chevendesi hikuái. ¡Mboy áño piko añehaʼã ajapo ikatumíva guive akumpli hag̃ua hendivekuéra, ha siémpre añehaʼã ajapo iporãva ótro rehehápe! Péro amo ipahápe che ména ou hasyete ha che membykuña orekóva 20 áñonte ou omano ostudiárõ guare ótro paíspe”.

ÑANEVUÉNONTERAMO NDAJAASEGURÁI ÑANDE FUTÚRO

Iñimportánte ningo añete ñanembaʼeporã ha ñanevuéno, péro upéva nogarantisái ñande futúro. ¿Mbaʼérepa jaʼekuaa upéva? Jahechamína mbaʼépa heʼi Ñandejára Ñeʼẽ.

NAENTÉROI OJAPOSE LA IPORÃVA

“Peteĩ pekadór añónte ikatu ohundi heta mbaʼe iporãva” (ECLESIASTÉS 9:18).

Ikatu oime ñande ñañehaʼãmbaite jajapo iporãva, péro umi hénte opensáva ijehénte ojapo la ogustáva chupekuéra ha upéva ikatu ñandeafekta ha ñandeapeligra. Por ehémplo, peteĩ pandémia aja ikatu oime ñande jadesidi jajapo pe goviérno heʼíva ha jareko enkuénta pe distansiamiénto físiko, péro oĩ heta hénte nopenáiva umívare ha la odesidíva hikuái ñandeafekta avei ñandéve.

OĨ NDOIKUAÁIVA MBAʼÉPA OĨ PORÃ HA MBAʼÉPA OĨ VAI

“Peteĩ persóna ikatu opensa ohoha tape porãre, péro añetehápe upe tape ogueraha chupe ñemanóme” (PROVERBIOS 14:12).

Ymaite guive heta hénte oĩ vaʼekue konvensído ojapoha iporãva, péro upéi ohechakuaa ojavy hague hikuái. Haʼekuéra opensáramo jepe oĩ porã hague la ojapóva, upéva ndeʼiséi ndosufríri hague odesidi vai haguére.

NDAJAIKUAÁI MBAʼÉPA ÑANERAʼARÕ AMO GOTYOVE

“Ndapeikuaái mbaʼépa oikóta pendehegui koʼẽrõ” (SANTIAGO 4:14).

Pe persóna ivuenovéva jepe ikatu hína oimeha óra omano. Por ehémplo, ko pandémia COVID-19 aja heta voluntário ou omano oipytyvõse rupi hapichápe. Térã ñapensami la oiko vaʼekue peteĩ kuñakaraíre oikóva Chínape. Itúa ou oñaksidenta ha omano. Ko kuñakarai heʼi: “Nantendéi vaʼekue mbaʼérepa che túa omano. Haʼe ningo siémpre isinséro, itravahadór ha iñumílde, ha haʼeñoite la omanóva pe aksidéntepe. ¡Mbaʼére la peteĩ persóna peichagua omano vaʼerã!”.

Oimérõ ndajaasegurái ñande futúro ñanevuénonteramo, ¿mbaʼépa upéicharõ ñanepytyvõta? Ñakontesta hag̃ua ko pregúnta jaheka vaʼerã umi konsého ideprovéchotava, ñandegia porãtava ha ikatúvare ñakonfia. ¿Moõpa jajuhukuaa upéva?

a Reikuaasevéramo mbaʼéichapa umi hénte orekoiterei enkuénta la omboʼe vaʼekue Confucio, ikatu rehecha kapítulo 7, párrafo 31-35 pe lívro héravape El hombre en busca de Dios, ojapóva testígo de Jehová. Oĩva Internétpe: www.jw.org/es.