LEKSIÓN 51
Ikatu ñambovyʼa Jehovápe ñañeʼẽ lájare
Jehová ñandekreárõ guare omeʼẽ ñandéve pe kapasida ñañeʼẽ hag̃ua, upéva ningo peteĩ rregálo iporãitereíva. ¿Sera ke iñimportánte chupe g̃uarã mbaʼéichapa jaipuru upe rregálo? Jaikuaa upéva (elee Santiago 1:26). Upéicharõ, ¿mbaʼéichapa ikatu jaipuru ko rregálo ñambovyʼa hag̃ua Jehovápe?
1. ¿Mbaʼéichapa ikatu jaipuru porã pe rregálo oúva Jehovágui?
La Biblia heʼi: “Pesegíkena peñomokyreʼỹ ha peñomombarete” (1 Tesalonicenses 5:11). Epensamína, ¿mávapepa ikatúne emokyreʼỹ? ¿Mbaʼépa ikatúne ejapo oñeñandu porãve hag̃ua? Easegura pe persónape revaloraitereiha chupe ha ikatu voi emensiona peteĩ kualida porã orekóva. Eñehaʼãkena avei eipuru umi téxto bíblico omokyreʼỹtava chupe. Nemanduʼa vaʼerã avei iñimportantetereiha mbaʼéichapa ere la kósa. Upévare tekotevẽ siémpre neamávle ha eñeʼẽ trankílo porãnte (Proverbios 15:1).
2. ¿Mbaʼépa ndovaléi jaʼe?
La Biblia heʼi: “Aníkena osẽ pende jurúgui mbaʼeveichagua ñeʼẽ kyʼa” (elee Efesios 4:29). Upéva heʼise ndovaleiha ñandejurutieʼỹ, ñandearhél térã ñañembohory ñande rapicháre ñamoñeñandu vai hag̃uáicha chupe. Heʼise avei ndovaleiha ñanechismóso ni ñañeʼẽ vai ñande rapicháre jaheja vaiségui chupe (elee Proverbios 16:28).
3. ¿Mbaʼépa ñanepytyvõta jaʼe hag̃ua umi mbaʼe omokyreʼỹtava ótrope?
Umi mbaʼe jaʼéva ningo ohechauka jepi mbaʼéichapa ñañeñandu ha mbaʼépa ñapensa jaikóvo (Lucas 6:45). Upévare ñañehaʼãmbaite vaʼerã ñapensa meme umi mbaʼe ihústovare, ipotĩvare, iporãvare ha ñanemomýivare japorohayhu hag̃ua (Filipenses 4:8). Ha ikatu hag̃uáicha ñapensa meme koʼã mbaʼére tekotevẽ jaelehi porã ñane diversión ha ñane amigokuéra (Proverbios 13:20). Avei iñimportánte ñapensa porã ñañeʼẽ mboyve. Upéicharõ, erekókena enkuénta mbaʼéichapa omoñeñandúta ótrope umi mbaʼe eréva. La Biblia heʼi: “Oĩ nopensáiva oñeʼẽ hag̃ua, ha umi mbaʼe heʼíva ñandekutu rasy peteĩ espádaicha, péro umi iñarandúva heʼíva haʼete peteĩ pohã ñanemongueráva” (Proverbios 12:18).
EJEPYʼAMONGETAMÍNA
Jahechamína mbaʼéichapa ikatu rembovyʼa Jehovápe reñeʼẽ lájare ha avei mbaʼéichapa ikatu remokyreʼỹ ótrope.
4. Eñatendékena la erévare
Sapyʼánte jaʼe jepi peteĩ mbaʼe ñambyasýva upe rire (Santiago 3:2). Elee Gálatas 5:22, 23, ha upéi erresponde koʼã porandu:
Umi kualida oñemensionáva koʼápe ikatu nepytyvõ reñatendeve hag̃ua la erévare, ¿mavaitévapa nde rejeruréne Jehovápe? ¿Mbaʼéichapa upe kualida ikatu nepytyvõ?
Elee 1 Corintios 15:33, ha upéi erresponde ko porandu:
Amáske jahasa tiémpo peteĩ persónandi jajoguavéma chupe oñeʼẽ lájape entéro. ¿Ndépa ere ikatuha ndeperhudika upe sentídope umi amista erekóva ha umi diversión reiporavóva?
¿Ikatúpa nepytyvõ térã ndeperhudika umi amígo ha diversión reiporavóva?
Elee Eclesiastés 3:1, 7, ha upéi erresponde ko porandu:
¿Mbaʼéicha javépa iporãvénte ñakirirĩ térã ñahaʼarõmiénte jaʼe hag̃ua álgo?
5. Eñeʼẽ porãkena umi ótrore
Sapyʼánte japoi rei reínte ñande jurúgui ha jaʼe umi mbaʼe omoñeñandu vaíva umi ótrope, ¿mbaʼépa ikatu ñanepytyvõ pono oiko ñanderehe upéva? Ehecha pe VIDÉO, ha upéi erresponde koʼã porandu:
Ohechauka haguéicha pe vidéope, ¿mbaʼérepa pe ermáno okambiase raʼe oñeʼẽ lája umi ótrore?
¿Mbaʼépa ojapo raʼe okambia hag̃ua?
Elee Eclesiastés 7:16, ha upéi erresponde ko porandu:
¿Mbaʼe rehepa ñanemanduʼa vaʼerã peichahágui ñañeʼẽ vaiséramo ótrore?
Elee Eclesiastés 7:21, 22, ha upéi erresponde ko porandu:
¿Mbaʼéichapa koʼã téxto ikatu nepytyvõ ani hag̃ua erreaksiona vai oĩramo oñeʼẽ vaíva nderehe?
6. Eñehaʼãkena neamávle reñeʼẽta jave ne hentekuérape
Jehová oipota jatrata porã ñane hentekuérape ha ñaneamávle hendivekuéra. Ehecha pe VIDÉO, ha upéi erresponde ko porandu:
¿Mbaʼépa nepytyvõta neamávle hag̃ua ne hentekuérandi?
Elee Efesios 4:31, 32, ha upéi erresponde ko porandu:
¿Mbaʼéichapa ñañeʼẽ vaʼerã ojupe jajogueraha porã hag̃ua ñane hentekuérandi?
Jehová heʼi vaʼekue voi ohayhuha Itaʼýra Jesúspe. Elee Mateo 17:5, ha upéi erresponde ko porandu:
¿Mbaʼéichapa ikatu resegi Jehová ehémplo reñemongetáta jave ne hentekuérandi?
Ehekákena oportunida efelisita hag̃ua ótrope
OĨRAMO HEʼÍVA: “Chéko haʼénte la apensáva, la ndogustáiramo ótrope la haʼéva ndahaʼevéima che provléma”.
¿Ndépa ere oĩ porãha upéva? ¿Mbaʼérepa repensa upéicha?
RRESÚMEN
Umi mbaʼe jaʼéva ikatu oipytyvõ térã omoñeñandu vai ótrope, upévare ñañatende vaʼerã mbaʼépa jaʼe, mbaʼe moméntopepa opyta porãve jaʼe ha mbaʼéichapa jaʼe.
Rrepáso
¿Mbaʼe mbaʼépa ikatu jaʼe ñaipytyvõ hag̃ua ótrope?
¿Mbaʼe mbaʼépa ndovaléi jaʼe?
¿Mbaʼépa ñanepytyvõta siémpre ñaneamávle hag̃ua ha ñaporomokyreʼỹ hag̃ua ñañeʼẽ jave?
EINVESTIGA HAG̃UA
¿Mbaʼépa ikatu ñanepytyvõ jaʼe hag̃ua umi mbaʼe omokyreʼỹtava ñande rapichakuérape?
Ehechamína mbaʼépa ikatu nepytyvõ ani hag̃ua ndejurutieʼỹ.
“¿Ivaieterei piko legálmente la ñandejurutieʼỹ?” (Artíkulo oĩva jw-pe)
Ehechamína mbaʼépa ikatu nepytyvõ ani hag̃ua reñeʼẽ vai ótrore.
Ehechamína mbaʼéichapa Jehová oipytyvõ peteĩ karaípe anivéma hag̃ua ijurutieʼỹ.
“Ahechakuaa tekotevẽha akambia” (Ñemañaha 1 de agosto de 2013)