“Chemoirũkena siémpre”

1-3. a) ¿Mbaʼéichapa Jesús ojedespedi idisipulokuéragui? ¿Mbaʼérepa jaʼekuaa ndopytái hague oñembyasy hikuái? b) ¿Mbaʼérepa tekotevẽ jaikuaa mbaʼépa ojapo Jesús oho jey rire yvágape?

ONCE kuimbaʼe oñemboʼy oñondivepa peteĩ sérrope. Haʼekuéra ojesareko peteĩ kuimbaʼe ohayhu ha oguerohorývare. Ko kuimbaʼe hetéramo jepe yvypóraicha, añetehápe haʼe hína Jesús oikove jey vaʼekue, ha oiko jeýma chugui Ñandejára Raʼy imbaretevéva. Jesús voi ohenoika ijapostolkuérape ou hag̃ua hendápe Sérro Olivotýpe, ha upérõ ipahaite oñembyaty hendivekuéra.

² Ko sérro ningo oĩ Cedrón Ñu mboypýri ha katuete omomanduʼa Jesúspe hetaiterei mbaʼére. Ijypýpe oĩ siuda de Betania, upépe haʼe omoingove jey Lázarope. Ha ag̃ui upégui opyta avei siuda de Betfagué, ramoiténte Jesús osẽ upe siudágui oho hag̃ua oike Jerusalénpe peteĩ Rréicha. Upérupinte avei oiméne oĩ hardín de Getsemaní, upépe Jesús heta ojepyʼapy ojejagarra mboyve chupe. Ko Sérro Olivotýpe oñembyaty iñirũ ha idisipulokuérandi oho mboyve yvágape. Jesús oñeʼẽ chupekuéra torypápe ha upéi oñepyrũ ojupi yvate gotyo. Umi apóstol opytaite ha omaña mbaʼéichapa imboʼehára ohayhuetéva ojupi yvágape. Upéi peteĩ arai omoʼã Jesúspe ndojekuaavéi peve (Hechos 1:6-12).

³ ¿Ndépa reimoʼã umi idisípulo opyta hague ndovyʼái ha oñembyasy? Nahániri, upe riremínte oñeʼẽ chupekuéra mokõi ánhel ha heʼi hikuái Jesús ojapóva ndopareimoʼãiha (Hechos 1:10, 11). Ojupívo yvágape Jesús oñepyrũ ramo hína hembiapo ha la Biblia omombeʼu ñandéve heta mbaʼe oikóva upe rire. ¿Mbaʼérepa tekotevẽ jaikuaa mbaʼépa ojapo Jesús oho rire ko yvýgui? Ñanemanduʼa vaʼerã Jesús heʼi hague Pédrope “chemoirũkena siémpre” (Juan 21:19, 22). Ñandéve avei Jesús heʼi ko mbaʼe, ha ndahaʼeiete peteĩ vyrorei jadesidíva pyaʼe pyaʼe. Ñande ningo ñamoirũ vaʼerã chupe jaikove aja pukukue. Ha upearã jaikuaa vaʼerã mbaʼépa ojapo hína ñande Ruvicha amo yvágape, ha mbaʼe rresponsavilidápa oñemeʼẽ chupe.

 4. ¿Mbaʼéichapa la Biblia ohechaukáma vaʼekue mbaʼépa oikóta Jesús oho jey rire yvágape?

⁴ Ñandejára Ñeʼẽ nomombeʼúi mbaʼépa oiko Jesús og̃uahẽvo yvágape, mbaʼéichapa oñemomaitei chupe ni mbaʼeichaitépa ovyʼa ojotopa jeývo Itúandi. Péro ipype ojeskrivíma voi kuri mbaʼépa oikóta Jesús oho jeývo yvágape. Por ehémplo la Biblia oñeʼẽ peteĩ arete guasúre ogueromanduʼa vaʼekue umi judío 1.500 áño pukukuérupi. Káda áño pe saserdóte guasu oike vaʼekue pe Santísimope oĩva témplope ha ohypýi árka del pákto renondépe umi mymba ruguykue. Koʼãva oñekuaveʼẽ Ñandejárape pe Día Oñeperdonahápe umi Pekádo. Upe díape pe saserdóte orrepresenta pe Mesíaspe. Ha Jesús ojapo upéva oho jeýrõ guare yvágape. Upérõ oho Itúa renondépe ha upéva haʼe hína pe lugár isagradovéva oĩva yvága ha yvýpe. Upévo omoĩ Jehová renondépe huguy repykue peteĩ jey ha pára siémpre (Hebreos 9:11, 12, 24). ¿Oguerohorýpa Jehová upéva?

5, 6. a) ¿Mbaʼéichapa jaikuaa Jehová oguerohory hague Jesús sakrifísio? b) ¿Máva mávapepa ou porã ko sakrifísio, ha mbaʼéichapa?

⁵ Jaikuaa hag̃ua oguerohorýpa Jehová pe sakrifísio Jesús ojapo vaʼekue jahechamíta mbaʼépa oiko Jesús oho riremi. Upérõ 120 idisípulorupi oñembyaty hína peteĩ koty yvatépe oĩva Jerusalénpe, ha peichaháguinte oiko peteĩ mbaʼe ñanemondýiva. Oñehendúvaicha yvytu hatãitereíva ha iñakã arikuéra ojehecha peteĩ mbaʼe ojoguáva tatarendýpe. Enterove henyhẽ espíritu sántogui ha oñepyrũ oñeʼẽ heta idiómape (Hechos 2:1-4). Upérõ oñepyrũ peteĩ nasión pyahu haʼéva pe Israel yvagapegua. Haʼekuéra ningo “peteĩ puévlo Ñandejára oiporavo vaʼekue” ha “peteĩ grúpo de rréi haʼéva saserdóte” ojapótava Ñandejára rembipota ko yvy ape ári (1 Pedro 2:9). Péicha ojehecha porãiterei Jehová oguerohory ha omombaʼeha Cristo ruguy oñehẽ vaʼekue ojeheja rei hag̃ua yvypóra rembiapo vaikue. Ha avei Ñandejára oñepyrũ ovendesi yvyporakuérape oñohẽvo ijespíritu sánto Jesús disipulokuéra ári.

⁶ Upe guive Jesús sakrifísio oipytyvõ entéro idisípulope oĩva ko yvy apére, tahaʼe jepe raʼe umi ‘ovecha mbovymi’ ogovernátava Cristo ndive, térã “ótro ovechakuéra” oikótava ipoguýpe ko yvy ape ári (Lucas 12:32; Juan 10:16). Ko sakrifísio rupive ikatu ñahaʼarõ iporãva ñane renonderãme ha avei ojeheja rei ñandéve ñane rembiapo vaikue. Akóinte ‘jahechaukáramo jajeroviaha’ ko sakrifísiore ha ñamoirũ Jesúspe ára ha ára, ñane konsiénsia ipotĩta ha jarekóta peteĩ esperánsa iporãmba jepéva (Juan 3:16).

 7. ¿Mbaʼépa ojapo oikóvo Jesús oho rire yvágape? ¿Mbaʼéichapa jahechauka ñamoirũha chupe?

⁷ ¿Mbaʼépa ojapo oikóvo Jesús oho jey rire yvágape? Oreko ipoguýpe hetaiterei mbaʼe (Mateo 28:18). Jehová omoĩ chupe omoakã hag̃ua pe kongregasión, ha haʼe ojapo upéva tekojoja ha mborayhúpe (Colosenses 1:13). Heʼiháicha la Biblia, haʼe omoĩ kuimbaʼe ojapóva hekopete hembiapo oñangareko hag̃ua ijovechakuérare (Efesios 4:8). Por ehémplo, onombra Páblope ‘apóstol oipytyvõ hag̃ua umi ndahaʼéivape judío’, ha omondo chupe omombeʼu hag̃ua umi notísia porã oparupiete (Romanos 11:13; 1 Timoteo 2:7). Opa potávo síglo primero Jesús oñemoñeʼẽ ha omokyreʼỹ umi 7 kongregasión oĩva Ásiape, ha avei heʼi chupekuéra mbaʼépa ojapo porãve vaʼerã (Apocalipsis kapítulo 2 ha 3). ¿Jahechakuaápa Jesús omoakãha kongregasión? (Efesios 5:23). Jahechaukákena akóinte ñamoirũha chupe ñaneñeʼẽrendu ha ñambaʼapo kyreʼỹvo ñane kongregasiónpe.

8, 9. ¿Mbaʼépa oiko 1914-pe, ha mbaʼérepa ñañehaʼã vaʼerã Jesús tañandeguerohory opa mbaʼe jajapóvape?

⁸ Áño 1914-pe Jesúspe avei oñenombra Rréi Jehová goviérnope. Oñepyrũvo ogoverna “oiko peteĩ gérra yvágape”. Satanás ha idemoniokuérape oñemombo ko yvýpe ha upe guive oñepyrũ jehasa asy ha jepyʼapy. Jahechávo mbaʼéichapa ñandeahoʼi umi gérra, mondaha, mbaʼasy, yvyryrýi ha ñembyahýi, ñanemanduʼa Jesús ogovernamaha avei yvágape. Satanás ningo haʼe gueteri ‘ko múndo ruvicha’, péro ‘mbykypaitéma itiémpo’ (Apocalipsis 12:7-12; Juan 12:31; Mateo 24:3-7; Lucas 21:11). Jesús katu omeʼẽ oportunida opaichagua tapichápe oñemoĩ hag̃ua igoviérno poguýpe.

⁹ Tekotevẽterei ñañemoĩ Cristo ykére. Opa mbaʼe jajapóvape ñañehaʼã vaʼerã haʼe tañandeguerohory ha ani ñañemoĩ porãse ko múndo añándi. Haʼe ningo “Rréi omandavéva entéro umi ótro rréigui, ha Governánte omandavéva entéro umi ótro governántegui”, ha ojesarekóvo yvyporakuérare ipochy ha avei ovyʼaiterei (Apocalipsis 19:16). ¿Mbaʼérepa oñeñandu upéicha?

10. ¿Mbaʼépepa Jesús ojogua Itúape, ha mávarepa haʼe ipochy?

¹⁰ Jesús ningo ojoguaiterei Itúape, upévare siémpre ovyʼa (1 Timoteo 1:11). Haʼe ndahaʼéi vaʼekue peteĩ kuimbaʼe hasýva ñameʼẽ chupe gústo térã okopi meméva hapicháre. Upéicharamo jepe ipochy ohechávo heta mbaʼe oikóva koʼág̃arupi ko yvy ape ári. Katuete oiméne ipochy umi rrelihión japúre, heʼíva omoirũha chupe. Haʼe heʼi voi: “Naentéroi heʼíva chéve: ‘Señór, Señór’, oikéta pe Rréino yvagapeguápe. Síno umi ojapóva che Ru yvagapegua rembipota añoite oikéta. Upe díape oĩta heta heʼíva chéve: ‘Señór, Señór, ore ningo [...] nde rérape rojapo heta milágro’. Péro che haʼéta chupekuéra: ’¡Che ndapoikuaái! ¡Tapeho koʼágui, peẽ ningo ivaívante pejapo!’” (Mateo 7:21-23).

11-13. ¿Mbaʼére piko oĩ heta nontendéiva mbaʼérepa Jesús ojaʼo umi ojapóvape ‘heta milágro hérape’, ha mbaʼérepa haʼe ipochyete? Emombeʼu peteĩ ehémplo.

¹¹ Heta heʼíva ojeroviaha Jesúsre ohecharamo haʼe heʼi vaʼekue. ¿Mbaʼére piko Jesús peichaite ojaʼóta umi heʼívape ‘ojapoha heta milágro’ hérape? Umi tupaokuéra ningo heta vése ombaʼapo oipytyvõ hag̃ua imboriahúvape, ojapoka eskuéla, ospitál ha hetave mbaʼe. ¿Mbaʼére piko upéicharõ Jesús ipochyete? Ñantende hag̃ua jahechami peteĩ ehémplo.

¹² Ñamoĩ chupe peteĩ sy ha túa oviaha vaʼerãha. Ndaikatúigui oraha ifamiliakuérape opaga peteĩ niñérape oñatende hag̃ua umi mitãre. Haʼekuéra heʼi porã ko niñérape mbaʼépa oipota ojapo: “Eñatende umi mitãre, emongaru, embojahu ha eñangareko ani hag̃ua ojehu chupekuéra mbaʼeve”. Péro ou jeývo otopa hikuái umi mitã iñembyahyipa, ikyʼa, hasy, hasẽ soro ha pe niñéra ni vymi nopenái hesekuéra. ¿Mbaʼérepa? Ojupi peteĩ eskalérape omopotĩ hag̃ua ventanakuéra. Pe sy ha túa ipochyeterei ha heʼi chupe mbaʼérepa nopenái umi mitãre. Pe niñéra osẽ heʼi: “Péro pemañamína, hetaiterei mbaʼéngo ajapo. Potĩ asy ningo aheja koʼã ventána. Ha amohenda heta mbaʼe ko ógape. Penderehehápe ningo ajapo”. ¿Ovyʼátapa upe haguére umi tuakuéra? Ni mbaʼevéicharõ, ¿ajépa? Haʼekuéra ndeʼíri chupe omopotĩ hag̃ua ventána, oipotánte kuri oñatende umi mitãre. Haʼekuéra ipochy pe niñéra ndojapói haguére ojeʼéva chupe.

¹³ Umi rrelihión heʼi guaʼúva omoirũha Jesúspe ojogua ko niñérape. Jesús oipota vaʼekue idisipulokuéra oipytyvõ umi héntepe oikuaa hag̃ua Ñandejára Ñeʼẽ ha ani hag̃ua omongyʼa ijerovia (Juan 21:15-17). Péro koʼã rrelihión ndojapói Jesús heʼíva. Nomboʼéi hikuái mbaʼépa heʼi la Biblia, upéva rangue japúmante oporomboʼe ha péicha umi hénte opyta haʼete iñembyahýiva (Isaías 65:13; Amós 8:11). Oñehaʼãvéramo jepe ojapo heta mbaʼe iporãva, upéva nomoʼãi hembiapo vaikue. Hiʼarive Satanás múndo aña haʼete peteĩ óga ojeitypátava, Ñandejára Ñeʼẽ heʼi koʼẽrõitéma oñehunditaha (1 Juan 2:15-17).

14. ¿Mbaʼe tembiapópa ombovyʼa Jesúspe, ha mbaʼérepa?

¹⁴ Péro Jesús katuete oiméne ovyʼa ohechávo hetaiterei tapicha oñehaʼãva opredika, haʼe heʼi haguéicha oho mboyve yvágape (Mateo 28:19, 20). ¡Ajépa ñandepyʼarory ñambovyʼa haguére ñande Ruvichápe! Upévare akóintekena ñambaʼapo “pe esklávo de konfiánsa ha iñarandúva” ndive (Mateo 24:45). Ko grúpo michĩva ohótava yvágape iñeʼẽrendu, omoakã pe predikasión ha omongaru hiʼórape umi Cristo ovechakuérape. Ndojoguaiete umi paʼikuérape.

15, 16. a) ¿Mbaʼéichapa oñeñandu Jesús ohechávo umi hénte ndojoayhuveiha, ha mbaʼéichapa jaikuaa upeichaha? b) ¿Mbaʼépa ojapo umi paʼikuéra Jesús ipochy hag̃ua hesekuéra?

¹⁵ Oĩve peteĩ mbaʼe omorrenegáva ñane Ruvichápe: ko múndope umi hénte ndojoayhuvéi. Ñanemanduʼamínte mbaʼéichapa Jesús oñeñandu umi fariséo otakýrõ guare hese oporomonguera haguére sabadokue. Haʼekuéra ipyʼahatã ha nontendeséi voi ojavyha. Upévare haʼekuéra heʼiháichante oipota oñekumpli Moisés léi ha umi léi haʼekuéra omoĩva. Ndohechái voi hikuái umi mbaʼe porã ojehupytýva Jesús milágro rupive, mbaʼéichapa umi hénte ovyʼa ha ipiroʼy opytávo ha mbaʼéichapa ijerovia imbareteve. ¿Mbaʼéichapa oñeñandu Jesús ohechávo umi fariséo lája? Peteĩ jey Jesús “omaña hesekuéra ha ipochy, haʼe ombyasyeterei peichaite peve ipyʼahatã haguére hikuái” (Marcos 3:5).

¹⁶ Koʼág̃arupi oĩ avei hetaiterei mbaʼe Jesús ‘ombyasyetereíva’ ohecha vove. Umi paʼikuéra omombaʼeve yvyporakuéra omboʼéva, jepe koʼãva oñemoĩ la Bíbliare. Avei ipochy hikuái ojepredika haguére umi notísia porã oñeʼẽva Ñandejára Rréinore. Upévare heta tetãme oĩ oñemoĩ mbaretéva kristianokuérare opredika haguére (Juan 16:2; Apocalipsis 18:4, 24). Hiʼarive koʼã paʼi omboliga umi héntepe oho hag̃ua gerrahápe ojuka hapichápe. ¡Guaʼúko Jesucristo oguerohorýta upéva!

17. ¿Mbaʼéichapa umi kristiáno tee ombopyʼarory Jesúspe?

¹⁷ Umi añetehápe omoirũva Jesúspe ningo oñehaʼã ohayhu hapichakuérape. Oikuaauka umi notísia porã ‘opaichagua persónape’ oĩramo jepe oñemoĩva hesekuéra, ha péicha osegi hikuái Jesús ehémplo (1 Timoteo 2:4). Ojoayhuetereígui ojekuaa kristiáno teeha (Juan 13:34, 35). Haʼekuéra ningo ohayhu ha omombaʼe iñermanokuérape ha péicha oguata Jesús pyporére ha ombopyʼarory chupe.

18. ¿Mbaʼépa ombyasy ñande Ruvicha, péro mbaʼéichapa ikatu ñambovyʼa chupe?

¹⁸ Ñanemanduʼa vaʼerã avei ñande Ruvicha ombyasyha ohechávo idisipulokuéra omboykeha Jehovápe, ikangy ha ndohayhuvéi rupi chupe (Apocalipsis 2:4, 5). Péro ovyʼa oĩramo oaguantáva ipahaite peve (Mateo 24:13). Upévare tekotevẽterei ñanemanduʼa pe heʼi vaʼekuére: “Chemoirũkena siémpre” (Juan 21:19). Koʼág̃a jahechami mbaʼépa omeʼẽta Jesús umi iñeʼẽrendúvape ipahaite peve.

19, 20. a) ¿Mbaʼépa jahupytýma koʼág̃a ñamoirũ haguére Jesúspe? b) Ñamoirũvo Jesúspe, ¿mbaʼéichapa jareko peteĩ “Túa opa ára g̃uarã”?

¹⁹ Hetaiterei mbaʼe porã jahupyty ñamoirũramo Jesúspe koʼág̃ama voi. Ñañemoĩramo ipoguýpe, jahejárõ ñanegoverna ha jasegíramo iñehémplo, jatopáta heta mbaʼe porã ko múndo ohekáva péro ndotopáiva. Ñande ningo jajapo peteĩ tembiapo ñanembovyʼáva, ñane ermanokuéra ñanderayhu añete, ñane konsiénsia ipotĩ ha ñandepyʼaguapy. Añetehápe ñanerenyhẽ chovi mbaʼe porãgui. Péro oĩvénte hína.

²⁰ Umi oikótavape ko yvy ape ári pára siémpre Jehová omeʼẽ peteĩ “Túa opa ára g̃uarã”, upéva hína Jesús. Ñande ru ypykue Adán ningo ofalla tuichaiterei ifamiliaréndi, péro Jesús oĩ hekoviarã (Isaías 9:6, 7). Jajeroviágui Jesús haʼeha ñande “Túa opa ára g̃uarã” jaikuaa katuete jaikotaha pára siémpre ha avei ñañemoag̃uive Jehováre. Jahecháma haguéicha, jasegívo Jesús ehémplo jajapo hína ko téxto heʼíva: “Pehaʼangákena Ñandejárape, peẽ itaʼýra haʼe ohayhuetéva” (Efesios 5:1).

21. ¿Mbaʼéichapa umi omoirũva Jesúspe ohesape ko múndo iñipytũvape?

²¹ Ñahaʼangávo Jehová ha Jesúspe ikatu jajapo peteĩ mbaʼe iporãitereíva: ikatu jahesape ko múndo ypytũme. Jaikóramo jepe peteĩ múndo oĩva pytũmbýpe, Satanás ombotavyhápe hetaiterei tapichápe ojapo hag̃ua ivaíva, ñande ñamoirũ Jesúspe ha jahesape mbaʼe rendýicha. Upévare jaikuaauka Ñandejára Ñeʼẽ heʼíva, ñanderekoporã, javyʼa, ñandepyʼaguapy ha japorohayhu añete. Jajapóramo koʼã mbaʼe ñañemoag̃uivéta Jehováre, ha ndaipóri ningo mbaʼeve tuichavéva upévagui.

22, 23. a) ¿Mbaʼépa ohupytýta umi omoirũ meméva Jesúspe? b) ¿Mbaʼépa jajapo vaʼerã koʼẽ koʼẽre?

²² Ñapensamína avei Jehová ojapótavare ñanderehehápe Jesucristo rupive. Koʼẽrõitéma Jesús oñorairõta Satanás múndo añándi. ¡Ha katuete ipuʼakáta hese! (Apocalipsis 19:11-15). Upéi ogovernáta 1.000 áñore ko yvy ape ári. Igoviérno rupive yvyporakuéra ojeíta pekádo ha ñemano poguýgui ohupyty peve perfeksión. Ñapensamíntena, upérõ ñaneresãita, koʼẽ koʼẽre ñanemitãvéta, ñanembaretéta ha ñambaʼapóta oñondivepa vyʼápe jajapopa peve ko yvýgui peteĩ hardín neporãva. Ha opávo umi 1.000 áño Jesús omeʼẽta igoviérno Itúape (1 Corintios 15:24). Akóinte ñamoirũramo Jesúspe jahupytýta peteĩ mbaʼe iporãiterei rasáva: ‘Oikóta ñandehegui Ñandejára raʼy ha jaguerekóta pe liverta ijojahaʼỹva’ (Romanos 8:21). Jarekopaitéta umi mbaʼe porã ohundi vaʼekue Adán ha Eva. Pe pekádo ombohasa vaʼekue ñandéve Adán ojeietétama opa ára g̃uarã ha avei “ndaiporimoʼãvéima omanóva” (Apocalipsis 21:4).

²³ Ñanemanduʼami pe kariaʼy iplátavare ñañeʼẽ hague kapítulo 1-pe. Haʼe nopenái Jesúsre heʼírõ guare chupe: “Eju chemoirũ” (Marcos 10:17-22). Aníkena jajavy haʼéicha. Kyreʼỹme ha vyʼapópe ñamoirũ vaʼerã Jesúspe. Jajepytaso mbaretékena ha ñamoirũ pe Pastór Imbaʼeporãvape koʼẽ koʼẽre. Péicha jaikovéta jahecha hag̃ua mbaʼéichapa Jehová okumplipaite hembipota.