“Ajapóta chuguikuéra peteĩ tetãnte”

1, 2. a) ¿Mbaʼérepa oiméne ojepyʼapy rakaʼe umi oĩva prisionéro? b) ¿Mbaʼérepa ohaʼarõ chupekuéra peteĩ sorprésa? c) ¿Mbaʼe porandúpa ñakontestáta koʼág̃a?

OGIA rupi chupe Ñandejára, Ezequiel omeʼẽma heta profesía umi oĩvape prisionéroramo Babilóniape umi rrepresentasión rupive. Pe primer profesía Ezequiel orrepresenta vaʼekue ningo oreko peteĩ mensáhe de huísio, avei pe segundo, ha péicha oho hese (Ezeq. 3:24-26; 4:1-7; 5:1; 12:3-6). Añetehápe enterove umi profesía haʼe orrepresenta vaʼekue oreko umi mensáhe okondena mbaretéva umi judíope.

² Epensamíntena mbaʼeichaitépa oiméne ojepyʼapy rakaʼe umi oĩva prisionéro Ezequiel oñemboʼýrõ guare henondepekuéra ha orrepresenta jey ótro profesía. Haʼekuéra oiméne opensa raʼe: “¿Mbaʼe mensáhe ivaívapa jarresivíta koʼág̃a?”. Péro ohaʼarõ chupekuéra peteĩ sorprésa. Pe profesía Ezequiel oñepyrũva orrepresenta idiferentete umi ótrogui. Ko profesía ndorekói mensáhe okondenáva chupekuéra, síno omeʼẽva esperánsa (Ezeq. 37:23). ¿Mbaʼe mensáhepa omeʼẽ Ezequiel umi oĩvape prisionéro? ¿Mbaʼépa heʼise upe mensáhe? ¿Mbaʼéichapa oñekumpli upéva Ñandejára puévlo koʼag̃aguáre? Jahechamína.

 3. a) ¿Mbaʼépa orrepresenta rakaʼe pe yvyra “Judápe g̃uarã”? b) ¿Mbaʼérepa ikatu jaʼe pe yvyra “orrepresentáva Efraínpe” orrepresentaha pe rréino de 10 trívupe?

³ Jehová heʼi Ezequiélpe ojagarra hag̃ua mokõi yvyra ha oskrivi hag̃ua peteĩre “Judápe g̃uarã” ha pe ótrore katu “Josépe g̃uarã, orrepresentáva Efraínpe” (elee Ezequiel 37:15, 16). ¿Mbaʼépa orrepresenta rakaʼe umi mokõi yvyra? Pe yvyra haʼéva “Judápe g̃uarã” orrepresenta vaʼekue pe rréino de 2 trívupe, oĩháme Judá ha Benjamín. Umi rréi oúva Judá familiarégui ogoverna vaʼekue umi mokõi trívupe. Hendivekuéra oĩ vaʼekue avei umi saserdóte, pórke haʼekuéra oservi pe témplope Jerusalénpe, haʼéva Judá kapitál (2 Crón. 11:13, 14; 34:30). Upéicharõ, pe rréino de Judápe oĩ vaʼekue umi rréi oúva David familiarégui ha umi saserdóte levita. Pe yvyra “orrepresentáva Efraínpe” katu orrepresenta pe rréino de 10 trívu de Israélpe. ¿Mbaʼérepa ikatu jaʼe upéva? Pórke Jeroboán haʼe vaʼekue pe primer rréi ogovernáva pe rréino de 10 trívu, ha haʼe ou vaʼekue Efraín trívugui. Tiémpo rire, Efraíngui oiko pe trívu iñimportantevéva Israélpe (Deut. 33:17; 1 Rey. 11:26). Péro pe rréino de 10 trívu de Israélpe ndaipóri vaʼekue umi rréi oúva David familiarégui ni umi saserdóte levita.

 4. ¿Mbaʼépa ohechauka pe rrepresentasión Ezequiel ojapo vaʼekue? (Ehecha pe taʼanga oĩva iñepyrũme).

⁴ Ezequiélpe ojejerure avei omboja hag̃ua ojuehe umi yvyra “ikatu hag̃uáicha oiko mokõivévagui peteĩnte”. Umi oĩva prisionéro ningo oikuaaseterei mbaʼépa ojapo Ezequiel, ha oporandu chupe hikuái: “¿Neremombeʼumoʼãi piko oréve mbaʼépa heʼise koʼã mbaʼe?”. Ha okontesta hag̃ua haʼe ojapo peteĩ rrepresentasión ohechaukáva mbaʼépa ojapóta Jehová. Oñeʼẽvo umi mokõi yvyra rehe, Jehová heʼi vaʼekue: “Ajapóta chuguikuéra peteĩ yvyránte che pópe” (Ezeq. 37:17-19).

 5. ¿Mbaʼépa heʼise Ezequiel omboja hague ojuehe umi mokõi yvyra? (Ehecha avei pe rrekuádro “Ajapóta chuguikuéra peteĩ yvyránte”).

⁵ Upéi Jehová omyesakã mbaʼépa heʼise oñemboja hague ojuehe umi mokõi yvyra (elee Ezequiel 37:21, 22). Umi ojegueraha vaʼekue prisionéroramo pe rréino de 2 trívu de Judágui ha umi ojegueraha vaʼekue pe rréino de 10 trívu de Israélgui (Efraín), ojegueraha jeýta ijyvýpe Israélpe, ha upépe oikóta chuguikuéra “peteĩ tetãnte” (Jer. 30:1-3; 31:2-9; 33:7).

 6. ¿Mbaʼépa hína umi mokõi profesía oñeñeʼẽha Ezequiel 37-pe?

⁶ Ezequiel 37-pe oñeñeʼẽ mokõi profesía ohóvare ojuehe. Koʼã profesía ijojahaʼỹva heʼi ojeadora jeytaha Jehovápe añoiténte: Peteĩ profesía oñeʼẽ umi kanguekue iséko veráva rehe ha pe ótro katu umi mokõi yvyra rehe. Jehová ohechaukáta haʼeha peteĩ Dios ikatúva oguenohẽ ipuévlope oĩhágui prisionéro (versíkulo 1-14), ha avei ouniha chupekuéra (versíkulo 15-28). Pe mensáhe porãite orekóva koʼã mokõi profesía haʼe hína: Jehová ikatu olivera ipuévlope ha omoĩ chupekuéra en unida.

 7. ¿Mbaʼéichapa 1 Crónicas 9:2, 3 heʼíva ohechauka ndaiporiha mbaʼeve Ñandejára ikatuʼỹva ojapo?

⁷ Yvyporakuérape g̃uarã haʼetévaicha voi núnka ndaikatumoʼãiva ojelivera ni oñembyaty umi ojegueraha vaʼekuépe prisionéro.a Péro “ndaipóri mbaʼeve Ñandejára ikatuʼỹva ojapo” (Mat. 19:26). Jehová okumpli vaʼekue iprofesía. Babilóniape oĩ kuri hikuái prisionéro áño 537 peve a.C., upéi Jehová heʼi haguéicha, umi hénte oĩva umi mokõi rréinope og̃uahẽ Jerusalénpe oadora jey hag̃ua Jehovápe haʼe oipotahaichaite. La Biblia ohechauka añetehápe oiko hague koʼã mbaʼe, heʼívo: “Unos kuánto Judá familiare, Benjamín, Efraín ha Manasés familiare opyta oiko Jerusalénpe” (1 Crón. 9:2, 3; Esd. 6:17).

 8. a) ¿Mbaʼépa oprofetisa vaʼekue Isaías? b) ¿Mbaʼépa hína umi mokõi mbaʼe iñimportánteva jatopáva Ezequiel 37:21-pe?

⁸ Amo 200 áñorupi upe mboyve, proféta Isaías oprofetisa vaʼekue mbaʼépa oikóta Israel ha Judáre osẽ rire hikuái oĩhágui prisionéro. Haʼe oprofetisa vaʼekue Jehová oñepyrũtaha ombyaty jey “umi isarambipa vaʼekue Israel ha Judágui”, ha “ogueru jeýta chupekuéra opáguio ládo ko yvy ape árigui”. Umíva apytépe oĩta avei umi “osẽva Asíriagui” (Is. 11:12, 13, 16). Añetehápe, Jehová heʼíma haguéicha, haʼe ogueru “umi israelítape umi tetãnguéra oho haguégui” (Ezeq. 37:21). Jahechami mokõi mbaʼe iñimportánteva: Jehová nohenoivéima “Judá” ha “Efraín” umi oĩvape prisionéro, síno “umi israelita”, peteĩ grúpontema. Avei umi israelita rehe ndojeʼéi outaha peteĩ paísguinte, Babilóniagui, síno umi tetãnguéragui, añetehápe oúta hikuái “opáguio ládo”.

 9. ¿Mbaʼéichapa Jehová oipytyvõ umi ou jey vaʼekuépe Israélpe oĩ hag̃ua en unida?

⁹ ¿Mbaʼéichapa Jehová oipytyvõ vaʼekue umi ou jey vaʼekuépe Israélpe oĩ hag̃ua en unida? Haʼe omeʼẽ chupekuéra umi pastór ijerovia mbaretéva, umíva apytépe Zorobabel, pe súmo saserdóte Josué, Esdras ha Nehemías. Ñandejára onombra avei umi proféta, umíva apytépe Ageo, Zacarías ha Malaquías. Enterove koʼã kuimbaʼe ifiélva oñehaʼãmbaite omombarete pe nasiónpe ojapo hag̃ua Ñandejára heʼíva (Neh. 8:2, 3). Avei Jehová oprotehe pe nasión de Israélpe. Haʼe ojapo upéva ojokóvo umi mbaʼe vai okalkuláva ojapo ipuévlore umi iñenemigokuéra (Est. 9:24, 25; Zac. 4:6).

10. ¿Mbaʼéichapa Satanáspe osẽ porã vaʼekue la ijidéa?

¹⁰ Péro Jehová ojapóramo jepe heta mbaʼe porã umi israelitakuérare, hetaiterei ijapyteguikuéra ndoadoravéi chupe haʼe oipotaháicha. Umi mbaʼe ojapo vaʼekue hikuái oñemombeʼu la Bíbliape, umi lívro ojeskrivi vaʼekuépe ou rire hetãme umi oĩ vaʼekue prisionéro (Esd. 9:1-3; Neh. 13:1, 2, 15). Añetehápe, ojapo mboyve 100 áño ou jey hague hikuái, umi israelita tuichaiterei jeýma oñemomombyry Jehovágui ha ndoadoravéi chupe haʼe oipotaháicha, upévare Jehová heʼímante chupekuéra: “Peñemoag̃ui jeýna cherehe” (Mal. 3:7). Jesús oúrõ guare ko yvy ape ári, umi judío rrelihión ojedividíma heta séktape omoakãva umi pastór naiñeʼẽrendúiva (Mat. 16:6; Mar. 7:5-8). Péicha Satanás osẽ ijidéape ha ndohejái ojehupyty pe unida kompléta. Upéicharõ jepe, Jehová profesía oñeʼẽva pe unida rehe katuete oñekumpli vaʼerã kuri. ¿Mbaʼéichapa oikóta upéva?

11. a) ¿Mbaʼépa heʼi Jehová pe profesía oñeʼẽvare pe unida rehe ipuévlo apytépe? b) ¿Mbaʼépa Satanás oñehaʼãmbaite jey ojapo oñemosẽ rire chupe yvágagui?

¹¹ (Elee Ezequiel 37:24). Jehová heʼi vaʼekue pe profesía oñeʼẽva unida rehe oñekumplipaitetaha ipuévlo apytépe ág̃a ‘isiérvo David’, haʼéva Jesús, oñepyrũ vove ogoverna Rréiramo, ha upéva oiko kuri 1914-peb (2 Sam. 7:16; Luc. 1:32). Upe tiémpope, pe nasión de Israel oñekambiáma kuri pe Israel Ñandejára mbaʼéva rehe, haʼéva umi kristiáno unhído (Jer. 31:33; Gál. 3:29). Satanás oñehaʼãmbaite jey ohundi pe unida oĩva Ñandejára puévlope, koʼýte oñemosẽ rire yvágagui (Apoc. 12:7-10). Por ehémplo, ermáno Russell omano rire 1916-pe, Satanás ojevale umi apóstatare oñehaʼã hag̃ua odividi umi unhídope. Péro upéi umi apóstata osẽ Jehová organisasióngui. Avei Satanás oguerahaka kárselpe umi ermáno omotenondévape pe organisasión upe tiémpope, péro upéva nohundíri vaʼekue Jehová puévlope. Umi unhído osegi ifiél Jehovápe ha oĩ en unida.

12. ¿Mbaʼérepa Satanás ndaikatúi odividi pe Israel Ñandejára mbaʼévape?

¹² Upéicharõ, pe oiko vaʼekue pe nasión de Israel rehe ndoikói pe Israel Ñandejára mbaʼévare, pórke haʼekuéra ndoʼái Satanás ñuhãme ha ndojedividipái hikuái. ¿Mbaʼérepa Satanás nosẽi ijidéape oñehaʼãramo jepe? Pórke umi unhído ojapo ikatúva guive iñeʼẽrendu hag̃ua Jehovápe. Upéicha rupi oprotehe chupekuéra Irréi Jesucristo, osegíva hína ogana Satanáspe (Apoc. 6:2).

13. ¿Mbaʼe iñimportántevapa ñanemboʼe pe profesía oñeʼẽva umi mokõi yvyráre?

¹³ ¿Mbaʼépa heʼise umi mokõi profesía ñandéve g̃uarã koʼág̃arupi? Ñanemanduʼa vaʼerã pe profesía ohechauka hague umi mokõi grúpo oĩtaha unído. Ha pe iñimportantevéva katu, pe profesía ohechauka porã Jehová rupive oĩ hague pe unida. Upéicharõ, ¿mbaʼépa ñanemboʼe pe adorasión oñemeʼẽ vaʼerãgui Jehovápe pe profesía oñeʼẽva umi mokõi yvyra oñembojoajúvare? Ohechauka porã ko mbaʼe iñimportánteva: Jehová voi ounitaha umi oadorávape chupe ha oikóta chuguikuéra ‘peteĩnte’ (Ezeq. 37:19).

14. ¿Mbaʼéichapa pe profesía oñeʼẽva umi mokõi yvyráre oreko vaʼekue peteĩ kumplimiénto tuichavéva 1919 guive?

¹⁴ Pe profesía oñeʼẽva umi mokõi yvyráre oñepyrũ vaʼekue oreko peteĩ kumplimiénto tuichavéva 1919 guive, oñemopotĩ rire Ñandejára puévlope ha oĩ rire hendive pyʼaguapýpe oadora hag̃ua chupe. Upe tiémpope, la majoría umi oñembyatýva oĩ hag̃ua en unida, ohaʼarõ vaʼekue oiko chuguikuéra rréi ha saserdóte yvágape (Apoc. 20:6). Umi unhído haʼete vaʼekue pe yvyra “Judápe g̃uarã”, peteĩ nasión oĩháme David familiare ha umi saserdóte levita. Péro tiémpo rire, heta hetave umi orekóva esperánsa oiko hag̃ua ko yvy ape ári oñepyrũ omoirũ umi unhídope. Koʼã omoirũva chupekuéra haʼete pe yvyra “orrepresentáva Efraínpe”, peteĩ nasión oĩháme umi rréi ndoúiva David familiarégui ha umi saserdóte ndoúiva Leví trívugui. Ha oñondive koʼã mokõi grúpo oservi en unida Jehovápe pe Rréi Jesucristo poguýpe (Ezeq. 37:24).

15. ¿Mbaʼéichapa oñekumpli koʼág̃arupi umi mbaʼe ojeprofetisa vaʼekue Ezequiel 37:26, 27-pe?

¹⁵ Ezequiel profesía ohechauka hetaiterei hénte omoirũsetaha umi unhídope oadora hag̃ua Jehovápe haʼe oipotaháicha. Haʼe heʼi voi ipuévlore: “Ambohetáta chupekuéra”, ha “che róga kárpa oĩta hiʼarikuéra” (Ezeq. 37:26, 27, nóta). Koʼã mbaʼe heʼíva ñanemomanduʼa apóstol Juan oprofetisa vaʼekuére, oiméne 700 áñorupi Ezequiel tiémpo rire. Juan heʼi: “Ñandejára pe oguapýva pe trónope, oipysóta hiʼarikuéra hóga kárpa” ha oipysóta upéva “peteĩ aty guasu” ári (Apoc. 7:9, 15 nóta). Ko tiémpope, umi unhído ha pe aty guasu oservi oñondive Jehovápe peteĩ tetãicha, haʼéva Ñandejára puévlo, ha haʼe oprotehe chupekuéra hóga kárpa guýpe.

16. ¿Mbaʼépa oprofetisa vaʼekue Zacarías ohechaukáva oikotaha en unida umi unhído ha umi orekóva esperánsa oiko hag̃ua ko yvy ape ári?

¹⁶ Zacarías oprofetisa vaʼekue avei oĩtaha en unida umi unhído ha umi ohaʼarõva oiko ko yvy ape ári. Ko proféta ningo ou jey vaʼekue avei hetãme umi ótro prisionérondi. Haʼe heʼi vaʼekue ‘10 kuimbaʼe oĩva umi nasiónpe oñakarama hatãtaha peteĩ judío aóre’, ha heʼitaha hikuái: “Ore rohose penendive, pórke rohendu Ñandejára oĩha penendive” (Zac. 8:23). Ojeʼévo “peteĩ judío” noñeñeʼẽi hína peteĩ persónarente, síno peteĩ grúpore, upévare ojeʼe “penendive”. Koʼãva orrepresenta hína umi unhído oikóva gueteri ko yvy ape ári (Rom. 2:28, 29). Umi “10 kuimbaʼe” orrepresenta umi orekóvape esperánsa oiko hag̃ua ko yvy ape ári. Haʼekuéra ‘oñakarama hatã’ umi unhídore ha ‘oho hendivekuéra’ (Is. 2:2, 3; Mat. 25:40). Heʼívo ‘oñakarama hatãtaha’ ha ‘ohoseha hendivekuéra’ ojehechauka porã umi mokõi grúpo oĩha en unida kompléta.

17. ¿Mbaʼépa heʼi vaʼekue Jesús pe unida jarekóvare ko tiémpope?

¹⁷ Oiméne Jesús imanduʼa rakaʼe Ezequiel profesía oñeʼẽvare umi mokõi yvyráre ha oikóva chugui peteĩnte, heʼírõ guare pe jatopáva Juan 10:16-pe. Upépe haʼe heʼi oikotaha chugui peteĩ pastór ojapótava ijovechakuéragui “peteĩ ovecha atýnte”: Umi ovecha oĩvagui ipoguýpe (umi unhído) ha umi “ótro ovechakuéra” (umi ohaʼarõvagui oiko ko yvy ape ári) (Ezeq. 34:23; 37:24, 25). Koʼã mbaʼe heʼi vaʼekue Jesús ha umi proféta yma guare, ohechauka porã jarekotaha peteĩ unida ijojahaʼỹva ko tiémpope, tahaʼe haʼéva pe esperánsa jarekóva. Umi rrelihión fálsa ningo ojedividi hetaiterei grúpope, ñande katu jareko peteĩ unida ijojahaʼỹva.

18. Heʼiháicha Ezequiel 37:28, ¿mbaʼérepa iñimportantete Ñandejára puévlo ‘ndoikói ko múndope ojeikoháicha’?

¹⁸ Opakuévo Ezequiel profesía oñeʼẽva pe unida rehe, ojehechauka porã mbaʼérepa ikatu ñaime segúro pe unida jarekóva núnka ndopamoʼãiha (elee Ezequiel 37:28). Jehová puévlo oĩ en unida pórke itémplo térã pe adorasión verdadéra oĩ “ijapytepekuéra”. Péro upe témplo osegíta ijapytepekuéra haʼekuéra osegíramo ipotĩ (térã oñesantifika), upéva heʼise ndojeheʼái vaʼerãha Satanás múndore (1 Cor. 6:11; Apoc. 7:14). Jesús ohechauka iñimportanteha ndajaikói ko múndope ojeikoháicha. Pe pyhare omano mboyve haʼe oñemboʼe kuri ipyʼaite guive idisipulokuéra rehehápe, ha heʼi: “Che Ru haʼéva sánto, eprotehemína chupekuéra [...]. Péicha oiko hag̃ua chuguikuéra peteĩnte [...]. Haʼekuéra ndoikói umi hénte ko mundopegua oikoháicha [...]. Ne ñeʼẽ rupive eipytyvõ chupekuéra ipotĩ hag̃ua” (Juan 17:11, nóta, 16, 17). Jahechakuaa upéicharõ Jesús oñeʼẽ jave pe unida rehe ohechauka avei iñimportanteha ‘ndojeikói umi hénte ko mundopegua oikoháicha’.

19. a) ¿Mbaʼéichapa jahechauka ‘ñahaʼangaha Ñandejárape’? b) ¿Mbaʼépa Jesús heʼi vaʼekue pe unida rehe pe pyhare omano mboyve?

¹⁹ Ko pártepe añoite jatopa la Bíbliape Jesús heʼiha Ñandejárare: “Che Ru haʼéva sánto”. Jehová ningo ipotĩeterei ha ihústo entéro mbaʼépe. Haʼe omanda vaʼekue umi israelítape: “Peẽ penepotĩ ha penderekoporã vaʼerã, pórke che sánto hína” (Lev. 11:45). Ñande ningo ‘ñahaʼanga Ñandejárape’ ha upévare ñañehaʼã vaʼerã ñanepotĩ entéro mbaʼe jajapóvape (Efes. 5:1; 1 Ped. 1:14, 15). Ojeʼe jave yvyporakuérare ‘ipotĩ ha hekoporã vaʼerãha’ heʼise “ojeapartaha” Jehová servísiope g̃uarã. Pe pyhare omano mboyve, Jesús heʼi vaʼekue idisipulokuéra osegitaha en unida ojeapartáramo, térã ndojeheʼáiramo hikuái ko múndo oĩvare dividído.

20, 21. a) ¿Mbaʼérepa ñaimeve segúro Jehová ñandeproteheha? b) ¿Mbaʼépa jajedesidíma jajapo?

²⁰ Jesús ojerure vaʼekue iñemboʼépe: ‘Eñangareko hesekuéra oĩgui Satanás’. Ha jahechakuaa Jehová okontesta hague upe ñemboʼe oĩ rupi peteĩ unida ijojahaʼỹva testígo de Jehová apytépe ko múndo tuichakuére (elee Juan 17:14, 15). Añetehápe jahechakuaa Satanás ndaikatúi hague odividi Ñandejára puévlope, upévare ñaimevéntema segúro Jehová ñandeproteheha hína. Ezequiel profesíape Jehová heʼi umi mokõi yvyrágui oikotaha peteĩnte ipópe. Upéicharõ Jehová voi omoĩ en unida ipuévlope ha oprotehe chupekuéra oĩ rupi ipoguýpe, upévare Satanás ndaikatúi ojapo mbaʼeve hesekuéra.

²¹ Upéicharõ, ¿mbaʼépa jajedesidi vaʼerã jajapo? Jasegitaha jajapo opa ikatúva jasegi hag̃ua jareko pe unida iporãitéva oĩva ko tiémpope. ¿Mbaʼéichapa káda uno ikatu jajapo upe mbaʼe iñimportantetéva? Jasegívo jaadora Jehovápe itémplo espirituálpe haʼe oipotahaichaite. Jahecháta mbaʼépa heʼise upéva umi kapítulo oúvape.