Jehová Ñeʼẽ ningo oikove

Mbaʼe mbaʼépa ñanemboʼe Ezequiel (párte 2)

DICIEMBRE áño 609-pe Jesús ou mboyve, Babilonia mburuvicha omongora jey Jerusalén. Koʼa peve Ezequiel omomarandúkuri umi hudío oĩva Babilóniape oñehunditaha Jerusalén, pe táva ohayhuetéva hikuái. Koʼág̃a katu Jehová heʼi Ezequiélpe omombeʼu hag̃ua mbaʼépa oikóta umi tetã oĩvare Jerusalén jerére. Koʼã tetã ningo ovyʼáta Ñandejára puévlope ojehuhaguére ivaíva. Jerusalén oñemongora 18 mésere ha upéi oñehundi. Upe rire Ezequiel oñepyrũ omombeʼu peteĩ mbaʼe pyahu oikótava: mbaʼéichapa ojeadora jeýta Ñandejára tee, Jehovápe.

Ezequiel 25:1–48:35 omombeʼu mbaʼépa oikóta umi tetãre oĩva Israel jerére, ha avei mbaʼéicha Ñandejára puévlo isãso jeýta.a Oñemombeʼu mbaʼéichapa oikóta umi mbaʼe ha avei oñemoĩ témare. Ezequiel 29:​17-20-pe katu noñemoĩri upéicha. Ko lívro hérava Ezequiel ohechauka Ñandejára Ñeʼẽ añetehápe ‘oikove ha ipuʼakaha’ (Hebreos 4:12).

‘KÓVA KO YVY HAʼETE YVOTYTY EDENPEGUA’

(Ezequiel 25:1–39:29)

Jehová oikuaa heta tetã ovyʼataha ohechávo Jerusalén oñehundihague. Upévare heʼi Ezequiélpe oñeʼẽ hag̃ua Ammón, Moab, Edom, Filistea, Tiro ha Sidón rehe. Heʼi avei Egipto oñemondapataha. ‘Faraón, mburuvicha guasu Egiptoygua ha hetãgua’ oñembojoja peteĩ cédrore. Ojeʼe “Babilonia ruvicha guasu kyse puku” oikytĩha ko yvyra máta (Ezequiel 31:​2, 3, 12; 32:​11, 12).

Seis mése rupi Jerusalén oñehundi rire 607-pe, peteĩ kuimbaʼe okañyvaʼekue upégui og̃uahẽ omombeʼu Ezequiélpe pe “táva guasu hoʼahague”. Upépe ae Ezequiel ‘oñeʼẽ jey’ umi hudíope oĩva Babilóniape (Ezequiel 33:​21, 22). Haʼe oikuaaukavaʼerã chupekuéra Jerusalén oñemopuʼã jeytaha. Jehová ‘omoĩta ijovechakuéra renondépe hembiguái David’ (Ezequiel 34:23). Edom oñehundíta, ha Judá oĩva ijypýpe, ojoguáta “yvotyty Edenpegua” (Ezequiel 36:35). Jehová opromete oñangarekotaha ipuévlore “Gog” opuʼã vove hesekuéra (Ezequiel 38:2).

Porandukuéra:

29:​8-12. Arakaʼépa Egipto opytáraʼe ñembyaikuepa 40 áñore? Oñehundi rire Jerusalén 607-pe heta hudío oho Egíptope, jepe Jeremías heʼi chupekuéra ani hag̃ua ojapo upéva (Jeremías 24:​1, 8-10; 42:​7-22). Upéicharõ jepe ndojesalvái hikuái, Egipto hoʼa rupi rréi Nabucodonosor poguýpe. Upéi Egipto opyta ñembyaikuepa 40 áñore. Jepe pe istória nomombeʼúi koʼã mbaʼe oikohague, ikatu jaguerovia upéicha hague. Jehová katuete okumpli umi profesía (Isaías 55:11).

29:18. Mbaʼéichapa “iñakã perõmba ha ijatiʼy aipa” hikuái? Omongorávo táva Tiro, umi soldádo Babiloniaygua hetaiterei ombaʼapo pohýi, ha ikaskokuéra omoakã perõmba chupekuéra. Avei ijatiʼykuéra ojepeʼo ha ijaipa ogueroja rupi heta mbaʼe pohýi omopuʼã hag̃ua tórre ha murálla (Ezequiel 26:​7-12).

Mbaʼépa ñanemboʼe:

29:​19, 20. Nabucodonosor ojagarráramo guare Tiro, oĩvaʼekue osẽva pe táva hoʼa mboyve ha oguerahapa lénto peteĩ íslape umi mbaʼeta orekóva. Upéicha rupi Nabucodonosor ndojagarrái heta mbaʼerepy upépe. Jepe Nabucodonosor oñemombaʼeguasueterei ha ndoadorái Jehovápe, Haʼe omeʼẽ chupe Egipto ‘ohepymeʼẽ hag̃ua iñorairõharakuérape’. Péicha opaga chupe ojapohaguére haʼe oipotáva. Iporãta avei jajapóramo Ñandejáraicha, ha japaga impuésto mburuvichakuérape. Haʼekuéra ojapo heta mbaʼe ñandéve g̃uarã. Jepe umi mburuvicha ojapo ivaíva térã ndoiporuporãi pe pláta, ñande japagavaʼerã katuete (Romanos 13:​4-7).

33:​7-9. Umi ungido ha iñirũnguéra ndokyhyjeivaʼerã opredika hag̃ua marandu porã Ñandejára goviérno rehegua ha omombeʼu hentekuérape hiʼag̃uimaha “jehasa asy tuicháva” (Mateo 24:21).

33:​10-20. Jajesalva hag̃ua tekotevẽ jajevy ñande rape vaígui ha jajapo Ñandejára ojeruréva ñandehegui. Añetehápe Jehová rape ‘hekojoja’.

36:​20, 21. Umi Israelgua ningo Jehová “retãgua”. Haʼekuéra ndojapoivaʼekue haʼe heʼíva ha péicha omongyʼa Jehová réra ambue tetã apytépe. Aníkena jaʼénte jaserviha Jehovápe ha ndajahechaukái umi mbaʼe jajapóvare.

36:​25, 37, 38. Ñaime peteĩ aty imarangatúvape oĩ porãva Jehová renondépe. Japyta hag̃ua upépe tekotevẽ ñande reko potĩ.

38:​1-23. Ajépa ñandepyʼaguapy jaikuaávo Jehová oñangarekotaha ipuévlore, Gog Magogpegua opuʼã vove hesekuéra. Gog ningo ko “yvy ruvicha”, upéicha oñehenói Satanáspe oñemosẽ rire yvágagui. Tetã Magog katu ko Yvy jere, oĩháme Satanás ha idemoniokuéra (Juan 12:31; Apocalipsis [Revelación] 12:​7-12).

‘EJESAREKO PORÃ OPA MBAʼE AHECHAUKÁTAVARE NDÉVE’

(Ezequiel 40:1–48:35)

Ojapóma 14 áño Jerusalén oñehundihague (Ezequiel 40:1). Umi hudío oĩta gueteri Babilóniape 56 áño (Jeremías 29:10). Ezequiel orekopotaitéma 50 áño. Petẽi visión rupive ohecha oikóva Israélpe. Ojeʼe chupe: ‘Emaʼẽ porã ha ehendu porãke; ejesareko porã opa mbaʼe ahechaukátavare ndéve’ (Ezequiel 40:​2-4). Mbaʼeichaitépa ovyʼáneraʼe Ezequiel ohechávo peteĩ témplo pyahu!

Pe témplo porãite Ezequiel ohecháva niko 6 hokẽ, oreko 30 koty ojekaru hag̃ua, tenda Marangatu (Santo), tenda Marangatuete (Santísimo), peteĩ altár ojejapóva yvyrágui ha peteĩ altár ojehapy hag̃ua mymba. Témplo okẽguy rupi ‘osyry’ y ha oiko chugui ysyry guasu (Ezequiel 47:1). Ezequiel ohecha avei peteĩ visiónpe oñemeʼẽvo káda trívupe ijyvyrã. Káda yvy tuicha kuarahyresẽ guive kuarahyreike peve. Benjamín ha Judá paʼũme oĩ mburuvichakuéra yvy. Avei oĩ Jehová ‘róga’ ha pe “táva” hérava Jehová-Samah (Ezequiel 48:​9, 10, 15, 35, [nóta, NM]).

Porandukuéra:

40:3–47:12. Mbaʼépa orrepresenta pe témplo Ezequiel ohechavaʼekue? Pe témplo guasuete Ezequiel ohechavaʼekue arakaʼeve noñemopuʼãi. Orrepresenta umi mbaʼe Jehová omoĩva ojeadora hag̃ua chupe koʼág̃a rupi (Ezequiel 40:2; Miqueas 4:1; Hebreos 8:2; 9:​23, 24). Ko visión oñekumpli “ára paha” aja oñemopotĩvo umi ohótava yvágape oservi hag̃ua saserdóteramo. Oñekumplipáta Ñandejára múndo pyahúpe (2 Timoteo 3:1; Ezequiel 44:​10-16; Malaquías 3:​1-3). Ezequiel oikórõ guare, ko visión ohechauka avei umi hudío oho jeytaha hetãme oadora Jehovápe, ha káda família orekotaha ijyvyrã.

40:3–43:17. Mbaʼérepa oñemedi pe témplo? Ojejapo upéva ojehechauka hag̃ua katuete ojeadora jeytaha Jehovápe, haʼe oipotaháicha.

43:​2-4, 7, 9. Mbaʼépa umi ‘mburuvicha guasukuéra retekue’ oñenohẽvaʼerã témplogui? Umíva ningo taʼangakuéra. Jerusalén mburuvichakuéra ha umi hénte omongyʼa Ñandejára témplo omyenyhẽvo taʼangágui. Umi taʼanga niko mburuvicha chupekuéra g̃uarã.

43:​13-20. Mbaʼépa orrepresenta pe altár Ezequiel ohechavaʼekue? Upe altár ningo orrepresenta Jehová ojapótava yvyporakuéra rehehápe Jesucristo sakrifísio rupi. Upe sakrifísio rupive umi ohótava yvágape oñemopotĩ ipekádogui, ha pe “aty guasu” katu oĩ porã Ñandejára renondépe (Apocalipsis [Revelación] 7:​9-14; Romanos 5:​1, 2). Oiméne upévare pe “ñaʼẽ bronce” oĩvaʼekue Salomón témplope, ha oiporúva umi saserdóte oñemopotĩ hag̃ua ndojehechái ko visiónpe (1 Reyes 7:​23-26).

44:​10-16. Mbaʼépa orrepresenta umi saserdóte? Umíva orrepresenta umi kristiáno ohótava yvágape oikóva koʼág̃a rupi. Áño 1918-pe Jehová “omopotĩ” chupekuéra “oñemopotĩháicha pláta ha óro tatápe” (Malaquías 3:​1-5). Umi oñemopotĩva térã oñembyasýva hembiapo vaikuére osegi oservi Ñandejárape. Haʼekuéra oñehaʼãmbaitevaʼerã oñeñangareko “yvy arigua teko kyʼágui”. Péicha omeʼẽ ehémplo pe ‘aty guasúpe’. Koʼãvape orrepresenta umi trívu ndoservíriva saserdóteramo (Santiago 1:27; Apocalipsis [Revelación] 7:​9, 10).

45:1; 47:13–48:29. Mbaʼépa orrepresenta pe “yvy” oñemeʼẽva káda trívupe? Pe yvy orrepresenta opa mbaʼe ojapóva Ñandejára puévlo chupe g̃uarã. Oime oimehápe Jehová siervokuéra iñeʼẽrendúramo chupe oĩ ko yvy porãme. Ko téysto oñekumplipáta ág̃a Ñandejára múndo pyahúpe. Upérõ entéro tapicha iñeʼẽrendúvape oñemeʼẽta ijyvyrã (Isaías 65:​17, 21).

45:​7, 16. Mbaʼépa pe kontrivusión oñemeʼẽva saserdóte ha mburuvichápe g̃uarã? Ñameʼẽ pe kontrivusión ñaipytyvõ jave kyreʼỹme umi omoakãvape kongregasión ha jajapo haʼekuéra heʼíva.

47:​1-5. Mbaʼépa heʼise pe y Ezequiel ohechavaʼekue osyryha? Pe y heʼise umi mbaʼe Jehová omeʼẽva ñandéve jahupyty hag̃ua jeikove opaʼỹva. Umíva apytépe Jesús sakrifísio ha la Biblia, ñanepytyvõva jaikuaa hag̃ua Chupe (Jeremías 2:13; Juan 4:​7-26; Efesios 5:​25-27). Pe ysyry hypyve ohóvo hetave tapicha oikuaa hag̃ua Jehovápe ha ojapo haʼe heʼíva (Isaías 60:22). Pe y osyry hatãvéta Cristo ogoverna aja mil áñore. Upérõ jaikuaa ha ñantendéta heta mbaʼe umi “kuatiañeʼẽ” pyahu rupi (Apocalipsis [Revelación] 20:12; 22:​1, 2).

47:12. Mbaʼépa umi yvyra rakã hiʼáva? Umi yvyra orrepresenta umi mbaʼe Jehová omeʼẽva yvyporakuéra ohupyty jey hag̃ua perfeksión.

48:​15-19, 30-35, nóta. Mbaʼépa orrepresenta pe táva Ezequiel ohechavaʼekue? Pe táva hérava “Jehová-Samah” oĩ yvy naimarangatúivape, upéva ohechauka oĩha ko Yvy ape ári. Ko táva ikatu orrepresenta umi tapicha omoakãtava “yvy ipyahúva”, koʼãva hína umi tapicha heko potĩva (2 Pedro 3:13). Ko táva heta hokẽ káda ládo, upéva ohechauka ndahasyiha jaike upépe. Péicha avei ndahasyivaʼerã ñañemboja ansianokuéra rendápe ñañeʼẽ hag̃ua hendivekuéra.

Mbaʼépa ñanemboʼe:

40:​14, 16, 22, 26. Umi palméra raʼanga oĩvaʼekue ojeikekuévo pe témplope ohechauka umi heko potĩva añoite ikatuha oike upépe (Salmo 92:12). Upéva ohechauka ñandéve, tekotevẽha ñande reko potĩ Jehová ñandeguerohory hag̃ua.

44:23. Ajépa jaagradesete umi mbaʼe omeʼẽva ñandéve pe ‘tembiguái jeroviaha ha iñarandúva’. Ojapohaguéicha umi saserdóte ymaguare, haʼekuéra ñanemboʼe ikatu hag̃uáicha jaikuaa mbaʼépa iporã térã ivai Jehová renondépe (Mateo 24:45).

47:​9, 11. Pe y orrepresenta avei umi mbaʼe oĩva Ñandejára Ñeʼẽme. Ko y rupive oñemonguerahína heta tapichápe ha ikatu oĩ porã hikuái Jehová renondépe (Juan 17:3). Umi nomombaʼéiva ko y, térã ndoikuaaséiva la Biblia heʼíva katu “ojeporúta oñerenohẽ hag̃ua chugui juky”, upéva heʼise oñehunditaha. Ajépa iñimportánte ‘ñañehaʼãmbaite ñamboʼe hekópe añetegua’ (2 Timoteo 2:15).

“Che ahechaukáta tetãnguéra apytépe che réra guasuete imarangatuha”

Ojepeʼa rire pe último rréi oúva David familiarégui, Jehová are ohaʼarõ ou peve haʼe oiporavóva ogoverna hag̃ua. Péro Ñandejára ndohejareíri ikompromíso ojapovaʼekue David ndive (Ezequiel 21:32 [21:​27, NM]; 2 Samuel 7:​11-16). Ezequiel omombeʼu Jehová heʼiha David rehe “che rembiguái” ha oikotaha ovechakuéra ‘rerekua’ ha ‘mburuvicháramo’ (Ezequiel 34:​23, 24; 37:​22, 24, 25). Upe ovecha rerekua ha mburuvicha niko Jesucristo ogovernávo Ñandejára rréinope (Apocalipsis [Revelación] 11:15). Jehová ‘ohechaukáta héra guasuete imarangatuha’ ko goviérno rupive (Ezequiel 36:23).

Koʼẽrõitéma oñehundíta entéro omongyʼáva Ñandejára réra marangatu. Péro umi omombaʼeguasúva Ñandejára réra ha ojapóva haʼe oipotáva ohupytýta jeikove opaveʼỹva. Upéicharõ, ñañehaʼãkena jayʼu pe y omeʼẽvagui tekove ha osyry hatãva koʼág̃a rupi. Ha jaikókena ñamombaʼeguasu hag̃ua Jehovápe.

[Nóta]

[Nóta oĩva taʼanga ndive páhina 7]

Témplo guasuete Ezequiel ohechavaʼekue

[Nóta oĩva taʼanga ndive páhina 8]

Mbaʼépa orrepresenta ysyry Ezequiel ohechavaʼekue?

[Roagradese]

Pictorial Archive (Near Eastern History) Est.