Jehová oñangareko porã isiervokuéra ijedávare

‘Ñandejára niko hekojoja ha ndahesaraimoʼãi umi pejapovaʼekuégui ha mborayhu pehechaukavaʼekue chupe.’ (HEB. 6:10.)

1, 2. a) Jahechávo ñane ermanokuéra ijedávape, mávarepa ñanemomanduʼa? b) Mbaʼéichapa Jehová ohecha isiervokuéra ijedávape?

JAHECHÁVO ñane ermanokuéra ijedávape oiméne ñanemomanduʼa Daniel heʼíva Jehováre. Haʼe omombeʼu ohecháva péicha: ‘Amaʼẽvévo ahecha oñemoĩha guapyhápe peteĩ Itujaitéva oguapy hag̃ua, ijao ha iñakãrague morotĩ ovecha rague oñemopotĩmbyréicha’ (Dan. 7:9, ÑÑB).

² Ovecha rague ningo morotĩ ha upévare Daniel ombojoja Ñandejára akãraguére. Avei heʼi hese “Itujaitéva”, koʼã mbaʼe ohechauka Jehová oikoveha ymaiterei guivéma ha iñarandu ndaijojahái. Jaikuaávo koʼã mbaʼe ñamombaʼeterei chupe. Péro mbaʼéichapa Jehová ohecha isiervokuéra ijedávape? La Biblia heʼi: ‘Akãrague morotĩ ombojegua karaiete ha kuñakarai akã, upéva oĩramo hustísia rapépe’ (Pro. 16:31, ÑÑB). Upéicharõ, Ñandejára omombaʼeterei isiervokuéra ijedávape osegíva ojerovia mbarete hese. Ñamombaʼépa avei chupekuéra?

Mbaʼérepa jahayhuete chupekuéra?

 3. Mbaʼérepa jahayhuete ñane ermanokuéra ijedávape?

³ Ñane ermanokuéra ijedáva apytépe oĩ umi oservíva Cuerpo Gobernánteramo, umi superintendénte térã umi haʼevaʼekue, prekursór ha umi oĩva ñanendive kongregasiónpe. Oiméne jaikuaa peteĩ ermáno térã ermána aréma opredikáva kaneʼõʼỹre marandu porã, ha omoĩva ehémplo neporãva umi imitãvévape. Hetápe oñemeʼẽ tuicha rresponsavilida ha ojepersegi opredika haguére. Jehová ha pe “tembiguái jeroviaha ha iñarandúva” omombaʼeterei koʼã ermáno ojapovaʼekue ha ojapóva gueteri Ñandejára goviérno rehehápe (Mat. 24:45).

 4. Mbaʼérepa jarrespetavaʼerã ñane ermanokuéra ijedávape ha ñañemboʼe hesekuéra?

⁴ Ñande jaservíva Jehovápe ñamombaʼe ha jahayhuvaʼerã koʼãichagua ermánope. Pe Léi Ñandejára omeʼẽvaʼekue Israélpe heʼi umi okyhyjéva Jehovágui omombaʼe ha otrata porã vaʼerãha umi ijedávape (Lev. 19:32). Ñañemboʼékena hesekuéra ha jaagradese Jehovápe hetaite ombaʼapo porã haguére. Apóstol Pablo oñemboʼevaʼekue iñirũnguérare, imitã ha itujávare (jaleemína 1 Tesalonicenses 1:2, 3).

 5. Mbaʼérepa ikatu ñaaprende heta mbaʼe umi ermáno ijedávagui?

⁵ Enterove ikatu ñaaprende chuguikuéra. Haʼekuéra ohasáma heta mbaʼe ha heta tiémpoma ostudia la Biblia, upévare oikuaave ñandehegui. Avei ipasiensiave ha imbaʼerechakuaa, haʼekuéra ningo ovyʼa omboʼévo oikuaáva umi imitãvévape (Sal. 71:18). Jaikuaa heta ñañehaʼãvaʼerãha ñanohẽ hag̃ua y peteĩ póso ipypukúvagui, upéicha avei umi imitãva oñehaʼãramo oaprendéta heta mbaʼe chuguikuéra (Pro. 20:5).

 6. Mbaʼéichapa jahechaukáta ñamombaʼeha ñane ermanokuéra ijedávape?

⁶ Mbaʼéichapa jahechaukáta umi ermáno ijedávape ñande ñamombaʼeha avei chupekuéra? Ikatu jaʼe chupekuéra ñamombaʼeha heta tiémpoma oservi porã haguére Jehovápe, ha jaguerohoryha umi konsého omeʼẽva. Avei jajapóramo heʼíva ñandéve jahechaukáta nañañeʼẽreiriha. Katuete ningo haʼekuéra imitãrõ guare ohendu avei umi ermáno ijedávape. Ha omombaʼégui ojeʼéva chupekuéra, koʼág̃a peve ovyʼa hikuái.a

Mbaʼéichapa jahechaukáta jahayhuha chupekuéra

 7. Mávapa oñangarekovaʼerã umi ijedávare?

⁷ Jehová heʼi umi ijedávare oñangarekovaʼerãha ihentekuéra (jaleemína 1 Timoteo 5:4, 8). Chupe ombovyʼa umi família ojapóva upéva ha omombaʼéva hogayguakuéra ijedávape. Katuete Jehová oipytyvõta chupekuéra osẽ porã hag̃ua.b

 8. Mbaʼérepa kongregasiónpe oñeñangarekovaʼerã umi ermáno ijedávare?

⁸ Péro Jehovápe avei ombovyʼa kongregasiónpe oñeñangarekóramo umi ermáno ndorekóivare hogaygua oservíva Chupe, térã oñangarekoséva hesekuéra (1 Tim. 5:3, 5, 9, 10). Péicha ikatu jahechauka ñanembaʼeporãha, japorohayhu ha japoroporiahuverekoha (1 Ped. 3:8). Ohechauka hag̃ua kristianokuéra ojepyʼapyha ojuehe, Pablo oñeʼẽ ñande retére ha heʼi hasýramo ñandéve peteĩ párte ‘opavave hembýva ohasa asyha avei’ (1 Cor. 12:26). Jahecháramo mbaʼépa oikotevẽ ñane ermanokuéra ijedáva ha ñaipytyvõ chupekuéra, jajapoñaína Pablo heʼíva: ‘Peñopytyvõ peropuʼaka hag̃ua opaichagua mbaʼe pohýi, ha upéicharõ pejapóne Cristo léi heʼiháicha’ (Gál. 6:2).

 9. Mbaʼépa hína umi “mbaʼe pohýi” ogueropuʼakáva ñane ermanokuéra ijedáva?

⁹ Mbaʼépa umi “mbaʼe pohýi” ogueropuʼakáva umi ijedáva? Oĩ umi ikaneʼõ reíva ha ojepyʼapyetereíva ohótaramo doktórpe térã opaga ideveha, okosina térã omopotĩtaramo hóga. Umi ijedáva ningo ndaijuruhevéi, ha upévare oĩ umi ndokaruporãiva térã ndoyʼúiva tekotevẽháicha. Ha ikatu avei nomombaretevéi ijerovia. Heta oĩ ndohechaporãvéiva térã nohenduporãvéiva, ha upévare hasy chupekuéra olee hag̃ua lívro ha rrevistakuéra, térã ohendu hag̃ua rreunionhápe. Heta vése ijetuʼúma chupekuéra oñembosakoʼi oho hag̃ua rreunionhápe. Mbaʼéichapa ikatu ñaipytyvõ chupekuéra?

Mbaʼéichapa ikatu ñaipytyvõ

10. Mbaʼépa ojapo ansianokuéra oipytyvõ hag̃ua umi ijedávape?

¹⁰ Heta kongregasión oñangareko porãiterei umi ermáno ijedávare. Pór ehémplo, oĩ umi ermáno ohóva ojogua chupekuéra oikotevẽva, omopotĩva hóga térã okosináva chupekuéra. Avei ostudia ha osẽ hendivekuéra opredika, ha ogueraha chupekuéra rreunionhápe térã tekotevẽhápe oho. Ha ndaikatúiramo osẽve hógagui, ograva chupekuéra umi rreunión térã ohenduka teléfono rupive. Umi ansiáno oñehaʼãmbaite oñeñangareko porã hag̃ua umi ermáno ijedávare.c

11. Emombeʼumi mbaʼéichapa peteĩ família oipytyvõ peteĩ ermánope.

¹¹ Natekotevẽi ningo ojeʼe raẽ ñandéve ñaipytyvõ hag̃ua peteĩ ermáno ijedávape, ñandejeheguíntema jajapovaʼerã upéva. Jahechamína peteĩ káso. Omano rire hembireko, peteĩ ermáno tujami opyta haʼeño ha ndohupytyvéi opaga hag̃ua alkilér. Haʼekuéra ningo omboʼevaʼekue la Biblia peteĩ karai ha ifamíliape. Ohechávo ko ermáno ohasáva, pe família ogueraha chupe oiko hag̃ua hendivekuéra. Tuicha ningo hóga hikuái ha omeʼẽ chupe mokõi koty oiko hag̃ua. Pe óga jára mokõi itajýra ha koʼã mitãkuña heta mbaʼe oaprende pe ermánogui, ha haʼe ovyʼa hendivekuéra. Haʼekuéra ojepokuaaiterei ojuehe ha pe ermáno oiko hendivekuéra 15 áño, omano meve, orekórõ guare 89 áño. Ko família ovyʼaiterei oñangareko haguére hese ha oagradese Ñandejárape upéva. Ha ajépa iporãite ko mbaʼe ojapóva hikuái! (Mat. 10:42.)d

12. Mbaʼéichapa ikatu jahechauka jahayhuha ñane ermanokuéra ijedávape?

¹² Ndaikatúiramo jepe jagueraha peteĩ ermáno térã ermána ijedávape oiko hag̃ua ñanendive, ikatu ñaipytyvõ chupekuéra oho hag̃ua rreunionhápe térã osẽ hag̃ua opredika. Avei ñainvitakuaa chupekuéra ou hag̃ua ñande rógape térã jagueraha ñambopasea. Ha oiméramo hasy térã ndaikatuvéima osẽ hógagui, jahavaʼerã ñañandumi. Péro aníke ñanderesarái haʼekuéra ndahaʼeiha mitã. Upévare ojedesidítaramo oimeraẽ mbaʼe oñeporandu raẽ vaʼerã chupekuéra mbaʼépa opensa. Ha jepe okalukáma jatrata porã ha jarrespetavaʼerã chupekuéra.

Jehová ndahesaraimoʼãi pejapovaʼekuégui

13. Mbaʼérepa jahechakuaavaʼerã umi ijedáva oñandúva?

¹³ Tekotevẽ ñanemanduʼa mbaʼéichapa oñeñandu jepi ñane ermanokuéra ijedáva. Sapyʼánte ikatu oñembyasy ndaikatuvéigui ojapo ymaguaréicha. Pór ehémplo, peteĩ ermána oservímava Jehovápe 50 áño rupi ou hasy, ha ndaikatuvéi oho meme rreunionhápe. Haʼe ningo precursora regular vaʼekue. Peteĩ jey imanduʼávo mbaʼéichapa opredikámi vaʼekue hesay pororopa. Oñakãity ha heʼi: “Koʼág̃a ningo ndaikatuvéima ajapo mbaʼeve”.

14. Mbaʼéichapa umi salmo omokyreʼỹ umi ijedávape?

¹⁴ Oiméramo ndetuja térã neg̃uaig̃ui, reñeñandúmapa avei péicha? Sapyʼántepa repensa Jehová hesaraiha ndehegui? David oñeñandúneraʼe péicha itujávo, ha upévare ojerure Jehovápe: ‘Chetujávo ani chereja rei, chekangývo ani nderesarái chehegui. Koʼág̃a niko chetujáma ha che akã iñapatĩ, Ñandejára, anítei chereja rei’ (Sal. 71:9, 18). Jehová ndohejareíri Davídpe ha nanderejamoʼãi ndéve avei. Ambue sálmope David heʼi ojeroviaitereiha Jehová oipytyvõtaha chupe (jaleemína Salmo 68:19). Rejepytasóramo nde jeroviáre, Jehová nepytyvõta koʼẽ koʼẽre.

15. Mbaʼépa oipytyvõta umi ijedávape ovyʼa hag̃ua?

¹⁵ Jehová akóinte imanduʼáta nde rejapovaʼekuére ha ohecha mbaʼéichapa reñehaʼã remombaʼeguasu chupe. Haʼe ‘niko hekojoja ha ndahesaraimoʼãi umi pejapovaʼekuégui ha mborayhu pehechaukavaʼekue chupe’ (Heb. 6:10). Upévare aníkena repensa nderevaleveimaha mbaʼeverã ha ndaikatuveimaha rejapo mbaʼeve Jehovápe g̃uarã. Ikuentave ningo repensa umi mbaʼe porãre, pór ehémplo umi rehupytýmava ha ñane esperánsa ijojahaʼỹvare. Ñane renonderã ningo iporãiterei ha Jehová ndaijapúi (Jer. 29:11, 12; Hech. 17:31; 1 Tim. 6:19). Nemanduʼa memékena umi mbaʼe porã ñahaʼarõvare, eñehaʼã nderetiaʼe ha ani nderesarái mbaʼéichapa oñekotevẽ nderehe kongregasiónpe.e

16. Mbaʼérepa peteĩ ermáno heʼi ndaikatuveimaha oservi ansiánoramo, ha mbaʼérepa okambia opensáva?

¹⁶ Jahechamína oikovaʼekue Juan rehe, peteĩ ermáno orekóva 80 áño. Hembireko Sara ningo ndoguatái, upévare haʼe oñangareko hese ára ha pyhare.f Umi ermána opyta jepi Sara ndive ikatu hag̃uáicha ko ermáno oho rreunionhápe ha osẽ opredika. Péro ndaʼaréi, ojepyʼapyetereígui opensa ndaikatuveimaha oservi ansiánoramo. Hesaypa ningo heʼívo: “Maʼerã piko asegíta ansiánoramo? Ndajapovéima ningo mbaʼeve kongregasiónpe”. Umi ansiáno heʼi chupe opensamie hag̃ua, ha saʼímaramo jepe ojapo oikotevẽha hese hikuái oikuaavégui chuguikuéra. Upéva omokyreʼỹ chupe ha osegi ansiánoramo, upévare enterovéva ovyʼa kongregasiónpe.

Jehová omombaʼeterei umi ijedávape

17. Mbaʼépa heʼi la Biblia umi ijedávare?

¹⁷ La Biblia ohechauka umi ermáno ijedáva ikatuha gueteri ojapo heta mbaʼe Jehovápe g̃uarã. Pe salmísta ohai: ‘Umíva oñeñoty Ñandejára róga guasúpe. Ituja rire jepe hiʼa porã, imbarete ha hovyũ asy’ (Sal. 92:13, 14, ÑÑB). Oiméne apóstol Pablo hasykatúraʼe, upévare heʼi: ‘Ndaorepyʼakangýi, ore retekuéramo jepe rohóvo’ (jaleemína 2 Corintios 4:16-18).

18. Mbaʼérepa tekotevẽ ñaipytyvõ umi ijedávape ha umi oñangarekóvape hesekuéra?

¹⁸ Umi ijedáva ikatu gueteri ojapo heta mbaʼe, ha oĩ heta ehémplo ohechaukáva upéva. Haʼekuéra ombohovái heta provléma, pór ehémplo ikatu nahesãivéi oñangarekóramo jepe hesekuéra ifamília. Avei umi oñangarekóva hesekuéra ikatu ikaneʼõ. Upévare, enterovéva kongregasiónpe jahechaukavaʼerã jahayhuha chupekuéra ha umi oñangarekóvape hesekuéra (Gál. 6:10). Ndahaʼéi jaʼénteva: “Toho porãite ndéve. Eñeñuvã roʼýgui ha ekaru”; ñaipytyvõvaʼerã katu chupekuéra ijahápe ñandéve (Sant. 2:15-17).

19. Mbaʼépa ojapóta Jehová umi ijedámavare?

¹⁹ Umi ijedáva ndaikatuvéi ojapo Jehovápe g̃uarã ymaguaréicha, péro Haʼe ohayhuverei chupekuéra ojerovia haguére hese. Haʼe omombaʼeterei ha ndohejareimoʼãi chupekuéra arakaʼeve (Sal. 37:28; Isa. 46:4). Katuete Jehová oñangarekóta hesekuéra opa ára (Sal. 48:14).

[Nóta]

Mbaʼépa ñambohováita?

• Mbaʼérepa jahayhuete umi ermáno ijedávape?

• Mbaʼéichapa ikatu jahechauka jahayhuha ñane ermanokuéra ijedávape?

• Mbaʼépa omokyreʼỹta umi ermáno ijedávape?

[Nóta oĩva taʼanga ndive páhina 23]

Kongregasiónpe enterove omombaʼe umi ijedávape