Oñeporandúva jepi

Entéro Jehová siérvo orrespeta la Biblia heʼíva odesidíta jave mbaʼéichapa oñedefendéta ha oñangarekóta ijehe. Ñandejára Ñeʼẽ ohechauka naiporãiha kristianokuéra oipuru pistóla, rrífle ni mbaʼeveichagua árma ojeprotehe hag̃ua ótra persónagui. Jahechamína mbaʼépa ikatu ñanepytyvõ jadesidi porã hag̃ua:

Jehovápe g̃uarã ningo sagrádo yvyporakuéra rekove. David oskrivi vaʼekue: “Ñandejára, nde ningo remeʼẽ la vída enterovépe” (Sal. 36:9, TNM). Upéicharõ, peteĩ kristiáno oñedefendétarõ térã odefendétarõ ikosakuéra, ojapo vaʼerã opa ikatúva ani hag̃ua ojuka hapichápe, upeichaʼỹrõ haʼéta kulpávle oñohẽ haguére “tuguy” (Deut. 22:8, TNM; Sal. 51:14).

Añetehápe ningo oimeraẽ mbaʼe jaipurúva ñañedefende hag̃ua ikatu hína ojuka ñande rapichápe. Péro jaipurúramo peteĩ árma ndahasyive japorojuka hag̃ua, ndajajaposéiramo jepe upéva.a (Elee pe nóta). Avei peteĩ mondaha inerviósoramo ha ohecháramo pe ótra persóna orekoha árma, pe situasión ipeligrosovéta ha ikatu voi oĩ omanóva.

Pe pyhare Jesús omano mboyve heʼi idisipulokuérape okonsegi hag̃ua ijespadarã, péro haʼe ndojeruréi upéva oipotágui oipuru hikuái espáda oñedefende hag̃ua (Luc. 22:36, 38). Jesús omboʼese idisipulokuérape peteĩ mbaʼe iñimportantetereíva: ndovaleiha oñorairõ oĩramo jepe heta persóna oúva oataka chupekuéra árma reheve (Luc. 22:52). Pedro onambiʼórõ guare ijespádape peteĩ saserdóte ruvichakuéra esklávope, Jesús heʼi chupe: “Eñongatu jey nde espáda ilugárpe”. Upe rire haʼe heʼi peteĩ mbaʼe entéro kristiáno orekóva enkuénta koʼag̃aite peve: “Umi oiporúva guive pe espáda, ojejukáta espádape” (Mat. 26:51, 52).

Miqueas 4:3 heʼi Ñandejára puévlore: “Umi hénte ojapóta ijespádagui arádo, ha ilánsagui ojapóta erramiénta ojepoda hag̃ua” (TNM). Opárupi ojekuaa umi kristiáno tee oñehaʼãha oiko pyʼaguapýpe. Haʼekuéra ningo oñehaʼã okumpli koʼã mandáto Ñandejára omeʼẽ vaʼekue apóstol Pablo rupive: “Avavépe ani pemyengovia ivaíva ivaívape”, ha “peñehaʼãmbaitékena peiko pyʼaguapýpe enterove pende rapichakuéra ndive” (Rom. 12:17, 18). Pablo oskrivi vaʼekue koʼã mbaʼe ohasáramo jepe heta situasión ijetuʼúva, por ehémplo ojapeligrárõ guare umi “mondaha káusare”. Upéicharõ jepe, haʼe nomboykéi la Biblia heʼíva ikatu hag̃uáicha oñedefende (2 Cor. 11:26). Upéva rangue, haʼe ojerovia Jehováre ha oikuaa umi konsého oĩva Ñandejára Ñeʼẽme iporãveha “umi árma ojepurúvagui gerrahápe” (Ecl. 9:18, TNM).

Kristianokuéra omombaʼeve hekove umi mbaʼerepýgui. Jaikuaaháicha, ñande rekove nodependéi umi mbaʼe jarekóvare (Luc. 12:15). Peichahágui oĩramo ñandeasaltáva ha orekóva árma, ñañehaʼã vaʼerã ñañeʼẽ chupe trankílo porãnte. Upéicharõ jepe haʼe noñekalmáirõ, iporãta ñanearandu ha jasegi ko konsého Jesús omeʼẽ vaʼekue: “Ani peñemoĩ iñañávare”. Upéva heʼise sapyʼánte tekotevẽtaha jaheja oraha la orahaséva (Mat. 5:39, 40; Luc. 6:29).b Ñanemanduʼa vaʼerã ndovaleiha jajapeligra. Upéva rangue iporãve jasegi umi konsého oĩva la Bíbliape ha ndajaikói “jajechaukase umi mbaʼe jarekóvare”. Péicha jajapóramo nañameʼẽmoʼãi juruja umi mondahápe ñandeperhudika hag̃ua (1 Juan 2:16). Avei, ñane vesinokuéra ohechakuaáramo ñande testígo de Jehová jaikoseha pyʼaguapýpe, jajehekýita heta mbaʼe vaígui (Prov. 18:10).

Kristianokuéra orrespeta hapichakuéra konsiénsia (Rom. 14:21). Kongregasiónpe ojekuaáramo peteĩ ermáno orekoha árma oñedefende hag̃ua, ikatu oĩ ojagarra vaíva upéva térã ombotropesa voi algúnope. Jahayhu rupi ñane ermanokuérape nañapensamoʼãi ñandejehénte, umi léi opermitíramo jepe jareko árma (1 Cor. 10:32, 33; 13:4, 5).

Kristianokuéra omoĩse ehémplo porã hapichakuérape (2 Cor. 4:2; 1 Ped. 5:2, 3). Peteĩ ermáno orekóramo árma oñedefende hag̃ua, iporãta umi ansiáno omeʼẽramo konsého bíblico chupe. Upéicharõ jepe pe ermáno odesidírõ osegi oreko, ndahaʼemoʼãi ehémplo porã kongregasiónpe. Upévare, ndaikatumoʼãi oñemeʼẽ chupe mbaʼeveichagua rresponsavilida ni priviléhio kongregasiónpe. Péicha ojejapóta avei peteĩ kristiáno oipurúvare árma itravahohápe, ojexihi rupi chupe. Ko situasiónpe iporãvéta pe ermáno ohekárõ ótro traváho.c

Peteĩ kristiáno ningo odesidi vaʼerã ijeheguiete mbaʼéichapa ojeprotehéta, ha mbaʼéicha oprotehéta hogayguakuérape ha ikosakuéra. Avei haʼete ohecha vaʼerã mbaʼépepa ombaʼapóta. Péro odesidi mboyve mbaʼépa ojapóta, tekotevẽ oraha enkuénta la Biblia heʼíva. Ñandejára ningo omeʼẽ ñandéve umi konsého iporãva ñanderayhúgui. Upéicha rupi umi ermáno omombaʼéva iñamista Jehovándi, odesidínte ndorekomoʼãiha árma ojeprotehe hag̃ua. Haʼekuéra oikuaa ojeroviárõ Ñandejárare ha ojapórõ la Biblia heʼíva, oikotaha pyʼaguapýpe opa ára g̃uarã (Sal. 97:10; Prov. 1:33; 2:6, 7).