Jaservi Jehovápe peteĩ ñeʼẽme

ISRAEL ningo ogueraha vaʼekue 1.500 áñorupi Jehová réra. Upéi ‘Ñandejára imanduʼa umi hénte ótro tetãyguáre, ha ijapyteguikuéra haʼe oñepyrũma oiporavo peteĩ puévlo ogueraha vaʼerã héra’ (Hech. 15:14). Pe puévlo oguerahátava héra haʼe vaʼerã kuri Itestígo. Oiko vaʼerã avei peteĩ ñeʼẽme umi mbaʼe opensáva ha ojapóvape, tahaʼe haʼéva pe lugár oikohápe. Jesús heʼi vaʼekue idisipulokuérape: “Tapeho pemboʼe umi hénte entéro paisguápe oiko hag̃ua chuguikuéra che disípulo, ha pevautisa chupekuéra pe Túa, pe Taʼýra ha pe espíritu sánto rérape. Ha pemboʼe chupekuéra ojapo hag̃ua entéro mbaʼe amanda vaʼekue peẽme” (Mat. 28:19, 20). Ojejapo rupi ko tembiapo, oñembyaty heta persónape oike hag̃ua pe puévlo oguerahávape Ñandejára réra.

² Ñande ningo ñañemeʼẽ Jehovápe ha jajevautisa, upévare oiko ñandehegui Jesús disípulo. Jehová puévlope oĩ ermáno de diferénte país ha trívu, oĩ ipláta hetáva ha imboriahúva, ijestudioʼíva ha ijestúdio hetáva. Upéicharõ jepe, peteĩ famíliaicha jaiko peteĩ ñeʼẽme (Sal. 133:1). Ikatu yma ndajaaseptái umi hénte ótro paisgua, ipire kolór idiferéntevape térã orekóva peteĩ edukasión o kriánsa idiferénteva ñandehegui. Péro koʼág̃a jahayhu ha jarrespeta entéro ñane ermanokuérape. Umi oĩva peteĩ famíliape ningo ojoayhu, upéicha avei umi oñoamígova ha umi oĩva peteĩ rrelihiónpe. Péro pe mborayhu oĩva ñande apytépe imbareteve umívagui (Mar. 10:29, 30; Col. 3:14; 1 Ped. 1:22).

³ Ikatu koʼág̃a peve ijetuʼu algúnope ohayhu umi idiferéntevape chuguikuéra. Por ehémplo oĩ opensa vaíva umi hénte ótro paisguáre, térã orekóvare ótro pire kolór, umi irríkovare térã imboriahúvare. Koʼã kásope iporãta imanduʼa umi kristiáno yma guarére. Oiko mboyve chuguikuéra kristiáno oĩ vaʼekue hikuái pe rrelihión judíape. Ha upe rrelihiónpe ndojehayhúi vaʼekue umi hénte ótro paisguápe. Upévare koʼã kristiáno heta oñehaʼã vaʼekue okambia hag̃ua opensa lája. Apóstol Pedro tekotevẽ vaʼekue avei okambia. Upévare Jehová oprepara porã vaʼekue chupe omondo mboyve Cornelio rendápe (Hech., kap. 10).

⁴ Peteĩ visión rupive ojeʼe Pédrope ojuka ha hoʼu hag̃ua unos kuánto animál ikyʼáva umi judíope g̃uarã. Apóstol Pedro heʼi ndojaposeiha upéva, upémarõ oñehendu peteĩ vos yvágagui heʼíva: “Anive ere ikyʼaha umi mbaʼe Ñandejára omopotĩma vaʼekue” (Hech. 10:15). Jahechaháicha, tekotevẽ vaʼekue Ñandejára oipytyvõ Pédrope okambia hag̃ua opensa lája ikatu hag̃uáicha okumpli pe asignasión oñemeʼẽtava chupe. ¿Mbaʼépa raʼe upe asignasión? Ovisita vaʼerã peteĩ kuimbaʼe ndahaʼéivape judío. Okumplívo upe asignasión, Pedro heʼi Cornelio ha umi hogayguápe: “Peẽ peikuaa porã pe léi heʼiha peteĩ judío noñemoag̃uíri ni ndojeheʼái vaʼerãha peteĩ kuimbaʼe ndahaʼéivare judío. Upéicharamo jepe Ñandejára ohechauka chéve ndovaleiha amboyke ni peteĩ kuimbaʼépe ni haʼe hese ikyʼaha. Upévare, añehenoikárõ guare ni ndadudái aju hag̃ua” (Hech. 10:28, 29). Upe rire, Pedro ohecha mbaʼéichapa Jehová oguerohory Cornelio ha hogayguakuérape.

⁵ Saulo de Tarso, haʼe vaʼekue peteĩ fariséo ijestúdio yvatéva. Haʼe tekotevẽ vaʼekue oñemomirĩ ojeheʼa hag̃ua umi persóna ymave haʼe orrechasa vaʼekuére. Sapyʼánte katu tekotevẽ vaʼekue voi ojerure chupekuéra gía (Hech. 4:13; Gál. 1:13-20; Filip. 3:4-11). Oĩ hetave persóna okambia vaʼekue opensa lája oaseptárõ guare umi notísia porã ha oikórõ guare chuguikuéra Jesús disípulo. Umíva apytépe Sergio Paulo, Dionisio, Dámaris, Filemón, Onésimo ha hetave (Hech. 13:6-12; 17:22, 33, 34; Filem. 8-20).

⁶ Pe mborayhu ojehechaukáva kongregasiónpe katuete nepytyvõne raʼe reñemoag̃ui hag̃ua Jehová ha iñorganisasiónre. Jesús heʼi vaʼekue pe mborayhu haʼeha peteĩ márka ohechauka porãva mávapa umi kristiáno verdadéro. Haʼe heʼi: “Ameʼẽ peẽme peteĩ mandamiénto pyahu: pejoayhu vaʼerã. Che pohayhu haguéicha, peẽ pejoayhu vaʼerã avei. Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:34, 35). Oiméne rehechakuaa umi ermáno ndahaʼéi ohayhúva umi oĩvape ikongregasiónpente, síno umi ermáno oĩvape ko múndo tuichakuére, ha oime vaʼerã upéva nemoag̃uivéntema raʼe Jehová ha iñorganisasiónre. Katuete rehecha mbaʼeichaitépa oñekumpli pe profesía jatopáva Miqueas 4:1-5-pe. Upépe heʼi koʼã ára pahápe heta hénte oadorataha Jehovápe peteĩ ñeʼẽme ha pyʼaguapýpe.

⁷ Ko múndope ningo oĩ heta mbaʼe omomombyrýva la héntepe ojuehegui, upévare heta oĩ oñesorprendéva ohechávo mbaʼéichapa Jehová puévlo oiko peteĩ ñeʼẽme. Upépe ningo oĩ hénte “oúva entéro tetã, trívu ha puévlogui, ha oñeʼẽva diferénte idióma” (Apoc. 7:9). Ñapensamíntena umi mbaʼe odividívare la héntepe. Oĩ umi tetã ipláta hetáva ha henyhẽva teknolohíagui, ha oĩ ótro tetã imboriahúva ha oikóva yma guaréicha. Umi rrelihión odividi avei umi hénte oikóvape peteĩ paíspe. Avei koʼág̃arupi la hénte ohayhueterei hetã ha ndochaʼéi voi umi ótro tetãyguáre. Ha oĩ hetaiteve mbaʼe odividíva umi héntepe. Upévare jahechávo mbaʼéichapa oiko peteĩ ñeʼẽme umi hénte oúva entéro tetã, trívu ha puévlogui, ha oñeʼẽva diferénte idióma, jaʼekuaa haʼeha peteĩ milágro ikatúva ojapo sólamente Ñandejára Todopoderóso, Jehová (Zac. 4:6).

⁸ Añetehápe ikatu jaʼe ñaneunidoha ñane ermanokuérandi. Oikóvo ñandehegui testígo de Jehová vautisádo, ñande jaike ko família tuichaitévape. Upévare enterove jareko pe rresponsavilida ñaipytyvõvo siémpre ojeiko hag̃ua peteĩ ñeʼẽme. ¿Mbaʼéichapa ikatu jajapo upéva? Jasegíramo ko konsého jatopáva Gálatas 6:10-pe, upépe apóstol Pablo heʼi: “Jareko jave oportunida ñañopytyvõ hag̃ua, jajapo memékena iporãva enterove rehehápe, péro koʼytevéntema ñane ermáno ha ermanakuéra rehehápe”. Tekotevẽ avei jasegi ko konsého: “Ani pejapo mbaʼeve peiko vaiségui ni peñembotuichaségui, upéva rangue peneumílde vaʼerã ha pepensa umi ótro tuichaveha pendehegui, ha ani pejepyʼapy umi mbaʼe peẽme okonvenívarente, síno pejepyʼapy vaʼerã avei umi ótrore” (Filip. 2:3, 4). Ñañehaʼãmbaite vaʼerã jahecha ñane ermanokuérape Jehová ohechaháicha chupekuéra, ha ani jajesegi ipíntarente, péicha jasegíta jaiko vyʼápe ha pyʼaguapýpe hendivekuéra (Efes. 4:23, 24).

⁹ Apóstol Pablo oñeʼẽ vaʼekue pe kuérpo umánore ohechauka hag̃ua pe kongregasión noĩriha dividído, síno enterovéva ojepyʼapyha ojuehe (1 Cor. 12:14-26). Oĩ ermáno oikóva mombyryeterei ñandehegui, upéicharõ jepe ñañeinteresa hesekuéra. Ñane ermanokuérape ojepersegírõ, ñande jasufri avei. Oimérõ ñane ermáno imboriahu térã oiko peteĩ lugár oĩhápe gérra, inestavilida polítika térã desástre naturál, jaikuaasetereíma voi mbaʼéichapa ikatu ñaipytyvõ chupekuéra omombarete hag̃ua ijerovia ha ohupyty hag̃ua oikotevẽmíva (2 Cor. 1:8-11).

¹⁰ Enterove ñañemboʼe vaʼerã ñane ermanokuérare káda día. Heta ermánope ojejopy ojapo hag̃ua ivaíva. Oĩ vése jaikuaáva voi umi ermáno osufri jave, péro heta vése ndajaikuaapái. Por ehémplo algúno ermánore oñemoĩ ikompañéro de traváho térã ifamília ndoservíriva Jehovápe (Mat. 10:35, 36; 1 Tes. 2:14). Entéro koʼã mbaʼe ñandepyʼapy pórke jahayhueterei ñane ermanokuéra oĩvape ko yvy tuichakuére (1 Ped. 5:9). Ñande apytépe oĩ ermáno oñemeʼẽmbaitéva Jehová servísiope omotenondévo pe predikasión ha ogiávo pe kongregasión. Algúno oreko ikárgope omotenonde umi traváho ojejapóva Ñandejára organisasiónpe. Sapyʼánte ndaikatumoʼãi ñaipytyvõ ermanokuérape ñaipytyvõseháicha, péro enterove ikatu ñañemboʼe koʼã ermánore. Péicha jahechauka jahayhuha chupekuéra ha ñañeinteresaha hesekuéra (Efes. 1:16; 1 Tes. 1:2, 3; 5:25).

¹¹ Koʼã ára paha ningo ivaive ohóvo, upévare Jehová puévlo oĩ vaʼerã preparádo oñopytyvõ hag̃ua. Sapyʼánte ikatu oiko peteĩ desástre naturál, por ehémplo peteĩ terremóto térã inundasión. Péicha jave tekotevẽ oñeorganisa heta mbaʼe oñepytyvõ hag̃ua umi ermánope ha oñemeʼẽ hag̃ua chupekuéra la oikotevẽva. Umi kristiáno síglo primérope guare oheja ñandéve peteĩ ehémplo iporãva. Umi ermáno Antioquiagua osegi vaʼekue Jesús konsého, upévare oguerahaka la ikatumíva oipytyvõ hag̃ua umi ermáno oĩva Judéape (Hech. 11:27-30; 20:35). Tiémpo rire, Pablo omokyreʼỹ umi ermáno Corintoguápe oapoja hag̃ua umi traváho ojejapóva oñepytyvõ hag̃ua umi ermáno oikotevẽvape (2 Cor. 9:1-15). Ñane tiémpope avei umi ermáno ohasa jave koʼãichagua situasión, ñane organisasión ha káda uno voi pyaʼe porã jahecha mbaʼéichapa ikatu ñaipytyvõ chupekuéra.

¹² Enterovete ñaiméva Jehová puévlope, ñaĩ organisádo jajapo hag̃ua ivolunta. ¿Mbaʼépa hína Jehová volunta ko tiémpope? Haʼe oipota umi notísia porã oñeʼẽva Irréinore oñemombeʼu oparupiete ko yvy ape ári, upe mensáhe ojekuaa hag̃ua entéro tetãrupi (Mat. 24:14). Ñakumplívo ko tembiapo, Ñandejára oipota avei jaiko haʼe omandaháicha (1 Ped. 1:14-16). Tekotevẽ ñañemoĩ umi ñanemoakãva poguýpe ha ñañehaʼãmbaite jajapo ikatúva guive ojesegi hag̃ua ojepredika (Efes. 5:21). Ko tiémpo jaikoha ningo ndahaʼéi ñamotenonde hag̃ua umi mbaʼe ñande jajaposévante. Upéva rangue ñamotenonde vaʼerã Ñandejára Rréino (Mat. 6:33). Ñañehaʼãmbaitéramo ñambaʼapo oñondivepa, katuete javyʼáta ha ñañeñandu porãta koʼág̃a, ha amo gotyove jarresivíta umi vendisión ndopamoʼãiva arakaʼeve.

¹³ Ñande testígo de Jehová, ñanediferénte jaadora rupi Jehovápe. Ñanepotĩ, ndajajeheʼái ko múndore ha kyreʼỹme jaservi Ñandejárape. Ndaipóri ótro puévlo Ñandejára puévloicha (Tito 2:14). Ñande jajapo umi mbaʼe ñaporomboʼéva. Avei ñambaʼapo peteĩ ñeʼẽme ñane ermanokuéra oĩvandi ko yvy tuichakuére ha ñañeʼẽ pe idióma ipotĩva. Upéva oprofetisa vaʼekue voi Jehová: “Che ameʼẽta umi puévlope peteĩ idióma pyahu, peteĩ ipotĩva, ikatu hag̃uáicha enterovéva omombaʼeguasu che réra Jehová, péicha haʼekuéra cheadoráta peteĩ ñeʼẽme” (Sof. 3:9).

¹⁴ Proféta Sofonías rupive, Jehová ohechauka mbaʼéichatapa isiervokuéra oĩva ko yvy tuichakuére. Haʼe heʼi: “Umi hénte hembýva Israélgui ndojapomoʼãi mbaʼeve ivaíva, ndaijapumoʼãi ha nombotavymoʼãi avavépe. Umi ovecháicha haʼekuéra oñenóta ha okarúta ha avave nomongyhyjemoʼãi chupekuéra” (Sof. 3:13). Ñande ñaaprende Jehová Ñeʼẽ omboʼéva, ñakambia ñapensa lája ha ñañehaʼã jajapo haʼe omandáva. Upéicha rupi ñambaʼapo peteĩ ñeʼẽme ha upéva ningo peteĩ mbaʼe ko múndope g̃uarã ijetuʼuetereíva. Ñande añetehápe ñanediferénte, peteĩ puévlo omombaʼeguasúva Ñandejárape ko yvy ape ári (Miq. 2:12).