Koʼẽrõitéma Jehová ojevaléta Irréinore osolusionambaite hag̃ua umi provléma jarekóva. Ko notísia ningo iporãiterei ha ekapáde entéro oikuaa. Upévare voi Jesús oipota ñamombeʼu opa ikatúvape upe mensáhe (Mateo 28:19, 20). ¿Mbaʼéichapa umi testígo de Jehová okumpli ko mandáto Jesús omeʼẽ vaʼekue?

1. ¿Mbaʼéichapa koʼág̃arupi oñekumpli Mateo 24:14 heʼíva?

Jesús heʼi vaʼekue: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári” (Mateo 24:14). Ore testígo de Jehová rovyʼaiterei ikatu haguére rokumpli ko tembiapo iñimportantetéva. Upévare ropredika umi notísia porã ko múndo tuichakuére mas de 1.000 idiómape. ¡Eñeimahinamína mbaʼeichaitépa tuicha pe traváho! Ha opa umi mbaʼe ikatu ojehupyty Jehová ovendesi rupínte pe esfuérso ojejapóva.

2. ¿Mbaʼe mbaʼépa ojejapo ikatu hag̃uáicha ojepredika opavavépe?

Ore ropredika oĩháme guive hénte ha ojapo haguéicha umi kristiáno ypykue ropredika avei “umi ogahárupi” (Hechos 5:42). Rojapo rupi upéicha ikatu ropredika hetaiterei héntepe káda áño. Péro jaikuaaháicha naentéroi oĩ hógape tódo el tiémpo, upévare ropredika jepi avei kállere, plásare ha umícha. Ore siémpre roheka voi oportunida roñeʼẽ hag̃ua la héntepe Jehováre ha umi mbaʼe porã ojapótavare ñanderehehápe.

3. ¿Mávapa oreko pe rresponsavilida opredikávo umi notísia porã?

Káda uno umi kristiáno jareko pe rresponsavilida ñamombeʼúvo ótrope umi notísia porã. Upévare ore testígo de Jehová rojagarra ensério pe rresponsavilida. Ore rojapo ikatúva entéro ropredika hag̃ua, pórke roipota enterove umi hénte ojesalva (elee 1 Timoteo 4:16). Avave ndopagái oréve rojapo hag̃ua ko tembiapo, pórke la Biblia heʼi voi: “Grátis oñemeʼẽ kuri peẽme, ha peẽ grátinte pemeʼẽ vaʼerã avei” (Mateo 10:7, 8). Oĩramo jepe heta nohenduséiva ore rosegi ropredika pórke péicha oreñeʼẽrendu Jehovápe ha upéva ombovyʼa chupe.

EJEPYʼAMONGETAMÍNA

4. Ore rojapo opa ikatúva ropredika hag̃ua opaichagua héntepe

VIDÉO: Japredika “mombyryvehápe ko yvy tuichakuére” (7:33)

• Entéro umi mbaʼe ojehechaukávagui pe vidéope, ¿mbaʼépa ndéve nesorprendeve ojapóvagui hikuái opredika hag̃ua?

Elee Mateo 22:39 ha Romanos 10:13-15, ha upéi erresponde koʼã porandu:

• ¿Mbaʼéichapa pe predikasión ohechauka Testigokuéra rohayhuha ore rapichápe?

• ¿Mbaʼéichapa Jehová oñeñandu ohechávo ojepredikaha umi notísia porã? (Ehecha jey versíkulo 15).

5. Ore ningo Ñandejára ajudánte

Oĩ heta experiénsia ohechaukáva Jehová ogiaha pe predikasión. Por ehémplo Nueva Zelándape peteĩ ermáno hérava Paul, og̃uahẽ peteĩ kuñakarai rógape opredika jave ogahárupi peteĩ kaʼaru. Upe pyharevépe ningo pe kuñakarai oñemboʼe kuri, ha oipuru voi Ñandejára réra Jehová oñemboʼévo. Haʼe heʼi Jehovápe oikuaaseveha la Bíbliagui, ha 3 óra haguépe ermáno Paul og̃uahẽ ohóvo hógape.

Elee 1 Corintios 3:9, ha upéi erresponde ko porandu:

• ¿Mbaʼéichapa pe experiénsia oiko vaʼekue Nueva Zelándape ohechauka Jehová odirihiha pe predikasión?

Elee Hechos 1:8, ha upéi erresponde ko porandu:

• ¿Mbaʼérepa ñaikotevẽmante Jehová ñanepytyvõ japredika hag̃ua?

¿Reikuaápa raʼe?

Káda semána ore rreunión éntre semanaguápe rohecha jepi umi mbaʼe orepytyvõtava ropredika hag̃ua. Oiméramo rehóma raʼe peteĩva umi rreuniónpe, ¿mbaʼépa repensa umi mbaʼe oñemboʼévare upépe?

6. Ore oreñeʼẽrendu Ñandejárape ha ropredika

Ymaite guive oĩ vaʼekue oñemoĩva Jesús segidorkuérare ha ndoipotáiva opredika, péro umi kristiáno osegi ‘odefende umi notísia porã ha oñehaʼã okonsegi pe derécho legál opredika hag̃ua umíva’ (Filipenses 1:7). Ore testígo de Jehová upeichaite avei rojapo koʼág̃arupi.a

VIDÉO: Oñekonsegi pe derécho legál ojepredika hag̃ua (2:28)

Elee Hechos 5:27-42, ha upéi erresponde ko porandu:

• ¿Mbaʼérepa ndaipóri ojoko vaʼerã pe predikasión? (Ehecha jey versíkulo 29, 38 ha 39).

RRESÚMEN

Jesús ojerure vaʼekue isegidorkuérape opredika hag̃ua umi notísia porã oparupiete ko yvy ape ári. Jehová oipytyvõ ipuévlope osegi hag̃ua ojapo ko tembiapo.

Rrepáso

• ¿Mbaʼéichapa ojepredika ko múndo tuichakuére umi notísia porã?

• ¿Mbaʼéichapa pe predikasión ohechauka Testigokuéra rohayhuha ore rapichápe?

• ¿Ndépa ere pe predikasión ikatuha ñanembovyʼa? ¿Mbaʼére repensa upéicha?

EINVESTIGA HAG̃UA

Ehecha mbaʼéichapa umi testígo de Jehová opredika umi siuda tuichahárupi.

Predikasión espesiál oñeorganisáva Paríspe (5:11)

¿Mbaʼéichapa umi testígo de Jehová opredika umi rrefuhiádope?

Ojepredika umi rrefuhiádope (5:59)

Ehecha mbaʼérepa peteĩ ermána ovyʼaite oipurupaitévo itiémpo oservi hag̃ua Ñandejárape.

Avyʼa adesidi haguére aservi de tiémpo kompléto (6:29)

Ehecha mbaʼéichapa unos kuánto káso hudisiál iñimportánteva oipytyvõ umi Testígope ifasilve hag̃ua chupekuéra opredika.

“Ermanokuéra og̃uahẽ umi trivunálpe” (¡Ñandejára Rréino ogovernáma!, kapítulo 13)

Jesús heʼi vaʼekue oiko hag̃ua ñandehegui idisípulo jajevautisámante vaʼerãha (elee Mateo 28:19, 20). Péro, ¿mbaʼéichapa ojejapo vaʼerã pe vautísmo? ¿Ha mbaʼérepa ñañehaʼã vaʼerã jahupyty upe méta?

1. ¿Mbaʼéichapa ojejapo vaʼerã pe vautísmo?

Pe palávra vautísmo ojetradusi griégogui, ha upe idiómape pe palávra heʼise oñapymi térã oikepa ýpe. Por ehémplo, Jesús ojevautisárõ guare oike vaʼekue pe Rrío Jordánpe ha upéi ‘osẽ pe ýgui’ (Marcos 1:9, 10). Upéicha avei umi kristiáno tee ojevautisáta jave oñapymimbaite vaʼerã ýpe.

2. ¿Mbaʼépa ojehechauka pe vautísmo rupive?

Peteĩ persóna ojevautisa jave ohechauka oñemeʼẽma hague Ñandejára Jehovápe. ¿Mbaʼéichapa ñañemeʼẽ Jehovápe? Peteĩ persóna odesidi mboyve ojevautisataha oñemboʼe vaʼerã Jehovápe haʼeñoháme ha heʼi oserviseha chupe pára siémpre. Haʼe opromete oadorataha Jehovápe añoite ha iñimportantevetaha chupe Jehová volunta. Haʼe odesidi ‘oñembyesaraitaha ijehegui ha omoirũ memetaha’ Jesúspe, upéicha osegíta iñehémplo ha umi mbaʼe haʼe omboʼéva (Mateo 16:24). Oñemeʼẽ rire Ñandejárape ha ojevautisa rire, ikatútama oiko chugui Jehová amigoite ha omoirũtama umi oadora memévape Jehovápe.

3. ¿Mbaʼépa rejapo vaʼerã rejevautisa mboyve?

Rejevautisa mboyve iñimportanteterei reikuaa porã Jehovápe ha ejerovia hese nde pyʼaite guive (elee Hebreos 11:6). Amáske reikuaa porãve Jehovápe ha rejeroviave hese rehayhuvéta chupe. Ha upépe remombeʼusétama ótrope umi mbaʼe reikuaáva chugui ha reñehaʼãta reiko haʼe oipotaháicha (2 Timoteo 4:2; 1 Juan 5:3). Peteĩ persóna oñehaʼãmbaitéramo oiko ‘oikoháicha umi oservíva Jehovápe, ikatu hag̃uáicha haʼe oguerohory chupe entéro mbaʼépe’, upéicharõ hiʼãitereítama chupe oñemeʼẽ Ñandejárape ha ojevautisa (Colosenses 1:9, 10).a

EJEPYʼAMONGETAMÍNA

4. ¿Mbaʼépa ñaaprende Jesús vautísmogui?

Elee Mateo 3:13-17 ehecha hag̃ua unos kuánto detálle Jesús vautísmogui. Upéi erresponde koʼã porandu:

• ¿Jesús piko peteĩ mitãraʼy raʼe ojevautisárõ guare?

• ¿Mbaʼéichapa ojevautisa chupe? ¿Ojehypýintepa raʼe ýpe?

Jesús ojevautisa rire ae oñepyrũ vaʼekue ojapo pe tembiapo iñimportantetéva Jehová onkarga vaʼekue chupe. Elee Lucas 3:21-23 ha Juan 6:38, ha upéi erresponde ko porandu:

• ¿Mbaʼe traváhopa omotenonde vaʼekue Jesús ojevautisa rire?

5. Nde ikatu rehupyty ne méta ha rejevautisa

Ñepyrũrã ikatu oime nemondýi lénto repensávo reñemeʼẽ vaʼerãha Jehovápe ha rejevautisa, upéicharõ jepe nde ikatu reprogresa rehóvo reime peve segúro redesidi mboyve ko mbaʼe iñimportantetéva. Emañamína mbaʼépa ojapo vaʼekue unos kuánto ermáno. Ehecha pe VIDÉO.

VIDÉO: Eñemoag̃uivékena ne amígo Jehováre (1:11)

Elee Juan 17:3 ha Santiago 1:5, ha upéi erresponde ko porandu:

• ¿Mbaʼépa ikatu nepytyvõ reime hag̃ua preparádo rejevautisa hag̃ua?

1. Peteĩ persóna oñemeʼẽ hag̃ua Jehovápe oñemboʼe vaʼerã haʼeñoháme, ha heʼi oserviseha chupe pára siémpre

2. Upe persóna ojevautisa jave ohechauka la héntepe oñemeʼẽma hague Ñandejárape

6. Jajevautisa vove ñaiméma Jehová família apytépe

Jehová oreko peteĩ família tuicháva ko múndo tuichakuére, ha jajevautisa vove ñande ñaiméma upe famíliape. Enterovéva, tahaʼe haʼéva ñande país, jaguerovia la mísma kósa ha jaiko Ñandejára oipotahaichaite. Elee Salmo 25:14 ha 1 Pedro 2:17, ha upéi erresponde ko porandu:

• ¿Mbaʼéichapa pe vautísmo ikatu oipytyvõ peteĩ persónape omombarete hag̃ua iñamista Jehovándi ha umi ermanokuérandi?

RRESÚMEN

Jesús heʼi vaʼekue umi kristiáno tee ojevautisámante vaʼerãha. Péro peteĩ persóna ojapo mboyve upéva tekotevẽ ojerovia mbarete Jehováre, oiko haʼe oipotahaichaite ha oñemeʼẽ chupe.

Rrepáso

• ¿Mbaʼéichapa ojejapo vaʼerã pe vautísmo, ha mbaʼérepa iñimportánte jajevautisa?

• ¿Mbaʼépa jahechauka jajevautisávo?

• ¿Mbaʼépa ojapo vaʼerã peteĩ persóna oñemeʼẽ mboyve Jehovápe ha ojevautisa?

EINVESTIGA HAG̃UA

Ehecha mbaʼépa heʼise ha mbaʼépa ndeʼiséi pe vautísmo.

“¿Mbaʼépa hína pe vautísmo?” (Artíkulo oĩva jw-pe)

Ehecha jey mbaʼe mbaʼépa ojapo vaʼerã peteĩ persóna ojevautisa hag̃ua.

“Jahayhúramo Jehovápe, upéva ñanemomýita jajevautisa hag̃ua” (Ñemañaha marzo de 2020)

¿Mbaʼérepa ko kariaʼy odesidi raʼe ojevautisataha?

“Oipota hikuái chete ahechakuaa la Biblia omboʼéva” (Ñemañaha 1 de febrero de 2013)

Ehecha mbaʼérepa iporãta remoĩramo la méta rejevautisávo ha mbaʼéichapa ikatu rejeprepara upearã.

“¿Ajevautisáma vaʼerã?” (Mitãrusukuéra oñeporandúva jepi, konsého peẽme g̃uarã, volúmen 2, kapítulo 37)