Ikatúpa jaguerovia umi mbaʼe ojeʼéva Jesúsre?

ELEEMÍNA KOʼÃ MBAʼE OJEʼÉVA JESÚSRE. NDÉPA MBAʼE ERE, AÑETÉPA TÉRÃ JAPU?

Onase 25 de diciembre.

Onase riremi, oho ovisita chupe umi tres reyes magos.

Naiñermánoi ni naiñermánai.

Haʼe Ñandejára, péro oñembohete kuimbaʼénte.

Ojapo heta mbaʼe porã, ndahaʼéi ku ipyʼaporãva reínte.

KATUETEI heta hénte heʼi añeteha koʼã mbaʼe ojeʼéva Jesúsre. Péro oĩ avei heʼíva avave ndoikuaaporãiha upéva ha la iñimportantevéva ndahaʼéi voi jaikuaa umi mbaʼe, síno jajerovia Jesúsre ha opáma.

Tahaʼe haʼeháicha, la Biblia omboʼe iñimportantetereiha ‘jaikuaa porã Jesucrístope’ (2 Pedro 1:8). Mbaʼéichapa ikatu jajapo upéva? Tekotevẽ jalee Mateo, Marcos, Lucas ha Juan kuatiañeʼẽ, jahecha hag̃ua añetépa térã japu umi mbaʼe ojeʼéva Jesús rehe, heʼiháicha ko artíkulo oñepyrũre.

MBAʼÉPA OJEʼE: Jesús onase 25 de diciembre.

AÑETÉPA TÉRÃ JAPU: JAPU.

La Biblia ndeʼíri arakaʼetépa onase Jesús. Moõgui piko upéicharõ oñeguenohẽ ko fécha? Peteĩ diccionario vívliko omombeʼu: “Rómape koʼã árape roʼy ha voi pytũ. Péro 25 de diciembre guive tardevéma pytũ ha pe ára ipukuve. Upéicha rupi umi ndahaʼéiva kristiáno káda áño omombaʼeguasu pe kuarahýpe ha heʼi oganaha pe pyharépe, upévare umi ára upe fécha guive ipukuve” (Diccionario de la Biblia, de W. R. F. Browning). Ambue enciclopedia heʼi avei upe árape “umi ndahaʼéiva kristiáno omombaʼeguasuha pe kuarahýpe okakuaa porãve hag̃ua iñemitỹngue roʼy tiémpope” (The Encyclopædia Britannica).

Avave ningo ndoikuaái arakaʼetépa onaséraʼe, upévare naisentídoi oñemboaretéramo 25 de diciembre, onaseramoguáicha Jesús upe árape. Ha avei Ñandejára ndeʼíri Iñeʼẽme jagueromanduʼa hag̃ua Jesús kumpleáño ni hemimboʼekuéra ojapo hague upéva. Síno la Biblia omombeʼu Jesús voi heʼi hague jagueromanduʼa hag̃ua haʼe omanoha ára ha heʼi avei mbaʼe féchapepa oiko upéva (Lucas 22:19).a Jaʼekuaa upéicharõ Jesús ndoipotaiha ojegueromanduʼa térã oñemboarete oñenaseha ára. Haʼe oipota guei ñamombaʼe isakrifísio, ñamboarete rangue ikumpleáño (Mateo 20:28).

MBAʼÉPA OJEʼE: Jesús onase riremi oho ovisita chupe umi tres reyes magos.

AÑETÉPA TÉRÃ JAPU: JAPU.

Ndépa rehechámava peteĩ kuádro oĩháme Jesús onasérõ guare? Upépe oĩ jepi peteĩ mitãraʼy oñenóva peteĩ pesévrepe ha mbohapy rréi omeʼẽrõ ko mitãme jopói. Añetehápe piko upéicha oikóraʼe? Nahániri, jahechamína mbaʼérepa jaʼe upéva.

La Biblia omombeʼu heta hénte ouha Jesús rendápe kuarahyresẽguio omombaʼeguasu hag̃ua chupe. Péro umíva ndahaʼéi katuete rréi, la Biblia omombeʼu haʼeha ‘karai oadivináva omañávo mbyjakuérare’ (Mateo 2:1, NM). Ha ndahaʼéi ku ohóva hendápe haʼe onaseha ára térã upe riremi, síno heta mése rire, oĩrõ guare hógapema hikuái (Mateo 2:9-11).

Mboy tapicha piko oho hendápe upérõ guare? Ñandejára Ñeʼẽ ndeʼíri oho hague mokõi, mbohapy térã treinta. Mbaʼére piko upéicharõ ojeʼe jepi mbohapyha? Oiméne la Biblia heʼi rupi ojegueraha hague chupe mbohapy jopói (Mateo 2:11).b Oĩ heʼíva káda uno umi jopói meʼẽha orrepresentaha peteĩ pire kolór; péro upéva la Biblia ndeʼíri mamove hendápe. Heʼi voi ningo peteĩ komentário upe arete ojejapóva umi mbohapy reyes magos rérape ou reínte hague “peteĩ istoriadór akãme síglo óchope, ha omoñepyrũ upéva ndoikuaáigui rei mbaʼépa heʼíta”.

MBAʼÉPA OJEʼE: Jesús naiñermánoi ni naiñermánai.

AÑETÉPA TÉRÃ JAPU: JAPU.

Mateo, Marcos, Lucas ha Juan kuatiañeʼẽme ohechauka porã Jesús iñermáno ha iñermána hague. Pór ehémplo Lucas heʼi Jesús haʼeha María memby “ypykue”, upéva heʼise upe rire María imembyve hague (Lucas 2:7).c Marcos avei omombeʼu umi hénte Nazaretgua ombojoja hague Jesúspe iñermanokuérare. Umi hénte jeko oporandujoa: ‘Kóva piko ndahaʼéi pe karpintéro, María memby? Iñermanokuéra ningo Santiago, José, Judas ha Simón, ajépa? Ha iñermanakuéra oiko avei koʼárupi ñanendive’ (Marcos 6:3, NM; Mateo 12:46; Juan 7:5).

Upéicharamo jepe oĩ gueteri heta teólogo heʼíva Jesús naiñermánoi hague. Oĩ heʼíva avei umi iñermáno ha iñermána oñemombeʼúva la Bíbliape haʼeha Jesús prímonte, ndahaʼéi iñermáno teed. Ha ambue katu heʼi umíva haʼeha María memby anga. Péro oimérire añete upéva, mbaʼére piko umi Nazaretgua heʼivaʼekue upéicha? Ajépa naisentídoi. Ñanemanduʼavaʼerã avei oĩ hague heta ohecháva Maríape hyeguasúrõ, ha upéicha oikuaa hikuái Jesús iñermáno hague.

MBAʼÉPA OJEʼE: Jesús haʼe Ñandejára, péro oñembohete kuimbaʼénte.

AÑETÉPA TÉRÃ JAPU: JAPU.

Oĩ heta ogueroviáva Ñandejára oñembohete kuimbaʼe hague ha ou ko yvy ape ári Jesúsramo. Upéicha ontendeka umi ogueroviáva Jesús, Ñandejára ha espíritu sánto peteĩnteha. Koʼã mbaʼe ningo oñepyrũ ojeguerovia Jesús omano riréma. Peteĩ enciclopedia heʼi: “Pe ñeʼẽ Trinidad ndaipóri mamove hendápe Nuevo Testaméntope. Ha upépe nomboʼéi Jesús, Ñandejára ha espíritu sánto peteĩnteha [...]. Ojehaipa rire umi Kuatiañeʼẽ Marangatu Griégope oñepyrũ ojeguerovia koʼã mbaʼe, ha upe guive akã rasýmante ogueru” (The Encyclopædia Britannica).

Ñapensamína, umi omboʼéva Jesús haʼeha Ñandejára péro oñembohete kuimbaʼénte hague oapoʼi térã omotĩ Jesúspee. Mbaʼérepa jaʼekuaa upéva? Ñantende porãve hag̃ua ñapensami ko ehémplore: Ñamoĩ chupe heta travahadór ojerureha ipatrónpe omeʼẽ hag̃ua chupekuéra peteĩ mbaʼe oikotevẽva, péro haʼe osẽ heʼi chupekuéra ndaikatuiha, ijáramante ikatuha omeʼẽ chupekuéra oikotevẽva. Oiméramo nomeʼẽséigui reínte heʼi ndaikatuiha ojapo, ajépa jaʼéta hese hovamokõiha, ijapueterei ha nomoakãporãiha? Péro oiméramo siérto upe heʼíva ohechauka nombotavyseiha chupekuéra.

Koʼág̃a ñapensami Jesús kásore. Peteĩ jey mokõi hemimboʼe ojerure chupe omboguapy hag̃ua chupekuéra ijasu ha ijakatúa gotyo. Mbaʼépa heʼi Jesús? ‘Che ndaikatúi haʼévo peẽme peguapytaha che asu térã che akatúa gotyo. Upéva ningo che Rúmante oikuaa mávapepa omeʼẽta.’ (Mateo 20:23, NM.) Oiméramo añete Jesús hína Ñandejára, tuichaiterei ijapu hemimboʼekuérape. Péro haʼe ningo nombotavyséinte avavépe, upévare heʼi Ñandejára omandaveha chugui. Péicha ohechauka oñemomirĩha ha avei ndahaʼeiha Ñandejára.

MBAʼÉPA OJEʼE: Jesús ojapo heta mbaʼe porã, ndahaʼéi ku ipyʼaporãva reínte.

AÑETÉPA TÉRÃ JAPU: AÑETE.

Jesús voi heʼivaʼekue ijehe ndahaʼeiha peteĩ kuimbaʼe ipyʼaporãva reínte. Haʼe heʼi: ‘Che Ñandejára Raʼy hína’ (Juan 10:36). Ha añetehápe oimeraẽva ikatu heʼi ijehe upéva. Péro ñapensamína, oimérire Jesús heʼi guaʼúnte haʼeha Ñandejára Raʼy ndaikatúi jaʼe hese ivuenoha, upéva rangue jaʼéta hese ijapuetereiha.

Jahechakuaa hag̃ua Jesús ndaijapúi hague ñapensavaʼerã mbaʼépa heʼi Ñandejára hese. Dos vése Haʼe oñeʼẽ yvága guive ha heʼi: ‘Kóva hína che raʼy ahayhuetéva ha aguerohorýva’ (Mateo 3:17, NM; 17:5). La Bíbliape dos vésente jatopa Ñandejára voi oñeʼẽrõ yvága guive. Ha upérõ guare Haʼe heʼi Jesús haʼeha Itaʼýra. Upéva ojurumbotýmane umi ndogueroviaséivape.

Ñahesaʼỹijo mbykymi rire umi mbaʼe ojegueroviáva Jesúsre, katuete ñanepytyvõne ñaaprende hag̃ua peteĩ mbaʼe ipyahúva. Oiméramo upéicha ñañehaʼãkena ñahesaʼỹijo porãve Mateo, Marcos, Lucas ha Juan kuatiañeʼẽ, upéva katuete ñanepytyvõta ñaaprendeve hag̃ua Jesús rekovégui ha avei ñanembovyʼavéta. Iñimportanteterei ningo jaikuaa porã Jesúspe ha avei Itúvape, upéicharõ mante ikatúta ‘jaiko opa ára g̃uarã’ (Juan 17:3).

[Nóta]

[Taʼanga ha rrekuádro oĩva páhina 14-pe]

Jaikuaave hag̃ua Jesúspe

Mbaʼéichapa raʼe Jesús? Peteĩ kuimbaʼe oñembosantuláriova, ijarhél, ipyʼahatã ha oñemomombyrýva enterovégui? Oĩ heta ogueroviáva upeichaha, péro jahechamína mbaʼépa heʼi Ñandejára Ñeʼẽ.

• Oho jepi fiéstape (Juan 2:1-11).

• Ohechakuaa ojejapóramo peteĩ mbaʼe porã ha oguerohory ojapóvape (Marcos 14:6-9).

• Ovyʼa umi mitã ojerepárõ hese (Marcos 10:13, 14).

• Ndahaʼéi ku okyhyjéva hasẽ hag̃ua umi hénte renondépe (Juan 11:35).

• Ombyasy umi ohasa asývape (Marcos 1:40, 41).