Mbaʼérepa ñanderekopotĩvaʼerã?

‘Ñandejára, chembojovakemíkena cherekopotĩháicha.’ (SAL. 7:​8, S.)

1, 2. Mbaʼéicha javépa ermanokuéra oñehaʼãmbaitevaʼerã hekopotĩ ha iñeʼẽrendu?

ÑAPENSAMÍNA koʼã mbaʼére: Peteĩ mitãrusúpe odesafia ikompañerokuéra oñorairõ hag̃ua. Oñemoĩtapa hesekuéra térãpa ojejokóta? Peteĩ karai katu oĩ hógape haʼeño ha ohekahína informasión Internétpe. Upeichaháguinte osẽ sapyʼa ikomputadórape peteĩ propagánda ohecha hag̃ua mbaʼe tieʼỹ. Ohechátapa? Peteĩ ermána oñemongetahína iñamigakuérandi. Ha peteĩ osẽ oñeʼẽ vai ambue ermánare. Mbaʼépa ojapóta? Oñeʼẽ reítapa avei, térãpa oñeʼẽta ótra kósare?

² Koʼã mbohapy ermáno oñehaʼãmbaitevaʼerã hekopotĩ ha iñeʼẽrendu Jehovápe. Ha ñande katu koʼẽ koʼẽre ñañehaʼãvaʼerã jahupyty ñaikotevẽva ha ñambohovái heta mbaʼe ñandepyʼapýva. Ñanemanduʼápa upéicha jave ñanderekopotĩvaʼerãha? Ndaivaíri ningo jajepyʼapy ñandejehe ñaneresãi ha ñañemonde porã hag̃ua. Avei ikatu jajepyʼapy ñande traváhore, ñane amigokuérare ha ñane mborayhu járare. Péro iñimportanteve jajepyʼapy ñanderekopotĩ hag̃ua. Jehová ningo omaña upévare ojesareko jave ñanderehe (Sal. 139: 23, 24).

 3. a) Mbaʼépa Jehová oheja jadesidi? b) Mbaʼépa ñahesaʼỹijóta koʼág̃a?

³ Jehová hína pe “opa mbaʼe porã ha hekopegua omeʼẽva ñandéve” (Sant. 1: 17). Omeʼẽ ñandéve ñande rete ha ñane arandu. Haʼe rupínte ningo ñaneresãi ha ñandekatupyry (1 Cor. 4:7). Péro, Jehová oheja ñande jadesidi ñanderekopotĩtapa, ha ndahaʼéi mbaretépema oipotáva ñanderekopotĩ (Deu. 30:19). Koʼág̃a ñahesaʼỹijomíta mbaʼépa heʼise ñanderekopotĩ ha mbaʼérepa tekotevẽ ñanderekopotĩ.

Mbaʼépa heʼise ñanderekopotĩ?

 4. Mbaʼe mbaʼépa heʼise evréope tekopotĩ? Ha mbaʼépa ohechauka ojeʼevaʼekue Israelguápe?

⁴ Heta ningo oĩ ndoikuaáiva mbaʼépa heʼise ñanderekopotĩ. Pór ehémplo, oĩ polítiko heʼíva ijehe hekopotĩha. Upéicharõ heʼisehína naimondaiha. Péro iñimportánteramo jepe naimondái, ndeʼiséi gueteri hekopotĩha. La Biblia ningo heʼi hekopotĩha umi tapicha ijoheipyréva ha ndahekovaíriva. Ha umi ñeʼẽ evréope ojeporúva ojeʼe hag̃ua “tekopotĩ” heʼise “oĩmbáva”, “noñembyaíriva”, “iporãva térã ndaikyʼáiva”. Peteĩva koʼã ñeʼẽ apytégui ojeporuvaʼekue ojeʼe hag̃ua Israelguápe mbaʼeichagua mymbápa oikuaveʼẽvaʼerã Jehovápe, heʼi hesãi ha iporã vaʼerãha. Upéicharõmante Jehová oguerohorýta (jaleemína Levítico 22:​19, 20). Upéva ohechauka Jehovápe ombopochyha umi oikuaveʼẽva mymba ikarẽva, hasypáva ha hesatũva (Mal. 1:​6-8).

5, 6. a) Mbaʼe ehémplopa ohechauka enterove jaipotaha peteĩ mbaʼe oĩmba ha iporãva? b) Mbaʼérepa natekotevẽi ñandeperfékto ñanderekopotĩ hag̃ua?

⁵ Jaikuaa ningo enterove jaipotaha peteĩ mbaʼe oĩmba ha iporãva. Pór ehémplo, peteĩ karai ombyatýva lívro yma guaréva, aréma oheka oikóvo peteĩ lívro. Upéi otopa sapyʼa peteĩ livreríape. Mbaʼépa ojapóne ohecháramo ofaltaha chupe heta páhina? Ikatu ojepicha ha ndoguerahái. Térã peteĩ kuñakarai ohóva merkádope ojogua hag̃ua verdúra, ovyʼa hetaiterei otopa haguére ha oiporavo hag̃ua orrevisapa voi. Mbaʼeichaguápa nde ere oguerahataha? Umi oĩmba porãva ha noñembyaíriva. Upéicha avei Ñandejára ojapo: oheka umi hekopotĩva ha oĩmba porãva (2 Cró. 16:9).

⁶ Ikatu ñapensa ñanderekopotĩ hag̃ua tekotevẽha ñandeperfékto. Ha ñaimoʼã ñaneimperfékto rupi jajoguaha peteĩ lívro noĩmbáivape térã peteĩ verdúra oñembyaívape. Oiméramo nde reñeñandu péicha, nemanduʼavaʼerã Jehová nohaʼarõiha ñandeperfékto. Haʼe ningo ndojeruréi ñandéve mbaʼeve ndaikatumoʼãiva jajapo (Sal. 103:14; Sant. 3:2).a Péro oipota ñanderekopotĩ. Ha mbaʼérepa idiferénte tekopotĩ ha perfeksión? Pór ehémplo, peteĩ kariaʼy ohayhuetereíva ichíkape, ha omendasémava voi hese, ikatúpa ohaʼarõ hembirekorã ndojavýi mbaʼevetépe? Nahániri, péro ikatu ohaʼarõ ohayhu ipyʼaite guive chupe añoite. Upéicha avei Jehová, oipota chupe añoiténte ñamombaʼeguasu (Éxo. 20:5). Nohaʼarõiramo jepe jajapo porã opaite mbaʼe, ohaʼarõ jahayhu chupe ñande pyʼaite guive ha ñamombaʼeguasu chupe añoiténte.

7, 8. a) Mbaʼéichapa Jesús omoĩ ñandéve ehémplo? b) Mbaʼépa heʼise la Bíbliape ñanderekopotĩ?

⁷ Ñanemanduʼami Jesús heʼivaʼekuére oñeporandúrõ guare chupe mbaʼépa pe iñimportantevéva jajapo (jaleemína Marcos 12:​28-30). Jesús ndahaʼéi heʼínteva mbaʼépa jajapovaʼerã, haʼete voi omoĩ ñandéve ehémplo. Ndaipóri ningo haʼéicha ohayhúva Jehovápe ipyʼaite guive, hiʼánga rugua guive, iñarandukue ha opa imbaretekue reheve. Upéicha haʼe ohechauka ñanderekopotĩha jaʼe ha jajapóramo opa mbaʼe ñande pyʼaite guive. Upévare, ñanderekopotĩ hag̃ua jasegivaʼerã katuete Jesucristo ehémplo (1 Ped. 2:21).

⁸ La Bíbliape ñanderekopotĩ heʼise ñamombaʼeguasu Ñandejárape añoite jahasa asýramo jepe ha ñaneñeʼẽrendu chupe opa mbaʼépe. Umi oñehaʼãva ojapo opa mbaʼe Jehovápe ogustaháicha ha umi omotenondéva hembipota hekopotĩhína. Koʼág̃a jahechamíta mbaʼe mbaʼérepa tekotevẽ ñanderekopotĩ.

1. Jahechauka hag̃ua Jehová añoite ñanesãmbyhyvaʼerãha

 9. Mbaʼéichapa jahechauka ñañemoĩha Jehová poguýpe ha jaipotaha ñanesãmbyhy?

⁹ Jehová ningo oreko derécho oisãmbyhy hag̃ua opa mbaʼe, ha upéva nodependéi ñanderehe. Ndahaʼéi ñanderekopotĩ térã ñande jaʼe haguére oisãmbyhýva opa mbaʼe. Upéicharõ jepe, yvágape ha yvy ape ári ojetaky Ñandejárare ha isãmbyhýre. Upévare, enterove ohechakuaavaʼerã Jehová añoite oisãmbyhyvaʼerãha opa mbaʼe ha ipoguýpe ojeiko porãveha. Ñande testigo de Jehová ningo ñañeʼẽ ñande rapichakuérape Ñandejára sãmbyhýre, péro mbaʼéichapa jahechauka ñañemoĩha Jehová poguýpe ha jaipotaha ñanesãmbyhy? Ñanderekopotĩ ha ñaneñeʼẽrendu memévo chupe.

10. a) Mbaʼépa heʼi ñanderehe Satanás? b) Mbaʼépa rejapóta rehechauka hag̃ua Satanás ijapuha?

¹⁰ Mbaʼérepa ñanderekopotĩvaʼerã Ñandejára ñanesãmbyhy hag̃ua? Satanás heʼivaʼekue ndaiporimoʼãiha yvypóra odefendétava Jehová sãmbyhy. Ha avave ndoservimoʼãiha Jehovápe ohayhúgui Chupe. Hetaiterei ánhel rovake heʼi Ñandejárape: ‘Yvypóra oĩ omeʼẽ hag̃uáicha oimeraẽ mbaʼe hekove rehehápe’ (Job 2:4). Péicha jahechakuaa Satanás noñeʼẽvaíri hague Job rehe añónte, enterove yvypóra rehe otaky. Ajeve ningo la Biblia heʼi hese ‘pe oñeʼẽ vaíva ñane ermanokuérare’ (Rev. 12:10). Satanás oñembohory Jehováre, heʼívo avavete naiñeʼẽrendumoʼãiha chupe. Upéicha, Satanás heʼi jahejataha Jehovápe ñande rekove rehehápe. Mbaʼéichapa reñeñandu heʼi haguére upéicha? Ajépa rehechaukase Satanás ijapuha? Ha ikatu rehechauka upéva nderekopotĩ ha neñeʼẽrendúramo Jehovápe.

11, 12. a) Mbaʼéicha javépa jahechaukavaʼerã ñanderekopotĩha? b) Mbaʼéichapa ikatu ñambovyʼa Ñandejárape?

¹¹ Péicha jahecha iñimportanteha jadesidi porã opa mbaʼe jajapótava. Pór ehémplo, ñanemanduʼápa oñepyrũvo ko artíkulo ñañeʼẽ hague mbohapy ermánore? Jahechami mbaʼépa ojapo upéicha jave umi hekopotĩva. Upe mitãrusu hemoĩmba oñemoĩségui ikompañerokuérare, péro osẽnte ohopa hese ojapoʼỹre mbaʼeve. Haʼe imanduʼa la Bíbliape heʼiha: ‘Che ermanokuéra, ani peñevenga peẽ voi pende rapicha rehe, peheja katu Ñandejára pópe. Ojehai voi Ñandejára Ñeʼẽme: “Che añevengáta ha amyengoviáta opavave rembiapo vaikue”’ (Rom. 12:​19, ÑÑB). Upe karai oiporuvahína Internét ikatúkuri ohecha umi taʼanga tieʼỹ. Péro imanduʼa Job heʼivaʼekuére: ‘Che añemoĩ peteĩ ñeʼẽme ani hag̃ua amaʼẽ kuñataĩ rehe aiko hag̃ua hendive’ (Job 31:1). Upévare ndohechái umi taʼanga tieʼỹ, omboykete voi venenorõguáicha. Pe ermána katu iñamigakuéra oñeʼẽ vaívo ermanokuérare, imanduʼa ko konséhore: ‘Opavave tojapo iporãva hapichápe, omombaretevaʼerã chupe ijerovia’ (Rom. 15:​2, BNP). Pe ermána oikuaa porã Jehovápe ndogustamoʼãiha oñeʼẽ vai hapicháre. Avavépe ningo nomokyreʼỹmoʼãi ha oñemoherakuã vaíta peteĩ ermánape. Upévare, haʼe oñeʼẽ vai rangue hapicháre, oñeʼẽ ambue mbaʼére.

¹² Koʼã mbohapy ermáno ohechauka ojapóvare oipotaha Jehová oisãmbyhy chupekuéra ha oĩ porãseha hendive. Ha ñande jajapóramo avei upéicha, ñaneñeʼẽrendutañaína Proverbios 27:11 heʼívape: ‘Ne arandúke che raʼy, upéva chembovyʼa, ha ikatúta ambohovái cherehe oñembohorývape’. Tuichaiterei mbaʼe ningo ñambovyʼa Ñandejárape! Upévare iporã ñañehaʼã ñanderekopotĩ ha ñaneñeʼẽrendu.

2. Jehová ohecháta ñanderekopotĩpa ñandehusga hag̃ua

13. Mbaʼépa ñanemboʼe Job ha David heʼivaʼekue?

¹³ Tekotevẽ avei ñanderekopotĩ Jehová ñandehusgáta rupi opa mbaʼe jajapóvare. Yma ningo Job ohechakuaamavaʼekue upéva (jaleemína Job 31:6). Haʼe oikuaa Jehová hendaitépe oporohusgaha, naimondaiha pe valánsa oiporúva oporohusga hag̃ua. David katu heʼivaʼekue: ‘Ñandejára ombojovakéne tavakuérape. Nde, Ñandejára, chembojovakemíkena cherekopotĩháicha. Ñandejára imarangatúva ombojovake porã ñane akã ha ñande pyʼapýpe oĩva guive’ (Sal. 7:​8, 9, S). Jaikuaa ningo Jehová ohechaha mbaʼépa oĩ ñande pyʼapýpe. Upévare, aníkena ñanderesarái Jehová ojesarekoha mbaʼéichapa ñanderekopotĩ ha upéva oiporuha ñandehusga hag̃ua.

14. Mbaʼérepa ñaneimperféktoramo jepe ikatu ñanderekopotĩ?

¹⁴ Ñapensamíntena Jehová ojesarekohahína enterove yvypóra pyʼapýpe oĩvare (1 Cró. 28:9). Saʼi ningo otopáne iñeʼẽrendúva chupe. Péro, ñanemanduʼákena ñaneimperféktoramo jepe, ikatuha ñaneñeʼẽrendu Jehovápe ha ñanderekopotĩ Job ha David ojapo haguéicha. Jaikuaaháicha Adán ha Eva iperfektovaʼekue péro naiñeʼẽrendúi Jehovápe. Ha hetaiterei yvypóra iñimperféktoramo jepe oservi ha iñeʼẽrendu chupe. Upéicharõ ñande avei ikatu jajapo upéicha.

3. Jaiko hag̃ua opa ára g̃uarã ñanderekopotĩvaʼerã

15. Mbaʼépa David ohechaukavaʼekue jahupytytaha ñanderekopotĩramo?

¹⁵ Jahecháma iñimportanteha ñanderekopotĩ Jehová ñandehusgáta rupi opa mbaʼe jajapóvare. Ha upéicharõmante ñahaʼarõta Jehová omeʼẽ ñandéve heta mbaʼe porã. David oikuaa porã vaʼekue upéva (jaleemína Salmo 41:12). Haʼe ohaʼarõ Jehová ovendesi chupe oiko hag̃ua opa ára g̃uarã. Ñandéicha avei David oservisevaʼekue Jehovápe opa ára g̃uarã ha koʼẽ koʼẽre ñañemoag̃uive hese. Haʼe oikuaavaʼekue akóinte hekopotĩramo, ohupytytaha umi mbaʼe porã ohaʼarõva. Ha ñande avei akóinte ñaneñeʼẽrendúramo Jehovápe, haʼe ñanepytyvõta, ñanerekomboʼéta ha ñanevendesíta.

16, 17. a) Mbaʼérepa ñanderekopotĩvaʼerã? b) Mbaʼépa ñahesaʼỹijóta pe artíkulo oúvape?

¹⁶ Koʼág̃a rupi avei ñahaʼarõvaʼerã heta mbaʼe porã javyʼa hag̃ua. Upéva ñanepytyvõta jagueropuʼaka hag̃ua umi mbaʼe vai jahasáva ha ani hag̃ua ñapensa ivaíva. La Biblia ningo ombojoja voi peteĩ káskore umi mbaʼe porã ñahaʼarõva (1 Tes. 5:8). Pe kásko omoʼãháicha peteĩ soldádo akã, umi mbaʼe porã ñahaʼarõva ñanemoʼã ani hag̃ua oike ñane akãme umi mbaʼe vai oñepensáva ko múndo añáme. Ha ndaigustomoʼãi ningo ñandéve nañahaʼarõiramo mbaʼeve iporãva. Jajepyʼamongetákena jahecha hag̃ua ñanderekopotĩpa ha jajeroviápa Jehová omeʼẽtaha ñandéve heta mbaʼe porã. Upévare, aníkena ñanderesarái ñanderekopotĩvaʼerãha jaipotáramo Jehová ñanesãmbyhy ha jahupytyséramo umi mbaʼe porã ñahaʼarõva. Akóintekena ñanderekopotĩ ha ñaneñeʼẽrendu Ñandejárape!

¹⁷ Ajépa iñimportantete ñanderekopotĩ! Upévare pe artíkulo oúvape ñahesaʼỹijomíta koʼã mbaʼe: Mbaʼépa jajapovaʼerã ñanderekopotĩ hag̃ua? Mbaʼéichapa ikatu ñanderekopotĩ ha ñaneñeʼẽrendu Ñandejárape jahasa asýramo jepe? Ikatúpa hekopotĩ jey umi osẽvaʼekue Ñandejára rapégui?

[Nóta]

Ñambohovaimi

• Mbaʼépa heʼise ñanderekopotĩ?

• Mbaʼéichapa ñanderekopotĩramo jahechauka jaipotaha Jehová ñanesãmbyhy?

• Mbaʼérepa ñanderekopotĩvaʼerã jaiko hag̃ua opa ára g̃uarã?

[Nóta oĩva taʼanga ndive páhina 5]

Koʼẽ koʼẽre ñañehaʼãvaʼerã jahechauka ñanderekopotĩha