Ndépa rekyhyje umi omanovaʼekuégui?

OĨ NDOKYHYJÉIVA ha heʼi voi: “Mbaʼére piko akyhyjéta, omanóva ningo omanóma! Péro upéicha avei oĩ hetaiterei okyhyjéva oimoʼã rupi umi omanóvagui oikoha espíritu ha ikatuha ou jey.

Pór ehémplo, Benín (África occidentálpe) ojeguerovia peteĩ tapicha omano rire oikoha chugui póra ha ikatuha ou jey ojuka hag̃ua ihentekuérape. Upévare oĩ heta ovendéva ikosakuéra térã odevepáva osakrifika hag̃ua mymba umi omanovaʼekuépe. Oĩ avei ohóva espiritísta rendápe oñeʼẽ hag̃ua umi omanóvandi. Ha ótro katu ohasa umi mbaʼe ivaíva ha ñanemongyhyjéva ha oimoʼã umi omanóva espíritu ojapoha hesekuéra.

Peteĩ karai ohasavaʼekue upéva héra Agboola, oikóva Benín ha Nigeria frontéra ypýpe. Haʼe omombeʼu ikáso: “Koʼárupi ningo henyhẽ pe espiritísmo. Pór ehémplo ojeguerovia peteĩ teʼõngue oñembojahu ha ojepreparavaʼerãha oho mboyve umi espíritu oĩháme. Ha chemanduʼa upéva ojejapopa rire ambyatymivaʼerã pe havón rembyre, ambojeheʼa yvyra roguére ha ajapo chugui pomáda. Upéva amona che rríflere ha haʼe hatã mbaʼe mymbápa ajukase. Koʼã mbaʼe enterovénte ojapo ore vállepe ha haʼete voi la oiko mbaʼéva! Péro heta mbaʼe ojejapóva pe espiritísmope ningo ivaieterei.

“Peteĩ jey omano chehegui mokõi che raʼy ha ndaikuaái mbaʼérepa, akyhyje oimérõ g̃uarã ojejapo cherehe paje mbaʼe. Upévare aha peteĩ pajeséro rendápe, peteĩ karai tuja ifamósova. Haʼe heʼi chéve añenpajena hague. Ha ivaiveha katu heʼi pe ojukavaʼekue che raʼykuérape omano vove orekotaha chupekuéra hembiguáiramo. Avei heʼi upeichaite oiko jeytaha che raʼy mbohapyháre. Ha maʼerã voi piko, upe riremínte omano avei upe che raʼy.”

Ohasa javete koʼã mbaʼe vaietáre Agboola oñemongeta peteĩ testígo de Jehová Nigeriaygua ndive hérava Jonh. Ko testígo ohechauka chupe mbaʼépa heʼi la Biblia umi omanovaʼekuére. Oikuaávo koʼã mbaʼe Agboola tuicha ipyʼaguapy. Ha katuete ningo Ñandejára Ñeʼẽ ombopyʼaguapýta entéro okyhyjévape umi omanóvagui.

Ikatúpa umi omanóva ojapo ivaíva ñanderehe?

Ndaipóri yvypóra ikatuvaʼerã ombohovái ñandéve ko porandu, teʼi jepe raʼe orekoha podér térã ivaletereiha. Ñandejára Jehová añoite ikatu heʼi porã ñandéve ko mbaʼe. Haʼe ningo ojapo opa mbaʼe oikovéva oĩva “yvágape ha yvýpe, ojehecháva ha ojehechaʼỹva” (Colosenses 1:16). Ojapo umi ánhel oiko hag̃ua yvágape ha yvypóra oiko hag̃ua ko yvy ape ári (Salmo 104:​4, 23, 24). Opa mbaʼe oikovéva ningo oĩ Ñandejára rupínte (Revelación [Apocalipsis] 4:11). Upévare iporãitereíta jahecháramo mbaʼépa heʼi la Biblia oikoha umi omanovaʼekuégui.

La Biblia ohechauka Jehová raẽve oñeʼẽ hague ñemanóre heʼírõ guare Adán ha Évape naiñeʼẽrendúiramo omanotaha (Génesis 2:17). Mbaʼépa heʼiserakaʼe upéva? Jehová omyesakã ko mbaʼe heʼívo Adánpe: “Ndéko hína yvýgui guarénte ha yvýpe jevy repavaʼerã” (Génesis 3:19). Upéicha rupi peteĩ tapicha omano vove hete oñembyai, imbaretekue ojei chugui ha oho jey ijapoharépe (Eclesiastés 12:7). Upéva heʼise Ñandejára añoite ikatuha omoingove jey chupe. Salmo 104:​29, 30 heʼi yvypóragui ohóramo ‘ipytu omanoha, ha yvýpe jeýnte oho opa’.

Adán ha Eva omano irrevélde rupi. Péro upe mboyve omano raẽ chuguikuéra peteĩ ifamília hérava Abel. Iñermáno Caín ojuka chupe (Génesis 4:8). Opytáparaʼe Caín okyhyje Abélgui? Nahániri. Haʼe ndokyhyjéi chugui, okyhyje guei umi oikovévagui ikatúva oñevenga hese (Génesis 4:​10-16).

Jahechamína ótro ehémplo oĩva la Bíbliape oikovaʼekue heta áño koʼã mbaʼe ohasa rire. Rréi Herodes rendápe ohovaʼekue astrologokuéra ha heʼi chupe onase hague “Israelguakuéra ruvicha guasurã”. Upéva ombopochy Heródespe ha ojukauka entéro mitã oikóva Belénpe orekóva guive dos áño térã imitãvéva. Péro ndojukajepéi Jesúspe. Mbaʼérepa? Ou rupi peteĩ ánhel heʼi Josépe: “Epáy ha epuʼã. Eraha nendive pe mitã ha isy, ha pyaʼe tereho Egíptope” (Mateo 2:​1-14).

Upe rire omano Herodes, ha peteĩ ánhel heʼi Josépe oho jey hag̃ua Israélpe ‘omanombáma rupi umi ojukasevaʼekue pe mitãme’ (Mateo 2:​19, 20). Pe ánhel ningo oiko umi espíritu oĩháme ha oikuaa umi omanóva ndohoiha upépe. Haʼe oikuaa porã Herodes ndaikatuveimaha ojapo mbaʼeve Jesúsre. Upévare José avei ndokyhyjevéima pe rréi omanovaʼekuégui. Péro ohecha mbaʼéichapa pe rréi pyahu, Arquelao iñañaiterei. Upévare oraha ifamiliakuéra Galiléape, pórke upépe nomandavéima pe rréi aña (Mateo 2:22).

Mbaʼépa ñanemboʼe koʼã mokõi ehémplo? Ohechauka ñandéve umi omanóva ndaikatuiha ojapo ñanderehe mbaʼeve. Péro, mbaʼéicha rupi piko Agboola ohasa umi mbaʼe vaietáre?

Omanóva espíritupa térãpa demónio?

Tuicha rire, heta vése Jesús ombohovaivaʼekue umi espíritu añáme. Umíva oikuaa porã mávapa haʼe ha upévare heʼi chupe ‘Ñandejára Raʼy’. Jesús oikuaa porã avei umíva haʼeha demónio térã ánhel aña, ndahaʼéi umi omanovaʼekue espíritu (Mateo 8:​29-31; 10:8; Marcos 5:8).

La Bíbliape heʼi oĩha ánhel irrevéldeva ha ánhel iñeʼẽrendúva Ñandejárape. Lívro de Génesis heʼi Jehová omosẽrõ guare Adán ha Évape Hardín de Edéngui, omoĩ hague mokõi keruvín térã ánhel pe kuarahyresẽ gotyo anive hag̃ua ojeike upépe (Génesis 3:24). Upéicha rupi jaʼekuaa upe guive umi espíritu oñepyrũ hague ojechauka yvypórape.

Tiémpo rire, heta ánhel oguejy ko yvy ape ári oiko hag̃ua yvypóraicha. Péro Jehová ndoipotaivaʼekue ojapo hikuái upéva. Haʼekuéra ‘oheja hóga yvagapegua’ oñenoségui umi kuñanguéra ndive (Judas 6). Upéi ou ifamília hikuái ha umívape ojeʼe nefilím. Koʼãva ha ituvakuéra sarambi ojapo upérõ, ha ko yvy ape ári henyhẽ hénte iñañáva, oñorairõ ha ojojukáva (Génesis 6:​1-5). Upémarõ Jehová ogueru peteĩ ama guasu pe y ojagarrapa peve ko yvy. Péicha omanombaite umi hénte aña, ha avei umi nefilím. Péro, mbaʼépa oiko umi ánhel irrevéldevagui?

Pe ama guasu ombodipara chupekuéra, oho jey umi espíritu oĩháme. Péro Jehová ndohejavéima koʼã ánhelpe oiko “heko ypykuépe” (Judas 6). ‘Ñandejára ndohejareirivaʼekue umi ánhelpe hembiapo vaikue. Oity guei chupekuéra tártarope. Upépe oheja chupekuéra iñapytĩhápe pytũmbýpe, ohaʼarõ hag̃ua Ñandejára oporombohovakeha ára’ (2 Pedro 2:4).

Mbaʼépa hína pe tártaro? Ndahaʼéi peteĩ lugár, heʼise guei umi demónio oĩ vaietereiha Ñandejára renondépe. Upévare ndaikatúi ojapo heta mbaʼe, pór ehémplo ndaikatuvéima oiko yvypóraicha. Péro ikatu oike yvypóra térã mymbápe ojapouka hag̃ua chupekuéra oipotáva, térã ipuʼaka umi hénte opensávare (Mateo 12:​43-45; Lucas 8:​27-33). Ñanembotavy hag̃ua ikatu oiko guaʼu umi omanóva espírituramo. Maʼerãpa ojapo hikuái upéva? Oipotágui jaguerovia umi omanóva espíritu oikoveha ha upéicha jajapo hag̃ua heta mbaʼe Jehovápe ndogustáiva.

Mbaʼépa ñanepytyvõta anive hag̃ua jakyhyje

Agboola ohechakuaa añeteha Ñandejára Ñeʼẽ heʼíva umi omanóvare. Haʼe oikuaaseve ha upévare ostudia John ndive la Biblia ha umi puvlikasión oñeguenohẽva chugui. Ko karaípe tuicha ombopyʼaguapy oikuaávo itaʼyrakuéra opytuʼuha, ndahaʼeiha espíritu ha ndoikomoʼãiha chuguikuéra ijukahare rembiguái (Juan 11:​11-13).

Avei ohechakuaa ohejaitevaʼerãha pe espiritísmo. Upévare ojagarra ohapypaite opa mbaʼe oúva chugui (Hechos 19:19). Oĩ ivesíno heʼíva chupe: “Cháke rembopochytareína umi espíritupe!”. Péro Agboola ndokyhyjevéima. Haʼe ojapo Efesios 6:​11, 12 heʼíva: ‘Pemoĩ pendejehe opa mbaʼe Ñandejára omeʼẽva peẽme peñorairõ hag̃ua. Ñañorairõ niko umi yvategua mbaʼe pochykuéra ndive’. Mbaʼéichapa ñamondéta koʼã mbaʼe Ñandejára omeʼẽva? Upearã jaikuaa porã vaʼerã la Biblia omboʼéva, ñanderekojojavaʼerã, ñamombeʼu pe marandu porã ñande rapichakuérape, jajerovia ha jaiporu Ñandejára Ñeʼẽ oñembojojáva peteĩ espádare. Koʼã mbaʼe tuichaiterei ñanepytyvõta.

Agboola oheja rire pe espiritísmo iñamígo ha ihentekuéra omboykete chupe. Péro testigos de Jehová apytépe hetavéntema otopa iñamigorã, ogueroviáva avei la Biblia heʼíva.

Agboola oaprende Jehová koʼẽrõitéma ohundipaitetaha iñañávape ha ndohejamoʼãveimaha umi demónio ojapo mbaʼeve ivaíva. Ojukapaitéta chupekuéra (Apocalipsis [Revelación] 20:​1, 2, 10). Avei oikuaa porã Ñandejára omoingove jeytaha umi omanovaʼekuépe (Juan 5:​28, 29). Hetaiterei ningo oĩ oikove jeýtava, umíva apytépe oĩ Abel ha umi mitã mimi rréi Herodes ojukaukavaʼekue. Agboola avei ojerovia Ñandejára omoingove jeytaha itaʼyrakuérape. Ha ñande ikatu avei jajerovia Ñandejára omoingove jeytaha umi jahayhúva omanovaʼekuépe. Ág̃a oikove jey vove hikuái, ikatúta omombeʼu ñandéve opytuʼúnte hague oñanduʼỹre mbaʼeve. Ha ndaikatuiha jajapo mbaʼeve umi omanóva rehehápe.

Upéicharõ jahechakuaa ndajakyhyjeivaʼerãha umi omanóvagui. Ha avei tuicha ñandepyʼaguapy jaikuaávo jahecha jeytaha umi jahayhúva omanovaʼekuépe. Upévare iporãta koʼág̃a jastudiáramo la Biblia ha jajerovia heʼívare. Avei jajeheʼavaʼerã umi ogueroviávare koʼã mbaʼe. Ha tekotevẽterei ñamboykepaite opa mbaʼe oúva espiritísmogui ha ‘ñamoĩ umi mbaʼe Ñandejára omeʼẽva ñañorairõ hag̃ua’ (Efesios 6:11). Testigos de Jehová ostudia umi oikuaasevévandi okovraʼỹre mbaʼeve. Ha upearã oiporu pe lívro Mbaʼépa añetehápe omboʼe la Biblia?a

Agboola ndokyhyjevéima umi omanóvagui ha oikuaa mbaʼépa ojapovaʼerã ani hag̃ua umi demónio ojapo hese ivaíva. Haʼe heʼi: “Ndaikuaái añete mbaʼérepa omano che raʼykuéra. Péro aservi ypy guive Jehovápe sieteháma che raʼy, ha mbaʼeveichagua espíritu ndojapovéi hesekuéra ivaíva”.

[Nóta]

[Komentário oĩva páhina 13-pe]

Agboola ndokyhyjevéima umi omanóvagui ha oikuaa mbaʼépa ojapovaʼerã ani hag̃ua umi demónio ojapo hese ivaíva

[Nóta oĩva taʼanga ndive páhina 12]

Caín ndokyhyjeivaʼekue iñermáno oñevengárõ g̃uarã hese