Okondena umi nopenáivape hese

Jesús orrespetaiterei Juan el Bautístape, péro heta hénte ndaupeichaiete. Upévare Jesús heʼi umi hénte oikóvare upe tiémpope: “Ojogua hikuái umi mitã oguapýva plásape, ha osapukáiva iñirũnguérape: ‘Rombopu peẽme fláuta ha ndapejerokýi, orerasẽ ha napeñembyasýi’” (Mateo 11:16, 17).

¿Mbaʼépa heʼise Jesús? Haʼe heʼi: “Juan ou ha ndokarúi ni ndoʼúi víno umi ótroicha, péro peẽ peje: ‘Kóva oñendemonia’. Pe Yvypóra Raʼy katu okaru ha hoʼu víno, ha peje: ‘¡Pévango ikaʼu ha okaruhárente voi oiko, ojeheʼa umi pekadór ha impuésto kovraháre!’” (Mateo 11:18, 19). Juan ningo oiko peteĩ nasaréoicha, ha ndoʼúi ni víno, péro umi hénte heʼi hese oñendemoniaha (Números 6:2, 3; Lucas 1:15). Jesús katu oiko umi ótro kuimbaʼéicha, hoʼu opaichagua tembiʼu ha vevída oavusaʼỹre, péro lomímonte ojeʼe hese ikaru ha omokõitereiha. Haʼete voi noñemeʼẽiva gústo umi héntepe.

Jesús heʼi umi hénte ojoguaha umi mitã ohugávape plásape. Umi ótro mitã ombopu chupekuéra fláuta, péro haʼekuéra ndojerokyséi, térã hasẽ péro haʼekuéra noñembyasýi hendivekuéra. Upévare Jesús heʼi: “Jajapóvare ojekuaa ñanearandúpa” (Mateo 11:16, 19). Ha upeichaite ningo, Juan ha Jesús ohechauka hembiapóre ndasiertoiha umi mbaʼe vai ojeʼéva hesekuéra.

Upéi, Jesús okondena mbohapy siudápe: Corazín, Betsaida ha Capernaum. Koʼã siudápe ningo haʼe ojapo heta milágro. Jesús heʼi ojapórire umi milágro Tiro ha Sidónpe, umi hénte upepegua oñarrepenti vaʼerãmoʼã. Avei heʼi haʼe opredika areve hague Capernáumpe, péro la majoría nohendúi chupe upépe. Upévare okondena ko siudápe heʼívo: “Pe Huísio Árape hoʼa vaivéta peẽme, Sodómagui” (Mateo 11:24).

Upéi, Jesús ombotuicha Itúvape oñomi haguére pe añetegua “umi iñarandu ha iñakãporãvagui”, ha oikuaauka umi iñumíldevape umi mitãicha (Mateo 11:25). Ipahápe Jesús ojapo peteĩ invitasión iporãitereíva: “Peju che rendápe enterove peẽ pembaʼapo jejopy ha pendekárga pohýiva, ha che pombopiroʼýta. Pehupi pende ári che júgo ha peaprende chehegui. Che ningo ndachepochyreíri ha añemomirĩ che pyʼaite guive, upévare katuete pombopiroʼýta. Che júgo napendeforsamoʼãi ha che kárga ivevýi” (Mateo 11:28-30).

¿Mbaʼéichapa Jesús ombopiroʼy umi héntepe? Oipeʼávo chuguikuéra umi kostúmbre pohýi omoĩva umi líder rrelihióso, por ehémplo, heta mbaʼe oproivíva hikuái ojejapo sabadokue. Péro Jesús ombovevýi chupekuéra ikárga omboʼe porãvo Ñandejára Ñeʼẽ. Avei ombopyʼaguapy umi hénte oiko asývape umi autorida káusare, ha oñekevrantávape opeka haguére. Jesús omombeʼu mbaʼépa ojapo vaʼerã hikuái oñeperdona hag̃ua chupekuéra ipekádo, ha ikatu hag̃uáicha oñemoĩ porã jey Ñandejárandi.

Enterove oñemoĩva Jesús júgo guýpe, oñemeʼẽ Ñandejárape ha oservi chupe. Jehová ningo haʼe ñande Ru yvagapegua ñandeporiahuvereko ha ñanderayhúva. Upévare, Iléi ha imandamientokuéra oĩva la Bíbliape ndaijetuʼúi ñakumpli hag̃ua (1 Juan 5:3).