“Poipytyvõta peiko hag̃ua peteĩ ñeʼẽme”

1-3. ¿Mbaʼéichapa umi babilonio oñembohory vaʼekue umi oadorávare Jehovápe ha mbaʼérepa?

EPENSAMÍNA nde haʼeha peteĩ judío ifiélva oikóva Babilóniape. Ojapóma 50 áñorupi nde puévlo oĩha prisionéroramo upe paíspe. Ha rejapoháicha jepi voi káda sábado, nde reho rejotopa umi ótro judíondi peadora hag̃ua Jehovápe. Upearã rehasa rehóvo umi kálle henyhẽvarupi héntegui, ha ápe ha pépe rehecha oĩha hetaiterei témplo tuichaicháva ha atyraite umi nichoʼi. Koʼã lugárpe ningo oho hetaiterei hénte, haʼekuéra opurahéi ha ojapo ofrénda umi dios fálsope, por ehémplo Mardúkpe.

² Mombyry umi henteitágui, rejotopa umi ótro judío ifiélvandi,a ikatu hína peteĩva umi lugár oĩva umi rrío ypýpe, umi ohasáva pe siudárupi. Peẽme g̃uarã upéva peteĩ lugár itrankílova ikatuhápe peñemboʼe, pepurahéi salmo ha pejepyʼamongeta oñondivepa Ñandejára Ñeʼẽre. Ha peñemboʼe aja, pehendu okuʼe ha ochiãha umi kanóa oñeñapytĩva pe rrío rembeʼýpe. Peẽ ningo pevyʼaiterei pórke hasypeve petopa peteĩ lugár avave napenemolestaihápe. Ha ndapeipotái umi hénte upepegua otopa penderehe ha ojapo sarambi pene rreunionhápe, ojapoháicha jepi voi. ¿Mbaʼérepa ojapóta hikuái upéva?

³ Babilonia ningo oganáma hetaiterei gérra, ha umi hénte heʼi pe siuda ipoderosoha oipytyvõ rupi chupekuéra umi dios fálso. Chupekuéra g̃uarã Marduk ipoderosove Jehovágui, ha upéicha rupi Jerusalén oñehundipa. Upévare haʼekuéra oñembohory Jehováre ha ipuévlore, ha sapyʼánte oñembohoryhápe heʼi chupekuéra: “Pepurahéi peteĩ músika oñeʼẽva Sion rehe” (Sal. 137:3). Heta salmo ningo omombeʼu Sion, térã Jerusalén oganáma hague heta gérra Jehová enemigokuéra kóntrape, koʼýte umíva umi salmo rehe oñembohory umi babilonio. Oĩ avei salmo oñeʼẽva umi babilonio rehe, peteĩva por ehémplo heʼi: “Oitypaite ha ohundi hikuái Jerusalén. [...] Ore vesinokuéra oñembohory ha opukapa orerehe” (Sal. 79:1, 3, 4).

4, 5. ¿Mbaʼe esperánsapa omeʼẽ Ezequiel profesía, ha mbaʼépa jahecháta ko kapítulope? (Ehecha pe taʼanga oĩva iñepyrũme).

⁴ Oĩ avei heta judío apóstata, umíva ndoperdéi avei la oportunida oñembohory hag̃ua nderehe rejerovia haguére Jehováre ha iprofetakuérare. Upéicharõ jepe, pe adorasión verdadéra tuichaiterei nekonsola ndéve ha ne famíliape. Peñeñandu porãiterei ningo ikatu haguére peñemboʼe ha pepurahéi umi ótro judío ifiélvandi. Ha releévo Ñandejára Ñeʼẽ tuichaiterei reñetrankilisa (Sal. 94:19; Rom. 15:4). Epensamína ko rreunionhápe peteĩva pende apytégui ogueruha peteĩ mbaʼe iñimportantetereíva: Peteĩ rróllo orekóva Ezequiel profesía. Nde revyʼaiterei rehendúvo Jehová promésa heʼíva haʼe ogueraha jeytaha ipuévlope ijyvy teépe. ¡Ne korasõ ningo henyhẽ vyʼágui rehendúvo ojeleeha upe profesía! Ha nde reñepyrũma reñeimahina mbaʼeichaitépa igústota ndéve ha ne famíliape peho jey vove pende vállepe, ha peipytyvõ ojeadora jey hag̃ua Jehovápe añoiténte.

⁵ Oñepyrũ guive opa peve Ezequiel profesía henyhẽ umi promésa heʼívagui ojeadora jeytaha Jehovápe añoiténte, ha umíva umi promésa omeʼẽ ñandéve esperánsa. ¿Mbaʼéichapa umi promésa oñekumpli umi oĩ vaʼekuére prisionéroramo? ¿Mbaʼéichapa oñekumpli ñane tiémpope umi profesía? Ñambohováita hína upéva. Jahecháta avei mbaʼéichapa umíva oñekumplíta amo gotyove.

6. ¿Mbaʼe avísopa Ñandejára omeʼẽ jey jey ipuévlo naiñeʼẽrendúivape?

⁶ Ezequiel rupive Jehová omombeʼu porã ipuévlope mbaʼéichapa okastigáta chupekuéra naiñeʼẽrendúi haguére. Jehová heʼi: “Haʼekuéra ohóta prisionéroramo ótro tetãme” (Ezeq. 12:11). Jahecha haguéicha ko lívrope, kapítulo 6-pe, Ezequiel ojapo peteĩ rrepresentasión ohechauka hag̃ua mbaʼéichatapa upe kastígo. Péro péva ndahaʼéi la primera ves ojeavisáva umi israelítape. Mil áño upe mboyve, Moisés tiémpopema voi Jehová oavisa vaʼekue ipuévlope ojeguerahataha chupekuéra prisionéroramo ótro tetãme osegíramo naiñeʼẽrendúi (Deut. 28:36, 37). Proféta Isaías ha Jeremías omeʼẽ vaʼekue avei peichagua avíso (Is. 39:5-7; Jer. 20:3-6).

7. ¿Mbaʼéichapa Jehová okastiga ipuévlope?

⁷ Ñambyasýramo jepe, la majoría umi israelita nopenái umi avísore, ha amo ipahápe heta ombohasa asy hikuái Ñandejárape. Pe puévlo otraisiona Jehovápe, naiñeʼẽrendúi chupe, oadora umi dios fálsope, ha ojapo opaichagua mbaʼe vai umi pastór ha umi governánte iñañáva ogueraha vai rupi chupekuéra. Upéicha rupi Jehová opermiti pe ñembyahýi og̃uahẽ upe tetãme. Upéva ningo peteĩ mbaʼe ivaietereíva ha peteĩ ñemotĩ chupekuéra g̃uarã, pórke upéva haʼe vaʼekue “peteĩ yvy osyryhápe kamby ha eirete” (Ezeq. 20:6, 7). Upéi Jehová okastiga ipuévlope ha oheja ojegueraha chupekuéra prisionéroramo, oprofetisa haguéicha ymaite guive. Áño 607-pe a.C. Nabucodonosor, pe rréi de Babilonia, ohundi Jerusalén ha pe témplo. Heta judío omano ha hetaitereípe ojegueraha prisionéroramo Babilóniape. Upépe heta ojepersegi ha oñeñembohory hesekuéra jahecha haguéicha oñepyrũvo ko kapítulo.

8, 9. ¿Mbaʼéichapa Jehová oavisa umi kristiánope oñeñangareko hag̃ua umi apóstatagui?

⁸ ¿Oiko piko umi kristiáno rehe upe oiko vaʼekue umi ojegueraha vaʼekuére prisionéroramo? Si, ha ojeavisa haguéicha umi judíope, voi porã ojeavisa vaʼekue avei Cristo segidorkuérape. Jesús oñepyrũrõ guare opredika heʼi vaʼekue: “Peñangarekóke pendejehe, cháke oĩta proféta japu oúva pene rendápe ovecharamoguáicha, péro añetehápe haʼekuéra lóvo vareʼa hína” (Mat. 7:15). Heta áño upe rire, apóstol Pablo omeʼẽ vaʼekue peichagua avíso: “Che aikuaa, ág̃a aha rire oiketaha pende apytépe lóvo ñarõ otrata vaítava umi ovechakuérape. Ha pende apytégui voi osẽta umi kuimbaʼe omboʼétava umi mbaʼe noĩporãiva ogueraha hag̃ua hapykuéri umi disípulope” (Hech. 20:29, 30).

⁹ Umi kristiánope oñembokatupyry opilla hag̃ua umi apóstatape ha ojeʼe chupekuéra ani hag̃ua ojeheʼa umívare. Ha umi ansiánope ojeʼe vaʼekue omosẽ vaʼerãha umichaguápe kongregasióngui (1 Tim. 1:19; 2 Tim. 2:16-19; 2 Ped. 2:1-3; 2 Juan 10). Upéicharõ jepe, oiko haguéicha Israel ha Judá yma guarére, heta kristiáno mbeguekatúpe nopenavéi umi avísore. Ha pe áño 100 rupi d.C. umi apóstata oñepyrũma ombyai pe kongregasión. Juan, pe último apóstol oikovéva gueteri upe tiémpope, ohecha vaʼekue mbaʼéichapa oñemongyʼa pe kongregasión umi apóstata ha umi rrevélde káusare. Haʼe añoite upe tiémpope la “ojokóva” chupekuéra, upéicha rupi umi enseñánsa japu ndojagarrapái pe kongregasión (2 Tes. 2:6-8; 1 Juan 2:18). ¿Péro mbaʼépa oiko apóstol Juan omano rire?

10, 11. ¿Mbaʼéichapa oñekumpli áño 100 guive d.C. pe ehémplo oipuru vaʼekue Jesús oñeʼẽva pe trígo ha ñanáre?

¹⁰ Omano rire apóstol Juan, oñepyrũ oñekumpli pe ehémplo oipuru vaʼekue Jesús oñeʼẽva pe trígo ha ñanáre (elee Mateo 13:24-30). Jesús heʼi haguéicha, Satanás oñotỹ “ñana”, térã umi kristiáno guaʼu pe kongregasión apytépe. Péicha pe kongregasión pyaʼevéntema oñemongyʼa ohóvo. ¿Mbaʼéichapa oiméne Jehová oñeñandu raʼe ohechávo koʼã mbaʼe? Oiméne omokorasõ rasy chupe ohechávo pe kongregasión omoñepyrũ vaʼekue Itaʼýra, henyhẽha umi kostúmbre ha fiésta oúva rrelihión fálsagui. Avei ohecha ojeadoraha umi taʼangápe ha oñemboʼeha umi enseñánsa japu, oúva umi filósofo ndogueroviáivagui Ñandejára oexistiha ha umi rrelihión fálsagui. ¿Mbaʼépa ojapo Jehová? Ojapo haguéicha pe nasión de Israel naiñeʼẽrendúi vaʼekue rehe, haʼe oheja ojegueraha ipuévlope prisionéroramo. Áño 100 guive d.C., ijetuʼuvéntema ojepilla hag̃ua mávapa umi kristiáno verdadéro, oñembojojáva pe trígore, pórke oĩ vaʼekue hetaiterei kristiáno guaʼu. Ñandejára puévlo, jaʼe porãsérõ g̃uarã, oĩ prisionéroramo Babilonia Guasu poguýpe, haʼéva hína entéro umi rrelihión fálsa. Ha umi kristiáno guaʼu ojeheʼa umi rrelihión fálsare. Ha hetave rupi umi kristiáno guaʼu oñepyrũ umi rrelihión heʼíva ijehe kristianoha.

¹¹ Hetaiterei tiémpore umi rrelihión heʼíva ijehe kristianoha oguereko pytũmbýpe la héntepe, péro upéicharõ jepe oĩ vaʼekue umi kristiáno verdadéro ha oñembojojáva ‘trígore’ pe ehémplo Jesús omoĩ vaʼekuépe. Ojapo haguéicha umi judío oĩ vaʼekue prisionéroramo oñemombeʼúva Ezequiel 6:9-pe, umi kristiáno verdadéro imanduʼa Ñandejára teére. Umíva apytégui oĩ vaʼekue umi pyʼaguasúpe oñemoĩva umi enseñánsa japúre, upéicha rupi ojepersegi chupekuéra ha avei oñeñembohory hesekuéra. ¿Ohejátapa Jehová ipuévlope pe rrelihión fálsa poguýpe? ¡Nahániri! Oiko haguéicha Israel yma guarére, Jehová medidaitére ohechauka vaʼekue ipochyha ipuévlore ha okorrehi chupekuéra tekotevẽha pevénte (Jer. 46:28). Avei Jehová ndohejái ipuévlope esperansaʼỹre. Ñanemanduʼami jeýna umi judío oĩ vaʼekuére prisionéroramo Babilonia yma guarépe, ha jahecha mbaʼéichapa Jehová omeʼẽ chupekuéra esperánsa osẽtaha upégui.

12, 13. ¿Mbaʼérepa Jehová ipochyjeráta ipuévlo oĩvandi prisionéroramo Ezequiel tiémpope?

¹² Jehová ohechauka porã vaʼekue ipochyha ipuévlore. Péro avei omyesakã porã ndaipochymoʼãiha hendivekuéra pára siémpre. Emañamína mbaʼépa haʼe heʼi: “Chepochyjeráta, añetrankilisáta ha añekontentátama. Ha péicha ambou rire hiʼarikuéra che pochykue, oikuaáta hikuái che Jehová heta vése haʼe hague chupekuéra chéve añoite cheadora vaʼerãha” (Ezeq. 5:13). ¿Mbaʼérepa Jehová ipochyjeráta?

¹³ Pórke umi judío naiñeʼẽrendúiva ojegueraha vaʼekue apytépe, oĩ umi judío ifiélva. Avei proféta Ezequiel rupive Ñandejára oprofetisa ipuévlo apytépe oĩtaha oñarrepentíva oĩ aja prisionéroramo. Umi judío oñarrepentíva imanduʼáta umi mbaʼe oporombojeguarúva ojapo vaʼekuére opuʼãvo Jehová kóntrape, ha ojerure asýta chupe operdona ha oguerohory jey hag̃ua chupekuéra (Ezeq. 6:8-10; 12:16). Umi judío ifiélva apytépe oĩ vaʼekue Ezequiel, proféta Daniel ha umi mbohapy iñirũ. Añetehápe, Daniel are oiko vaʼekue ha upéicha rupi ohecha jepe oñepyrũrõ guare ou hikuái prisionéroramo Babilóniape, ha avei oñesẽrõ guare upégui. Lívro de Daniel kapítulo 9-pe, jatopa peteĩ ñemboʼe iporãitereíva haʼe ojapo vaʼekue ojerurehápe oñeperdona hag̃ua Israel pekadokuéra. Umi mbaʼe heʼíva ohechauka porãiterei pe oñandúva umi miles oĩva prisionéroramo. Umíva umi judío oipotaiterei vaʼekue Jehová operdona ha ovendesi jey chupekuéra. ¡Añetehápe ñanemopirĩmba Ezequiel profesiakuéra, heʼíva ojepoi jeytaha umi judíogui ha oadora jeytaha hikuái Jehovápe añoiténte!

14. ¿Mbaʼérepa Jehová ogueraha jeýta ipuévlope hetãme?

¹⁴ Péro Jehová ojapóta upéva ndahaʼéi oguenohẽnte hag̃ua ipuévlope upe oĩhágui prisionéroramo ha ojeadora jey hag̃ua chupe, síno oĩ kuri peteĩ mbaʼe iñimportantevéva. Haʼekuéra osẽta kuri Babilóniagui ndahaʼéi omereségui, síno pórke og̃uahẽma kuri pe tiémpo Jehová ombotuicha jey hag̃ua héra umi nasionkuéra renondépe (Ezeq. 36:22). ¡Umi babilonio hasypeve oikuaáta umi dios demoniáko orekóva, por ehémplo Marduk, ndahaʼeiha mbaʼevete asy oñembojojárõ Ñandejára Todopoderóso Jehováre! Jahechamína 5 promésa Jehová ojapo vaʼekue ha Ezequiel omombeʼúva umi oĩvape prisionéroramo. Primero jahecháta mbaʼépa heʼise raʼe umi promésa umi judío ifiélvape g̃uarã. Upéi jahecháta mbaʼéichapa umi promésa oreko vaʼekue peteĩ kumplimiénto tuichavéva.

15. ¿Mbaʼéichapa oadora Ñandejárape umi judío ou jey vaʼekue hetãme?

¹⁵ PROMÉSA 1. Ndojeadoramoʼãvéima umi taʼanga ha opáta umi mbaʼe oporombojeguarúva oúva rrelihión fálsagui (elee Ezequiel 11:18; 12:24). Jahecha haguéicha ko lívrope kapítulo 5-pe, Jerusalén ha pe témplo oñemongyʼa vaʼekue ojesegi haguére upépe umi kostúmbre oúva rrelihión fálsagui, umíva apytépe pe taʼanga ñemombaʼeguasu. Péicha pe puévlo oñemongyʼa ha oñemomombyry Ñandejáragui. Péro Ezequiel rupive Jehová oprofetisa umi oĩva prisionéroramo, ikatuha oreko esperánsa ipotĩ jeytaha pe adorasión omeʼẽva hikuái. Entéro umi ótra vendisión oútava ojeadora jey vove Jehovápe añoiténte, odepende hína ko mbaʼe iñimportantetévare: Ipotĩ jey vaʼerã pe adorasión oñemeʼẽva Jehovápe.

16. ¿Mbaʼe promésapa Jehová ojapo ipuévlope oñeʼẽvo chupekuéra hetãre?

¹⁶ PROMÉSA 2. Oho jeýta hikuái ivállepe. Jehová heʼi umi oĩvape prisionéroramo: “Ameʼẽta peẽme Israel yvy” (Ezeq. 11:17). Upéva ningo peteĩ promésa ndaijojaháiva, pórke umi babilonio pyʼỹinte oñembohorýva Ñandejára puévlore núnka nomeʼẽiva chupekuéra esperánsa oho jeytaha hetãme (Is. 14:4, 17). Haʼekuéra oho jey vove hetãme, pe yvy oprodusi porãta, orekóta hikuái heta hiʼupy ha pe traváho ojapóva omoñeñandu porãta chupekuéra. Umi judío ifiél aja entéro, opytáta tesaráipe pe ñembyahýi ha miséria ohasa vaʼekue (elee Ezequiel 36:30).

17. ¿Mbaʼépa oikóta umi sakrifísio ojejapóvagui Jehovápe g̃uarã?

¹⁷ PROMÉSA 3. Ojejapo jeýta ofrénda Jehová altárpe. Jahecha haguéicha ko lívrope, kapítulo 2-pe, pe léi heʼi vaʼekue umi sakrifísio ha ofrénda iñimportantetereiha ojeadora hag̃ua Jehovápe haʼe oipotaháicha. Umi judío ou jeýva ojapóta ofrénda Jehovápe, péro haʼe oaseptáta umíva haʼekuéra ifiélramo ha oadoráramo chupe añoite. Péicha oñeperdonáta pe puévlope ipekadokuéra ha oñemoag̃ui jeýta Ñandejárare. Jehová ningo opromete: “Kompletoite Israelgua, enterovete voi cheservíta upe paíspe. Che avyʼáta hesevekuéra, ha upépe ahaʼarõta ogueru chéve hikuái ofréndaramo umi tenonderãite okosecha vaʼekue ha ikontrivusión, umíva hína umi mbaʼe sagrádova” (Ezeq. 20:40). Añetehápe ningo ojeadora jeýta Jehovápe añoiténte haʼe oipotahaichaite ha upéva rupive ojehupytýta heta vendisión.

18. ¿Mbaʼéichapa Jehová oñangarekóta ipuévlore?

¹⁸ PROMÉSA 4. Ndaiporimoʼãvéima pastór aña. Ñandejára puévlope ogia vaʼekue umi pastór aña, ha upéva peteĩ mbaʼe ogueraha vaieterei vaʼekue pe puévlope. Péro Jehová opromete okambiataha upéva. Oñeʼẽvo umi pastór aña rehe, haʼe heʼi: “Amosẽta chupekuéra anivéma hag̃ua oñangareko che ovechakuérare [...]. Asalváta che ovechakuérape umi pastór jurúgui”. Péro Jehová opromete avei ipuévlo ifiélvape: “Añangarekóta che ovechakuérare” (Ezeq. 34:10, 12). ¿Mbaʼéichapa ojapóta upéva? Haʼe ojevaléta umi kuimbaʼe ifiél ha iñeʼẽrendúvare oñangareko hag̃ua ijovechakuérare.

19. ¿Mbaʼe promésapa Jehová ojapo oñeʼẽvo pe unida rehe?

¹⁹ PROMÉSA 5. Umi oadoráva Jehovápe oĩta en unida. Epensamína mbaʼeichaitépa oiméne umi judío ifiélva Jehovápe, oñembyasy ohechávo Ñandejára puévlo ojedividiha oho mboyvéma voi prisionéroramo. Omboliga rupi chupekuéra umi pastór aña ha proféta japu, umi hénte opuʼã umi proféta ifiélva kóntrape orrepresentáva Jehovápe. Upéva káusare umi hénte oforma grúpo ha oñakontraria ojuehe. Upéicha rupi, iporãiterei vaʼekue pe promésa oñekumplítava oñepyrũ jey vove pe adorasión verdadéra: “Poipytyvõta peiko hag̃ua peteĩ ñeʼẽme, ha amoĩta pende pyʼapýpe peteĩ espíritu pyahu” (Ezeq. 11:19). Umi judío ou jey vaʼekue, oĩramo en unida Jehovándi ha hapichakuérandi, ni peteĩ enemígo ndaipuʼakamoʼãi hesekuéra. Pe nasión kompletoite koʼág̃a ikatu jeýta omombaʼeguasu Jehovápe, ndahaʼemoʼãi ku omotĩ ha oheja vaítava chupe.

20, 21. ¿Mbaʼéichapa oñekumpli Ñandejára promésa oñeʼẽva umi ou jey vaʼekuére hetãme?

²⁰ ¿Oñekumplípa umi 5 promésa umi judío ou jeýrõ guare oĩhágui prisionéroramo? Ikatu ñanemanduʼa upe heʼi vaʼekuére ituja riréma peteĩ kuimbaʼe ifiélva, hérava Josué: ‘Entéro umi promésa porãite pende Jára Jehová ojapo vaʼekue umi israelítape oñekumplipaite, ni peteĩ ndopytái oñekumpliʼỹre’ (Jos. 23:14). Jehová okumpli vaʼekue iñeʼẽ Josué tiémpope, ha upeichaite avei ojapo vaʼekue umi judío ou jeýrõ guare hetãme.

²¹ Umi judío ndoadoravéi umi taʼanga ha ndojapovéi umi mbaʼe oporombojeguarúva oúva rrelihión fálsagui, umíva ningo omomombyry vaʼekue chupekuéra Jehovágui. Ha oiko upe mbaʼe ñaimoʼãʼỹva: Pe puévlo ou jey hetãme, ombaʼapo ijyvy teépe ha oiko vyʼápe upe lugárpe. Upépe haʼekuéra omopuʼã jey Jehová altár ha ojapo ofrénda Ñandejára oguerohorýva, upéva peteĩ mbaʼe primeroite voi ojapo vaʼekue hikuái (Esd. 3:2-6). Jehová ovendesi ipuévlope ha omeʼẽ chupekuéra umi pastór imbaʼeporãva, umíva apytépe Esdras, haʼe ningo saserdóte vaʼekue ha okopia Ñandejára Ñeʼẽ, avei oĩ Nehemías ha Zorobabel, haʼekuéra governadór vaʼekue, avei Josué, haʼe oservi vaʼekue súmo saserdóteramo, ha Ageo, Zacarías ha Malaquías katu haʼe vaʼekue proféta ipyʼaguasúva. Umi hénte osegíramo iñeʼẽrendu ha ojapo umi instruksión oúva Jehovágui, oĩta hikuái en unida yma guaréicha (Is. 61:1-4; elee Jeremías 3:15).

22. ¿Mbaʼéichapa umi promésa oñekumpli vaʼekue ohechaukánte umi mbaʼe tuichavéva oikótava upe rire?

²² Añetehápe iporã ha oporomokyreʼỹeterei vaʼekue oñekumplírõ guare umi promésa Jehová ojapo vaʼekue, heʼíva oñepyrũ jeytaha ojeadora chupe añoiténte. Péro umi mbaʼe oñekumpli vaʼekue ohechaukánte umi mbaʼe tuichavéva oikótava upe rire. ¿Mbaʼéichapa jaikuaa upéva? Jehová okumplíta kuri umi promésa, péro upearã pe puévlo osegi vaʼerã iñeʼẽrendu chupe. Ñambyasýramo jepe, umi judío naiñeʼẽrendúi jey chupe ha opuʼã hese. Péro Josué heʼi haguéicha, Jehová heʼíva ningo oñekumpli katuete. Upévare jaʼekuaa koʼã promésa oreko hague peteĩ kumplimiénto tuichavéva ha opytáva pára siémpre. Jahechamína mbaʼéichapa oiko upéva.

23, 24. ¿Arakaʼe ha mbaʼéichapa oñepyrũ “pe tiémpo oñembopyahu jey hag̃ua entéro mbaʼe”?

²³ Jastudia rupi la Biblia ñande jaikuaa 1914 guive ñaimeha umi ára pahápe, ha ko múndo aña oñehundi potaitemaha. Péro ñande jaservíva Jehovápe nañambyasýi upéva. Añetehápe, la Biblia omyesakã 1914-pe oñepyrũ hague peteĩ tiémpo iñimportantetereíva: “Pe tiémpo oñembopyahu jey hag̃ua entéro mbaʼe” (Hech. 3:21). ¿Mbaʼéichapa jaikuaa upéva? ¿Mbaʼépa oiko yvágape áño 1914-pe? ¡Jesucrístogui oiko rréi Ñandejára Rréinope! ¿Mbaʼéichapa upe oiko vaʼekue ‘ombopyahu jey entéro mbaʼe’? Ñanemanduʼa vaʼerã Jehová opromete hague rréi Davídpe ifamiliare siémpre ogovernataha (1 Crón. 17:11-14). Áño 607-pe a.C., umi babilonio ohundi Jerusalén ha pe goviérno oúva David familiarégui, ha upe tiémpo guive ndaiporivéima ni peteĩ David familiare oservíva rréiramo.

²⁴ Jesús, haʼéva pe “Yvypóra Raʼy”, oreko pe derécho legál ogoverna hag̃ua, haʼe rupi rréi David familiare (Mat. 1:1; 16:13-16; Luc. 1:32, 33). Áño 1914-pe, Jehová omoĩrõ guare Jesúspe rréiramo yvágape, oñepyrũ “pe tiémpo oñembopyahu jey hag̃ua entéro mbaʼe”. Koʼág̃a Jehová ikatúma oipuru ko Rréi perféktope osegi hag̃ua ombopyahu entéro mbaʼe.

25, 26. a) ¿Arakaʼépa opa pe tiémpo oñeĩ hague prisionéroramo Babilonia Guasu poguýpe, ha mbaʼéichapa jaikuaa upéva? (Ehecha rrekuádro “¿Mbaʼérepa áño 1919?”). b) ¿Mbaʼépa oñepyrũ rakaʼe oñekumpli 1919 guive?

²⁵ Crístogui oiko rire Rréi, haʼe omoirũ Itúape ohecha hag̃ua mbaʼéichapa Ñandejára puévlo oadora hína Itúape ko yvy ape ári, upéva peteĩ mbaʼe primeroite voi ojapo vaʼekue (Mal. 3:1-5). Jesús oprofetisa haguéicha omoĩrõ guare pe ehémplo oñeʼẽva pe trígo ha ñanáre, heta tiémpore ndaikatúi vaʼekue oñediferensia pe trígo pe ñanágui, térã umi kristiáno unhído teéva, umi kristiáno guaʼúgui.b Péro áño 1914-pe og̃uahẽma pe kosécha tiémpo, ha ikatúma vaʼekue oñediferensia. Heta áño 1914 mboyve, umi Estudiánte de la Biblia ifiélva ohechaukáma tuichaiterei ojavyha umi rrelihión heʼíva ijehe kristianoha, ha oñepyrũ ojesepara chuguikuéra. Upérõ og̃uahẽma pe tiémpo ojeadora jey hag̃ua Jehovápe haʼe oipotaháicha. Upémarõ, oñepyrũmíre áño 1919, unos kuánto áño oñepyrũ rire pe “kosécha tiémpo”, Ñandejára puévlo osẽ Babilonia Guasu poguýgui, upe oĩ haguégui prisionéroramo (Mat. 13:30). ¡Opáma pe tiémpo oĩ haguépe hikuái prisionéroramo!

²⁶ Ezequiel profesiakuéra oñeʼẽva mbaʼéichapa oñemoĩ jeýta hendaitépe pe adorasión verdadéra, oñepyrũ vaʼekue oreko peteĩ kumplimiénto tuichavéva, ndojehechái haguéicha arakaʼeve Ñandejára puévlope. Jahechamína koʼág̃a mbaʼéichapa umi 5 profesía ñahesaʼỹijo vaʼekue oreko peteĩ kumplimiénto tuichavéva.

27. ¿Mbaʼéichapa Ñandejára omopotĩ ipuévlope idolatríagui?

²⁷ PROMÉSA 1. Ndojeadoramoʼãvéima umi taʼanga ha opáta umi mbaʼe oporombojeguarúva oúva rrelihión fálsagui. Opávo ohóvo umi áño 1800, ha oñepyrũvo umi áño 1900, umi kristiáno ifiélva oforma unos kuánto grúpo michĩva ha oñepyrũ oheja umi kostúmbre oúva rrelihión fálsagui. Oñemboyke umi enseñánsa noĩriva la Bíbliape ha oñemopyendáva pe rrelihión fálsape, por ehémplo pe Trinida, ñane álma nomanoiha ha umi omanóva ohoha infiérnope okái hag̃ua. Ojehechauka porã ndojepurúi vaʼerãha umi taʼanga ojeadora hag̃ua Ñandejárape, haʼégui idolatría. Mbeguekatúpe Ñandejára puévlo ontendéma avei ndojepurúi vaʼerãha pe kurusu, haʼe rupi taʼanga ñemombaʼeguasu (Ezeq. 14:6).

28. ¿Mbaʼéichapa Jehová puévlo haʼete ku oho jeýva hetãme?

²⁸ PROMÉSA 2. Ñandejára puévlo oreko jeýta pyʼaguapy ha unida. Umi kristiáno ifiélva osẽ umi rrelihión fálsagui, térã Babilonia Guasúgui. Ojapóvo upéva, haʼete ku oho jeýva hikuái hetãme, upéva heʼise oñepyrũ hague oĩ pyʼaguapy ha unida Ñandejára puévlope. Ko lugárpe arakaʼeve ndofaltamoʼãvéima chupekuéra mbaʼeve oĩ porã hag̃ua Ñandejára renondépe (elee Ezequiel 34:13, 14). Ko lívrope, kapítulo 19-pe jahecháta mbaʼéichapa Jehová ovendesi ipuévlope omeʼẽvo chupekuéra hetaiterei hiʼupy, oikoʼỹ haguéicha arakaʼeve (Ezeq. 11:17).

29. ¿Mbaʼéichapa 1919-pe ojehechauka vaʼekue iñimportantetereiha pe predikasión?

²⁹ PROMÉSA 3. Ojejapo jeýta ofrénda Jehová altárpe. Umi kristiáno ypykue tiémpope, Ñandejára puévlo oaprende natekotevẽveimaha osakrifika umi animál Ñandejárape. Péro haʼekuéra omeʼẽ vaʼerã Jehovápe peteĩ mbaʼe ovalevéva upévagui: Omombaʼeguasu vaʼerã Ñandejárape umi mbaʼe heʼíva rupive ha oñeʼẽ vaʼerã hese opredikávo hapichakuérape (Heb. 13:15). Oĩ aja hikuái prisionéroramo heta áñore, ndaipóri vaʼekue ni peteĩ organisasión ogiáva Ñandejára puévlope, ikatu hag̃uáicha ojepredika ha ojeadora chupe. Ha og̃uahẽ mbotávo pe tiémpo osẽ hag̃ua hikuái pe oĩhágui prisionéroramo, Ñandejára puévlo ojapóma hína kuri koʼãichagua sakrifísio. Haʼekuéra heta hembiapo pe predikasiónpe ha vyʼápe omombaʼeguasu hikuái Jehovápe umi rreuniónpe. Ha áño 1919 guive, “pe esklávo de konfiánsa ha iñarandúva”, ohechauka iñimportantetereiha ojepredikave, ha oorganisa porãve upe tembiapo (Mat. 24:45-47). ¡Péicha hetavéma ohóvo umi omombaʼeguasúva Ñandejára réra ha Jehová altár henyhẽte isakrifisiokuéragui!

30. ¿Mbaʼépa Jesús ojapo oñeñangareko porã hag̃ua ijovechakuérare?

³⁰ PROMÉSA 4. Ndaiporimoʼãvéima pastór aña. Umi rrelihión heʼívape ijehe kristianoha oĩ umi pastór aña, japu ha opensáva ijehénte, péro Jesucristo osalva vaʼekue Ñandejára puévlope umívagui. Cristo kongregasiónpe, umi otrata vaívape umi ovechakuérape, ojapoháicha umi pastór japu ojepeʼa vaʼekue chuguikuéra upe rresponsavilida (Ezeq. 20:38). Jesús, pe Pastór Imbaʼeporãva, ojasegura porã ikatu hag̃uáicha oñeñangareko porã ijovechakuérare. Áño 1919-pe, haʼe oiporavo pe esklávo de konfiánsa ha iñarandúva. Upe grúpo michĩva oĩháme umi kristiáno unhído ifiélva oñenkarga omeʼẽ hag̃ua hiʼupy, péicha oñeñangareko porã Ñandejára puévlore. Tiémpo rire, oñembokatupyry umi ansiánope ikatu hag̃uáicha oñangareko porã “Ñandejára ovechakuérare” (1 Ped. 5:1, 2). Umi mbaʼe heʼíva Ezequiel 34:15 ha 16 heta vése ojepuru oñemomanduʼa hag̃ua umi pastór kongregasionpeguápe, mbaʼéichapa Jehová ha Jesús oipota ojetrata ijovechakuérape.

31. ¿Mbaʼéichapa Jehová okumpli pe profesía oĩva Ezequiel 11:19-pe?

³¹ PROMÉSA 5. Umi oadoráva Jehovápe oĩta en unida. Ohasávo umi áño, umi heʼíva ijehe kristianoha ojedividi hetaiterei rrelihión ha sékta opuʼãmbávape ojuehe. Jehová ojapóva katu ndahaʼeiete upéicha, haʼe ojapo peteĩ mbaʼe ijojahaʼỹva: Omantene en unida pe ipuévlo oadora jeýva chupe haʼe oipotaháicha. Ezequiel rupive Jehová opromete: “Poipytyvõta peiko hag̃ua peteĩ ñeʼẽme” (Ezeq. 11:19). Ha ko promésa oñekumpli oñeimoʼãʼỹháicha. Ko múndo kompletoitére, Cristo oreko hetaiterei segidór oúva diferénte kultúra ha rrelihióngui, avei oĩ umi iplátava ha imboriahúva. Upéicharõ jepe, enterovépe oñemboʼe peteĩchapa la Biblia heʼíva ha ojapo el mísmo traváho peteĩ ñeʼẽme. Pe último pyhare Jesús oĩrõ guare ko yvy ape ári, oñemboʼe ha ojerure asy isegidorkuéra oĩ hag̃ua siémpre en unida (elee Juan 17:11, 20-23). Ñane tiémpope, Jehová ombohovái ñaimoʼãʼỹháicha upe mbaʼe Jesús ojerure vaʼekue iñemboʼépe.

32. ¿Mbaʼéichapa nde reñeñandu reikuaávo oñekumpliha hína pe profesía heʼíva ojeadora jeytaha Jehovápe haʼe oipotahaichaite? (Ehecha rrekuádro “Profesía oñeʼẽva umi prisionérore”).

³² Ñane tiémpope ojeadora jey hína Jehovápe haʼe oipotahaichaite, ¡ajépa javyʼaite ikatu haguére jaiko ko tiémpope! Jahecha hína mbaʼéichapa oñekumpli Ezequiel profesiakuéra enteroite mbaʼépe ñane adorasiónpe. Ikatu ñaime segúro Jehová ovyʼaha ipuévlo ndive, haʼe voi oprofetisa haguéicha: “Avyʼáta pendereheve” (Ezeq. 20:41). ¿Rehechakuaápa tuichaiterei mbaʼeha reime haguére Ñandejára puévlope? Koʼág̃a, ñasẽ rire upe ñaime haguégui prisionéroramo hetaite tiémpore Babilonia Guasu poguýpe, jareko heta hiʼupy oúva Ñandejára Ñeʼẽgui ha ñamombaʼeguasu Jehovápe ko yvy tuichakuére. Péro heta Ezequiel profesía heʼíva ojeadora jeytaha Jehovápe haʼe oipotahaichaite, orekóta hína peteĩ kumplimiénto tuichavéva amo gotyove.

33-35. a) ¿Mbaʼépa heʼise pe promésa oĩva Ezequiel 36:35-pe umi judío oĩvape g̃uarã prisionéroramo? b) ¿Mbaʼépa heʼise ñandéve g̃uarã koʼág̃arupi upe promésa? (Ehecha rrekuádro “Pe tiémpo oñembopyahu jey hag̃ua entéro mbaʼe”).

³³ Jahecha haguéicha, “pe tiémpo oñembopyahu jey hag̃ua entéro mbaʼe” oñepyrũ oñemoĩrõ guare Jesúspe rréiramo áño 1914-pe. Péicha oñemoĩ jey rréiramo David familiarépe (Ezeq. 37:24). Upéi, Jehová omeʼẽ podér Jesúspe oipytyvõ hag̃ua ipuévlope oadora jey hag̃ua Ñandejárape haʼe oipotahaichaite, heta áño oĩ rire hikuái prisionéroramo Babilonia Guasu poguýpe. Péro pe traváho Jesús ojapóva omoĩ porã jey hag̃ua pe adorasión verdadéra ndopái upépe. Upe traváho osegíta amo gotyove oñeimoʼãʼỹháicha, jahechamína umi mbaʼe ijojahaʼỹva heʼíva Ezequiel profesía upéva rehe.

³⁴ Por ehémplo, epensamína ko promésare: “Ha umi hénte heʼíta: ‘Pe yvy ojeheja vaʼekue nandi vera, koʼág̃a ojogua pe hardín de Edénpe’” (Ezeq. 36:35). ¿Mbaʼépa heʼise upe promésa Ezequiélpe g̃uarã ha umi iñirũnguéra oĩvape g̃uarã prisionéroramo? Katuete oiméne haʼekuéra nohaʼarõi koʼã mbaʼe oñekumpli upeichaite voi, ku oikotarõguáicha pe yvýgui peteĩ lugár iporãitereíva, haʼe haguéicha pe hardín de Edén, upe Jehová voi ojapo vaʼekue yma iñepyrũme (Gén. 2:8). Upéva rangue, oiméne haʼekuéra ontende porã rakaʼe Jehová oaseguraha chupekuéra upe ijyvykuéragui oiko jeytaha peteĩ yvy iporãva ha oprodusi porãva.

³⁵ ¿Mbaʼépa heʼise ñandéve g̃uarã koʼág̃arupi upe promésa? Ñande nañahaʼarõi avei koʼã mbaʼe oñekumpli upeichaite voi, ko múndo aña oĩvape Satanás poguýpe. Upéva rangue, ñande ñantende umi mbaʼe oñekumpliha espirituálmente Ñandejára puévlore. Ñande jaservíva Jehovápe jaiko peteĩ lugár iporãitereívape, upéva hína pe paraíso espirituál. Koʼápe jaservi porã Jehovápe ñande pyʼaite guive ha upéva hína pe iñimportantevéva ñande rekovépe. Ko paraíso espirituál ningo amás día iporãve ohóvo. ¿Péro mbaʼépa oikóta amo gotyove?

36, 37. ¿Mbaʼe promésapa oñekumplíta paraísope?

³⁶ Oiko rire pe ñorairõ guasuete Armagedónpe, Jesús osegíta ombaʼapo omyatyrõ hag̃ua ko yvy kompletoite. Ogoverna vove umi mil áño aja, haʼe ogiáta yvyporakuérape ojapo hag̃ua ko yvýgui peteĩ paraíso, peteĩ hardín de Edén ojagarrátava kompletoite ko yvy (Luc. 23:43). Upépe enterove yvypóra oikóta pyʼaguapýpe oñondivepa ha oñangarekóta ko yvýre. ¡Ni peteĩ lugárpe ndaiporimoʼãvéima mbaʼeve ñanemongyhyjéva ni ñandeapeligráva! Epensamíntena mbaʼéichapa jaikóta oñekumpli vove ko promésa: “Ajapóta peteĩ kompromíso de paz hendivekuéra, ha ahundipaitéta ko yvýgui umi animál salváhe iñarõva, péicha oikóta hikuái segúro porã pe desiértope ha okéta umi kaʼaguýpe” (Ezeq. 34:25).

³⁷ ¿Ndépa ikatu reñeimahina upéva? Nde ikatúta revisita kyhyjeʼỹme oimeraẽ lugár oĩva ko yvy ape ári. Ni peteĩ animál ndojapomoʼãi nderehe mbaʼeve ivaíva. Reiméta trankílo ha mbaʼeve nandeapeligramoʼãi. Ikatúta reguata neaño pe kaʼaguýre, edisfruta umi mbaʼe porã rehecháva, ha ikatúta voi repyta reke upépe trankiloite, reikuaágui repytuʼu porãtaha ha ndoikomoʼãiha nderehe mbaʼeve ivaíva.

38. ¿Mbaʼéichapa reñeñandu rehecháta haguére oñekumpliha pe promésa oĩva Ezequiel 28:26-pe?

³⁸ Jahecháta avei oñekumpli vove ko promésa: “Haʼekuéra oikóta upépe pyʼaguapýpe ha ndokyhyjemoʼãi, ojogapóta, oñotỹta parrál ha oikóta kyhyjeʼỹme ág̃a che ahusga vove enterove oĩvape ijerére ha oñembohorýva hesekuéra, ha oikuaáta hikuái che haʼeha Ijára Jehová” (Ezeq. 28:26). Oñehundipa rire Jehová enemigokuérape, ojeikóta pyʼaguapýpe ha kyhyjeʼỹme ko yvy tuichakuére. Ñande ñañangarekóta ko yvýre, péro avei ñañangarekóta ñandejehe ha umi jahayhúvare, ñamopuʼãta ñande rogarã iporãva jaiko hag̃ua pype ha ñañotỹta umi parralty.

39. ¿Mbaʼérepa ikatu reime segúro oñekumplitaha Ezequiel promesakuéra oñeʼẽva pe paraísore?

³⁹ ¿Ñapensápa iporãitereimaha koʼã promésa oñekumpli hag̃ua? Ñanemanduʼamína upéicharõ umi mbaʼe jahecháma vaʼekuére oñekumpli ko ‘tiémpo oñembopyahu jeyhápe entéro mbaʼe’. Satanás oñemoĩ mbaretéramo jepe, Jesúspe oñemeʼẽ podér oipytyvõ hag̃ua Ñandejára siervokuérape oadora jey hag̃ua Jehovápe haʼe oipotahaichaite, ha ojapo upéva pe tiémpo ijetuʼuvévape ohasáva ko múndo. ¡Upéva ohechauka porã ñandéve katuete oñekumplitaha entéro promésa Ñandejára ojapo vaʼekue ha oĩva lívro de Ezequiélpe!