Oñondivepa ha joayhupápe. Aty ojejapóva káda áño

ÑAPENSAMÍNTENA mbaʼeichaitépa oiméne ovyʼa umi ermáno oĩvaʼekue pe aty ojejapóvape káda áño. Upéva oikókuri 3 de octubre de 2009, peteĩ Salón de Asambleas-pe oĩva Jersey City-pe (Nueva Jersey, Estados Unidos). Amo cinco mil rasa rupi oñembyaty pe rreunión número 125-pe ojapóva corporación Watch Tower Bible and Tract Society of Pennsylvania. Avei umi mbohapy sukursál oĩva Estados Unídospe ha ótro Canadápe oiporu kámara ha vidéo ohecha ha ohendu hag̃ua umi diskúrso. Upéicharõ, oĩkuri 13.235 ermáno ohendúva umi diskúrso tres óra aja. Ha enterovévape ombojoaju Jehová mborayhu.

Ko aty omoakã peteĩ ermáno Cuerpo Gobernantepegua hérava Geoffrey Jackson. Ha ñepyrũrã opresenta umi ermánope ombaʼapóva Betélpe, ojeporavovaʼekue opurahéi hag̃ua umi purahéi pyahu. Koʼãvape omoakã jey ótro ermáno Cuerpo Gobernantepegua hérava David Splane, ha oñepyrũ mboyve pe kóro opurahéi, omyesakã mbaʼérepa iñimportánte pe músika ñamombaʼeguasu hag̃ua Jehovápe. Upe rire oñeinvita enterovévape opurahéi hag̃ua mbohapy purahéi pyahu; oñepyrũ umi koropegua ha upe rire oñondivepa. Iporãramo jepe koʼã mbaʼe ndeʼiséi ojejapovaʼerãha upéicha kongregasionkuérape térã ojejapo vove umi aty guasu; upe kóro ningo upérõnte ojeporu.

Marandu umi sukursalpegua

Upe rire cinco ermáno Comité de Sucursalpegua omombeʼu umi mbaʼe ojehupytýva umi tetã oĩháme hikuái. Pór ehémplo Kenneth Little, oĩva Canadápe, omombeʼu koʼẽrõitéma oñeimprimimba lentotaha umi rrevísta Estados Unidos ha Canadápe g̃uarã. Upéva heʼise 10 vése ojejapo hetavetaha koʼág̃agui ha ojejapóta dos túrno oñembaʼapo hag̃ua dieciséis óra pór día.

Reiner Thompson avei omombeʼu mbaʼéichapa oho hese pe predikasión República Dominicánape ha Albert Olih oñeʼẽ Nigériare. Emile Kritzinger katu omombeʼu testigokuéra Mozambiquegua oĩha legál goviérno renondépe 1992 guive, heta ojepersegi rire. Umi áño ohasavaʼekuépe koʼã mbohapy tetãme hetaiterei oĩ oñepyrũva oservi Jehovápe. Viv Mouritz Australiagua, omombeʼu Timor Orientálpe koʼág̃a hetavéma oĩha testígo.

Umi comité Cuerpo Gobernantepegua

Áño 1976 guive, umi seis comité Cuerpo Gobernantepegua ojesareko opaichagua tembiapo ojapóvare Testigos de Jehová. Tiémpo rire oipytyvõ avei chupekuéra ambue ermáno ndahaʼéiva ungido ha koʼág̃a oĩma 23 omoirũva chupekuéra. Koʼãva apytégui oñeñeʼẽ seis ndive pe aty ojejapovaʼekuépe. Oñondivepa 341 áñorema oservi de tiémpo kompléto, upéva heʼise 57 áño rupi káda uno oĩmaha Jehová servísiope.

Ñepyrũrã oñeñeʼẽ ermáno Don Adams ndive, haʼe ombaʼapo Betélpe 1943 guive. Omombeʼu pe Comité de Coordinadores-pe oĩha cinco ermáno omoakãva umi ótro cinco comité, ikatu hag̃uáicha ombaʼapo hikuái oñondivepa peteĩ ñeʼẽme. Haʼekuéra ojesareko ani hag̃ua ojejoko predikasión, umi káso legál rehe, ohecha mbaʼéichapa ikatu oñepytyvõ umi ermánope oĩ jave ama guasu, yvyryrýi ha umícha. Avei ojesareko ambue mbaʼe tekotevẽvare oñeñatende pyaʼe.

Ermáno Dan Molchan omombeʼu Comité de Personal oñangarekoha umi 19.851 betelítare oĩva ko múndope, ikatu hag̃uáicha oguereko hikuái opa mbaʼe oikotevẽva omombarete hag̃ua ijerovia ha ombaʼapo porã hag̃ua. Upe rire David Sinclair omombeʼu Comité de Publicación oñangarekoha umi mbaʼe ojeguerúvare sukursálpe, oñekotevẽva oñembaʼapo porãve hag̃ua. Upe rire ermáno Robert Wallen, ombaʼapómava sesenta áño rupi Betélpe, omombeʼu Comité de Servicio ojesarekoha ojejapóvare predikasión ha kongregasionkuérape. Avei ermáno William Malenfant heʼi mbaʼeichaitépa oñembaʼapo Comité de Enseñanza-pe ojeprepara hag̃ua umi diskúrso ñande Aty Guasu tres diaguápe g̃uarã. Oñemohuʼã hag̃ua katu ermáno John Wischuk omombeʼu Comité de Redacción oprepara ha oiporavoha umi informasión oñemoĩtava umi puvlikasiónpe.a

Pe téysto ojeporúva ko áñope oñeʼẽ mborayhu rehe

Upe rire mbohapy ermáno Cuerpo Gobernantepegua ojapo mbohapy diskúrso. Omoñepyrũ hag̃ua Gerrit Lösch oporandu: “Ndépa reipota nde rapicha nderayhu?”. Upéi heʼi ñande japorohayhuha ha avei jaipotaha ñande rapicha ñanderayhu, upéva ñanepytyvõta jajapo hag̃ua heta mbaʼe porã. Heʼi avei Jehová ñanderayhueterei rupi ñandeapo hague, ha ñande jahayhúgui chupe ñasẽha japredika ha ñaporomboʼe.

Avei heʼi ñande jahayhuha umi ñanderayhuʼỹvape, ha péicha jahechauka ñande kristiáno teeha (Mat. 5:43-45). Ko diskúrsope ermáno Lösch omokyreʼỹ enterovépe ojepyʼamongeta hag̃ua umi mbaʼe Jesús ohasavaʼekuére ñanderehehápe. Chupe ningo oñembyepoti, oñemotĩ ha oñendyvu hese, upéicharamo jepe haʼe oñemboʼe umi soldádo oikutúvare chupe pe yvyráre. Ava piko ndohayhumoʼãi Jesúspe oikuaávo koʼã mbaʼe, ajépa? Upe rire ermáno Lösch omombeʼu mbaʼe téystopa ojeporúta 2010-pe, oñeguenohẽva 1 Corintios 13:7, 8-gui [NM]: ‘Pe mborayhu oaguanta opa mbaʼe. Pe mborayhu ndopamoʼãi arakaʼeve’. Upéicha ohechauka ikatutaha japorohayhu ha avei ñande rapichakuéra ñanderayhutaha opa árare.

Saʼípa ñane kombustívle?

Ermáno Samuel Herd oiporu peteĩ ehémplo iporãitereíva omoñepyrũvo idiskúrso. Haʼe heʼi: “Ñamoĩ chupe javiahaha ñane amígondi ikóchepe, ha jahavaʼerã 50 kilómetro. Peichaháguinte ñanderesaho sapyʼa pe tavlérore ha omarka pe tánke nandimaha. Upémarõ jaʼe ñane amígope opa potaitemaha pe kombustívle, péro haʼe heʼi ani hag̃ua jajepyʼapy, hembyitiha cuatro lítro rupi. Upe riremínte opaitéma katu pe kombustívle ha oparaite pe kóche. Oĩ porãpa raʼe javiaha kombustivleʼíre ha jaha japyta tapekuʼáre rei? Ikuentavevaʼerãmoʼã oñemyenyhẽrire pe tánke, ajépa? Péicha avei ñande tekotevẽ jaikuaave jahávo Jehovápe, ha ñaiméta ku ñane kombustívle hetarõguáicha”.

Péro upearã tekotevẽ manterei jakarga. Ha oĩ irundy mbaʼe ikatúva jajapo. Primero, jastudia meme ha jaleevaʼerã ára ha ára Ñandejára Ñeʼẽ. Péro upéva ndeʼiséi jaleentevaʼerãha, síno jaikuaa porã vaʼerã la Biblia heʼíva ha ñantende mbaʼépa omboʼese. Segundo, jajapo porã vaʼerã pe aty jastudia hag̃ua ñande rogayguándi. Jajapópa upéicha káda semána ñamyenyhẽ hag̃uáicha ñane tánke térãpa michĩmínte jakarga? Tercero, jaha meme rreunionhápe jastudia hag̃ua la Biblia. Ha cuarto, jajepyʼamongeta Jehová rembipotáre peteĩ lugár itrankilohápe. Iporãta ñahaʼangáramo salmístape: “Umi mbaʼe yma guare ou che akãme, chemanduʼa umi nerembiapokue rehe” (Sal. 143:5).

‘Umi hekojojáva kuarahýicha omimbíta’

Ermáno John Barr ojapo pe tercer diskúrso omohuʼã hag̃ua ko aty. Haʼe omyesakã pe ehémplo oñeʼẽva trígo ha ñana rehe (Mat. 13:24-30, 38, 43). Ha ohechauka ‘oñemonoʼõ’ jave pe ‘rréino yvagapegua ñemoñarépe’, oñemboyketaha umi ñana ojehapy hag̃ua.

Upe rire ermáno Barr ohechauka porã noñemonoʼõmoʼãiha opa ára g̃uarã, ha heʼi oĩva Mateo 24:34-pe: ‘Umi hénte koʼag̃agua ndohasamoʼãi oiko mboyve koʼã mbaʼe’. Ha upéi olee dos vése ko informasión: “Áño 1914-pe Jesús oñepyrũ ogoverna yvágape. Upérõ oĩ ko yvy ape ári heta ungido ohecháva mbaʼéichapa oñepyrũ oñekumpli pe profesía Jesús omeʼẽvaʼekue. Haʼekuéra oikove aja gueteri onase avei ambue ungido ha umíva ohecháta ág̃a oñepyrũ vove pe jehasa asy guasu”. Jesús oñepyrũrõ guare ogoverna yvágape oĩ ungido imitãva ha ijedáva, ha mokõivéva oiko pe ára paha aja, upe rire omano ohóvo umi ijedavéva. Ndajaikuaái ningo añete mboy tiémpopa oikovéta gueteri umi ungido imitãvéva, péro jaikuaa oñepyrũ vove pe jehasa asy guasu oĩtaha gueteri oikovéva. Ajépa ñanembopyʼaguapyete upéva!

‘Pe rréino yvagapegua ñemoñare’ ohaʼarõ kyreʼỹma Ñandejára jopói. Péro opaichagua kristiáno, tove toho yvágape térã opyta ko yvy ape ári, tekotevẽ iñeʼẽrendu ha ‘omimbi kuarahýicha’. Tuichaite mbaʼe ningo ñaime pe “trígo” ñemonoʼõha tiémpope!

Oñemohuʼã hag̃ua ko aty ojepurahéi ha upéi oñemboʼe peteĩ ermáno Cuerpo Gobernantepegua hérava Theodore Jaracz. Ajépa oporomokyreʼỹete ko aty!

[Nóta]

[Rrekuádro oĩva páhina 5-pe]

ESKUÉLA ANSIANOKUÉRAPE G̃UARÃ

Pe aty aja ermáno Anthony Morris, Cuerpo Gobernantepegua, heʼi oñembokatupyryvetaha umi ansiáno kongregasionguápe. Oñepyrũre 2008 ojejapókuri peteĩ eskuéla Patterson-pe (Nueva York) umi ansiáno Estados Unidosguápe g̃uarã. Ko aty oñepyrũrõ guare oñemohuʼã ramoite pe eskuéla número 72, ha oñembokatupyrýma 6.720 ansiánope. Upéicharamo jepe hetaiterei tembiapo gueteri hemby, Estados Unídospente voi oĩ 86.000 rasa ansiáno. Upévare Cuerpo Gobernante heʼi ojejapo hag̃ua peteĩ eskuéla pyahu Brooklyn-pe (Nueva York), ha upéva oñepyrũ 7 de diciembre de 2009.

Dos mése aja oñembokatupyry cuatro superintendénte Patterson-pe, oho hag̃ua upe rire oporomboʼe Brooklyn-pe. Upéi oñembokatupyry jey cuatro ermánope, oho hag̃ua Brooklyn-pe umi cuatro rekovia. Ikatu hag̃uáicha umi oho raẽve vaʼekue, omoakã pe eskuéla ansianokuérape g̃uarã, umi Salón de Asamblea ha Salón del Réinope. Upéicha ojejapo oĩ meve doce ermáno ikatútava oporomboʼe ingléspe seis eskuélape, káda semána Estados Unídospe. Upe rire oñembokatupyrýta avei cuatro ermánope oporomboʼe hag̃ua españólpe. Ko eskuéla ningo noñemoĩri Escuela del Ministerio del Reino rekovia, síno ojejapo omombareteve hag̃ua umi ansiáno jerovia. Septiembre 2011 guive opavave sukursál oĩva ko múndope ojapóta pe eskuéla umi Salón de Asamblea ha Salón del Réinope.

[Nóta oĩva taʼanga ndive páhina 4]

Ko atýpe ojepurahéi ñande purahéi ryru pyahúgui hérava Cantemos a Jehová