¿Oĩpa ne korasõ reikuaa hag̃uáicha Jehovápe?

1, 2. ¿Mbaʼérepa heta héntepe ogusta pe ígo?

¿NDÉPA reʼúmava ígo? Heta héntepe ogustaiterei ko yva, tahaʼe ojepoʼo ramóva térã oñembopiru vaʼekue. Upévare heta tetã rupi oĩ igoty. Umi hudío yma guare hoʼuseterei vaʼekue ko yva (Nah. 3:12; Luc. 13:6-9). Pe ígo ningo oreko heta mbaʼe ojapo porãva ñanderehe, ñanepytyvõva ñaneresãive hag̃ua, ha iporãva ñane korasõme g̃uarã.

² Peteĩ jey, proféta Jeremías rupive, Jehová ombojoja umi ígo ñane korasõre. Upérõ haʼe ndeʼíri mbaʼeichaitépa pe ígo ideprovécho ñandéve g̃uarã, síno oñeʼẽ umi mbaʼe jarekóvare ñande pyʼapýpe, ñande ha umi jahayhúva. Ñahesaʼỹijóvo Ñandejára heʼi vaʼekue, tekotevẽ ñapensa mbaʼépa heʼise upéva opavave kristiánope g̃uarã.

 3. ¿Mbaʼépa orrepresenta umi ígo oñeñeʼẽha Jeremías kapítulo 24-pe?

³ Jahechamína mbaʼépa Ñandejára heʼi Jeremíaspe umi ígo rehe. Áño 617-pe, Jesús ou mboyve, umi Judagua noĩporãiete Jehová renondépe, upémarõ haʼe ohechauka Jeremíaspe peteĩ visiónpe mbaʼépa oikóta hesekuéra amo gotyove. Upearã oiporu mokõi ajaka orekóva ígo; peteĩvape oĩ “ígo iporãitereíva”, ha pe ótrope katu, ‘ígo ivaietereíva’ (elee Jeremías 24:1-3). Umi ígo ivaietereíva orrepresenta rréi Sedequíaspe ha entéro umi tapicha haʼeichaguápe ohasa asýtava rréi Nabucodonosor ha ijehérsito poguýpe. Péro oĩ avei ígo iporãva. Umíva apytépe oĩ Ezequiel, Daniel ha umi mbohapy iñirũ ojeguerahámava Babilóniape. Ha oĩ avei heta hudío iñeʼẽrendúva ojegueraha potaitéva upépe. Ohasávo pe tiémpo, oĩta oho jeýva omyatyrõ hag̃ua Jerusalén ha pe témplo. Ha upeichaite oiko (Jer. 24:8-10; 25:11, 12; 29:10).

 4. ¿Mbaʼéichapa ñanemokyreʼỹ Jehová heʼíva umi ígo iporãvare?

⁴ Ñandejára heʼi umi ígo iporãvare: “Ameʼẽta chupekuéra peteĩ korasõ chekuaa hag̃ua, che haʼeha Jehová; ha oikóta chuguikuéra che retã” (Jer. 24:7). ¡Ajépa ñanemokyreʼỹete ko téxto omopyendáva ko artíkulo! Jahechaháicha, Ñandejára omeʼẽse ñandéve peteĩ korasõ jaikuaa hag̃ua chupe. Koʼápe, pe ñeʼẽ korasõ heʼise hína umi mbaʼe ñandegustáva ñande pyʼaite guive. Añetehápe, ñande jaikuaase vaʼerã Jehovápe ha ñaimese ipuévlope. Upearã, tekotevẽ jastudia Ñandejára Ñeʼẽ ha jajapo umi mbaʼe ñaaprendéva, ñañearrepenti ha jahejaite umi mbaʼe vai jajapo vaʼekue, ñañemeʼẽ Jehovápe ha jajevautisa Túva, Taʼýra ha espíritu sánto rérape (Mat. 28:19, 20; Hech. 3:19). Oĩ ojapómava koʼã mbaʼe iñimportánteva, ótro katu oñakãrapuʼã ohóvo ha ndofaltái rreunionhápe.

 5. ¿Máva mávarepa Jeremías oñeʼẽve?

⁵ Oiméramo jajapopáma koʼã mbaʼe térã nahániri, enterove tekotevẽ jajepyʼamongeta umi mbaʼe ñapensáva ha jajapóvare. ¿Mbaʼérepa? Jeremías heʼi vaʼekue oñeʼẽvo ñane korasõre, ñanepytyvõta jaikuaa hag̃ua upéva. Lívro de Jeremías oñeʼẽ avei umi tetã ambuére, upéicharamo jepe oñeʼẽve Judá rehe cinco rréi oisãmbyhy aja pukukue (Jer. 1:15, 16). Ko proféta omeʼẽ pe mensáhe enterove oñemeʼẽma vaʼekuépe Jehovápe, tahaʼe umi kuimbaʼe, kuña ha mitã. ¿Mbaʼérepa jaʼe upéva? Ijypykuéra ningo odesidi ijeheguiete oiko Ñandejára retãramo (Éx. 19:3-8). Ha umi isrraelíta oiko vaʼekue Jeremías tiémpope ohechauka haʼekuéra voi oñemeʼẽ hague avei Jehovápe, heʼívo: “Ápe roime, roju ne rendápe, [nde Jehová haʼe rupi] ore Jára” (Jer. 3:22). Péro ¿mbaʼépa oreko hikuái ipyʼapýpe?

 6. ¿Mbaʼérepa ñaneinteresa vaʼerã Jehová heʼi vaʼekue yvypóra korasõre?

⁶ Koʼág̃a rupi umi doktór oiporu hetaichagua aparáto oikuaa hag̃ua mbaʼéichapa oĩ ha ombaʼapo ñane korasõ. Jehová katu noikotevẽi koʼãichagua aparáto rehe ohecha hag̃ua opa mbaʼe oĩva ñande pyʼapýpe. Ojapo haguéicha Jeremías tiémpope, haʼe ohesaʼỹijo porãiterei ñane korasõ. La Biblia heʼi voi: “Yvypóra pyʼapy itraisionéro ha iñaña. ¿Máva piko ikatu oikuaa chupe? Che, Jehová, aipyguara pe korasõ, [...] amyengovia hag̃ua peteĩteĩme hembiapo ojerureháicha” (Jer. 17:9, 10, NM). Jaikuaa hag̃ua mbaʼéichapa oĩ térã ombaʼapo ñane korasõ, jaha vaʼerã doktórpe ha jajapouka peteĩ estúdio; péro oñehesaʼỹijo hag̃ua ñande pyʼapy, natekotevẽi jajapo upéva. Pe téxtope, Jehová oñeʼẽ umi mbaʼe oĩvare ñande pyʼapýpe, tahaʼe ñapensáva, ñañandúva, jaipotáva térã jahupytyséva. Opavavete jareko peichagua korasõ ha ikatu ñahesaʼỹijo, péro Ñandejára oipyguara porãiteve ñandehegui opa mbaʼe jarekóva ñande pyʼapýpe.

 7. ¿Mbaʼépa oreko ikorasõme heta hudío Jeremías tiémpope?

⁷ Ikatu hag̃uáicha ñahesaʼỹijo ñane korasõ, ñañeporandu vaʼerã: “¿Mbaʼépa oreko ipyʼapýpe umi hudío oiko vaʼekue Jeremías tiémpope?”. Ha ñambohovái hag̃ua upéva, jahechami Jeremías heʼi vaʼekue: “Opavave umi Israelgua noñesirkunsidái ikorasõme”. Upérõ haʼe noñeʼẽi pe sirkunsisión ojejapóvare umi kuimbaʼépe. ¿Mbaʼérepa jaʼe upéva? Jeremías heʼive: “¡Péina!, og̃uahẽta ára ahusgatahápe opavave oñesirkunsidávape, ha upéicharõ jepe, noñesirkunsidái gueteri”. Jahechaháicha, heta hudío oñesirkunsida vaʼekue jepe, añetehápe “noñesirkunsidái ikorasõme” (Jer. 9:25, 26, NM). ¿Mbaʼépa heʼise upéva?

8, 9. ¿Mbaʼépa tekotevẽ vaʼekue ojapo umi hudío ipyʼapýre?

⁸ Peteĩ mbaʼe Jehová heʼi vaʼekue ipuévlope ñanepytyvõ ñantende hag̃ua mbaʼépa heʼise “noñesirkunsidái ikorasõme”. Haʼe oñemoñeʼẽ vaʼekue chupekuéra kóicha: “Peipeʼa pene korasõgui umi mbaʼe vai, peẽ kuimbaʼe peiméva Judápe ha opavave peikóva Jerusalénpe; anítei chepochy [...] penerembiapo vai haguére”. Ha ¿moõguipa osẽ umi mbaʼe vai ojapóva hikuái? Umíva osẽ ipyʼapyguikuéra (elee Marcos 7:20-23). Proféta Jeremías rupive, Ñandejára heʼi porã mbaʼéicha rupípa umi hudío iñañaite. Haʼekuéra oñemoĩ Jehováre ha nokambiaséi voi. Ñandejára ndoguerohorýi umi mbaʼe opensáva ha omomýiva chupekuéra (elee Jeremías 5:23, 24 ha 7:24-26). Upévare Jehová heʼi koʼã hudíope: “Peñesirkunsida Ñandejárape g̃uarã, ha peipeʼa pene korasõgui umi mbaʼe vai” (Jer. 4:4, NM; Jer. 18:11, 12).

⁹ Péicha jahecha umi hudío tekotevẽ hague ojopera ikorasõgui, térã ipyʼapýgui, ojapo haguéicha ijypykuéra Moisés tiémpope (Deut. 10:16; 30:6). Jahechaháicha, ‘oipeʼa vaʼerã hikuái ikorasõgui’ umi mbaʼe omoĩ vaíva chupekuéra Ñandejára renondépe, tahaʼe umi mbaʼe opensáva, oipotáva ha omomýiva chupekuéra (Hech. 7:51).

10. ¿Mbaʼépepa ñahaʼanga vaʼerã Davídpe?

¹⁰ ¡Ajépa javyʼaite Ñandejára ñanepytyvõ haguére ñantende hag̃ua mbaʼépa ikatu oiko ñane korasõre! Péro, ¿mbaʼérepa upéva ñaneinteresa vaʼerã opavave ñande testígo de Jehovápe? Ndahaʼéi ningo heta kristiáno ojapóva mbaʼe vai, térã oikóva chuguikuéra “ígo ivaíva”, ojehu haguéicha heta hudío yma guarépe. Upéva rangue, Ñandejára puévlo koʼag̃aguápe oĩ hénte hekopotĩva ha omombaʼeguasúva chupe ipyʼaite guive. Upéicharõ jepe, opavave jajepyʼamongeta vaʼerã peteĩ ñemboʼe David ojapo vaʼekuére: “Eipyguara che pyʼapy, eikuaa mbaʼépa oĩ che apytuʼũnguápe, ehecha ahápa hína tape vaíre” (Sal. 17:3; 139:23, 24).

11, 12. a) ¿Mbaʼérepa opavave ñahesaʼỹijo vaʼerã ñande pyʼapy? b) ¿Mbaʼépa Ñandejára ndojapomoʼãi?

¹¹ Jehová ningo oipota akóinte ñaime porã hendive. Proféta Jeremías heʼi vaʼekue: “Nde, Jehová, che Jára ndepuʼakapáva, rehesaʼỹijóva hekojojávape; rehecháva yvypóra orekóva ipyʼapýpe” (Jer. 20:12, NM). Ñandejára ohesaʼỹijóramo pe hekojojáva pyʼapy jepe, koʼýte ñande jahecha vaʼerã mbaʼépa oĩ ñane korasõme (elee Salmo 11:5). Jajapóvo upéva, ikatu hína jahechakuaa ñakambia vaʼerãha ñapensáva, ñañandúva ỹrõ umi mbaʼe jahupytyséva. Ikatu avei jahecha ñane korasõme oĩha peteĩ mbaʼe nañanepytyvõiva ñaneñeʼẽrendu hag̃ua Jehovápe ha tekotevẽha jajopera, térã jaipeʼaite ñande pyʼapýgui. Oiméramo ñande jahecha iñimportanteha ñahesaʼỹijo ñane korasõ, ¿mbaʼépa jahekavaʼerã? Ha ¿mbaʼéichapa ñakambiáta tekotevẽhápe? (Jer. 4:4.)

¹² Péro oĩ peteĩ mbaʼe añetetéva: Jehová nañandejopymoʼãi ñakambia hag̃ua. Haʼe heʼi vaʼekue umi “ígo iporãva” rehe: “Ameʼẽta chupekuéra peteĩ korasõ chekuaa hag̃ua”. Ndeʼíri ojopytaha chupekuéra okambia hag̃ua ipyʼapy, síno haʼekuéra voi oipotataha peteĩ korasõ oĩva oikuaa hag̃uáicha Ñandejárape. Ha ñande jaipota vaʼerã avei upéva.

13, 14. ¿Mbaʼéichapa peteĩ kristiánope ikatu operhudika ikorasõ?

¹³ Jesús heʼi: “Yvypóra korasõgui osẽ umi mbaʼe vai ojaposéva, jejuka, ñemoakãratĩ, tekovai, ñemonda, japu ha ñeʼẽ vai ótrore” (Mat. 15:19, NM). Por ehémplo, peteĩ kristiáno orekóramo mbaʼe vai ipyʼapýpe ikatu ou hekovai, ỹrõ omoakãratĩ iména térã hembirekópe, ha noñearrepentíriramo opyta vaítama Jehová ndive. Péro ndoʼáiramo jepe koʼãichagua pekádope, ikatu avei omoinge mbeguekatúpe koʼã mbaʼe vaiete ipyʼapýpe (elee Mateo 5:27, 28). Péicha jave tekotevẽ ñahesaʼỹijo ñane korasõ ha jahecha ndajarekóipa peteĩ mbaʼe Ñandejára ndoguerohorýiva. Por ehémplo, ¿ñapensápa hekopeʼỹ peteĩ kuimbaʼe térã kuñáre? Oiméramo oiko ñanderehe upéva, jaipeʼa vaʼerã koʼã mbaʼe ñande pyʼapýgui.

¹⁴ Peteĩ kristiáno ningo ndojukamoʼãi avavépe, péro ¿mbaʼépa ikatu jaʼe ipyʼaróramo peteĩ ermánore ha ndaijaʼeiete hese? (Lev. 19:17.) ¿Oñehaʼãmbaitétapa oipeʼa ikorasõgui umi mbaʼe ombopyʼahatãtava chupe? (Mat. 5:21, 22.)

15, 16. a) ¿Mbaʼéicha javépa peteĩ ermáno “noñesirkunsidái ikorasõme”? b) ¿Mbaʼérepa nde ere Jehová ndoguerohoryiha peteĩ ‘noñesirkunsidáivape ikorasõme’?

¹⁵ Añetehápe ningo ndaiporiguasúi ermáno orekóva peichagua “mbaʼasy” ikorasõme. Péro Jesús heʼi avei ‘yvypóra korasõgui osẽha umi mbaʼe vai ojaposéva’, térã opensáva ha omomýiva chupe ojapo hag̃ua peteĩ mbaʼe. Por ehémplo, oĩ oimoʼãva odefende vaʼerãha katuete ihentekuérape. Jahechaháicha, koʼã “ára pahápe” heta tapicha ‘ndohayhúi ihéntepe’, péro ñande kristiáno ndaupéichai, síno jahayhu vaʼerã ñane parientekuérape (2 Tim. 3:1, 3, NM). Péro oĩ heʼíva “ñane família ningo oĩ tenondete”, ha opensa voi odefende vaʼerã ihéntepe toiko la oikóva. Oĩramo ombopochýva peteĩ ihéntepe, haʼekuérama katu ipochy avei. Oiméne ñanemanduʼa mbaʼépa ojapo vaʼekue Dina ermanokuéra opensa haguére upéicha (Gén. 34:13, 25-30). Ñapensamína avei Absalón rehe. Mbaʼeichaitépa oiméne ndaijaʼéi rakaʼe iñermáno anga Amnón rehe, ajeve ojuka chupe (2 Sam. 13:1-30). ¿Jahechakuaápa koʼã tapicha ‘korasõgui osẽ hague umi mbaʼe vai ojaposéva’?

¹⁶ Ikatu ningo peteĩ kristiáno oimoʼã ótro ermáno térã ermána otrata vai hague peteĩ ihéntepe, ha opyta ipyʼaro hese. Upévare orrechasa opaichagua invitasión pe ermáno ojapóva chupe térã naimbaʼeporãvéi hendive (Heb. 13:1, 2). Koʼã mbaʼe opensáva ha ojapóva ndahaʼéi vyrorei. Pe tapicha ipyʼaro ha naimbaʼeporãiva ohechauka ndoporohayhuiha. Ha ikatu voi Ñandejára, pe ohesaʼỹijóva yvypóra korasõ, heʼi ko ermáno ‘noñesirkunsidaiha ikorasõme’ (Jer. 9:25, 26). Ñanemanduʼa vaʼerã Jehová heʼi hague umi hudíope: “Peipeʼa pene korasõgui umi mbaʼe vai” (Jer. 4:4).

17. ¿Mbaʼéichapa ñanepytyvõta ñakambia hag̃ua tekotevẽhápe jakyhyjéramo Jehovágui?

¹⁷ Rehesaʼỹijo rire umi mbaʼe oĩva nde pyʼapýpe, ikatu oime rehechakuaa hasyha ndéve neñeʼẽrendu hag̃ua Jehovápe opa mbaʼépe, ha reguerekoha peteĩ korasõ ‘noñesirkunsidáiva’. Ikatu rehechakuaa rekyhyjeha yvypóragui, rehupytyseha heta mbaʼe repy, nefamosose, reñemohatãha nde erévapente ha rejaposeha opa mbaʼe ndéve ndegustaháichante. Oiméramo upéicha, nemanduʼa vaʼerã oĩha avei heta tapicha opensáva ndéicha (Jer. 7:24; 11:8). Jeremías heʼi umi hudío naiñeʼẽrendúiva itiempopegua ‘oñembotuicha ha oñemoĩha’ Jehováre. Upéi ohai avei: “Ndeʼíri hikuái ipyʼapýpe: ‘Jakyhyje koʼág̃a ñande Ruete, Ñandejára teégui, omboúva hiʼaraitépe ama tenondegua ha ipahapeguáva’” (Jer. 5:23, 24, ÑÑB). Jahechaháicha, ñasirkunsida hag̃ua ñane korasõ, térã ñakambia tekotevẽhápe, jakyhyje vaʼerã Jehovágui ha ñamombaʼe ojapóva ñanderehehápe. Jakyhyjéramo chugui hekópe porã, ñane korasõ oĩta ojapo hag̃uáicha opa mbaʼe Jehová oipotáva.

18. ¿Mbaʼépa Jehová opromete umi oĩvape pe kompromíso pyahúpe?

¹⁸ Ñande ningo ikatu ñambaʼapo meme Jehová ndive haʼe omeʼẽramo ñandéve peteĩ korasõ oĩva jaikuaa hag̃uáicha chupe. Haʼe voi opromete upéva umi unhído oĩvape pe kompromíso pyahúpe heʼívo: “Amoĩta ko che [léi ipypekuéra] ha ahaíta ipyʼapýpe; ha Che aikóta chupekuéra g̃uarã Ijáraramo ha haʼekuéra oikóta che retãramo”. ¿Oikuaa porãtapa hikuái Ñandejárape? Jehová heʼi avei: “Avave nomboʼemoʼãvéi hapichápe térã ipehenguépe, heʼívo: ‘Eikuaána [Jehovápe]’, mayma chekuaa porã voi, pe michĩvéva guive pe tuichavéva peve. [...] Aperdonáta [ipekádo], ha nachemanduʼamoʼãvéi hembiapo vai rehe” (Jer. 31:31-34, ÑÑB).a

19. ¿Mbaʼépa ohupytýta umi kristiáno añetegua?

¹⁹ Oiméramo reipota pe kompromíso pyahu ideprovécho ndéve opa árare, tahaʼe yvágape, térã ko yvy ape ári, reikuaase vaʼerã Jehovápe ha reime vaʼerã ipuévlope. Rehupyty hag̃ua koʼã mbaʼe porã, tekotevẽ Ñandejára operdona ne rembiapo vaikue Cristo sakrifísio rupive. Ha upéva nemomýi vaʼerã nde avei reperdona hag̃ua opavavépe, tandepyʼaro jepe raʼe peteĩ nde rapicháre. Reguenohẽramo koʼã mbaʼe ne korasõgui, tuichaiterei nepytyvõta. Upéicha rehechaukáta reserviseha Ñandejárape ha reikuaa porãveha chupe. Jehová heʼi koʼãichagua tapicháre: “Peẽ pecherekáta ha katuete pechejuhúta, cherekágui pende pyʼaite guive. Ha chete ajejuhukáta peẽme” (Jer. 29:13, 14, NM).