¿Remombaʼépa pe matrimónio?

“Jehová tomeʼẽ peẽme peteĩ jopói, ha tapendepyʼaguapy pene ména rógape.” (RUT 1:9, NM)

EMBOHOVÁI KOʼÃ PORANDU

¿Mbaʼérepa ikatu jaʼe Ñandejára rembiguái yma guare omombaʼe hague pe matrimónio?

¿Mbaʼérepa jaʼekuaa Jehovápe g̃uarã iñimportanteha jaiporavóva ñane ména térã ñane rembirekorã?

¿Mbaʼe konsého oĩva la Bíbliapepa resegise ne matrimóniope?

 1. ¿Mbaʼéichapa Adán oñeñandu Jehová omeʼẽrõ guare chupe hembirekorã?

“KÓVA katu che kangue ha che roʼógui osẽva, hérata Kuña osẽre kuimbaʼégui.” (Gén. 2:23.) ¡Oiménepa ovyʼaite raʼe Adán, pe kuimbaʼe ypykue, hembirekóma haguére! Ndareíri umi mbaʼe heʼíva ojogua peteĩ ñeʼẽyvotýpe. Jehová omongete Adánpe ha peteĩ ikostíllagui ojapo pe kuña porãite. Adán ombohéra chupe Eva, ha Ñandejára omomenda chupekuéra oiko hag̃ua oñondive vyʼápe. Jehová ojapo Évape Adán kostílla pehẽnguégui, upévare jaʼekuaa ndaiporiha koʼág̃a rupi ambue omendáva hiʼag̃uivéva ojuehe.

 2. ¿Mbaʼérepa kuña ha kuimbaʼe oñenamora?

² Jehová iñarandueterei ha ojapo yvyporakuérape ikatu hag̃uáicha oñenamora, upéicha rupi kuña ha kuimbaʼe ojegusta ha ojoayhu. Peteĩ ensiklopédia heʼi: “Kuña ha kuimbaʼe omendáva oikuaa oĩtaha oñondive ha akóinte ogustataha chupe hembiayhu” (The World Book Encyclopedia). Ha upéva ojekuaa avei Jehová rembiguaikuéra apytépe.

OMOMBAʼE HIKUÁI ÑANDEJÁRA JOPÓI, PE MATRIMÓNIO

 3. ¿Mbaʼéichapa Isaac otopa hembirekorã?

³ Abrahánpe g̃uarã tuicha mbaʼe pe matrimónio, upévare oipota itaʼýra omenda peteĩ kuña omombaʼeguasúvare Jehovápe. Upémarõ omondo hembiguái ijedavéva Mesopotámiape oheka hag̃ua Isaácpe hembirekorã. Abrahán rembiguái katu ojerure Jehovápe toipytyvõmi chupe ojuhu hag̃ua peteĩ kuñataĩ ijoheipyréva, ha haʼe ohendu chupe. Péicha Isaac omenda Rebécare ha Jehová oiporu chupe ani hag̃ua opa rei Abrahán familiare (Gén. 22:18; 24:12-14, 67). Ko ehémplo ndeʼiséi jaikotaha ñandealkaguetéro ñaipytyvõségui ñande rapichápe. Koʼág̃a rupi hetave hendápe umi omendaséva oiporavo iména térã hembirekorã. Ha Ñandejára ndeʼíriramo jepe mávarepa ñamendavaʼerã, ikatu ñanepytyvõ jadesidi hag̃ua heta mbaʼe, pór ehémplo jaiporavo hag̃ua ñane rembiayhurã. Péro upearã ñañemboʼevaʼerã ha jaheja ijespíritu tañanesãmbyhy (Gál. 5:18, 25).

4, 5. ¿Mbaʼérepa jaʼekuaa pe sulamíta ha pe ovecharerekua ojoayhu añete hague?

⁴ Peteĩ mitãkuña porã Sunemgua ndoipotaivaʼekue iñamigakuéra omboliga chupe omenda hag̃ua rréi Salomón rehe. Upévare heʼi chupekuéra: “Peprometéke chéve kuñanguéra Jerusalengua, ndapechejopymoʼãiha aporohayhu hag̃ua” (Cant. de Cant. 8:4, NM). Ko mitãkuña ha peteĩ ovecharerekua ningo ojoayhueterei. Haʼe hekomirĩgui heʼi: “Che niko yvoty Saronpegua, che niko yvoty ñurupigua”. Pe ovecharerekua katu ombohovái: “Che rembiayhu, ndéko kuñataĩ apytépe ñuatĩ paʼũmeguáicha yvoty” (Cant. de Cant. 2:1, 2). ¡Ajépa ojoayhuete hikuái!

⁵ Pe mitãkuña Sunemgua ha pe ovecharerekua ohayhueterei Ñandejárape, upévare omenda vove hikuái koʼýte ojoayhúta. Upévare pe mitãkuña heʼi hembiayhúpe: ‘Erahána che raʼanga nde pyʼapýpe ha emoĩ nde jyváre; pe mborayhu imbarete ñemanóicha; ha pe oporohayhúva hakateʼỹ imborayhu rehe, ku Seol hakateʼỹháicha umi omanóvare. Pe mborayhu ningo tata tuichávaicha, oúva Jehovágui. Pe y osyry mbaretéramo jepe ndaikatúi ombogue ni ogueraha pe mborayhu’ (Cant. de Cant. 8:6, 7, ÑÑB). Peteĩ Jehová rembiguái omendaséva noñekontentaivaʼerã iména térã hembirekorã ohayhuʼimínterõ chupe, síno ohaʼarõvaʼerã ohayhu chupe ipyʼaite guive, ohechaukaháicha koʼã versíkulo.

JAIPORAVÓVA IÑIMPORTÁNTE ÑANDEJÁRAPE G̃UARÃ

6, 7. ¿Mbaʼérepa ikatu jaʼe Jehovápe g̃uarã iñimportanteha jaiporavóva ñane ména térã ñane rembirekorã?

⁶ Ñande jadesidi mávarepa ñamendáta, ha upéva iñimportanteterei Jehovápe g̃uarã. Upéicha rupi haʼe heʼivaʼekue isrraelitakuérape ani hag̃ua omenda umi Canaanguáre: “Ani pemenda ikuñanguérare térã peheja pende rajy térã pende raʼy omenda hesekuéra. Cháke upéicha haʼekuéra oipeʼáta pende raʼykuéra [Ñandejáragui] ha omoñesũta [ijarakuéra] renondépe. Upérõ [Ñandejára] ipochyrendýta ha penerundíta peteĩ sapyʼaitépe” (Deu. 7:3, 4). Heta tiémpo rire, pe saserdóte Esdras heʼi: ‘Pemendávo kuña okarayguáre, peẽ pejapo ivaíva ha koʼýte Israel oñemoĩ vai Ñandejára renondépe’ (Esd. 10:10). Ha apóstol Pablo ohaivaʼekue ermanokuérape: ‘Pe kuña omendáva oñeñapytĩ iména oikove aja; péro iména omanóramo ikatu omenda jey omendasévare, haʼéma guive peteĩ Ñandejárare ojeroviáva’ (1 Cor. 7:39, BNP).

⁷ Jehová siérvo omendáramo ambue ndoservírivare chupe, naiñeʼẽrenduihína. Umi isrraelíta Esdras tiémpope guare omboykevaʼekue Jehovápe ‘omendávo kuña okarayguáre’, ha ñande nañapensaivaʼerã vyroreinteha la Biblia heʼíva ko mbaʼére (Esd. 10:10; 2 Cor. 6:14, 15). Peteĩ kristiáno omendáramo peteĩ ndoservírivare Jehovápe, nomoĩri ehémplo porã ha ohechauka nomombaʼeiha pe matrimónio, ha ikatu voi ojepeʼa chugui heta priviléhio kongregasiónpe. Ojapóvo péicha haʼete heʼíva Jehovápe: “Che ningo ndajapói nde reipotáva, upéicharamo jepe chevendesíkena”.

ÑANDE RU YVAGAYGUA IÑARANDUVE ÑANDEHEGUI

 8. Emyesakã mbaʼérepa opavave omendáva ojapovaʼerã Jehová heʼíva.

⁸ Peteĩ mákina apoha oikuaa porãiterei mbaʼéichapa ombaʼapo upe mákina, upévare haʼe ikatu heʼi mbaʼéichapa ojeporuvaʼerã. Péro, ¿mbaʼépa oikóta ndajaiporúiramo pe favrikánte heʼihaichaite? Ikatu voi nañamombaʼapói térã ñambyaiete pe mákina. Upéicha avei, jaiko porã hag̃ua ñane ména térã ñane rembirekóndi jajapovaʼerã Jehová heʼihaichaite, pe oporomomenda ypy vaʼekue.

 9. ¿Mbaʼérepa jaʼe Jehová oikuaa porãitereiha oñandúva umi oĩva haʼeño ha umi omendáva ikatuha ovyʼa?

⁹ Jehová oikuaa opa mbaʼe, upéicha rupi oikuaa porãiterei yvyporakuérape ha mbaʼéichapa oikovaʼerã umi omendáva. Haʼe ojapo chupekuéra oĩse hag̃uáicha oñondive, ha upéicha okumpli ko mandáto: “Peñemoña ha peñembohetáke” (Gén. 1:28, ÑÑB). Avei oikuaa mbaʼéichapa oñeñandu umi oĩva haʼeño, upévare ojapo mboyve pe kuña ypykuépe, heʼi: “Kuimbaʼe naiporãi oiko haʼeño. Ajapóta chupe iñirũrã, peteĩ oipytyvõvaʼerã chupe” (Gén. 2:18). Jehová avei oikuaa porã umi omendáva ikatuha ovyʼaiterei (elee Proverbios 5:15-18).

10. ¿Mbaʼéichapa umi kristiáno omendáva ohechavaʼerã pe rrelasión sexual?

¹⁰ Ñande ningo Adán ñemoñare ha opavave ñanase pekadór, upévare umi omendáva katuete iprovléma. Upéicharamo jepe Ñandejára rembiguaikuéra omendáva ikatu ovyʼaiterei ojapóramo Iñeʼẽ heʼíva. Jahechamína umi konsého omeʼẽva Pablo rrelasión sexual rehe (elee 1 Corintios 7:1-5). La Biblia nomboʼéi ména ha tembireko oĩvaʼerãha oñondive ifamília hag̃uánte, síno avei upéicha omeʼẽha ojupe oikotevẽva. Péro Ñandejárape ndogustái umi omendáva ojapóramo umi mbaʼe hekopeʼỹ oreko jave rrelasión sexual. Upéva rangue, ohechaukavaʼerã hikuái ojoayhuha ko mbaʼe iñimportantetévape ha omboyke oimeraẽ mbaʼe noĩporãiva Jehová renondépe.

11. ¿Mbaʼépa ohupyty Rut ojapo haguére Ñandejára rembipota?

¹¹ Umi omendáva ndoikoivaʼerã oñamarga ni oñembyasyháre, upéva rangue ovyʼavaʼerã, oikovaʼerã pyʼaguapýpe hikuái. Ñapensamína peteĩ mbaʼe oikovaʼekuére ojapo tres mil áño rupi. Noemí ha inuerakuéra viúdava avei, Orpá ha Rut, ohohína Judápe Moab rapérupi. Noemí ojerure umi kuñáme oho jey hag̃ua ivállepe, péro Rut opyta hendive. Haʼe ojerovia Jehováre, upéicha rupi Israel Jára ‘omyengovia chupe, oñemoĩgui ipepo guýpe oñemoʼã hag̃ua’ (Rut 1:9; 2:12, ÑÑB). Rut ohechauka omombaʼeha pe matrimónio ha omenda Boaz rehe, peteĩ karai ijedáva oservíva Ñandejárape. Ág̃a Rut oikove jey vove Ñandejára múndo pyahúpe, ovyʼaitereíta oikuaávo Jesucristo onase hague ifamiliarégui (Mat. 1:1, 5, 6; Luc. 3:23, 32). ¡Ajépa hetaite mbaʼe porã ohupyty ojapo haguére Ñandejára rembipota!

KONSÉHO PORÃ UMI OMENDÁVA OVYʼA HAG̃UA

12. ¿Moõpa jatopáta konsého iporãva umi omendávape g̃uarã?

¹² Jehová omomenda ñepyrũ yvypórape ha omboʼe chupekuéra mbaʼéichapa oikovaʼerã ovyʼa hag̃ua. Ndaipóri iñaranduvéva chugui. Iñeʼẽ ndojavýi arakaʼeve, upévare ipype añoite jajuhúta umi konsého iporãvéva oñeʼẽva matrimóniore. Pór ehémplo, espíritu sánto rupive Pablo ohaivaʼekue: “Opáichavo menakuéra tohayhu hembirekópe ojehayhuháicha ijupe voi, ha tembirekokuéra tomombaʼe iménape” (Efe. 5:33). Peteĩ kristiáno iñakãguapýva katuete ontende porã mbaʼépa heʼise ko konsého. Péro, ¿ojapótapa heʼíva upépe? Omombaʼéramo pe matrimónio, iñeʼẽrendúta.a

13. ¿Mbaʼépa ikatu oiko ndojejapóiramo 1 Pedro 3:7 heʼíva?

¹³ Peteĩ ména oservíva Jehovápe ohayhu ha otrata porã vaʼerã hembirekópe. Apóstol Pedro ohaivaʼekue: “Peẽ ména, peiko hekópe pende rembireko ndive pehechakuaávo haʼekuéra ikangyveha pendehegui, upévare peapo chupekuéra mbaʼéramo, peikuaa porã haʼekuéra ohupytytaha avei pe tekove tapia g̃uarãva, ani hag̃ua pene ñemboʼe opyta rei” (1 Ped. 3:7, ÑÑB). Pe ména nopenáiramo koʼã konséhore oĩva la Bíbliape, ikatu Jehová nohendúi iñemboʼe. Ha oikóramo upéva, mokõivéva oñemomombyrýta Ñandejáragui ha oñepyrũtama oiko vai ha iprovléma heta.

14. ¿Mbaʼéichapa peteĩ tembireko iñarandúva oipytyvõ ojevyʼa hag̃ua hogapýpe?

¹⁴ Tembireko ojapóva la Biblia heʼíva ha oikóva espíritu sánto oipotaháicha, tuicha oipytyvõ ojeiko hag̃ua vyʼa ha pyʼaguapýpe hógape. Jaikuaaháicha, ména ojeroviáva Ñandejárare ohayhu hembirekópe, oñangareko hese ha omombarete ijerovia. Upévare, tembireko oipotáramo iména ohayhu porã chupe, oñehaʼãmbaitevaʼerã ojapo umi mbaʼe porã hembiayhu oguerohorýtava. Proverbios 14:1 heʼi: “Kuña iñarandúva hóga omopuʼã, itavýva katu ipo rupiete ohundi”. Peteĩ tembireko iñarandu ha ipyʼaporãva oipytyvõ hogayguakuérape ovyʼa ha osẽ porã hag̃ua hikuái opa mbaʼépe. Avei ohechauka omombaʼeha ipyʼaite guive pe matrimónio.

15. ¿Mbaʼe konséhopa jajuhu Efesios 5:22-25-pe?

¹⁵ Umi omendáva omombaʼe pe matrimónio ojotratávo Jesús otrata haguéicha kongregasión (elee Efesios 5:22-25). Hiʼarive ohupytýta hikuái heta mbaʼe porã Ñandejáragui ojoayhúramo ipyʼaite guive. Naiporãmoʼãi ningo oikóramo oñemombaʼeguasu ha ndojapói la Biblia heʼíva, pór ehémplo pochýgui noñeʼẽvéi ojupe ojapoháicha umi mitã. Koʼã mbaʼe ombyai pe matrimónio.

ANÍKENA AVAVE PENDEPEʼA OJUEHEGUI

16. ¿Mbaʼérepa heta kristiáno nomendái?

¹⁶ Opavave lénto ningo omendase, péro oĩ kristiáno nomendáiva ndojuhúi rupi peteĩ ogustáva chupe ha oĩ porãva Ñandejára renondépe. Oĩ avei nomendaséiva voi, ha upévare ikatu oiporuve itiémpo Jehová servísiope ndoikói rupi ojepyʼapy iména térã hembirekóre. Péro umi nomendáiva oikovaʼerã Jehová oipotahaichaite ikatu hag̃uáicha ovyʼa (Mat. 19:10-12; 1 Cor. 7:1, 6, 7, 17).

17. a) ¿Mbaʼe konséhoguipa nañanderesarairivaʼerã arakaʼeve? b) Oiméramo peteĩ kristiáno oñepyrũ ohayhu ména térã tembireko ahéno, ¿mbaʼépa pyaʼe ojapovaʼerã?

¹⁷ Oiméramo ñamendáva térã ñandesoltéro, opavave ñanemanduʼavaʼerã Jesús heʼivaʼekuére: “¿Ndapeleéiva piko Ñandejára ñeʼẽme, haʼe ojapo hague iñepyrũmbýpe kuimbaʼe ha kuñáme, ha heʼi: ‘Upévare pe kuimbaʼe ohejavaʼerã itúva ha isýpe, ojoajuvaʼerã hembirekóre, ha mokõivégui oikovaʼerã peteĩntema’? Upéicha rupi, haʼekuéra ndahaʼevéima mokõi, síno peteĩntema. Upévare, avave ndoipeʼaivaʼerã ojuehegui Ñandejára omoĩvaʼekue oñondive peteĩ júgo guýpe” (Mat. 19:4-6, NM). Peteĩ pekádo ningo jahayhu ména térã tembireko ahéno (Deu. 5:21). Oimérõ peteĩ kristiáno oñepyrũ oñandu upéva, pyaʼe omboykevaʼerã umi mbaʼe vai haʼete omoingevaʼekue iñakãme openságui ijehénte, tahasy jepe raʼe chupe upéva (Mat. 5:27-30). Tekotevẽ oñehaʼãmbaite ojejokokuaa ha omboyke koʼã mbaʼe, ikorasõ ikatu rupi otraisiona chupe (Jer. 17:9).

18. ¿Mbaʼéichapa jahechavaʼerã pe matrimónio?

¹⁸ Oĩ ndoikuaaietéva Ñandejárape térã ndoikuaaporãiva chupe, ni haʼe oporomomenda ypy hague, upéicharõ jepe chupekuéra g̃uarã iñimportánte pe matrimónio. Péro ñande ñañemeʼẽmavaʼekue jaservi hag̃ua ‘Ñandejára ovyʼaitévape’ (1 Tim. 1:11). Upévare koʼýte jaguerohoryvaʼerã opa mbaʼe omeʼẽva ñandéve ha jahechauka ñamombaʼeha pe matrimónio.

[Nóta]

[Komentário oĩva páhina 6-pe]

Peteĩ matrimónio osẽ porãramo, omombaʼeguasu Jehovápe ha ombovyʼaiterei hogayguakuérape

[Nóta oĩva taʼanga ndive páhina 5]

Rut ohechaukavaʼekue omombaʼeha pe matrimónio

[Nóta oĩva taʼanga ndive páhina 7]

¿Rehechaukápa remombaʼeha nde pyʼaite guive pe matrimónio?