Jesús orresponde peteĩ mburuvicha iplátavape

Jesús ohokuévo Jerusalénpe ohasa Peréarupi. Upépe odipara ou hendápe peteĩ mitãkariaʼy irríkova ha oñesũ henondépe. Ko kuimbaʼe ningo peteĩ mburuvicha, upéicharõ oiméne oreko hína peteĩ puésto iñimportánteva sinagógape, térã ikatu voi oĩ pe Sanedrínpe. Ko mitãkariaʼy oporandu Jesúspe: “Mboʼehára Imbaʼeporãva, ¿mbaʼépa ajapo vaʼerã ahupyty hag̃ua jeikove opaveʼỹva?” (Lucas 8:41; 18:18; 24:20).

Jesús ombohovái: “¿Mbaʼére piko ere chembaʼeporãha? Ñandejára añoite ningo pe imbaʼeporãva” (Lucas 18:19). Umi líder rrelihióso ningo oipuru jepi pe palávra “imbaʼeporãva” peteĩ títuloicha, ha oiméne upévare pe mitãkariaʼy heʼi Jesúsre upéicha. Péro Jesús imbaʼeporãramo jepe ha ikatupyry oporomboʼe hag̃ua, heʼi chupe pe título “Imbaʼeporãva” ikatuha ojepuru oñeñeʼẽvo Ñandejárare añoite.

Jesús heʼi avei chupe: “Péro nde rehupytyséramo jeikove opaveʼỹva, rejapo meme vaʼerã Ñandejára mandamiénto heʼíva”. Pe mitãkariaʼy oporandu: “¿Mavaitévapa?”. Jesús osita chupe cinco mandamiénto oĩva umi Diez Mandamiénto apytépe: “Ndovaléi reporojuka, ndovaléi reporomoakãratĩ, ndovaléi remonda, ndovaléi remopuʼã japu nde rapicháre, emombaʼe nde ru ha nde sýpe”. Upéi heʼi peteĩ mandamiénto iñimportantevéva: “Rehayhu vaʼerã nde rapichápe nde rejehayhuháicha” (Mateo 19:17-19).

Pe kuimbaʼe heʼi: “Koʼãva ningo che akumplipaitéma. ¿Mbaʼépa ofaltave chéve?” (Mateo 19:20). Oiméne ko mitãkariaʼy opensa ojapo vaʼerãha ótra kósa iporãitevéva ohupyty hag̃ua pe vída etérna. Jesús ohechakuaa haʼe isinseroha, upévare oguerohoryeterei chupe (Marcos 10:21). Péro pe mitãkariaʼy oreko peteĩ provléma.

Pe kuimbaʼe ningo ohayhueterei umi mbaʼe orekóva. Upévare Jesús heʼi chupe: “Tekotevẽ gueteri rejapo peteĩ mbaʼe: Tereho evende nde kosakuéra ha emeʼẽ umi imboriahúvape, upéicharõ reguerekóta mbaʼerepy yvágape; ha eju chemoirũ”. Pe kuimbaʼégui ikatúta kuri oiko Jesús disípulo orrepartíramo imbaʼerepy umi imboriahúvape, péro haʼe ndojaposéi upéva. Oiméne Jesús ombyasy ohechávo mbaʼéichapa pe mitãkariaʼy opuʼã ha oñesenti ohóvo, pórke oguereko “hetaiterei mbaʼe” (Marcos 10:21, 22). Ohayhuetereígui ipláta ndaikatúi ohecha umi mbaʼe añetehápe ovaléva. Jesús heʼi: “¡Hasyetéta umi ipláta hetáva oike hag̃ua Ñandejára Rréinope!” (Lucas 18:24).

Umi disípulo oñesorprende ohendúvo upéva. Péro koʼýte oñesorprende Jesús heʼívo chupekuéra: “Peteĩ kaméllo jepe ikatúne ohasa peteĩ ju ikuahárupi, péro ijetuʼuvéta upévagui peteĩ ipláta hetáva oike hag̃ua Ñandejára Rréinope”. Umi disípulo oporandu: “¿Máva piko upéicharõ ikatúne ojesalva?”. Jesús omaña porã hesekuéra ha heʼi: “Yvyporakuéra ndaikatúiva ojapo, Ñandejára ikatu ojapo” (Lucas 18:25-27).

Upéi Pedro heʼi haʼe ha umi ótro disípulo ndojapói hague pe mitãkariaʼy ojapo haguéicha, síno odesidi omoirũ Jesúspe. Haʼe heʼi: “Ore ningo rohejapaite opa mbaʼe ha romoirũ. ¿Mbaʼépa rohupytýta upévare?”. Jesús opromete: “Ñandejára ombopyahupa jeýta opa mbaʼe, pe Yvypóra Raʼy oguapývo itróno omimbipávape. Upérõ peẽ chemoirũ vaʼekue, peguapýta avei doce trónope, pehusga hag̃ua umi doce trívu oĩva Israélpe” (Mateo 19:27, 28).

Péicha Jesús ohechauka ipyahu jeytaha ko yvy ha ojogua jeýta pe hardín de Edénpe. Pedro ha umi ótro disípulo ogovernáta Crístondi ha orekóta ipoguýpe ko hardín neporãva. Upéicharõ, oimeraẽ sakrifísio ojapóva hikuái ndahaʼéi mbaʼeve ombojojárõ umi mbaʼe ohupytýtavare.

Péro Jesús heʼi chupekuéra koʼág̃ama voi ohupytytaha hikuái heta mbaʼe porã. Haʼe heʼi: “Ñandejára Rréino rehehápe oheja vaʼekue hóga, hembireko, iñermanokuéra, isy ha itúva, térã itaʼyrakuérape, ko tiémpope voi chupekuéra oñemeʼẽta hetaitereive upe oheja vaʼekuégui. Ha amo gotyove katu ohupytýta jeikove opaveʼỹva” (Lucas 18:29, 30).

Ha upeichaite ningo, umi idisípulo oviaháramo mombyryvehápe jepe ko yvy tuichakuére, otopa iñermanokuérare. Hendivekuéra ojogueraha porãiterei, ha ni ihentekuéra teéndi ndovyʼái hikuái peichaite peve. Upéicharõ pe mitãkariaʼy iplátava ojavy ko mbaʼe porãite ha avei pe oportunida oiko hag̃ua opa árare pe Rréino yvagapeguápe.

Upéi Jesús heʼi: “Péro heta oĩva hína tenonde, opytáta tapykuépe, ha umi itapykuéva hína, opytáta tenonde” (Mateo 19:30). ¿Mbaʼe heʼise upéva?

Pe mitãkariaʼy iplátava oĩ “tenonde”, pórke oĩ kuri umi mburuvicha hudío apytépe. Haʼe ningo oikuaa porã kuri pe Léi, upévare orekove oportunida omoirũvo Jesúspe, péro omotenonde umi mbaʼerepy ha péicha rupi “opytáta tapykuépe”. ¿Ha mávapa umi ‘itapykuéva opytátava tenonde’? Umíva hína umi hénte iñumíldeva oaseptáva Jesús enseñánsa, ha ohechakuaáva tekotevẽha ojerovia hese ikatu hag̃uáicha oikove pára siémpre. Haʼekuéra oĩta Crístondi pe Rréinope, ha ogovernáta ko yvy ape ári, haʼétava peteĩ paraíso.