Pe parávola oñeʼẽva umi ombaʼapóvare parraltýpe

Jesús oĩrõ guare Peréape, heʼi kuri umi héntepe: “Heta oĩva hína tenonde, opytáta tapykuépe” (Mateo 19:30). Koʼág̃a katu omombeʼu peteĩ parávola omyesakã hag̃ua upéva.

Haʼe heʼi: “Pe Rréino yvagapegua ojogua peteĩ ogajárape, osẽva pyharevete oheka ombaʼapo vaʼerã chupe iparraltýpe. Ha oñemoĩ rire peteĩ ñeʼẽme opaga hag̃ua chupekuéra un denário por día, omondo iparraltýpe. Upéi las nuéverupi osẽ jey ha ohecha ótro kuimbaʼekuéra oñemboʼy reíva hína plásape; ha heʼi chupekuéra: ‘Pejúna avei peẽ pembaʼapo che parraltýpe ha apagáta peẽme hekoitépe’. Upémarõ oho hikuái. Upéi pe ogajára osẽ ha ojapo jey upéicha las dócerupi, ha las trésrupi avei. Ipahápe, kaʼaru las cíncorupi osẽ, ha otopa jey ótro kuimbaʼekuéra oñemboʼy reíva hína. Ha heʼi chupekuéra: ‘¿Mbaʼére piko peẽ peime rei raʼe un diaite koʼápe?’. Haʼekuéra heʼi: ‘Avave ningo nomeʼẽi oréve ore travahorã’. Haʼe heʼi: ‘Tapeho peẽ avei pe parraltýpe’” (Mateo 20:1-7).

Jesús oñeʼẽ ‘pe Rréino yvagapeguáre’ ha peteĩ “ogajára” oguerekóvare iparralty. Oiméne umi hénte opensa raʼe Jehováre ohendúvo ko ehémplo, pórke Ñandejára Ñeʼẽ ohechauka haʼe ojoguaha peteĩ parralty járape, ha pe parralty orrepresentaha tetã Israélpe (Salmo 80:8, 9; Isaías 5:3, 4). Umi ombaʼapóva pe parraltýpe haʼe hína umi oĩva Moisés Léi poguýpe. Péro añetehápe, Jesús noñeʼẽi hína umi isrraelíta tiémpore, síno peteĩ mbaʼe oikóvare upe tiémpope.

Umi fariséo ramoiténte omoñuhãse hague Jesúspe oporandúvo chupe pe divórsiore. Haʼekuéra ha umi ótro líder rrelihióso ombaʼapo meme guaʼu Ñandejára servísiope. Upévare ojogua hikuái umi ombaʼapóvape un diaite ha ohaʼarõva ojepaga chupekuéra un denário.

Umi saserdóte ha umi ótro líder rrelihióso oapoʼi umi ótro hudíope, pórke opensa ombaʼapo saʼiveha Ñandejárape g̃uarã. Jesús okompara koʼãvape umi nombaʼapóivape un diaite pe parraltýpe. Pe ehémplope, Jesús heʼi oĩ hague umi oñepyrũva ombaʼapo “las nuéverupi”, “las dócerupi, ha las trésrupi”. Ha oĩ katu umi oúva “kaʼaru las cíncorupi”.

Upe tiémpope, oĩ umi heʼíva Jesús disipulokuéra nomereseiha “Ñandejára oguerohory chupekuéra” (Juan 7:49). La majoría ningo haʼe vaʼekue persóna ombaʼapóva péskape térã ombaʼapo ahénova. Péro áño 29-pe, “pe ogajára” ombou Jesúspe oinvita hag̃ua umichagua persóna iñumíldevape oiko hag̃ua chugui Jesús disípulo, ha péicha ombaʼapo hag̃ua Ñandejárape g̃uarã. Koʼãva hína umi “tapykuépe ou vaʼekue” ha oñepyrũ ombaʼapo pe parraltýpe kaʼaru las cíncorupi.

Omohuʼãvo ko parávola, Jesús omombeʼu mbaʼépa oiko og̃uahẽvo pe tiémpo ojepaga hag̃ua umi ombaʼapóvape. Haʼe heʼi: “Upéi pytũmbývo, pe ogajára heʼi pe iparraltýre oñangarekóvape: ‘Ehenói umi ombaʼapóvape ha epaga chupekuéra, eñepyrũ umi tapykuépe og̃uahẽ vaʼekuégui, ha upéi epaga umi tenonde ou vaʼekuépe’. Ha oúvo umi kuimbaʼe oñepyrũ vaʼekue ombaʼapo las cíncorupi, oñemeʼẽ peteĩteĩme un denário. Upévare oúrõ guare umi tenondete oñepyrũ vaʼekue, oimoʼã oñemeʼẽvetaha chupekuéra; péro un denárionte avei ojepaga chupekuéra. Upémarõ haʼekuéra oñepyrũ oñeʼẽ vai pe ogajárare, ha heʼi hikuái: ‘Koʼã tapykuépe ou vaʼekue ningo una órante ombaʼapo, upéicharamo jepe nde repagánte avei chupekuéra oréve repaga haguéicha. ¡Ore katu un diaite rombaʼapo pe kuarahy akúpe!’. Péro pe ogajára heʼi peteĩvape: ‘Chamígo, ndajapói ningo nderehe mbaʼeve ivaíva. Japytángo kuri apagataha ndéve un denário, ¿ajépa? Ejagarra katu la ne mbaʼéva ha tereho. Che ameʼẽse koʼã tapykue og̃uahẽ vaʼekuépe ndéve ameʼẽháicha avei. ¿Ndaikatúingaʼu piko ajapo ajaposéva che plátagui? ¿Térãpa rejepicha hína chembaʼeporã haguére hendivekuéra?’. Upéicha avei umi itapykuéva hína, opytáta tenonde, ha umi oĩva tenonde, opytáta tapykuépe” (Mateo 20:8-16).

Oiméne umi disípulo oñesorprende ohendúvo mbaʼéichapa Jesús omohuʼã pe ehémplo. ¿Mbaʼérepa umi líder rrelihióso hudío, opensáva oĩha “tenonde”, opytáta hína “tapykuépe”? ¿Ha mbaʼéichapa Jesús disipulokuéra opytáta “tenonde”?

Umi fariséo ha umi ótro líder rrelihióso opensa Jesús disipulokuéra haʼeha umi “tapykuépe ou vaʼekue”. Péro amo ipahápe, haʼekuéra hína umi “tenonde” orresivítava pe suéldo kompletoite. Jesús omanóvo, Ñandejára orrechasa pe Jerusalén oĩvape ko yvy ape ári, ha oiporavo peteĩ tetã pyahu, pe “Israel Ñandejára mbaʼéva” (Gálatas 6:16; Mateo 23:38). Juan el Bautista oñeʼẽma vaʼekue upévare, heʼírõ guare oĩtaha pe vautísmo ojejapóva espíritu sánto rupive. Umi oĩva “tapykuépe” raẽvete orresivi upe vautísmo ha oreko pe priviléhio oikuaaukávo Jesús réra “mombyryvehápe ko yvy tuichakuére” (Hechos 1:5, 8; Mateo 3:11). Amáske umi disípulo ontende mbaʼéichapa okambiáta isituasionkuéra, ohechakuaa avei mbaʼeichaitépa upéva ndogustamoʼãi umi líder rrelihiósope, opytátava “tapykuépe”.