Jehová oikuaa mbaʼéichapa osalváta ipuévlope

‘Jehová oikuaa mbaʼéichapa osalváta umi ohayhúvape chupe.’ (2 PED. 2:9, NM)

¿MBAʼÉREPA JAJEROVIAKUAA KOʼÃ MBAʼÉRE?

Jehová oikuaa arakaʼetépa okumplíta hembipota.

Jehová oiporúta ipodér osalva hag̃ua ipuévlope.

Jehová oikuaa porã mbaʼéichapa oikóta opa mbaʼe ikatu hag̃uáicha okumpli hembipota.

 1. ¿Mbaʼépa oikóta og̃uahẽ vove pe “jehasa asy guasu”?

OÑEIMOʼÃʼỸVE jave Jehová ohundíta ko múndo aña oĩva Satanás poguýpe (1 Tes. 5:2, 3). Og̃uahẽ vove “Ñandejára ára guasu”, oikóta tuicha sarambi ko yvy ape ári (Sof. 1:14-17). Oĩta hetaitereive provléma ha umi hénte ojepyʼapyetereíta. Añetehápe, oĩta jehasa asy “arakaʼeve oikoʼỹ haguéicha ko múndo ñepyrũmby guive koʼág̃a peve” (elee Mateo 24:21, 22).

2, 3. a) ¿Mbaʼépa ombohováita Ñandejára puévlo pe “jehasa asy guasu” aja? b) ¿Mbaʼépa ñanepytyvõta jagueropuʼaka hag̃ua umi mbaʼe oikótava?

² Og̃uahẽvo ohóvo huʼãme pe “jehasa asy guasu”, “Gog, Magog retã ruvicha” oiporúta opa mbaʼe orekóva ipoguýpe opuʼã hag̃ua Ñandejára puévlore. Ojevaléta ijehérsitore haʼetétava ‘arai hũ omoʼãva ko yvy ape’ (Eze. 38:2, 14-16, ÑÑB). Oiko vove upéva ndaiporimoʼãi yvypóra ni mbaʼeveichagua organisasión ñanepytyvõtava. Ñandejára añoite ikatúta ñanepytyvõ ha ñandesalva. ¿Mbaʼépa jajapóta jahechakuaávo ikatuha hína ñamano?

³ Opavave jaservíva Jehovápe ñañeporanduvaʼerã: “¿Agueroviápa che pyʼaite guive Ñandejára oñangarekotaha ipuévlore oiko aja pe jehasa asy guasu?”. Aníkena ñanderesarái apóstol Pedro heʼivaʼekuégui: ‘Jehová oikuaa mbaʼéichapa osalváta umi ohayhúvape chupe, ha oheja umi heko añávape ohusga ha okastiga hag̃ua’ (2 Ped. 2:9). Jajepyʼamongetáramo umi mbaʼe Ñandejára ojapovaʼekuére omosãso hag̃ua hembiguaikuéra yma guarépe, ñañemombaretevéta jagueropuʼaka hag̃ua umi mbaʼe oikótava. Jahechamína mbohapy ehémplo ohechaukáva Jehová ikatuha osalva ipuévlope, ha ñahesaʼỹijóvo koʼã mbaʼe katuete omombaretéta ñande jerovia.

OJESALVA HIKUÁI OÚRÕ GUARE PE AMA GUASU

 4. ¿Mbaʼérepa iñimportánte vaʼekue pe fécha oiko hag̃ua pe Ama Guasu?

⁴ Ñepyrũrã ñañeʼẽmi pe Ama Guasu oikovaʼekuére Noé tiémpope. Ko situasiónpe iñimportánte vaʼekue pe fécha oiko hag̃ua Jehová rembipota. Oñepyrũ mboyve pe Ama Guasu, oĩ peteĩ tembiapo tuichaitereíva: ojejapovaʼerã pe árka ha oñemoinge pype umi mymbakuéra. Jehová nohaʼarõi ojejapopa raẽ pe árka odesidi hag̃ua arakaʼépa okýta. Nopensái ikatunteha okambia pe fécha, peichahágui ndojejapopáirõ g̃uarã. Upéva rangue, heta tiémpo omanda mboyve Noépe ojapo hag̃ua pe árka, odesidíma mbaʼe féchapa oñepyrũta pe Ama Guasu, ojehechaukaháicha lívro de Génesispe. ¿Mbaʼérepa jaʼekuaa upéva?

 5. ¿Mbaʼéichapa ñantendevaʼerã Génesis 6:3, ha arakaʼépa Jehová odesidi upéva?

⁵ Ñandejára Ñeʼẽ ohechauka Jehová odesidíma hague yvágape, oĩva Génesis 6:3-pe: “Ndahejamoʼãi yvyporakuéra oikove opa ára g̃uarã. Haʼekuéra omanovaʼerã voínte. Koʼa guive oikovéta 120 áño pevénte”. ¿Heʼisépa ko téysto mboy áño pevépa oikovéta yvyporakuéra? Nahániri. Upéva rangue, Jehová ohechauka odesidíma hague arakaʼépa ohundíta umi hénte iñañávape.a Pe Ama Guasu oiko áño 2370-pe Jesús ou mboyve, upévare jaʼekuaa Ñandejára heʼi hague oĩva Génesis 6:3-pe áño 2490-pe, Noé orekórõ guare 480 áño (Gén. 7:6). Ha 20 áño rire, 2470-pe, onase Sem, itaʼýra ypykue (Gén. 5:32). Upérõ ofalta 100 áño rupi ou hag̃ua pe Ama Guasu, ha Jehová ndeʼíri gueteri Noépe ojapo hag̃ua pe tembiapo ikatútava osalva yvyporakuérape. Upéicharõ, ¿mbaʼe tiémpopepa omombeʼu chupe?

 6. ¿Arakaʼépa Jehová heʼi Noépe ojapo hag̃ua pe árka?

⁶ Heta áño rire ae Noé oikuaa mbaʼépa ojapóta Ñandejára. ¿Mbaʼérepa ikatu jaʼe upeichaha? La Biblia ohechauka itaʼyrakuéra okakuaapáma ha omendáma hague. Jehová heʼi Noépe: “Nendive katu añemoĩta peteĩ ñeʼẽme. Reikéta [pe árkape] ne rembireko, nde raʼykuéra ha hembirekokuéra ndive” (Gén. 6:9-18). Upévare ikatu jaʼe Jehová omandárõ guare Noépe ojapo hag̃ua pe árka, ofaltáne hague 40 térã 50 áñontema ou hag̃ua pe Ama Guasu.

 7. a) ¿Mbaʼéichapa Noé ha ifamília ohechauka ojeroviaha? b) ¿Arakaʼépa Jehová omombeʼu Noépe outaha pe Ama Guasu?

⁷ Noé ha ifamiliakuéra ojapóvo pe árka oiméne oñeporandurakaʼe mbaʼéichapa oñekumplíta Jehová rembipota ha arakaʼépa oúta pe Ama Guasu. Ndoikuaaporãiramo jepe umi mbaʼe, omohuʼã hikuái pe tembiapo tuichaitéva itiempoitépe. La Biblia heʼi: “Noé ojapopa [Ñandejára] heʼi hagueichaite chupe” (Gén. 6:22, ÑÑB). ¿Arakaʼépa Jehová omombeʼu Noépe outaha pe Ama Guasu? Siete día mboyvéntema, ha umi 7 díape haʼekuéra omoingepavaʼerã árkape umi mymba. Upeichaite, ‘Noé oguerekópe 600 áño, segundo més ha 17 díape’, ojeavri “yvága rokẽ guasu y jokoha” (Gén. 7:1-5, 11).

 8. ¿Mbaʼéichapa pe Ama Guasu ouvaʼekue ohechauka Jehová oikuaaha arakaʼépa osalváta hembiguaikuérape?

⁸ Pe Ama Guasu ouvaʼekue ohechauka Jehová oikuaaha arakaʼetépa ha mbaʼeichaitépa osalváta isiervokuérape. Koʼág̃a katu hiʼag̃uivéntema pe ára ko múndo vaiete oñehundi hag̃ua, ha ikatu jajerovia oñekumplitaha Jehová rembipota itiempoitépe, “upe día ha upe óra” haʼe omoĩ haguépe (Mat. 24:36, NM; elee Habacuc 2:3).

JEHOVÁ OSALVA CHUPEKUÉRA MÁR RÓJOPE

9, 10. ¿Mbaʼe ehémplopa ohechauka Jehová oiporu hague umi isrraelítape omoñuhã hag̃ua Faraón ha ijehérsitope?

⁹ Jahecha haguéicha, Ñandejára oikuaa arakaʼetépa okumplíta hembipota. Koʼág̃a katu ñahesaʼỹijóta ótro ehémplo ohechaukáva mbaʼérepa jajeroviakuaa hese: Jehová oiporúta ipodér osalva hag̃ua ipuévlope. Haʼe ningo katuete oguenohẽ jejopýgui hembiguaikuérape, toiporu jepe raʼe chupekuéra karnádaramo omoñuhã hag̃ua umi ndaijaʼéivape hesekuéra. Upeichaite oikovaʼekue omosãsórõ guare umi isrraelítape Egipto poguýgui.

¹⁰ Oiméne Egíptogui osẽ 3 millón isrraelíta rupi. Jehová voi heʼíkuri Moiséspe moõrupipa oguerahavaʼerã chupekuéra, péro Faraón oimoʼã haʼekuéra oñedesatinambaha pe desiértore (elee Éxodo 14:1-4). Upéicha rupi hoʼa pe ñuhãme, ha ijehérsito reheve omuña umi isrraelítape ha upéi omongora chupekuéra Mar Rojo rembeʼýre. Haʼete voi kuri ndaikatuvéimava ojapo hikuái mbaʼeve (Éxo. 14:5-10). Péro añetehápe ni michĩmi ndojapeligrái hikuái. ¿Mbaʼérepa? Ñandejára ningo oñangareko hesekuéra ha ojapóta tekotevẽva guive osalva hag̃ua chupekuéra.

11, 12. a) ¿Mbaʼépa ojapo Jehová ipuévlo rehehápe? b) ¿Mbaʼépa oiko umi ehípsiore, ha mbaʼépa ñanemboʼe upéva Jehovágui?

¹¹ “Pe arai oñemboʼýva” umi isrraelíta renonderãme, ikatu hag̃uáicha ohechauka chupekuéra moõrupipa ohovaʼerã, ova hapykuerikuéra ha oheja pytũmbýpe Faraón ha ijehérsitope. Péicha rupi ndaikatúi ojapo hesekuéra mbaʼeve, péro pe arai ohesape pyharekue umi isrraelítape g̃uarã (elee Éxodo 14:19, 20). Upe rire Jehová oavri pe már peteĩ yvytu atã rupive oipejúva kuarahyresẽguio “ikã meve pe yvy”. Oiméne mbeguekatúpe pe yvy ikãmba, ajeve la Biblia heʼi pe yvytu oipeju hague “pyhare pukukue aja” ha ‘hasýpe Israel ñemoñarekuéra oike pe yguasu paʼũ ikãháme’. Faraón, ijehérsito ha ikarrokuéra reheve, ipyaʼeve umi isrraelítagui, péro ni upeichavérõ ndohupytýi chupekuéra Jehová oñorairõ rupi hesehapekuéra. Ñandejára ‘ojapo sarambi guasu ijapytepekuéra, ohekýivo umi kárro rruéda’ ha upéicha ndaikatuvéi okuʼe porã hikuái (Éxo. 14:21-25, ÑÑB).

¹² Umi isrraelíta ohasapa rire pe már mboypýri, Jehová heʼi Moiséspe: ‘Eipyso nde po pe y ári ha toʼa umi Egiptoygua, ikavaju arigua ha ikarrokuéra ári’. Haʼekuéra osẽséramo jepe upégui “Ñandejára ojahoʼipa ýpe chupekuéra”. Ndaikatuvéima oguevi hikuái, “nahembýi peteĩnte jepe” ijapyteguikuéra (Éxo. 14:26-28). Péicha Ñandejára ohechauka porã tuicha ipuʼakaha osalva hag̃ua ipuévlope oimehaichagua jejopy vaígui.

OJESALVA HIKUÁI JERUSALÉN OÑEHUNDÍRÕ GUARE

13. ¿Mbaʼépa heʼi Jesús hemimboʼekuérape, ha mbaʼépa oiméne oñeporandu hikuái?

¹³ Jehová oikuaa porã mbaʼéichapa oikóta opa mbaʼe ikatu hag̃uáicha okumpli hembipota. Upéva jahecháta ñahesaʼỹijóvo mbaʼépa oikovaʼekue síglo primérope, Jerusalén oñehundi mboyve. Itaʼýra rupive, Jehová heʼimavaʼekue umi kristiáno Jerusalén ha Judeayguápe mbaʼépa ojapovaʼerã ojesalva hag̃ua oñehundíta vove Jerusalén. Jesús heʼi chupekuéra: “Pehecha vove pe mbaʼe ñanembojeguarúva ha oguerúva ñehundi oĩha pe lugár imarangatúvape, Ñandejára heʼi haguéicha proféta Daniel rupive, [...] upérõ umi oĩva Judéape todipara toho umi montáñare” (Mat. 24:15, 16, NM). ¿Mbaʼéichapa Jesús remimboʼekuéra ohechakuaáta oñekumpliha upe profesía?

14. ¿Mbaʼéichapa hesakã ohóvo umi mbaʼe Jesús heʼivaʼekue?

¹⁴ Umi mbaʼe oikóva upe rire omyesakã mbaʼépa heʼisékuri Jesús. Áño 66-pe, pe ehérsito rrománo omoakãva Cestio Galo, og̃uahẽ Jerusalénpe ojoko hag̃ua umi hudíope opuʼãva goviérnore. Koʼã hudío, oñehenóiva avei selóte, oikepa oñemoʼã hag̃ua Jerusalén témplope ha umi soldádo rrománo katu oñepyrũ ombyai pe murálla. Umi kristiáno oñatende porãva ontende umi mbaʼe oikóva: “Pe mbaʼe ñanembojeguarúva” térã pe ehérsito rrománo ivandéra ha umi símbolo reheve, og̃uahẽ pe “lugár imarangatúvape” térã Jerusalén témplo murálla kóstare. Upéva heʼise Jesús remimboʼekuéra ‘osẽvaʼerãha oho umi montáñare’. Péro, ¿mbaʼéicha piko haʼekuéra ojapóta upéva pe táva henyhẽramo iñenemigokuéragui? Noimoʼãiramo jepe hikuái, oikopotaite peteĩ mbaʼe oñehaʼarõʼỹva.

15, 16. a) ¿Mbaʼépa Jesús heʼivaʼekue hemimboʼekuérape, ha mbaʼérepa tekotevẽterei ojapo hikuái upéva? b) ¿Mbaʼépa ñande avei jajapovaʼerã jajesalva hag̃ua?

¹⁵ Cestio Galo ha umi soldádo rrománo haʼete ku reiete ohopa jeýva, ha umi selóte oñepyrũ omuña chupekuéra. Osẽmbámarõ Jerusaléngui umi rrománo ha hudiokuéra irrevéldeva, kristianokuéra ikatu oaprovecha ha osẽ upégui. Jesús heʼi porã vaʼekue chupekuéra tohejapánte umi mbaʼe orekóva ha pyaʼe toho upe távagui (elee Mateo 24:17, 18). ¿Tekotevẽpa raʼe apúrope osẽ hikuái? Upe riremínte umi selóte oupa jey ha ojopy umi oĩvape Jerusalén ha Judéape omoirũ hag̃ua chupekuéra, ha ikatu hag̃uáicha oñemoĩ avei pe goviérnore haʼekuéra ojapoháicha. Umi selóte ha ambue hudío oiko vaipa oñondive entéronte omandaségui, ha upéva koʼýte ogueru heta mbaʼe vai. Upérõ g̃uarã hasyvéma oñesẽ hag̃ua Jerusaléngui, ha umi rrománo ou jeývo áño 70-pe, ndaikatuvéima ojeho mamove (Luc. 19:43). Umi nosẽivaʼekue itiémpope pe távagui opytáma upépe, péro umi kristiáno iñeʼẽrendúva Jesúspe ha ohovaʼekue montáñare, ojesalva. Haʼekuéra ohechakuaa Jehová ikatuha osalva hembiguaikuérape. ¿Mbaʼépa ñaaprende ko ehémplogui?

¹⁶ Oñekumpli vove umi profesía pe jehasa asy guasu aja, ñande jaservíva Jehovápe jajapovaʼerã Iñeʼẽ ha iñorganisasión heʼihaichaite. Jesús heʼivaʼekue umi kristiánope “toho umi montáñare”. Upéva oñekumplíta avei ñane tiémpope, péro ndajaikuaái gueteri mbaʼeichaitépa.b Upéicharõ jepe, Jehová katuete omyesakãta ñandéve itiempoitépe mbaʼépa jajapovaʼerã. Ha ikatu hag̃uáicha jajesalva tekotevẽterei ñaneñeʼẽrendu. Upévare iporã ñañeporandu: “¿Ajapo pyaʼépa umi mbaʼe Jehová heʼíva iñorganisasión rupive, térãpa apensa raẽ ajapo hag̃ua?” (Sant. 3:17).

ÑANDEJÁRA ÑANDEPREPARA ÑAMBOHOVÁI HAG̃UA UMI MBAʼE OÚTAVA

17. ¿Mbaʼépa heʼi Habacuc oikotaha Gog opuʼã vove Ñandejára puévlore?

¹⁷ Ñanemanduʼami jeýna mbaʼéichapa Gog opuʼãta Ñandejára puévlore. Oñeʼẽvo upévare Habacuc heʼi: “Koʼã mbaʼe ahendúvo akyhyje, che rembe osysyipa, chekanguerasypa ha chepytaryrýi. Upéicharamo jepe, pyʼaguapýpe ahaʼarõ upe ára [Ñandejára outaha] ohundi hag̃ua umi orerehe opyrũsévape” (Hab. 3:16). Jahechaháicha, pe proféta ohendúvonte mbaʼéichapa oñepuʼãta Ñandejára puévlore, ipyʼapererepa, hembesysyipa ha ikangypa. Ñapensávo mbaʼéichapa Habacuc oñeñandu, haʼete ijetuʼuetereítava avei ñandéve ág̃a Gog opuʼã vove ñanderehe. Péro Jehová katuete ñandesalváta hiʼára guasúpe. Upévare, ojapo haguéicha pe proféta, tekotevẽ ñahaʼarõkuaa ha jajerovia haʼe ñandesalvataha (Hab. 3:18, 19).

18. a) ¿Mbaʼérepa ndajakyhyjeivaʼerã umi mbaʼe oikótavagui? b) ¿Mbaʼépa jahecháta pe semána oúvape?

¹⁸ Umi mbohapy ehémplo ñahesaʼỹijovaʼekue ohechauka porã Jehová oikuaaha mbaʼéichapa osalváta opavave hembiguaikuérape. Jahechaháicha, ndaipóri ojokovaʼerã Ñandejára rembipota, haʼe katuete ohupytýta pe oipotáva. Ñande avei ikatúta jahecha mbaʼéichapa okumpli hembipota ñaneñeʼẽrendúramo chupe ipahaite peve. Péro, ¿mbaʼéichapa haʼe ñanepytyvõ ñaneñeʼẽrendu hag̃ua koʼã tiémpope? Upéva jahecháta pe artíkulo oúvape.

[Nóta]

[Nóta oĩva taʼanga ndive páhina 24]

¿Jaʼekuaápa Faraón ha ijehérsito oapeligra hague umi isrraelítape?