Oinvita Matéope omoirũ hag̃ua chupe

Omonguera riremi pe paralítikope, Jesús opytamiénte Capernáumpe, mar de Galilea kóstare. Upépe ou jey hendápe heta hénte, ha haʼe omboʼe chupekuéra. Upéi osẽ oguata upérupi, ha ohecha peteĩ kuimbaʼépe hérava Mateo, oñehenóiva avei Leví. Mateo oguapy hína ojekovrahápe impuésto, ha Jesús ojapo chupe peteĩ invitasión iporãitereíva. Heʼi chupe: “Eju chemoirũ” (Mateo 9:9).

Oiméne Mateo oikuaáma raʼe umi mbaʼe Jesús omboʼéva ha ojapóva upe sónare, oikuaa haguéicha avei Pedro, Andrés, Santiago ha Juan. Ha ojapo haguéicha koʼã disípulo, Mateo ensegída oho Jesús ndive. La Biblia omombeʼu: “Haʼe opuʼã ha oho hendive” (Mateo 9:9). Upepete Mateo oheja itraváho ha omoirũ Jesúspe.

Upe rire Mateo ojapo peteĩ karu guasu hógape, oiméne oagradese hag̃ua Jesús oinvita haguére chupe. Upérõ ndahaʼéi Jesús ha idisipulokuérante la oĩva Mateo rógape, síno oñeinvita avei umi ótro impuésto kovrahápe ombaʼapo vaʼekue Matéondi. Umi hudío ningo ndohayhúi koʼã kuimbaʼépe, pórke okovra chupekuéra impuésto Rómape g̃uarã. Por ehémplo, okovra hikuái umi várko oike haguére puértope, ojepuru haguére umi tape prinsipál, ha oñemoinge haguére merkadería ótro ládogui. Umi hudío ndochaʼeiete umi impuésto kovraháre, pórke ikorrúpto ha okovrave chupekuéra Roma ojerurévagui. Pe karu guasúpe oñeinvita avei umi persóna ikonosídova hembiapo vai haguére (Lucas 7:37-39).

Umi fariséo ohecha Jesús oguapyha okaru koʼãichagua héntendi, upévare oporandu Jesús disipulokuérape: “¿Mbaʼére piko pene mboʼehára okaru umi impuésto kovraha ha mbaʼe vai apohándi?” (Mateo 9:11). Jesús ohendu la heʼíva hikuái ha heʼi: “Hesãiva noikotevẽi doktór, péro umi hasýva oikotevẽ. Tapeho pejepyʼamongeta mbaʼépa heʼise ko mbaʼe: ‘Aipota peiporiahuvereko pende rapichápe, pejapo rangue sakrifísio’. Che ndajúi ahenói umi hekojojávape, aju guei ahenói umi mbaʼe vai apohápe” (Mateo 9:12, 13; Oseas 6:6). Umi fariséo hovamokõieterei ha heʼi guaʼúnte Jesúsre haʼeha “mboʼehára”. Péro upéicharõ jepe, haʼekuéra oaprende vaʼerã mbaʼéichapa otrata vaʼerã umi héntepe.

Oiméne Mateo oinvita hógape koʼã impuésto kovrahápe ha ambue hentekuérape ikatu hag̃uáicha ohendu hikuái Jesúspe ha oheja hape vai. Koʼã hénte apytépe oĩ heta “oñepyrũva avei omoirũ chupe” (Marcos 2:15). Jesús ohasaʼimi tiémpo umi impuésto kovrahándi oipytyvõse rupi chupekuéra. Péichamante orekóta hikuái oportunida oñemoag̃ui hag̃ua Ñandejárare. Umi fariséo hovamokõietéva katu odespresia koʼã persónape. Péro Jesús tuicha idiferénte. Haʼe oiporiahuvereko ha oipytyvõ chupekuéra oñemoĩ porã hag̃ua Jehovándi, ojapoháicha peteĩ doktór oipohãnóva peteĩ hasývape.

Jahechaháicha, Jesús oiporiahuvereko umi pekadórpe, péro upéva ndeʼiséi oguerohoryha hembiapokuéra. Haʼe otrata porã chupekuéra otrata haguéicha umi persóna hasývape. Por ehémplo, katuete ñanemanduʼáne omonguerárõ guare pe kuimbaʼe ilépravape. Jesús ombyasyetereígui chupe, opoko hese ha heʼi: “Si, romonguerase” (Mateo 8:3). ¡Ajépa iporãitéta ñande avei jaiporiahuverekóramo ñande rapichakuérape, ha ñaipytyvõ umi oikotevẽvape oñemoag̃ui hag̃ua Ñandejárare!