¿Máva podér rupivépa oiko umi milágro?

Jesús oĩ kuri pe fariséo Simón rógape, ha omboʼe iñimportanteha ñaporoperdona. Upe rire oñepyrũ jey opredika pe marandu porã Galiléare. Kóva haʼéma pe segundo áño haʼe okorreha heta lugár rupi opredika hag̃ua. Péro ndoviahái haʼeño, oho hendive umi 12 ijapóstol. Avei omoirũ chupekuéra “umi kuña Jesús omonguera ha oipeʼa vaʼekue demónio poguýgui” (Lucas 8:2). Umíva apytépe oĩ María Magdalena, Susana, ha Juana, iména haʼéva rréi Herodes Antipas ofisiál.

Amáske Jesús opredika ha ojapo milágro, umi hénte ojodiskutipa. Peteĩ jey ojegueraha Jesús rendápe peteĩ kuimbaʼe endemoniádo ndohecháiva ha iñeʼẽngúva. Haʼe omonguera chupe, ha upe rire pe kuimbaʼe oñeʼẽ ha ohecha. Umi henteita ijurujaipa opytávo ha heʼijoa: “¿Kóva piko ndahaʼéi David Raʼy?” (Mateo 12:23).

Umi hénte ijaty pe óga Jesús oĩháme, ha upévare haʼe ha idisipulokuéra ndaikatúi ni okaru. Heta oĩ ojeroviáva Jesúsre ha oĩ segúro haʼeha “David Raʼy”, péro oĩ avei umi ndojeroviáiva hese. Umi mboʼehára leipegua ha fariseokuéra ou Jerusaléngui oheja vai hag̃ua Jesúspe umi hénte renondépe. Haʼekuéra heʼi hese: “Kóva ningo oĩ Beelzebub poguýpe, [...] umi demónio ruvicha” (Marcos 3:22). Jesús hentekuéra ohendúvo pe guyryry oikóva, ou ogueraha hag̃ua chupe. ¿Mbaʼérepa?

Iñermanokuéra ndoroviái gueteri Jesús haʼeha Ñandejára Raʼy (Juan 7:5). Oimoʼã hikuái operdeha ihuísio, ha ikáusare umi hénte oiko vaipaha. Haʼekuéra opensa Jesús ndahaʼeveimaha peteĩ persóna itrankílova, haʼe haguéicha ymave oiko tiémpope hendivekuéra Nazarétpe. Upévare heʼi hese hikuái: “Itavyraíma ningo” (Marcos 3:21).

Péro, ¿operdépa raʼe Jesús isentído? Umi mbaʼe ojapo vaʼekue ohechauka nahaniriha. Por ehémplo haʼe omonguera kuri pe endemoniádope, ha upéva avave ndaikatúi onega. Pe kuimbaʼe koʼág̃a ikatúma ohecha ha oñeʼẽ. Péro umi mboʼehára leipegua ha fariseokuéra oheja vaise katuete Jesúspe, upévare osẽ heʼi hikuái: “Haʼe ningo omosẽ umi demóniope oipytyvõgui chupe Beelzebub, umi demónio ruvicha” (Mateo 12:24).

Jesús oikuaa mbaʼépa opensa umi mboʼehára leipegua ha umi fariséo, upévare osẽ heʼi: “Peteĩ goviérno hoʼáta umi hénte oiko vaipáramo oñondive. Ha umi hénte oĩva peteĩ siudápe térã peteĩ ógape ndohopukumoʼãi opuʼãmbárõ oñoakãre. Upéicha avei Satanás omosẽramo Satanáspe, opuʼã hína ijehe, ¿ha mbaʼéicha piko upéicharõ igoviérno oho pukúta?” (Mateo 12:25, 26).

Upéicha Jesús ojurumbotyete chupekuéra. Umi fariséo oikuaa oĩha hudío heʼíva omosẽha avei umi demóniope (Hechos 19:13). Upévare Jesús oporandu chupekuéra: “Ha oiméramo añete Beelzebub rupive amosẽ umi demónio, ¿máva rupive piko upéicharõ pende disipulokuéra omosẽ umi demóniope?”. Péicha Jesús ontendeka umi fariséope oñeʼẽ reieteha hese, pórke oiméramo siérto la heʼíva hikuái, umi fariséo disípulo ojapo vai avei. Upéi Jesús heʼi porã chupekuéra: “Péro che amosẽramo umi demónio Ñandejára espíritu rupive, upéicharõ katu añetehápe, Ñandejára Rréino penderupytýma” (Mateo 12:27, 28).

Jesús ningo omosẽ umi demóniope haʼe ipoderosove rupi Satanásgui, ha ikatu hag̃uáicha ojehechakuaa upeichaha, omoĩ peteĩ ehémplo: “Oĩramo oikeséva peteĩ kuimbaʼe imbaretéva rógape ogueraha hag̃ua chugui ikosakuéra, tekotevẽ oñapytĩ raẽ chupe, ¿ajépa? Upéi ae ikatúta omonandi chugui hóga. Pe noĩriva chendive, opuʼã cherehe, ha pe nombyatýiva chendive, omosarambi” (Mateo 12:29, 30). Ojekuaa porãiterei ningo umi fariséo oñemoĩha Jesúsre ha ombaʼapoha Satanáspe g̃uarã. Péro Jehová oĩ Jesúsndi, upéicharõ jepe umi fariséo omomombyry umi héntepe Ñandejára Raʼýgui.

Upéicha rupi Jesús heʼi porã Satanás rembiguaikuérape: “Yvyporakuérape oñeperdonáta opaichagua pekádo ojapóva térã ñeʼẽ vai heʼíva. Péro oimeraẽ otakýva espíritu sántore noñeperdonamoʼãi arakaʼeve, ipekádo opytáne hiʼári opa ára g̃uarã” (Marcos 3:28, 29). Upeichaite ningo, enterove heʼíva Jesús ojapo hague pe milágro Satanás rupive, opeka hína espíritu sánto kóntrape ha noñeperdonamoʼãi chupekuéra.