Jajepreparákena koʼág̃a pórke oĩta ñandepersegíva

 1. ¿Mbaʼérepa jajepreparáma vaʼerã ko tiémpope?

PE PYHARE omano mboyve, Jesús heʼi vaʼekue ko múndo ndochaʼemoʼãiha enterove umi odesidívare oiko chugui idisípulo (Juan 17:14). Upe tiémpo guive koʼag̃aite peve, umi oñemoĩva pe adorasión verdadérare opersegi umi testígo de Jehová ifiélvape (2 Tim. 3:12). Ha jaikuaa voi hetave jajepersegitaha hiʼag̃uivévo ohóvo pe fin (Mat. 24:9).

2, 3. a) ¿Mbaʼérepa ipeligróso jakyhyjéramo? b) ¿Mbaʼépa jahecháta ko artíkulope?

² ¿Mbaʼéichapa ikatu jajeprepara koʼág̃ama voi ñaaguanta hag̃ua ág̃a oĩ vove ñandepersegíva? Natekotevẽi ningo ñañeimahina entéro mbaʼe vai ikatúva oiko ñanderehe amo gotyove. Jajapóramo upéicha, ikatu hína japyta jakyhyjeterei ha jajepyʼapyeterei. Amo ipahápe, ñapensaitereíramo umi mbaʼe vai neʼĩravare oiko, ikatu jakyhyjeterei ha jaju ndajaservivéi Jehovápe oiko mboyve jepe umi mbaʼe vai (Prov. 12:25; 17:22). Jakyhyjetereíramo, upéva ideprovechoitereíta ñane ‘enemígope, pe Añáme’, ha haʼe katuete oipurúta upéva ñane kóntrape (1 Ped. 5:8, 9). Upéicharõ, ¿mbaʼéichapa ikatu jajeprepara ñaaguanta hag̃ua oĩ vove ñandepersegíva?

³ Ko artíkulope jahecháta mbaʼéichapa ikatu ñamombareteve ñane amista Jehovándi ha mbaʼérepa iñimportánte jajapo upéva koʼág̃ama voi. Avei jahecháta mbaʼépa ikatu jajapo ñandepyʼaguasuve hag̃ua. Ha ultimoite jahecháta mbaʼépa jajapo vaʼerã umi hénte ndochaʼéiramo ñanderehe.

 4. Heʼiháicha Hebreos 13:5, 6, ¿mbaʼe rehepa ñaime vaʼerã segúro, ha mbaʼérepa iñimportantete upéva?

⁴ Ñaime vaʼerã segúro Jehová ñanderayhuha ha núnka nañanderejamoʼãiha ñaneaño (elee Hebreos 13:5, 6). Ojapóma heta áño pe rrevísta Ñemañaha heʼi hague: “Pe oikuaa porãvéva Ñandejárape, koʼytevéntema ojeroviáta hese oĩ vove opersegíva chupe”. ¡Ajépa siertoite upéva! Jagueropuʼaka hag̃ua oĩ vove ñandepersegíva, jahayhu vaʼerã Jehovápe ha jajerovia hese ñande pyʼaite guive, ha arakaʼeve ndajadudái vaʼerã Jehová ñanderayhuha (Mat. 22:36-38; Sant. 5:11).

 5. ¿Mbaʼépa ñanepytyvõta jahechakuaa hag̃ua Jehová ñanderayhuha?

⁵ Jalee vaʼerã la Biblia káda día ñañemoag̃uiseve rupi Jehováre (Sant. 4:8). Jalee aja ñapensa vaʼerã umi kualida porã Jehová orekóvare. Avei ñañehaʼã vaʼerã ñantende mbaʼeichaitépa haʼe ñanderayhu jalee jave umi mbaʼe heʼi ha ojapo vaʼekue (Éx. 34:6). Algúnope g̃uarã ikatu ijetuʼu hína oguerovia hag̃ua Ñandejára ohayhuha chupe, pórke avave ndohechaukáiva ohayhuha chupe. Oiméramo ñande ñañeñandu upéicha, káda día ñañehaʼã vaʼerã jajapo peteĩ lísta ha ñamoĩ pype mbaʼéichapa Jehová ohechaukáma ñandeporiahuverekoha, ha avei imbaʼeporãha ñanendive (Sal. 78:38, 39; Rom. 8:32). Jajepyʼamongetáramo umi mbaʼe jahasa vaʼekuére ha umi mbaʼe jaleévare Ñandejára Ñeʼẽme, katuete oiméne ñaanotáta heta mbaʼe Jehová ojapóma vaʼekue ha osegíva ojapo ñanderehehápe. Amáske ñamombaʼeve umi mbaʼe Jehová ojapóva, koʼýte imbaretevéta ñane amista hendive (Sal. 116:1, 2).

 6. Heʼiháicha Salmo 94:17-19, ¿mbaʼéichapa ñanepytyvõ ñañemboʼéramo Jehovápe ñande pyʼaite guive?

⁶ Ñañemboʼe meme vaʼerã. Ñapensamína peteĩ mitãʼi oañuãváre chupe itúa. Ko mitãʼi ningo oñeñandu porãiterei, ha ndokyhyjéi omombeʼu hag̃ua itúape entéro mbaʼe ohasa vaʼekue upe díape, tahaʼe iporãva térã ivaíva. Ñande ikatu avei ñañeñandu upéicha Jehovándi káda día ñañemboʼéramo chupe ñande pyʼaite guive (elee Salmo 94:17-19). Ñañemboʼe jave ñande Túa ñanderayhuetévape, ikatu ‘ñanerasẽ ha ñamombeʼu chupe entéro mbaʼe oĩva ñane korasõme’, ha ikatu voi ñamombeʼu Jehovápe entéro mbaʼe ñanemongyhyjéva ha ñanekevrantaitereíva (Lam. 2:19). ¿Mbaʼépa jahupytýta jajapóramo upéicha? Ñañandúta ‘Ñandejára pyʼaguapy tuichavéva opa mbaʼe ikatúvagui ñantende’ (Filip. 4:6, 7). Péicha ñañemboʼe meméramo Jehovápe, ñañandúta ñañemoag̃uiveha hese (Rom. 8:38, 39).

 7. ¿Mbaʼérepa ñaime vaʼerã segúro oñekumplitaha katuete Ñandejára promesakuéra oñeʼẽva pe Rréinore?

⁷ Ñaime segúro oñekumplitaha katuete Ñandejára promesakuéra oñeʼẽva pe Rréinore (Núm. 23:19). Ndajajeroviapáirõ oñekumplitaha Jehová promesakuéra, ifasilvéta hína Satanáspe ha umi oĩvape ipoguýpe ñanemongyhyje hag̃ua (Prov. 24:10; Heb. 2:15). ¿Mbaʼéichapa koʼág̃a ikatu ñamombareteve ñande jerovia Ñandejára Rréinore? Ñañemotiémpo vaʼerã jastudia hag̃ua Ñandejára promesakuéra oñeʼẽva pe Rréinore, ha mbaʼérepa ikatu ñaime segúro umíva oñekumplitaha katuete. ¿Mbaʼéichapa ñanepytyvõta upéva? Jahechamína Stanley Jones ehémplo, ojerovia rupi haʼe oĩ vaʼekue kárselpe 7 áño.b Haʼe omombeʼu mbaʼépa oipytyvõ chupe oaguanta hag̃ua: “Che jerovia ningo imbarete vaʼekue pórke aikuaa porã mbaʼépa Ñandejára Rréino ha mbaʼe mbaʼépa ojapóta. Che ni michĩmi ndadudáiva upévagui. Upéicha rupi avave ndaikatúi vaʼekue chemomombyry Jehovágui”. Jajerovia mbaretéramo Ñandejára promesakuérare, ñañemoag̃uivéta Jehováre ha nañapermitimoʼãi mbaʼeve ñanemongyhyje jasegi hag̃ua jaservi chupe (Prov. 3:25, 26).

 8. ¿Mbaʼépa ikatu jahechakuaa ñandejehe jajepyʼamongetáramo mbaʼéichapa jahecha umi rreunión? Emyesakã.

⁸ Ani jafalta umi rreuniónpe. Umi rreunión ningo ñanepytyvõ ñamombareteve hag̃ua ñane amista Jehovándi. Ha odepende hína mbaʼéichapa jahecha umi rreunión ikatu hag̃uáicha amo gotyove jagueropuʼaka oĩ vove ñandepersegíva (Heb. 10:24, 25). ¿Mbaʼérepa jaʼekuaa upéva? Jahejáramo ñandejoko umi mbaʼe michĩva jepe jaha hag̃ua rreunionhápe, ¿mbaʼépa jajapóta ág̃a umi goviérno oproivi vove ñandehegui ñañerreuni? Péro koʼág̃ama voi jajerresolvéramo ndajafaltamoʼãiha rreunionhápe, ñande ndajakyhyjemoʼãi ág̃a umi oñemoĩva ñanderehe ñandejokose vove ani hag̃ua ñañembyaty. Koʼág̃a hína pe tiémpo jajepokuaa hag̃ua ñamombaʼe ñane rreunionkuéra. Péicha jajapóramo, oĩrõ jepe oñemoĩva ñanderehe térã pe goviérno oproivíramo ñandehegui umi rreunión, mbaʼeve nañandejokomoʼãi ñaneñeʼẽrendu hag̃ua Jehovápe yvypórape rangue (Hech. 5:29).

 9. ¿Mbaʼéichapa ñanepytyvõta jaikuaáramo de memória umi téxto bíblico?

⁹ Jaikuaa de memória umi téxto bíblico ñandegustavéva (Mat. 13:52). Ikatu oime hasy ñandéve ñanemanduʼapaite hag̃ua umi téxtore, péro Jehová ikatu oipuru ijespíritu sánto ipoderosoitéva ñanemomanduʼa hag̃ua umi téxtore (Juan 14:26). Peteĩ ermáno ningo oĩ vaʼekue préso Alemania Orientálpe, ha oñemoĩ chupe peteĩ lugár oĩ hag̃uáme haʼeñoite. Haʼe heʼi: “Chéngo avyʼaiterei pórke aikuaa vaʼekue mas de 200 téxto bíblico de memória. Aiméramo jepe cheañoite, asegi amombaʼapo che akã ha ajepyʼamongeta heta téma bíblicore”. Umi téxto bíblico oipytyvõ vaʼekue pe ermánope oñemoag̃ui hag̃ua Jehováre, ha ifiél hag̃ua ogueropuʼakávo upe situasión.

10. ¿Mbaʼérepa jaikuaa vaʼerã de memória umi purahéi omombaʼeguasúva Jehovápe?

¹⁰ Jaikuaa de memória umi purahéi omombaʼeguasúva Jehovápe, ha japurahéi umíva. Pablo ha Silas oĩrõ guare préso Filípospe, opurahéi umi músika omombaʼeguasúva Jehovápe oikuaáva de memória (Hech. 16:25). Ñane ermanokuéra oĩ vaʼekue pe Unión Soviéticape ojapo vaʼekue avei upéicha oñemondórõ guare chupekuéra préso Sibériape. Pe ermána Mariya Fedun imanduʼávo upévare, heʼi: “Ore roñemoĩ ropurahéi entéro umi músika roikuaáva de memória oĩva pe purahéi ryrúpe”. Haʼe heʼi koʼã purahéi oipytyvõ hague chupekuéra ipyʼaguasu hag̃ua ha oñemoag̃uive hag̃ua Jehováre. Oiméne ñandéve avei ñanemombarete japurahéi jave umi músika ñandegustavéva omombaʼeguasúva Jehovápe, tahaʼe umi oĩva ñande purahéi ryrúpe térã ñande sítio de Internétpe. Upéicharõ, koʼág̃ama ñaaprende vaʼerã de memória koʼã purahéi (ehecha pe rrekuádro “Chembopyʼaguasumína Jehová”).

11, 12. a) Heʼiháicha 1 Samuel 17:37, 45-47, ¿mbaʼérepa David ipyʼaguasuete vaʼekue? b) ¿Mbaʼépa ñaaprende David ehémplogui?

¹¹ Ikatu hag̃uáicha jagueropuʼaka oĩ vove ñandepersegíva, tekotevẽ ñandepyʼaguasu. ¿Mbaʼépa ikatu jajapo jahechakuaáramo nañandepyʼaguasuiha? Ñanemanduʼa vaʼerã ñandepyʼaguasu hag̃ua natekotevẽiha ñandepuku, ñanembarete térã ñandevale. Ñapensamíntena David ehémplore, haʼe ningo imitã vaʼekue oñorairõrõ guare Goliat kóntrape. David michĩve ha ikangyve vaʼekue pe higánte Goliátgui, ha ndorekói vaʼekue heta mbaʼe oñorairõ hag̃ua. Añetehápe David ni espáda ndorekói vaʼekue. Upéicharõ jepe, haʼe ipyʼaguasueterei ha ndokyhyjéi oho hag̃ua oñorairõ pe higánte oñemombaʼeguasuetéva kóntrape.

¹² ¿Mbaʼérepa David ipyʼaguasuete vaʼekue? Haʼe ningo oguerovia vaʼekue ipyʼaite guive Jehová oĩha hendive (elee 1 Samuel 17:37, 45-47). David nopensái vaʼekue: “Goliat ningo tuichave chehegui”. Upéva rangue haʼe opensa: “Goliat ndahaʼeiete mbaʼeve Jehová rovake”. ¿Mbaʼépa ñaaprende upévagui? Ñande avei ñandepyʼaguasutaha jajeroviáramo Jehová oĩha ñanendive, ha ñane enemigokuéra ndahaʼeiha mbaʼeve Ñandejára Todopoderóso rovake (2 Crón. 20:15; Sal. 16:8). ¿Mbaʼépa ikatu jajapo ñandepyʼaguasuve hag̃ua koʼág̃a oĩ mboyve ñandepersegíva?

13. ¿Mbaʼépa ikatu jajapo ñandepyʼaguasuve hag̃ua? Emyesakã.

¹³ Ñande ikatu ñandepyʼaguasuve koʼág̃a, ñamombeʼúramo umi héntepe umi notísia porã oñeʼẽva Ñandejára Rréinore. ¿Mbaʼérepa jaʼe upéva? Pórke japredika jave ñaaprende jajerovia hag̃ua Jehováre ha ani hag̃ua jakyhyje la héntegui (Prov. 29:25). Umi ñane múskulo ningo imbareteve jajapóramo ehersísio, upéicha avei ñande ñandepyʼaguasuve japredikáramo ogahárupi, oĩháme heta hénte, umi negosioháre, kállere térã jaikohárupi. Ñañehaʼãramo koʼág̃ama voi ñandepyʼaguasuve japredika hag̃ua, ñaimétama preparádo jasegi hag̃ua japredika umi goviérno oproivíramo jepe ñandehegui amo gotyove (1 Tes. 2:1, 2).

14, 15. ¿Mbaʼépa ñaaprende Nancy Yuen ha Valentina Garnovskaya ehémplogui?

¹⁴ Ikatu ñaaprende heta mbaʼe mokõi ermána ifiélvagui ohechauka vaʼekue ipyʼaguasuetereiha. Peteĩva héra Nancy Yuen.c Orekóramo jepe 1 métro imédiorupinte, ndaiporiguasúi vaʼekue mbaʼeve omongyhyjéva chupe. Ojeovligasérõ guare chupe anivéma hag̃ua opredika Ñandejára Rréino, haʼe lomímonte osegi ojapo upéva. Upéicha rupi ojegueraha chupe kárselpe 21 áñore Chínape. Umi ofisiál ointerroga vaʼekue chupe heʼi hese haʼeha “pe persóna ikaprichosavéva” oĩva upe paíspe.

¹⁵ Pe ótra ermána héra Valentina Garnovskaya.d Chupe ojegueraha vaʼekue kárselpe 3 vése Unión Soviéticape, ha en totál oĩ jepe kárselpe 21 áñore. ¿Mbaʼérepa? Haʼe ningo ojerresolve vaʼekue ipyʼaite guive osegitaha opredika, upévare umi ofisiál heʼi hese haʼeha “peteĩ kriminál ipeligrosoitereíva”. ¿Mbaʼérepa koʼã ermána ifiélva ipyʼaguasuete vaʼekue? Pórke haʼekuéra ojerovia vaʼekue ipyʼaite guive Jehová oĩha hendivekuéra.

16. ¿Mbaʼe rehepa odepende ñandepyʼaguasu hag̃ua?

¹⁶ Jahecha haguéicha, ñandepyʼaguasuve hag̃ua ndajajeroviái vaʼerã ñandejehe ñanembarete térã ñandevale haguére. Upéva rangue, jajerovia vaʼerã Jehová oĩha ñanendive ha haʼe oñorairõha hína ñanderehehápe (Deut. 1:29, 30; Zac. 4:6). Upévare odepende hína ñandepyʼaguasu hag̃ua.

17, 18. Heʼiháicha Juan 15:18-21, ¿mbaʼe avísopa omeʼẽ vaʼekue ñandéve Jesús? Emyesakã.

¹⁷ Ñande ningo javyʼa umi hénte ñanderrespetárõ, péro ndovaléi ñapensa ndajavaleiha mbaʼeverã umi hénte nañandeguerohorýiramo. Jesús heʼi vaʼekue: “Pevyʼa umi hénte ndaijaʼéiramo penderehe, penemboykéramo, otakýramo penderehe, ha penemoherakuã vaíramo che káusare” (Luc. 6:22). ¿Mbaʼépa heʼise vaʼekue Jesús?

¹⁸ Jesús ndeʼiséi vaʼekue ñande kristianokuéra javyʼataha umi hénte ndaijaʼéiramo ñanderehe. Upéva rangue haʼe ñandeavisa mbaʼépa oikóta ñanderehe. Ñande ningo ndajajeheʼái ko múndore, jaiko Jesús omboʼe haguéicha ha japredika pe mensáhe haʼe opredika vaʼekue. Upéicha rupi ko múndo ndaijaʼéi ñanderehe (elee Juan 15:18-21). Ñande ningo jaipota Jehová ñandeguerohory. Umi hénte ndochaʼéiramo ñanderehe jahayhu rupi ñande Ru Jehovápe, upéva ndahaʼevéima ñane provléma.

19. ¿Mbaʼéichapa ikatu jasegi umi apostolkuéra ehémplo?

¹⁹ Aníkena arakaʼeve ñatĩ ñande haʼe haguére testígo de Jehová, umi hénte heʼi térã ojapo rupi álgo ñanemoñeñandu vaíva (Miq. 4:5). Sapyʼánte jakyhyjéramo mbaʼépa opensa ñanderehe umi hénte, ñanemanduʼa vaʼerã umi apostolkuéra ehémplore. Ojejuka rire Jesúspe, umi apóstol oñandu vaʼekue mbaʼeichaitépa umi líder rrelihióso ndaijaʼéi hesekuéra (Hech. 5:17, 18, 27, 28). Upéicharõ jepe, haʼekuéra osegi oho pe témplope káda día, ha oikuaauka haʼekuéra haʼeha Jesús disípulo opredikávo umi héntepe (Hech. 5:42). Umi apóstol ndahaʼéi vaʼekue ku okyhyjéva ha upéicha rupi ndopredikavéiva. Oiméramo ñande jakyhyje la héntegui, ikatu jagueropuʼaka upéva jaikuaaukáramo ñande haʼeha testígo de Jehová, tahaʼe ñande travahohápe, eskuéla térã koléhiope ha ñane vesinokuérape (Hech. 4:29; Rom. 1:16).

20. ¿Mbaʼérepa umi apóstol ovyʼa vaʼekue ndojechaʼéiramo jepe hesekuéra?

²⁰ ¿Mbaʼérepa umi apóstol ovyʼa vaʼekue? Pórke haʼekuéra oikuaa mbaʼérepa ndojechaʼéi hesekuéra, ha chupekuéra g̃uarã peteĩ priviléhio vaʼekue oñemaltrata ojapo rupi Jehová rembipota (Luc. 6:23; Hech. 5:41). Tiémpo rire, apóstol Pedro oskrivi vaʼekue: “Peẽ pevyʼa, pehasa asýramo jepe pejapo haguére iporãva” (1 Ped. 2:19-21; 3:14). Jahechakuaáramo umi hénte ndochaʼeiha ñanderehe jajapo haguére iporãva, nañapermitimoʼãi upéva ñandejoko jasegi hag̃ua jaservi Jehovápe.

21, 22. a) ¿Mbaʼépa jajerresolve vaʼerã jajapo jajeprepara hag̃ua ág̃a oĩ vove ñandepersegíva? b) ¿Mbaʼépa jahecháta pe artíkulo oúvape?

²¹ Ñande ningo ndajaikuaái arakaʼépa umi hénte oñepyrũta ñandepersegi, térã arakaʼépa umi goviérno oproivíta ñandehegui japredika térã ñañerreuni. Péro jaikuaa ikatuha jajeprepara koʼág̃ama voi ñamombaretévo ñane amista Jehovándi, ñañehaʼãvo ñandepyʼaguasuve ha jaikuaávo mbaʼépa jajapo vaʼerã umi hénte ndaijaʼéi jave ñanderehe. Umi mbaʼe jajapóva koʼág̃a jajeprepara hag̃ua, ñanepytyvõta jasegi hag̃ua jaservi Jehovápe toiko la oikóva amo gotyove.

²² ¿Péro mbaʼépa jajapóta ojeproivíramo ñandehegui jaservi Jehovápe? Pe artíkulo oúvape jahecháta la Biblia ikatuha ñanepytyvõ jasegi hag̃ua jaservi Jehovápe, ojeproivíramo jepe ñandehegui.