Jasegíkena pe Rrégla de Óro japredika jave

 1. ¿Mbaʼépa ikatu jahupyty jatrata porãramo ñande rapichakuérape japredika jave? Emoĩ peteĩ ehémplo. (Ehecha pe taʼanga oĩva iñepyrũme.)

PETEĨ matrimónio kristiáno oikóva Fíjipe, oinvita oikóvo umi héntepe oho hag̃ua pe Konmemorasiónpe. Ha oñeʼẽ jave hikuái peteĩ kuñakarai ndive hóga renondépe, oñepyrũ oky. Upémarõ pe ermáno omeʼẽ peteĩ sombrílla pe kuñakaraípe ha oipuru hembirekóndi ótra sombrílla. Upe paréha ovyʼaiterei ohechávo upéi pe kuñakarai ohoha Konmemorasiónpe. Pe kuñakarai omombeʼu naimanduʼaguasuiha mbaʼérehepa oñemongeta kuri pe matrimóniondi ohórõ guare hógape. Péro oguerohoryeterei otrata lája chupe hikuái ha upévare odesidi oho Konmemorasiónpe. Jahechaháicha ko ehémplope, pe matrimónio osegi pe Rrégla de Óro.

 2. ¿Mbaʼépa hína pe Rrégla de Óro, ha mbaʼéichapa ikatu jasegi upe konsého?

² ¿Mbaʼépa pe Rrégla de Óro? Upéva hína ko konsého Jesús omeʼẽ vaʼekue: “Opa mbaʼe peẽ peipotáva ojapo penderehe pende rapichakuéra, peẽ pejapo vaʼerã avei hesekuéra” (Mat. 7:12). ¿Mbaʼéichapa ikatu jasegi ko konsého? Jajapo vaʼerã mokõi mbaʼe. Primero, ñañeporandu: “Aimérire upe tapicha lugárpe, ¿mbaʼéichapa aipotáta chetrata umi ótro?”. Ha segundo, ñañehaʼãmbaite vaʼerã jatrata chupe ñande jaipotaháicha umi ótro ñandetrata (1 Cor. 10:24).

3, 4. a) ¿Mbaʼérepa pe Rrégla de Óro ndeʼiséi jatrata porã vaʼerãha ñane ermanokuérapente? b) ¿Mbaʼépa ñamyesakãta ko artíkulope?

³ Heta vése ndahasýi jasegi hag̃ua pe Rrégla de Óro ñane ermanokuérandi, péro Jesús ndeʼíri vaʼekue jatrata porã vaʼerãha chupekuérante. Haʼe ningo oñeʼẽ vaʼekue pe Rrégla de Órore heʼírõ guare mbaʼéichapa jatrata vaʼerã opavave tapichápe, ñane enemigokuérape jepe (elee Lucas 6:27, 28, 31, 35). Ha jasegíramo ko konsého jatrata lájape ñane enemígope, koʼýte jatrata porã vaʼerã umi héntepe japredika jave chupekuéra. Umíva apytépe oĩ hína heta “oñehaʼãva ohupyty jeikove opaveʼỹva” (Hech. 13:48).

⁴ Koʼág̃a ñahesaʼỹijóta cuatro porandu ñanepytyvõtava japorotrata porã hag̃ua japredika jave: 1) ¿Mávapepa ñañeʼẽ hína? 2) ¿Moõpa ñañeʼẽ chupe? 3) ¿Mbaʼe moméntopepa opyta porãve ñañeʼẽ hag̃ua? ha 4) ¿Mbaʼéichapa ñañepyrũ vaʼerã ñañeʼẽ? Koʼã porandu ñanepytyvõta jahechakuaa hag̃ua mbaʼépa opensa ñande rapichakuéra ha ikatúta jaipuru umi téma ointeresátava chupekuéra (1 Cor. 9:19-23).

 5. ¿Mbaʼépa iporã ñañeporandu?

⁵ Japredika jave, ñañemongeta diferénte persóna ndive, ha káda uno oreko ikostúmbre ha iprovlemakuéra (2 Crón. 6:29). Upévare, ñamombeʼu vove pe marandu porã peteĩ tapichápe, ñañeporandu vaʼerã: “Oimérire chéve ojepredika, ¿mbaʼéichapa aipotáta chetrata pe persóna og̃uahẽva cherendápe? ¿Chegustátapa chetratáramo peteĩ extráñoicha? ¿Térãpa aipotáta oikuaa mbaʼeichagua persónapa che?”. Koʼã porandu ñanepytyvõta jatrata hag̃ua káda únope ogustataháicha chupe.

6, 7. ¿Mbaʼépa jajapo vaʼerã jatopáramo predikasiónpe peteĩ persóna ijarhélva ñandéve?

⁶ Avave ndoipotái ojeʼe hese iñamargadoha. Por ehémplo, ñande jaservíva Jehovápe ñañehaʼãmbaite jasegi pe konsého vívliko heʼíva: “Pene ñeʼẽ akóinte iporã ha ijuky vaʼerã” (Col. 4:6). Upéicharõ jepe, ñaneimperfékto rupi heta vése jaʼe peteĩ mbaʼe upéi ñambyasýva (Sant. 3:2). Ikatu sapyʼánte ñanekoʼẽ vai ha jajahéi peteĩ ñande rapicháre. Ajépa nañandegustamoʼãi upe haguérente ojeʼérõ ñanderehe ñandearhelha. Katuete jaipotáta umi ótra persóna ontende jahasáva ha ohechakuaa nañaimeporãi haguénte. Upéicha avei ñanembaʼerechakuaa vaʼerã ñande rapichakuérandi.

⁷ Sapyʼánte japredika jave jatopáramo peteĩ persóna ijarhélva ñandéve, ndajajapurái vaʼerã ñapensa vai hag̃ua hese. Ikatu oime ojejopyeterei hendive itravahohápe térã koléhiope, ỹrõ hasy oikóvo. Heta vése umi tapicha ñepyrũrã ijarhél vaʼekue ñandéve, upe rire okambia ohechávo Jehová siervokuéra hory ha orrespetaha chupe (Prov. 15:1; 1 Ped. 3:15).

 8. ¿Mbaʼérepa japredika vaʼerã “opaichagua tapichápe”?

⁸ Japredika jave, jajuhu opaichagua tapicha. Umi áño ohasa vaʼekuépe, rrevísta Ñemañaha oguenohẽ mas de 60 ermáno ha ermána rembiasakue umi artíkulo héravape “La Biblia okambia chupekuéra”. Koʼã persóna oikuaa mboyve Jehovápe, haʼe vaʼekue mondaha, pandilléro, ikaʼu, ojedroga, térã hekovai. Avei oĩ umi ombaʼapo vaʼekue polítikape, oñemeʼẽmbaitéva iprofesiónpe ha omoakãva rrelihión japu. Entéro koʼãva ohendu pe marandu porã, oñepyrũ ostudia la Biblia, okambia ha oiko chugui Jehová siérvo. Upévare ndovaléi ñapensa oĩha umi nohendumoʼãiva arakaʼeve pe mensáhe oñeʼẽva Ñandejára Rréinore (elee 1 Corintios 6:9-11). Ñanemanduʼa vaʼerã ‘opaichagua tapicha’ ikatuha oasepta pe marandu porã (1 Cor. 9:22).

 9. ¿Mbaʼérepa jarrespeta vaʼerã ogapy ahéno?

⁹ ¿Moõpa japredika umi héntepe? Pyʼỹinte jaha hogakuérape upearã (Mat. 10:11-13). Ha javyʼa ojerrespetáramo ñande róga ha ñande kosakuéra, ¿ajépa? Amo ipahápe ningo ñandéve g̃uarã iñimportánte ñande róga. Jaipota entéronte orrespeta oikóva ñande rogapýpe ha ñaimese trankílo porã upépe. Upeichaite jarrespeta avei ñane vesinokuérape. Upévare, japredika jave ogahárupi, jahecha vaʼerã oimépa jarrespeta hína ogapy ahéno (Hech. 5:42).

10. ¿Mbaʼérepa ñañatende vaʼerã ani hag̃ua jajapo mbaʼeve ostorvátava umi héntepe?

¹⁰ Koʼág̃arupi oĩ hetaiterei delinkuénte ha heta ogajára okyhyjepáma oimeraẽ extráñogui (2 Tim. 3:1-5). Upévare ñañatende vaʼerã ani hag̃ua umi hénte odeskonfia ñanderehe. Por ehémplo, ñamoĩ chupe ñag̃uahẽha peteĩ ógape ha jajepopete, péro avave nosẽi oñatende ñanderehe. Naiporãmoʼãi ningo ñamañáramo ventánape, térã jaike voi pe korapýpe. Katuete upéva ndogustamoʼãi pe ogajárape. ¿Ha mbaʼépa opensáta umi vesíno? Añetehápe ñande japredikase opavavépe (Hech. 10:42). Ñamog̃uahẽse pe marandu porã ñane vesinokuérape, ha upéva iporãiterei (Rom. 1:14, 15). Upéicharõ jepe, ñañehaʼãmbaite ani hag̃ua jajapo peteĩ mbaʼe ostorvátava umi héntepe ñande territóriope. Apóstol Pablo ohai: “Ni mbaʼevéicharõ ndorojapói mbaʼeve penemoñepysangátava, ani hag̃ua ojetopa mbaʼeve ivaíva ore servísiope” (2 Cor. 6:3). Jahechaukáramo jarrespetaha umi oikóvape ñande territóriope, ikatu hína ñamokyreʼỹ heta persónape oñeinteresa hag̃ua pe añeteguáre (elee 1 Pedro 2:12).

11. ¿Mbaʼérepa ñañeñandu porã oĩramo ohechakuaáva ñanerembiapoha?

¹¹ Ñande jaservíva Jehovápe heta ñanerembiapo. Upévare, ikatu hag̃uáicha ñakumpli ñane rresponsavilidakuéra, jahecha mbaʼépa iñimportanteve ha ñamohenda porã ñane tiémpo (Efes. 5:16; Filip. 1:10). Péro peichahágui oikóramo peteĩ mbaʼe nañahaʼarõiva ha ndaikatúi ñakumpli ñane rembiapo, katuete ñanemorrenega. Upéicha rupi ñañeñandu porã oĩ jave ohechakuaáva ñanerembiapoha ha ndajarekoguasuiha tiémpo ñañatende hag̃ua hese. ¿Mbaʼéichapa pe Rrégla de Óro ñanepytyvõ jarrespeta hag̃ua umi hénte hembiapóvape japredika jave?

12. ¿Mbaʼéichapa jaikuaáta mbaʼe moméntopepa opyta porãve javisita umi ogajárape?

¹² Jahecha vaʼerã mbaʼe moméntopepa opyta porãve javisita hag̃ua umi ogajárape ñande territóriope. ¿Mbaʼe órapepa umi hénte oĩve hogapekuéra? ¿Mbaʼe moméntopepa itiempove oñatende hag̃ua ñanderehe? Iporã vaʼerã ñañemotiémpo jaha hag̃ua javisita chupekuéra. Heta hendápe umi ermáno otopave ogajarakuérare kaʼaru pytũ. Oiméramo upéicha nde territóriope, ¿ikatúpa remohenda ne tiémpo ikatu hag̃uáicha resẽ repredika ogahárupi umi órape? (Elee 1 Corintios 10:24.) Jehová katuete ñanevendesíta ñañehaʼãramo ñag̃uahẽ umi hénte rendápe opyta porãve jave chupekuéra.

13. ¿Mbaʼéichapa ikatu avei jahechauka jarrespetaha umi ogajárape?

¹³ ¿Mbaʼéichapa ikatu avei jahechauka jarrespetaha umi ogajárape? Jajuhúramo peteĩ persóna oñatende porãva ñanderehe, ndahaʼéi upe haguérente jahasáma vaʼerã la rrája ha ñandeareterei upépe. Ikatu ningo haʼe omboykéma raʼe itiémpo ojapo hag̃ua peteĩ mbaʼe chupe g̃uarã iñimportánteva. Upévare, jaʼéramo chupe sapyʼaiténte ñañeʼẽtaha, ñakumpli vaʼerã jaʼe haguéicha (Mat. 5:37). Ha ñamohuʼãvo ñane predikasión, ikatu ñaporandu pe ogajárape arakaʼépa opyta porãta chupe jaju jey hag̃ua. Heta maranduhára omombeʼu osẽ porãha jepi heʼíramo: “¿Ikatu piko aju jey rovisita? ¿Ikatúpa rohenói térã agueruka ndéve peteĩ mensáhe aju mboyve?”. Ñañehaʼãramo ñamohenda ñane tiémpo javisita hag̃ua umi héntepe opyta porã jave chupekuéra, jasegi hína Pablo ehémplo. Haʼe heʼi vaʼekue: “Ndajapói umi mbaʼe chévente ideprovéchotava, ikatu hag̃uáicha ameʼẽ gústo entéro tapichápe opa mbaʼépe, ojesalva hag̃ua hikuái” (1 Cor. 10:33).

14-16. a) ¿Mbaʼérepa ñamombeʼu vaʼerã umi ogajárape maʼerãpa javisita chupekuéra? Emoĩ peteĩ ehémplo. b) ¿Mbaʼépa ojapo jepi peteĩ superintendénte opredika jave?

¹⁴ Epensamína peteĩ persóna nerenoiha por teléfono, péro nde ndereikuaái chupe. Upéi oñepyrũ oñeʼẽ tembiʼúre ha oporandu ndéve mbaʼeichaguápa ndegustave. Katuete reikuaaséta mávapa pe oñeʼẽva ha mbaʼépa oipota. Ikatu ningo nandearhelséi hendive ha upévare rehendu sapyʼami chupe, péro upéi rekortasétama chugui. Koʼág̃a epensami upe nerenóiva oñepyrũre heʼimaha ndéve mávapa haʼe. Avei omombeʼu ndéve ombaʼapoha peteĩ emprésa oipytyvõvape umi héntepe okaru porã hag̃ua ha orekoha informasión ideprovéchotava ndéve. Katuete ñahendusevéta upeichaguápe. Amo ipahápe, jaguerohory peteĩ persóna imbaʼerechakuaávape ha ñanderrespetáva oñeʼẽ jave ñanendive. ¿Mbaʼépa jajapo vaʼerã jatrata hag̃ua avei péicha ñande rapichakuérape japredika jave?

¹⁵ Heta lugárpe jaʼe raẽ vaʼerã umi ogajárape maʼerãpa jaha javisita chupekuéra. Ñande ningo jaha ñamombeʼu hag̃ua peteĩ mensáhe haʼekuéra ndoikuaáiva gueteri. Péro upéva ndeʼiséi natekotevẽveimaha ñañepresenta ni jaʼe maʼerãpa jaha. Ñamoĩ chupe ñag̃uahẽre peteĩ ógape jaʼemaha pe ogajárape: “Ikatúramo resolusiona umi provléma oĩva ko múndope, ¿mavaitévapa resolusionáta?”. Jaikuaaháicha, koʼãichagua porandu ñanepytyvõ jepi jaikuaa hag̃ua mbaʼépa opensa peteĩ persóna ha avei ñañepyrũ hag̃ua ñañeʼẽ la Bíbliare. Péro pe ogajára ikatu oñeporandu: “¿Mbaʼe apoha piko kóva? ¿Mbaʼérepa oiméne oporandu chéve upéva? ¿Mbaʼe piko la oipotáva?”. Ñañatende vaʼerã ikatu hag̃uáicha pe ogajára oĩ trankílo ñañemongeta jave hendive (Filip. 2:3, 4). ¿Mbaʼéichapa ikatu jajapo upéva?

¹⁶ Peteĩ superintendénte omombeʼu mbaʼépa oipytyvõ jepi chupe predikasiónpe. Ñepyrũrã osaluda pe persónape ha oñepresenta, upéi omeʼẽ chupe pe tratádo Ndépa reñeporandúmava koʼã mbaʼe?, ha heʼi: “Romeʼẽ hína ko informasión opavave tapichápe. Pype oĩ seis porandu iñimportánteva la hénte oikuaaséva jepi”. Ko ermáno omombeʼu umi tapicha heta vése opytaha itrankilove oikuaávo maʼerãpa javisita chupekuéra, ha péicha ikatu ñañemongetamie hendivekuéra. Upe rire heʼi avei oporanduha: “¿Repensámavapa koʼã témare?”. Pe tapicha oiporavóramo peteĩ porandu, pe ermáno oavri pe tratádo ha ohechauka chupe mbaʼépa heʼi la Biblia. Peichaʼỹrõ katu haʼe voi oiporavo peteĩ porandu ha omyesakã ojopyʼỹre pe ogajárape. Añetehápe ningo heta hendáicha ikatu ñañepyrũ ñañemongeta ñande rapichakuéra ndive. Heta lugárpe, umi hénte og̃uahẽva peteĩ ógape ojepokuaa osaluda raẽ, oñemongetaʼimi ambue mbaʼére, ha upe rire ae omombeʼu maʼerãpa ou. Ñanemanduʼákena ñañemoĩ vaʼerãha ñande rapicha lugárpe ha ñañeʼẽ chupekuéra ñanerenduse hag̃uáicha.

17. Jahecha haguéicha ko artíkulope, ¿mbaʼéichapa jahechauka jasegiha pe Rrégla de Óro japredika jave?

¹⁷ Upéicharõ, ¿mbaʼéichapa jahechauka jasegiha pe Rrégla de Óro japredika jave? Jahecháma haguéicha, tekotevẽ jatrata káda únope ogustaháicha chupe. Avei jarrespeta vaʼerã pe óga ahéno. Ñañehaʼãmbaite japredika umi óra oĩve jave ogajarakuéra ha itiempove jave hikuái oñatende hag̃ua ñanderehe. Ha jaikuaa vaʼerã mbaʼéichapa umi hénte ojepokuaa oñemongeta upe lugárpe, ani hag̃ua opensa jajopy vaiha chupekuéra, térã odeskonfia ñanderehe.

18. ¿Mbaʼérepa jatrata vaʼerã ñande rapichakuérape ñande jaipotaháicha haʼekuéra ñandetrata?

¹⁸ Katuete ningo ñasẽ porãta jatratáramo ñande rapichakuérape ñande jaipotaháicha haʼekuéra ñandetrata. Ñanderory ha ñanembaʼerechakuaáramo, jahechauka mbaʼeichaitépa ñanepytyvõ la Biblia omboʼéva ha ñambotuicha ñande Ru yvagapeguápe (Mat. 5:16). Umi hénte ohendusevéta pe mensáhe ñande voi jarrespetáramo chupekuéra (1 Tim. 4:16). Ha oiméramo umi ñanerendúva oasepta pe marandu porã, térã nahániri, jaikuaa ñañehaʼãmbaiteha ñakumpli porã ñane rembiapo (2 Tim. 4:5). Jasegíkena apóstol Pablo ehémplo. Haʼe heʼi vaʼekue: “Ajapo opa mbaʼe umi marandu porã rehehápe, ikatu hag̃uáicha apredika che rapichakuérape” (1 Cor. 9:23). Upéicharõ, ñañehaʼãkena akóinte jasegi pe Rrégla de Óro japredika jave.