Oipuru mbovymi pan ha pira omongaru hag̃ua hetápe

Umi 12 apóstol vyʼápe ou Jesús rendápe opredika rire Galiléare, ha “omombeʼupaite chupe umi mbaʼe ojapóva ha mbaʼéichapa oporomboʼe hikuái”. Haʼekuéra ningo ikaneʼõiterei og̃uahẽvo, péro naitiémpoi ni okaru hag̃ua, pórke oĩ hetaiterei hénte ou ha ohóva. Upévare Jesús heʼi chupekuéra: “Jahána ndaiporihápe avave pepytuʼumi hag̃ua” (Marcos 6:30, 31).

Amalisia haʼekuéra noĩri mombyry Capernáumgui. Koʼág̃a ojupi hikuái peteĩ kanóape ha oho éste gotyo rrío Jordángui, peteĩ lugár ndaiporihápe avave, opytáva ojehasa rire Betsaida. Péro heta hénte ohecha haʼekuéra osẽ jave ha oĩ avei ohendúva moõ gotyopa ohóta hikuái. Upévare umi hénte odipara pe y kóstare ha oñemotenonde hesekuéra. Og̃uahẽvo pe kanóa, umi henteita ohaʼarõjoáma chupekuéra.

Jesús oguejývo pe kanóagui ha ohechávo umi héntepe, oiporiahuverekoiterei chupekuéra, haʼetégui hikuái umi ovecha ndorekóiva avave oñangarekóva hesekuéra. Upémarõ “oñepyrũ omboʼe chupekuéra heta mbaʼe” pe Rréinogui (Marcos 6:34). Avei “omonguera umi hasývape” (Lucas 9:11). Péro pyaʼeterei ohasa la óra ha Jesús disipulokuéra heʼi chupe: “Tárdema ha koʼárupi ndaipóri mbaʼeve, emondóna koʼã héntepe umi puévlore tojogua oimeraẽ mbaʼe hoʼu hag̃ua” (Mateo 14:15).

Haʼe katu heʼi: “Natekotevẽingo oho hikuái; pemeʼẽna peẽ chupekuéra hoʼu vaʼerã” (Mateo 14:16). Jesús oikuaáma mbaʼépa ojapóta, péro oprova hag̃ua Felípepe, oporandu chupe: “¿Moõgui piko jajoguáta pan hoʼu hag̃ua koʼã hénte?”. Felipe oiko ag̃ui Betsáidagui, upévare Jesús oporandu chupe. Péro ni ojoguáramo heta pan, ndaikatumoʼãi oñemongarupa umi héntepe, pórke oĩ amo 5.000 kuimbaʼérupi. Ha ikatu voi oĩ 10.000 persóna oñekontapárõ umi kuña ha mitãnguéra. Upéi Felipe heʼi: “Ni jajoguáramo pan doscientos denário repy ndohupytymoʼãi káda uno hoʼu hag̃ua michĩmi jepe” (upe tiémpope, oñegana un denário un día de traváhore) (Juan 6:5-7).

Oiméne Andrés ohechakuaa ndaikatuiha voínte ojejapo mbaʼeve, ha heʼi: “Koʼápe oĩ peteĩ mitãʼi orekóva cinco pan ha mokõi piraʼi. ¿Péro mbaʼéicha piko ikatúta ohupytypa enterovépe?” (Juan 6:9).

Pe Páskua áño 32-pegua ningo hiʼag̃uimbaitéma, ha pe kapiʼi vérde asýva ojahoʼi pe kámpo, pórke primavérama. Upévare Jesús omanda idisipulokuérape heʼi hag̃ua umi héntepe toñembyaty de a 50 ha de a 100, ha toguapy hikuái pe kapiʼipépe. Jesús ojagarra umi cinco pan ha mokõi pira, ha oñemboʼe Ñandejárape. Upe rire ombojaʼo umi pan ha umi pira, ha omeʼẽ umi disípulope orreparti hag̃ua umi héntepe. Oñeimoʼãʼỹramo jepe, enterovete hoʼu hyg̃uatãha meve.

Upéi Jesús heʼi idisipulokuérape: “Pembyaty umi hembýva ani hag̃ua oñehundipa rei” (Juan 6:12). Haʼekuéra ombyaty 12 kanásto renyhẽte.