Okaru peteĩ fariséo rógape

Jesús oĩ aja Judéape, peteĩ fariséo oinvita chupe okaru hag̃ua hógape (Lucas 11:37, 38). Umi fariséo ojepokuaa ojepohéi ikódo peve okaru mboyve, péro Jesús ndojapói upéva (Mateo 15:1, 2). Ñandejára Léi ningo ndeʼíri ivaiha upe kostúmbre, péro añetehápe Jehová ndojeruréi ojejapo hag̃ua upéva.

Umi fariséo oñesorprende ohechávo Jesús ndosegiriha ko kostúmbre, upévare Jesús heʼi chupekuéra: “Peẽ fariséo pemopotĩ pe kópa ha pláto ijapéguionte; pende pyʼapy katu henyhẽ taryrýi ha tekoañágui. ¡Ajépa pendevýro! Pe ijape apohare ojapo avei pe hyepy, ¿ajépa?” (Lucas 11:39, 40).

Añetehápe ningo ndaivaíri umi fariséo ojepohéi okaru mboyve. Haʼekuéra ha entéro umi ótro osegíva ko kostúmbre ojepohéi avei, péro osegi hovamokõi ha ikorasõ henyhẽ mbaʼe vaígui. Upévare Jesús heʼi chupekuéra: “Peipytyvõ jave oikotevẽvape, pejapo vaʼerã pende pyʼaite guive, upéicharõ penepotĩta opa mbaʼépe” (Lucas 11:41). Ñande avei ñaipytyvõ vaʼerã ñande rapichápe ñande pyʼaite guive, ndahaʼéi jajechaukaséguinte.

Péro umi fariséo ndojapói upéicha. Upévare Jesús heʼi chupekuéra: “Aichejáranga peẽ fariséo, peẽ ningo pemeʼẽ pe diésmo jervavuéna, rrúda ha entéro umi ótro plántagui. Péro pemboyke pe hustísia ha Ñandejára mborayhu. Tekotevẽ añete pemeʼẽ diésmo, péro ndahaʼéi upe haguére pemboyke vaʼerã koʼã mbaʼe” (Lucas 11:42). Ñandejára Léi ningo heʼi omeʼẽ vaʼerãha hikuái diésmo umi mbaʼe oñotỹvagui (Deuteronomio 14:22). Ha umíva apytépe oĩ pe jervavuéna ha rrúda, ojepurúva kondimentorã. Umi fariséo omeʼẽ diésmo umi plánta michĩvévagui jepe, péro omboyke pe hustísia ha naiñumíldei hikuái (Miqueas 6:8).

Jesús heʼi avei chupekuéra: “Aichejáranga peẽ fariséo, peẽ ningo peguapyseterei tenondete umi sinagógape ha peipota enterove pendesaluda umi plasahárupi. Aichejáranga peẽ, haʼete umi sepultúra ndaikatúiva ojehecha, ha umi hénte ohasajoa hiʼári oikuaaʼỹre” (Lucas 11:43, 44). Añetehápe oimeraẽ persóna ikatu opyta ikyʼa Ñandejára renondépe ohasáramo koʼãichagua sepultúra ári. Upévare Jesús okompara umi fariséope umívare, pórke haʼekuéra okumpli guaʼu pe Léi, péro añetehápe hovamokõi hína (Mateo 23:27).

Peteĩ kuimbaʼe oikuaa porãva pe Léi osẽ heʼi chupe: “Mboʼehára, erévo koʼã mbaʼe ningo rekopi avei orerehe”. Péro ko kuimbaʼe oñemeʼẽ vaʼerã avei enkuénta haʼekuéra noipytyvõiha umi héntepe. Upévare Jesús heʼi: “Aichejáranga avei peẽ peikuaa porãva pe Léi, pemoĩ rupi pende rapicha ári kárga ijetuʼúva ojegueraha hag̃ua, péro peẽ ni peteĩ pene kuã napembojái umi kárga rehe. Aichejáranga peẽ pemopuʼãva umi profetakuéra panteón, péro umi pende rukuéra ypykue voi ojuka vaʼekue chupekuéra” (Lucas 11:45-47).

Umi kárga Jesús heʼíva ningo haʼe umi kostúmbre hudía ha avei umi rrégla omoĩva umi fariséo, péro noĩriva Ñandejára Léipe. Koʼã líder rrelihióso ndojapói mbaʼeve ombovevyive hag̃ua umi héntepe umi kárga, síno ojopy hendivekuéra osegi hag̃ua umi kostúmbre. Avei haʼekuéra omombaʼe guaʼu umi proféta yma guarépe ha ojapouka panteón ojegueromanduʼa hag̃ua chupekuéra. Hiʼarive, Abel tiémpo guive, iñantepasadokuéra voi ojuka vaʼekue koʼã profétape. Koʼág̃a katu koʼã líder rrelihióso osegi ituvakuéra ypykue ehémplo ha iñaña avei haʼekuéraicha. Ojukase voi hikuái pe Proféta iñimportantevévape Jehová omboúva. Upévare Jesús heʼi haʼekuéra ojechataha Jehovándi umi mbaʼe ojapóvare. Ha upéva oñekumpli 38 áñorupi upe rire, áño 70-pe.

Jesús heʼi avei: “Aichejáranga peẽ peikuaa porãva pe Léi, peẽ peipeʼa pe lláve oavríva pe okẽ ojekuaa hag̃ua Ñandejárape. Peẽ voi ndapeikéi, ha umi oikeséva katu ndaikatúi oike pendehegui” (Lucas 11:52). Koʼã kuimbaʼe omboʼe rangue Ñandejára Ñeʼẽ umi héntepe, oipeʼa chuguikuéra pe oportunida oñemoag̃ui hag̃ua hese.

Umi fariséo ha umi mboʼehára leipegua ipochyeterei Jesúsre. Upévare, osẽvo pe ógagui oñemoĩ oporandu chupe hikuái heta mbaʼe ojoapykueripa. Ndahaʼéi oaprendeségui Jesús omboʼéva, síno otopaségui álgo heʼi hag̃ua ikóntrape, ikatu hag̃uáicha oñemoinge chupe kárselpe.