Ojevyʼa peteĩ pekadór oñarrepentíramo

Jesús heta vésema omboʼe iñimportanteha ñaneumílde (Lucas 14:8-11). Haʼe oheka umi hekomirĩva ha oserviséva Ñandejárape, oiméramo jepe ojapo raʼe hikuái heta mbaʼe vai ha tekotevẽ gueteri okambia.

Umi mboʼehára leipegua ha fariséo katu ndochaʼéi koʼãichagua héntere. Upévare oñeʼẽ vai Jesúsre ohechávo koʼã hénte oñembojaha hendápe. Haʼekuéra heʼi: “Ko kuimbaʼe ningo orresivi torypápe umi pekadórpe ha okaru hendivekuéra” (Lucas 15:2). Umi fariséo ha mboʼehára leipegua opensa haʼekuéra iñimportanteveha, ha umi hénte katu haʼeteha pe yvytimbo haʼekuéra opyrũva. Heʼi voi hesekuéra haʼeha hénte tavy atýra, ha péicha ohechauka mbaʼechaitépa oapoʼi chupekuéra.

Jesús katu otrata porã, oiporiahuvereko ha orrespeta enterovépe. Upévare heta persóna ojedespresiáva ohenduse chupe, ha umíva apytépe oĩ mimi avei la hembiapo vaíva. Péro, ¿mbaʼépa ojapo Jesús oĩramo jepe okritikáva chupe oipytyvõségui umi pekadórpe?

Jesús omombeʼu chupekuéra peteĩ ehémplo ojoguáva pe omombeʼu vaʼekuépe Capernáumpe (Mateo 18:12-14). Haʼe oikuaa umi fariséo opensaha haʼekuéra hekojojaha ha oĩ porãha Ñandejára renondépe. Avei opensa hikuái umi ótro hénte osẽmaha pe tape porãgui ha naipohãveimaha. Upémarõ Jesús oipuru upéva ifavórpe ha omoĩ peteĩ ehémplo.

Haʼe heʼi: “¿Mávapa pende apytégui orekóva cien ovecha, ha okañýramo chugui peteĩ ndohejamoʼãi umi noventa y nueve pe desiértore ha oho oheka pe okañy vaʼekue otopa peve? Ha upéi otopa jeývo ovyʼaiterei ha ohupi ijatiʼy ári, ha og̃uahẽvo hógape, ohenói iñamígo ha ivesinokuérape ha heʼi: ‘Pevyʼákena chendive, atopa jey haguére ko che ovechami okañy vaʼekue’” (Lucas 15:4-6).

Upéi omyesakã upe ehémplo heʼívo: “Che haʼe peẽme, yvágape ojevyʼave peteĩ pekadór oñarrepentíramo, ojevyʼa rangue noventa y nueve hekojojávare natekotevẽiva oñarrepenti” (Lucas 15:7).

Umi fariséo oiméne orrenega ohendúvo Jesús oñeʼẽha umi oñarrepentívare. Haʼekuéra oimoʼã hekojojaha ha natekotevẽiha oñarrepenti. Dos áño upe mboyve umi fariséo okopi kuri Jesúsre okaru haguére umi impuésto kovraha ha pekadór ndive. Upérõ haʼe heʼi chupekuéra: “Che ndajúi ahenói hag̃ua umi hekojojávape, síno umi mbaʼe vai apohápe” (Marcos 2:15-17). Umi fariséo oñemosánto guaʼu ha opensa voi natekotevẽiha oñarrepenti. Upévare avave ndovyʼái hesevekuéra yvágape. Péro oĩramo peteĩ pekadór oñarrepentíva katu ojevyʼaiterei.

Jesús omombeʼu jey ótro ehémplo ohechauka porãve hag̃ua ojevyʼaha yvágape oĩrõ peteĩ pekadór oñarrepentíva. Haʼe heʼi: “Peteĩ kuña oguerekóva diez monéda de pláta, okañýramo chugui peteĩ, ¿nomyendymoʼãipa ilámpara, oitypei hóga ha oheka porã otopa jey peve? Otopa jey vove katu ohenói iñamíga ha ivesinakuérape ha heʼi: ‘Pevyʼákena chendive, atopa jey haguére ko che monéda de pláta okañy vaʼekue’” (Lucas 15:8, 9).

Jesús oipuru koʼã mokõi ehémplo omboʼe hag̃ua peteĩ mbaʼe iñimportánteva. Haʼe heʼi: “Che haʼe peẽme, péicha avei Ñandejára anhelkuéra ovyʼa peteĩ pekadór oñarrepentíramo” (Lucas 15:10).

Umi ánhel ningo ovyʼaiterei umi pekadór oñarrepentíramo. Ha koʼytevéntema ovyʼa hikuái pe persóna upéi ohótaramo yvágape ogoverna Ñandejára Rréinope. Hiʼarive orekóta hína peteĩ puésto ijyvatevéva umi ánhelgui (1 Corintios 6:2, 3). Péro umi ánhel ndaipochýi upe haguére, síno ovyʼa heseve. Upéicharõ, ¿mbaʼéichapa ñañeñandu vaʼerã oĩrõ peteĩ pekadór oñembyasýva ipyʼaite guive ha oñemoag̃ui jeýva Ñandejárare?