“Che Rréino ndahaʼéi ko mundopegua”

1, 2. a) ¿Mbaʼéichapa oĩ ko múndo? b) ¿Mbaʼe porandúpa ñambohováita ko artíkulope?

PETEĨ ermána oikóva sur de Európape imanduʼávo mbaʼéicha vaʼekuépa haʼe ymave, heʼi: “Chemitãkuñaʼi guive tódo el tiémpo ahecha vaʼekue inhustísia. Upévare arrechasa kuri pe polítika che paispegua ha aapoja umi idéa hetápe g̃uarã naiporãietéva. Heta áñore areko vaʼekue peteĩ che chíko haʼéva terrorísta”. Peteĩ ermáno oikóva sur de Áfricape omombeʼu mbaʼérepa opensa vaʼekue pe violénsia iporãha. Haʼe heʼi: “Che aimoʼã kuri che trívu iñimportanteveha enterove umi ótrogui, ha añeuni peteĩ partído polítikope. Upépe oremboʼe hikuái rojuka hag̃ua lánsape umi ótro partidoguápe, tahaʼe jepe raʼe ore trivugua”. Peteĩ ermána oikóva Europa sentrálpe katu heʼi: “Chedespresiativaiterei vaʼekue, ha ndachaʼéi umi ótro paisgua térã ótra rrelihionguáre”.

² Koʼág̃arupi hetave hénte opensa koʼã mbohapy persóna opensa haguéicha. Por ehémplo, heta grúpo polítiko oñepyrũ iviolénto ikatu hag̃uáicha oñeindependisa ipaís. Avei heta hetave oĩ oñorairõva pe polítika káusare. Ha heta paíspe katu ojeapoʼi umi extranhérope. Añetehápe, koʼã ára pahápe oñekumpli la Biblia heʼíva umi héntere: “Oñemohatãta heʼívape” (2 Tim. 3:1, 3). ¿Mbaʼépa kristianokuéra ojapo vaʼerã oĩ hag̃ua unído, jepe ko múndo ojedividipa? Jesús ehémplo ñanemboʼe heta mbaʼe. Upe tiémpope umi hénte oiko vaipa vaʼekue avei pe polítika káusare. Ko artíkulope ñarrespondéta koʼã mbohapy porandu: 1) ¿Mbaʼérepa Jesús noñentremetéi vaʼekue polítikare? 2) ¿Mbaʼéichapa haʼe ohechauka Ñandejára puévlo ndojeheʼái vaʼerãha polítikare? Ha 3) ¿mbaʼéichapa Jesús ñanemboʼe arakaʼeve ndovaleiha ñaneviolénto?

3, 4. a) ¿Mbaʼépa ohaʼarõ vaʼekue heta judío Jesús tiémpope? b) ¿Mbaʼéichapa umi judío opensa lája oafekta kuri Jesús disipulokuérape?

³ Jesús opredika vaʼekue hetápe, ha umíva apytépe oĩ heta judío ojeisetereíva Roma poguýgui. Umi selóte haʼe vaʼekue peteĩ grúpo polítiko judío ifanátikova. Koʼãva omboliga meme umi héntepe opensa hag̃ua avei iporãvetaha ojeíramo hikuái upe tetã poguýgui. Heta selóte oapoja kuri peteĩ kuimbaʼe oñehenóivape Judas el Galileo. Ko kuimbaʼe oiko vaʼekue síglo primérope, ha haʼe kuri peteĩ fálso mesías ombotavýva heta héntepe. Pe istoriadór judío Josefo heʼi Judas omboliga hague umi judíope opuʼã hag̃ua Roma kóntrape. Ha heʼi umi judío opagávare impuésto ipyʼajuha. Upéi umi romano ojuka kuri Júdaspe (Hech. 5:37). Umi selóte apytépe oĩ vaʼekue ivioléntova ikatu hag̃uáicha okonsegi la oipotáva.

⁴ Heta judío oipotaitereíma kuri og̃uahẽ pe Mesías. Haʼekuéra ohaʼarõ peteĩ líder polítiko onohẽ vaʼerã chupekuéra Roma poguýgui ha ojapo jeýtava Israélgui peteĩ tetã iñimportánteva (Luc. 2:38; 3:15). Heta oĩ oimoʼãva pe Mesías omoñepyrũtaha peteĩ goviérno Israélpe. Péicha hetaiterei judío oikóva diferénte tetãrupi oupa jeýta hetãme. Peteĩ vuéltape Juan el Bautista jepe oporanduka vaʼekue Jesúspe: “¿Nde piko hína pe Ñandejára opromete vaʼekue omboutaha, térãpa oúta ótro kuimbaʼe?” (Mat. 11:2, 3). Oiméne haʼe oikuaase raʼe oĩtapa ótro omosãsótava umi judíope Roma poguýgui. Upéi, Jesús orresusita rire oñemongeta kuri mokõi disípulondi Emaús rapére. Haʼekuéra heʼi chupe pe Mesías ndojapói hague la ohaʼarõva hikuái (elee Lucas 24:21). Upe riremi, umi apóstol oporandu Jesúspe: “Ore Ruvicha, ¿remoĩ jeýtapa ko tiémpope, pe Rréino Israélpe?” (Hech. 1:6).

 5. a) ¿Mbaʼérepa umi galileo oipotaiterei vaʼekue Jesúspe irreikuerarã? b) ¿Mbaʼéichapa Jesús okorrehi chupekuéra?

⁵ Umi judío oipota kuri pe Mesías osolusiona iprovlemakuéra. Upévare umi hénte Galileagua oipotáne raʼe Jesúspe irreikuerarã. Oiméne opensa hikuái ndaiporimoʼãiha ótro líder haʼéicha ikatupyrýva. ¿Mbaʼérepa? Pórke haʼe iñeʼẽkuaaiterei, omonguera umi hasývape, ha hiʼarive omongaru umi iñembyahýivape. Umi hénte ningo oñemaravilla Jesús omongarúrõ guare 5.000 kuimbaʼépe. Péro haʼe oikuaa la ojaposéva hikuái. La Biblia heʼi: “Jesús katu oikuaágui outaha hikuái mbaretépe omoĩ chupe rréiramo, oho jey pe sérrope haʼeño” (Juan 6:10-15). Al ótro día umi hénte oñekalmamiéma, ha Jesús oexplika chupekuéra ndoúi hague omeʼẽ hag̃ua umi héntepe hemikotevẽ, síno omboʼe hag̃ua chupekuéra heta mbaʼe porã Ñandejára Rréinogui. Jesús heʼi chupekuéra: “Ani pembaʼapo tembiʼu oñehundi vaʼerãre, pembaʼapo guei pe tembiʼu oñehundiʼỹvare ha omeʼẽva jeikove opaveʼỹva” (Juan 6:25-27).

 6. ¿Mbaʼéichapa Jesús ohechauka nointeresái hague chupe peteĩ puésto polítiko ko yvy ape ári? (Ehecha pe taʼanga oĩva iñepyrũme).

⁶ Jesús omano mboyvemi oñemeʼẽ enkuénta isegidorkuéra opensaha oikotaha chugui rréi ogoverna hag̃ua Jerusalénpe. Péro Jesús omombeʼu chupekuéra pe ehémplo oñeʼẽva peteĩ rréi raʼýre ikatu hag̃uáicha ontende hikuái ndoikomoʼãiha upéva. Pe ehémplope pe kuimbaʼe orrepresenta hína Jesúspe, ha heʼi ohotaha mombyry ha ou jeytaha heta tiémpo haguépe (Luc. 19:11-13, 15). Ótra vuéltape Jesús omyesakã porã vaʼekue avei umi autorida Romaguápe noñentremetemoʼãiha polítikare. Por ehémplo, Poncio Pilato oporandu vaʼekue chupe: “¿Nde piko hína judiokuéra Rréi?” (Juan 18:33). Oime vaʼerã Pilato okyhyje Jesús omoñepyrũrõ g̃uarã peteĩ rrevolusión Roma kóntrape. Péro Jesús ombohovái chupe: “Che Rréino ndahaʼéi ko mundopegua” (Juan 18:36). Jesús ndojeheʼái kuri polítikare pórke Irréino oĩta yvágape. Haʼe heʼi ou hague ko múndope oikuaauka hag̃ua pe añetegua (elee Juan 18:37).

 7. ¿Mbaʼérepa jaʼekuaa sapyʼánte ijetuʼuha ndajaapojái ni michĩmi peteĩ grúpo polítikope?

⁷ Jesús ontende porã vaʼekue mbaʼépa la iñasignasión. Ñande avei ñantende porãrõ mbaʼépa la ñane asignasión, ndajaapojamoʼãi mbaʼeveichagua partído polítiko, ni ndajajapomoʼãi upéva ñande pyʼapýpe jepe. Sapyʼánte ningo koʼã mbaʼe ijetuʼu hína. Peteĩ superintendénte de sirkuíto omombeʼu mbaʼeichaitépa ifanátiko umi hénte oikóva haʼe oserviha gotyo. Heʼi umi persóna omombaʼetereiha hetã, ha opensa haʼekuérante ogoverna vaʼerãha ihentekuérape ikatu hag̃uáicha oho porãve chupekuéra. Pe superintendénte heʼi avei: “Péro umi ermáno nopensái upéicha. Upéva rangue oñekonsentra opredika hag̃ua umi marandu porã oñeʼẽva pe Rréinore, ha péicha osegi iñunído hikuái. Umi ermáno ojerovia Ñandejára oguerutaha hustísia ha osolusionataha opaichagua provléma”.

 8. ¿Mbaʼe inhustísiapa ohasa vaʼekue umi judío Jesús tiémpope?

⁸ Umi hénte iñakãrakuve pe polítikare ohecha jave oikoha heta inhustísia. Jesús tiémpope, umi impuésto okovráva umi autorida omomýi vaʼekue umi héntepe oñentremete hag̃ua polítikare. Por ehémplo, Judas el Galileo ou vaʼekue opuʼã pe goviérno románore, pórke haʼekuéra osensa umi héntepe ani hag̃ua avave opyta opagaʼỹre chupekuéra impuésto. Pe puévlo opaga vaʼerã heta impuésto, por ehémplo ijyvýre, hógare ha ambue mbaʼe orekóvare. Hiʼarive umi impuésto kovraha ikorruptoiterei vaʼekue, ha upéva koʼýte oempeorave la situasión. Umi impuésto kovraha sapyʼánte opaga umi autoridápe omeʼẽ hag̃ua chupekuéra algún puésto. Upéi haʼekuéra oipuru ijautorida omyenyhẽ hag̃ua ivolsíllo. Por ehémplo, Zaqueo haʼe vaʼekue pe prinsipál impuésto kovraha oĩva Jericópe. Haʼe ou kuri irríko ojeaprovecha rupi umi héntere (Luc. 19:2, 8). Katuete ningo ndahaʼeichéne haʼénte la ojapóva koʼã mbaʼe.

9, 10. a) ¿Mbaʼépa ojapo Jesús enemigokuéra oipotágui haʼe oopina pe polítikare? b) ¿Mbaʼépa ñaaprende Jesús orresponde lájagui chupekuéra? (Ehecha pe taʼanga oĩva iñepyrũme).

⁹ Jesús enemigokuéra oipota kuri haʼe oopina pe impuésto jepagáre. Haʼekuéra oporandu chupe mbaʼépa opensa “pe impuésto Césarpe” ojepagávare. Upéva hína 1 denário opagáva káda judío (elee Mateo 22:16-18). Umi judío ndopagaseieterei vaʼekue pe impuésto pórke omomanduʼa chupekuéra oĩha pe goviérno romano poguýpe. “Herodes segidorkuéra”, haʼéva umi oapojáva pe partído polítiko osegíva Herodes, omoñuhãse Jesúspe. Haʼekuéra oipota Jesús heʼi ndojepagái vaʼerãha pe impuésto, péicha ojeakusáta chupe opuʼãseha pe goviérno románore. Péro Jesús heʼíramo ojepaga vaʼerãha, umi hénte ikatu ohejapa rei chupe. ¿Mbaʼépa ojapo kuri Jesús?

¹⁰ Haʼe oñatende ani hag̃ua ofavorese ni peteĩvape. Jesús heʼi: “Pemeʼẽ Césarpe imbaʼéva, péro pemeʼẽ Ñandejárape imbaʼéva” (Mat. 22:21). Jesús oikuaa heta impuésto kovraha ikorruptoha, péro noñekonsentrái upévare. Síno opensa Ñandejára Rréino añoite la añetehápe osolusionátava yvyporakuéra provléma. Jahechaháicha, Jesús omoĩ peteĩ ehémplo iporãitereíva ñandéve g̃uarã. Ñande avei nañañentremetéi vaʼerã umi téma polítikore, haʼetéramo jepe umi mbaʼe ojejaposéva oĩ porã ha ihustoha. Kristianokuéra oñekonsentra vaʼerã Ñandejára heʼívare oĩ porãha ha Irréinore. Upévare ndajaikói vaʼerã jataky umi inhustísia oikóvare pe polítika káusare, ni ndajaikói vaʼerã ñañeʼẽ vai umívare (Mat. 6:33).

11. ¿Mbaʼéichapa ikatu ñambohovái umi inhustísia?

¹¹ Heta testígo de Jehová okambia umi mbaʼe opensáva pe polítikare. Por ehémplo, peteĩ ermána Gran Bretañagua oikuaa mboyve pe añetegua, ostudia kuri universidápe Sociología. Upéva omomýi chupe oñemohatã hag̃ua la opensávape pe polítikare. Haʼe heʼi: “Heta inhustísia rohasa kuri, upévare adefende pe derécho orekóva umi persóna ipire hũva. Haimete tódo el tiémpo agana la haʼévape, péro lomímonte nañeñanduporãi. Ndahechakuaái kuri pe rrasísmo ojehapoʼo vaʼerãha umi hénte korasõgui. Añepyrũrõ guare astudia la Biblia, añemeʼẽ enkuénta che raẽ añepyrũ vaʼerãha aipeʼa upe sentimiénto che korasõgui”. Peteĩ ermána ipire morotĩva oipytyvõ kuri ko ermánape okambia hag̃ua umi mbaʼe orekóva ipyʼapýpe. Okambia rire la ilája, ko ermána heʼi: “Koʼág̃a aservi de prekursóra rregulár peteĩ kongregasión de lenguáhe de séñape, ha añehaʼã aipytyvõ opaichagua persónape”.

12. ¿Mbaʼeichagua levadúraguipa ojekuida vaʼerã Jesús disipulokuéra?

¹² Jesús tiémpope umi líder rrelihióso oapoja vaʼekue umi grúpo polítikope. Por ehémplo, pe lívro hérava La vida cotidiana en Palestina en tiempo de Jesús heʼi umi grúpo rrelihióso oĩva umi judío apytépe, ojedividi hague a según la opensáva hikuái pe polítikare. Upévare Jesús oavisa porã vaʼekue idisipulokuérape: “Pejesareko meméke ha peñeñangareko umi fariséo ha Herodes levadúragui” (Mar. 8:15). Jesús omensionávo Heródespe posívlemente ojerreferi Herodes segidorkuérare. Umi fariséo haʼe vaʼekue avei ótro grúpo. Koʼãva oipota umi judío oñeindependisa Rómagui. Según pe lívro de Mateo, Jesús oavisa isegidorkuérape ojekuida hag̃ua avei umi saduséogui. Koʼãva oipota Roma osegi ogoverna umi judíope, pórke pe goviérno opermiti chupekuéra oreko puésto polítiko iñimportánteva. Jesús heʼi idisipulokuérape ojekuida hag̃ua pe “levadúragui”, térã umi enseñánsa oúva koʼã mbohapy grúpogui (Mat. 16:6, 12). Haʼe heʼi kuri koʼã mbaʼe idisipulokuérape umi hénte omoĩse riremi chupe rréiramo.

13, 14. a) ¿Mbaʼépa oiko pe rrelihión ojeheʼa jave polítikare? b) ¿Mbaʼérepa núnka naiporãi pe violénsia oikóramo jepe peteĩ inhustísia? (Ehecha pe taʼanga oĩva iñepyrũme).

¹³ Umi rrelihión oñentremete jave polítikare katuete oĩ violénsia. Jesús omboʼe idisipulokuérape ani hag̃ua ojeheʼa koʼã mbaʼére. Péro upéva ndogustái umi saserdóte prinsipál ha fariseokuérape, upéicha rupi ojukase Jesúspe. Haʼekuéra ningo okyhyje umi hénte ojapórõ g̃uarã la Jesús heʼíva, ha upéva oikóramo ndorekomoʼãvéima chupekuéra ipoguýpe. Péicha operdéta hikuái pe puésto rrelihióso ha polítiko orekóva. Haʼekuéra heʼi: “Jahejáramo osegi péicha enterove ojeroviáta hese ha umi rrománo oúta oipeʼa ñandehegui ñane témplo ha ñane retã” (Juan 11:48). Upémarõ Caifás, haʼéva pe saserdóte prinsipál oplanea ojuka Jesúspe (Juan 11:49-53; 18:14).

¹⁴ Caifás ohaʼarõ pytũ raẽ, ha upéi omondo umi soldádope oarresta hag̃ua Jesúspe. Péro Jesús oikuaáma haʼekuéra oplanea hague ojuka chupe. Upe pyharépe, ojapórõ guare pe última séna ijapostolkuérandi, heʼi chupekuéra oraha hag̃ua espáda. Mokõi espáda rupive Jesús omboʼéta idisipulokuérape peteĩ mbaʼe iñimportantetereíva (Luc. 22:36-38). Tardemie upe pyharépe, peteĩ hénte aty ou ogueraha hag̃ua Jesúspe. Péro Pedro ipochyeterei pe inhustísia ojejapóvare, ha oataka peteĩ kuimbaʼépe ijespádape (Juan 18:10). Jesús katu heʼi Pédrope: “Eñongatu jey nde espáda ilugárpe, cháke umi oipurúva guive pe espáda, ojejukáta espádape” (Mat. 26:52, 53). Péicha Jesús omboʼe idisipulokuérape peteĩ mbaʼe iñimportantetereíva: haʼekuéra ndojeheʼái vaʼerãha ko múndore. Voimie upe pyharépe, Jesús oñemboʼéma kuri ko mbaʼére (elee Juan 17:16). Añetehápe Ñandejára añoite oreko derécho ojapo hag̃ua hustísia.

15, 16. a) ¿Mbaʼéichapa Ñandejára Ñeʼẽ oipytyvõ kristianokuérape? b) ¿Mbaʼépa ohecha Jehová omaña jave yvyporakuérare?

¹⁵ Pe ermána Europa del surgua ñañeʼẽ hague anteve, oaprende avei ko leksión iñimportantetéva. Haʼe heʼi: “Ahechakuaa pe violénsia rupive ndaikatuiha ojejapo hustísia. Péro umi ojapóva upéva pyʼỹinte omano térã opyta oñamarga. Che aaprende la Biblia rupive Ñandejára añoite ikatuha ogueru pe hustísia teete ko yvy ape ári, ha upéva chembovyʼaiterei. Ojapóma 25 áño aguerahaha aikóvo ko mensáhe umi héntepe”. Pe ermáno oikóva sur de Áfricape katu oheja la ilánsa, ha koʼág̃a oipuru “pe espáda omeʼẽva pe espíritu sánto”, térã Ñandejára Ñeʼẽ (Efes. 6:17). Koʼág̃a haʼe opredika pe mensáhe oñeʼẽva pyʼaguapýre opaichagua héntepe, tahaʼe jepe raʼe umi ndahaʼéiva itrivupegua. Pe ermána Europa sentralgua koʼág̃a haʼe testígo de Jehová, ha omenda peteĩ ermáno opertenesévare peteĩ grúpo de hénte idiferéntevape chugui. Anteve haʼe ndaijaʼéi vaʼekue peichagua grúpore. Koʼã mbohapy persóna okambia pórke ojoguase Crístope.

¹⁶ Iñimportanteterei avei ñande ñakambia koʼã mbaʼépe. La Biblia okompara yvyporakuérape pe mar pochýre, núnka noĩriva trankílo (Is. 17:12; 57:20, 21; Apoc. 13:1). Pe polítika káusare umi hénte ojedividipa, oiko vaipa ha iviolénto. Péro ñande katu jaiko pyʼaguapýpe ha peteĩ ñeʼẽme. Jehová ohecha mbaʼeichaitépa umi hénte oiko vaipa, péro oime vaʼerã ovyʼaite ohecha jave ipuévlo oĩha unído (elee Sofonías 3:17).

17. a) ¿Mbaʼépa ikatu jajapo ñaneunído hag̃ua? b) ¿Mbaʼépa jahecháta pe artíkulo oúvape?

¹⁷ Ko artíkulope jahecha kuri mbohapy mbaʼe ikatúva jajapo ñaneunído hag̃ua: 1) jajerovia Ñandejára Rréino osolusionataha umi inhustísia, 2) nañañentremetéi polítikape, ha 3) ñamboyke pe violénsia. Péro oĩ peteĩ mbaʼe ikatúva ombyai pe unida jarekóva: pe desprésio. Pe artíkulo oúvape ñaaprendéta mbaʼépa ikatu jajapo ani hag̃ua jaju ñamboyke avavépe, ha jahecháta mbaʼépa oipytyvõ vaʼekue umi kristiáno síglo primeroguápe.