Jesús heʼi haʼeha Ñandejára Raʼy

Umi hudío otaky Jesúsre omonguera haguére peteĩ hasývape peteĩ sábado. Upévare Jesús heʼi chupekuéra: “Che Ru ombaʼapo koʼág̃a peve ha che avei ambaʼapo gueteri hína” (Juan 5:17).

Añetehápe, Jesús ojapóva sabadokue ndojeproivíri pe Léipe. Ñandejára voi omanda chupe opredika ha omonguera hag̃ua umi héntepe, ha upévare haʼe osegi ojapo koʼã mbaʼe káda día. Péro umi hudío ohendúvo Jesús heʼíva, koʼýte orrenegave ha oñehaʼã ojuka chupe. Jahechamína mbaʼérepa la ipochyete hikuái.

Umi líder rrelihióso opensa Jesús ndorrespetaiha Ñandejára Léi oporomonguerávo sabadokue. Ha ipochy voi pórke Jesús heʼi ijehe haʼeha Ñandejára Raʼy. Haʼekuéra opensa Jesús oñembotuichaitereimaha heʼívo upéva. Upéicha rupi oakusa chupe hikuái opekaha Ñandejára kóntrape. Upéicharamo jepe, Jesús ndokyhyjéi ha osegi omombeʼu mbaʼéichapa haʼe ha Itúva oñoamigoite. Haʼe heʼi: “Pe Túva ohayhu Itaʼýrape ha ohechauka chupe opa mbaʼe ojapóva” (Juan 5:20).

Jehová omeʼẽ vída enterove yvypórape, ha omeʼẽ vaʼekue avei podér umi profétape orresusita hag̃ua umi omanóvape. Upévare Jesús heʼi umi líder rrelihiósope: “Pe Túva omopuʼãháicha umi omanóvape ha omoingove chupekuéra, upéicha avei pe Taʼýra omoingove umi haʼe omoingovesévape” (Juan 5:21). Jesús heʼívo péicha ohechauka oĩha esperánsa umi omanóvape g̃uarã. Añetehápe ningo heta hénte haʼete omanóva, pórke noĩporãi Ñandejára renondépe, péro pe predikasión rupive haʼete Jesús omoingove jeýva chupekuéra. Upévare Jesús heʼi: “Upe ohendúva che ñeʼẽ ha ogueroviáva pe chembou vaʼekuépe, ohupyty jeikove opaveʼỹva, ha ndojehusgái chupe. Upéva rangue haʼete oñemoingove jeýva chupe omanóva apytégui” (Juan 5:24).

Jesús heʼírõ guare koʼã mbaʼe, neʼĩra gueteri omoingove jey ni peteĩ omanóvape, péro péicha ohechaukáma umi otakývape hese oĩtaha rresurreksión. Haʼe heʼi: “Ani pehecharamo ko mbaʼe, og̃uahẽtagui pe óra opavave umi oĩva pe sepultúrape ohendutaha iñeʼẽ ha osẽta” (Juan 5:28, 29).

Jehová ningo omeʼẽ Jesúspe tuichaiterei rresponsavilida ikatu hag̃uáicha oñekumpli ivolunta. Upéicharõ jepe, haʼe orrekonose odependeha Itúvare ojapo hag̃ua opa mbaʼe, ha heʼi: “Che ndaikatúi ajapo ni peteĩ mbaʼe chejehegui reínte. [...] Ajapo guei pe Túva chembou vaʼekue rembipota” (Juan 5:30). Jesús nomombeʼúiva gueteri en púvliko haʼe ojapóva iñimportantetereiha oñekumpli hag̃ua Ñandejára rembipota. Péro ndahaʼéi Jesús añónte la oñeʼẽva koʼã mbaʼére. Upévare haʼe heʼi umi oñemoĩvape hese: “Peẽ pemondo kuimbaʼe Juan [el Bautista] rendápe ha haʼe oñeʼẽ vaʼekue pe añeteguáre” (Juan 5:33).

Ojapo dos áño Juan el Bautista omombeʼu hague umi líder rrelihiósope oĩtaha peteĩ kuimbaʼe oútava haʼe rire. Juan ohenói pe kuimbaʼépe “Proféta” ha “Cristo” (Juan 1:20-25). Koʼág̃a Jesús omomanduʼa chupekuéra mbaʼéichapa ymave omombaʼe hikuái Juánpe, koʼág̃a oĩva hína kárselpe. Haʼe heʼi: “Peẽ pevyʼa vaʼekue sapyʼami haʼe ohesapehápe” (Juan 5:35). Péro koʼág̃a Jesús ohechauka siertoha Juan el Bautista heʼi vaʼekue hese.

Jesús heʼi: “Che ajapóvo umi tembiapo che Ru omeʼẽ vaʼekue chéve, ahechauka porãve Haʼe chembou hague”. Upéi heʼi avei: “Pe Túva chembou vaʼekue voi heʼi che haʼeha Itaʼýra” (Juan 5:36, 37). Ha upéva siertoite, pórke haʼe ojevautisárõ guare, yvágagui oñehendu Ñandejára heʼívo oguerohoryha chupe (Mateo 3:17).

Añetehápe umi oakusáva Jesúspe ndorekói mbaʼeve heʼi vaʼerã ikóntrape. Haʼekuéra ningo heʼi ohesaʼỹijoha Ñandejára Ñeʼẽ, péro upépe voi umi profesía ohechauka Jesús haʼeha pe Cristo. Upévare Jesús heʼi chupekuéra: “Pegueroviárire Moiséspe, pejerovia vaʼerãmoʼã avei cherehe, haʼe oñeʼẽgui cherehe umi kuatiañeʼẽ ohai vaʼekuépe. Péro ndapegueroviáiramo haʼe ohai vaʼekue, ¿mbaʼéicha pegueroviáta che haʼéva?” (Juan 5:46, 47).