LEKSIÓN 37
¿Mbaʼépa heʼi la Biblia pe traváho ha plátare?
¿Ndévepa sapyʼánte ndepyʼapy nde traváho, térã nderehupytýirõ g̃uarã ne remikotevẽ? Heta vése ikatu ijetuʼu ñandéve jakuvri hag̃ua ñane nesesida káda diagua, ha avei jaadora hag̃ua Jehovápe haʼe omereseháicha. Péro la Bíbliape jatopa umi konsého iporãitereíva ñanepytyvõtava upearã.
1. ¿Mbaʼépa heʼi la Biblia pe traváhore?
Ñandejára oipota jadisfruta pe traváho otokávagui ñandéve jajapo. Eclesiastés 2:24 heʼi voi ikatuha “javyʼa ñambaʼapo pohýivo” ha “ndaiporiha ótra kósa iporãvéva” upévagui. Jehová siémpre ombaʼapo jejopy. Ñande jasegíramo iñehémplo, haʼe ovyʼáta ha ñande voi ñañeñandu porãta.
Pe traváho ningo iñimportánte, péro núnka nañapermitíri vaʼerã hoʼupa ñandehegui ñane tiémpo ha upéva káusare ndaikatuvéi jaadora Jehovápe (Juan 6:27). Haʼe opromete ñandéve ñamotenondéramo chupe omeʼẽtaha ñandéve opa mbaʼe ñaikotevẽva.
2. ¿Mbaʼépa ñapensa vaʼerã pe plátare?
La Biblia ohechauka pe pláta ikatuha ñandeprotehe, péro heʼi avei pe pláta añónte ndaikatuiha ñanembovyʼa (Eclesiastés 7:12). Upévare ñanemokyreʼỹ ani hag̃ua ñandeplatarayhu ha ‘javyʼa hag̃ua umi mbaʼe jarekóvare’ (elee Hebreos 13:5). Péicha nañapensamoʼãi ofaltapataha ñandéve la kósa, ha ndajaikomoʼãi jadevepa rei (Proverbios 22:7). Avei nañanembotavymoʼãi umi heʼíva ikatuha ñanderríko ñambaʼapoʼỹre térã umi huégo rupive.
3. ¿Mbaʼéichapa ikatu ñandepojera jaipurúvo ñande pláta?
Jehová siémpre ipojeraiterei. Ha jasegi hag̃ua iñehémplo tekotevẽ ñande avei ‘ñandepojera, ha ñanekyreʼỹ ñakomparti hag̃ua ótrondi umi mbaʼe jarekóva’ (1 Timoteo 6:18). Por ehémplo, ikatu jaipuru ñande pláta ñameʼẽ hag̃ua ñane kontrivusión ha ñaipytyvõ hag̃ua umi oikotevẽvape, koʼýte ñane ermanokuérape. Jehová noñenkonsentrái pe kantida ñameʼẽvare, upéva rangue haʼe ohecha mbaʼépa ñanemomýi ñameʼẽ hag̃ua. Ñandepojera ha ñakompartíramo la jarekóva ñande pyʼaite guive, javyʼaitereíta ha Jehová ñandeguerohorýta (elee Hechos 20:35).
EJEPYʼAMONGETAMÍNA
Jahechamína mbaʼéichapa ñanepytyvõta jahecháramo hendaitépe pe traváho ha ñañekontentáramo la jarekóvare.
4. Ñamombaʼeguasúkena Jehovápe jajapo lájare ñande traváho
Ñande jahayhu Jehovápe, ha upéva ñanepytyvõ jahecha hag̃ua hendaitépe pe traváho. Ehecha pe VIDÉO, ha upéi erresponde koʼã porandu:
Rehecha rire mbaʼépa opensa Jason itraváhore ha mbaʼéichapa oñekomporta upépe, ¿mbaʼépa la nesorprendevéva?
¿Mbaʼépa oipytyvõ chupe ohecha hag̃ua hendaitépe itraváho?
Elee Colosenses 3:23, 24, ha upéi erresponde ko porandu:
¿Mbaʼérepa iñimportánte ñañatende mbaʼépa ñapensa ñande traváhore?
Pe traváho ningo iñimportánte, péro núnka nañapermitíri vaʼerã hoʼupa ñandehegui ñane tiémpo ha upéva káusare ndaikatuvéi jaadora Jehovápe
5. Ñañekontentákena jarekomívare
Oĩ heta oñehaʼãva ombyaty pe pláta ikatúva entéro, péro la Biblia omeʼẽ ñandéve peteĩ konsého idiferentetéva. Elee 1 Timoteo 6:6-8, ha upéi erresponde ko porandu:
¿Mbaʼe konséhopa omeʼẽ ñandéve la Biblia?
Ndajarekóiramo jepe heta mbaʼe, lomímonte ikatu javyʼa. Ehecha pe VIDÉO, ha upéi erresponde ko porandu:
Koʼã família imboriahuetereíramo jepe, ¿mbaʼépa añetehápe ombovyʼa chupekuéra?
Péro oiméramo ñandeplátama ha lomímonte jaipotave, ¿mbaʼérepa ipeligróso? Jesús oexplika vaʼekue upéva peteĩ ehémplo rupive. Elee Lucas 12:15-21, ha upéi erresponde ko porandu:
¿Mbaʼépa reaprende pe ehémplo Jesús oipuru vaʼekuégui? (Ehecha jey versíkulo 15).
Elee ha ekompara Proverbios 10:22 ha 1 Timoteo 6:10. Upéi erresponde koʼã porandu:
¿Mbaʼépa nde ere iñimportanteveha: ñandepláta heta térãpa ñane amista Jehovándi? ¿Mbaʼérepa repensa upéicha?
¿Mbaʼe provlémapepa ikatu jaike ñandeplatarayhúramo?
6. Jehová oñangarekóta ñanderehe
Ñambohováiramo peteĩ provléma ñande travahohápe térã jaju ñandesogue, ikatu jaaprovecha pe oportunida jahechauka hag̃ua jajeroviaha Jehováre. Ehecha pe VIDÉO ohechaukáva mbaʼépa ikatu jajapo jareko jave peichagua provléma, ha upéi erresponde koʼã porandu:
Ohechaukaháicha pe vidéo, ¿mbaʼe ijetuʼúvapa ombohovái kuri pe ermáno?
¿Mbaʼe mbaʼépa ojapo kuri ombohovái porã hag̃ua pe situasión?
Elee Mateo 6:25-34, ha upéi erresponde ko porandu:
¿Mbaʼépa ojapóta Jehová ñanderehehápe ñamotenondéramo chupe?
OĨRAMO HEʼÍVA: “Che ambaʼapo jejopýmante vaʼerã amantene hag̃ua che famíliape. Nachetiémpoi aha hag̃ua káda semána rreunionhápe”.
¿Mbaʼe téxtopa ndéve nekonvense iporãveha siémpre emotenondéramo Jehovápe?
RRESÚMEN
Pe traváho ha pláta ningo iñimportánte, péro ndovaléi ñapermiti koʼã mbaʼe ñanemomombyry Jehovágui.
Rrepáso
¿Mbaʼépa nepytyvõta ehecha hag̃ua hendaitépe nde traváho?
¿Mbaʼérepa iporãve reñekontentáramo umi mbaʼe erekóvare?
Jehová opromete okuidataha isiervokuérare, ¿mbaʼéichapa ikatu rehechauka rejeroviaha hese?
EINVESTIGA HAG̃UA
¿Oĩ vai piko la ñandepláta? ¿Mbaʼépa heʼi la Biblia upe témare?
“¿Mbaʼérepa naiporãi ñandeplatarayhu?” (Artíkulo oĩva jw-pe)
Ehecha mbaʼéichapa ikatu jaipuru ñande pláta Ñandejára ñandeguerohory hag̃ua.
“¿Mbaʼéicha javépa iporã ñandepojera ha mbaʼéicha javépa nahániri?” (Artíkulo oĩva jw-pe)
¿Iporãpa japara huegohápe?
“¿Mbaʼépa heʼi la Biblia umi huégore?” (¡Despertad! Marzo de 2015)
Ehecha mbaʼépa oipytyvõ vaʼekue peteĩ karai imonda vaʼekue ha avei oñenvisia vaʼekuépe huégore ou hag̃ua okambia.
“Chegustaiterei vaʼekue umi karréra de kavállo” (La Atalaya 1 de noviembre de 2011)