Pe Ovecharerekua Imbaʼeporãva ha ijovechakuéra

Jesús osegi oporomboʼe Judéare, ha koʼág̃a omoĩ peteĩ ehémplo ontende porãva entéro umi ohendúva chupe. Oñeʼẽ umi ovecha oĩvare peteĩ korápe. Umi hudío oiméne imanduʼa David heʼi vaʼekuére: “Jehová oñangareko cherehe, che ningo ijovechami. Upévare mbaʼevete asy ndofaltamoʼãi chéve. Haʼe chemombytuʼu oĩháme heta kapiʼipe vérde asýva” (Salmo 23:1, 2, NM). Ótro sálmope David heʼi: “Ñañesũ ha jaadora ñande Apoharépe. Haʼe hína ñande Dios, ñande katu ipuévlo ha haʼe oñangareko ñanderehe. Ñande ningo chupe g̃uarã ovecha mimi” (Salmo 95:6, 7, NM). Añetehápe ningo yma guivéma oñekompara peteĩ ovecha atýre umi isrraelíta oĩvape pe Léi poguýpe.

Koʼã “ovecha” oĩ kuri peteĩ “korápe” onaséma rupi hikuái pe pákto de la Léi poguýpe. Ha pe Léi haʼete peteĩ kinchádo oseparáva chupekuéra umi hénte noĩrivagui ko pákto poguýpe. Upéicharõ jepe, oĩ vaʼekue isrraelíta omaltratáva Ñandejára ovechakuérape. Upévare Jesús heʼi: “Añetehápe haʼe peẽme: Pe kuimbaʼe ndoikéiva pe okẽrupi ovechakuéra korápe, ojupíva guei ótro hendárupi, upéva hína mondaha ha mbaretépe ogueraháva mbaʼe ahéno. Péro pe oikéva okẽrupi, haʼe hína pe ovecharerekua” (Juan 10:1, 2).

Upe tiémpope oĩma vaʼekue unos kuánto kuimbaʼe heʼíva ijehe haʼeha pe Mesías térã Cristo. Ha oiméne umi hénte imanduʼa hesekuéra. Umíva haʼete hína mondaha, mbaretépe ogueraháva mbaʼe ahéno. Ha haʼekuéra ndosegíri vaʼerã koʼãichagua kuimbaʼépe. Upéva rangue, osegi vaʼerã hikuái ‘pe ovecharerekuápe’.

Jesús heʼi vaʼekue pe ovecharerekuáre: “Chupe oavri pe okẽre oñangarekóva, umi ovecha katu ohendu iñeʼẽ, ha haʼe ohenói ijovechakuérape hérarupi ha oguenohẽ okápe. Oguenohẽmbávo ijovechakuéra, pe ovecharerekua oho henonderã ha umi ovecha oho hapykuéri oikuaágui iñeʼẽ. Peteĩ extráño rapykuéri ni mbaʼevéicharõ ndohomoʼãi hikuái, odiparapáta guei chugui ndoikuaáigui umi extráño ñeʼẽ” (Juan 10:3-5).

Are guivéma voi Juan el Bautista, haʼéva pe “okẽre oñangarekóva”, heʼi vaʼekue Jesús haʼeha pe ovecharerekua, ha chupe osegi vaʼerãha entéro umi oĩva pe Léi poguýpe. Unos kuánto “ovecha” Galilea ha Judeagua ‘oikuaa’ térã orrekonose Jesús ñeʼẽ. Péro, ¿moõpa Jesús ‘oguenohẽ ijovechakuérape’? ¿Mbaʼépa ohupytýta umi osegíva chupe? Katuete ningo umi hénte oikuaaséne raʼe koʼã mbaʼe, pórke “nontendéi” mbaʼépa Jesús omboʼese chupekuéra pe ehémplo rupive (Juan 10:6).

Haʼe heʼi: “Añetehápe haʼe peẽme: Che hína pe okẽ, oike hag̃ua umi ovecha. Entéro umi che rérape ou guaʼúva, umíva hína mondaha ha mbaretépe ogueraháva mbaʼe ahéno; péro umi ovecha nohendúi chupekuéra. Che hína pe okẽ; oimeraẽ oúva che rendápe oike hag̃ua pe korápe, ojesalváta. Oike ha osẽta ha ojuhúta kapiʼipe” (Juan 10:7-9).

Jahechaháicha, Jesús ojapo hína peteĩ mbaʼe ipyahúva. Umi ohendúva chupe ontende haʼe noñeʼẽiha pe pákto de la Léire, oĩmava hetaite tiémpore. Upéicha Jesús ohechauka ‘oguenohẽha ijovechakuérape’ omoinge hag̃ua ótro korápe. ¿Maʼerãpa ojapo upéva?

Jesús heʼi: “Che katu aju oikove hag̃ua hikuái opa árare. Che hína pe ovecharerekua imbaʼeporãva. Pe ovecharerekua imbaʼeporãva omeʼẽ hekove umi ovechakuéra rehehápe” (Juan 10:10, 11). Ndaʼareiete Jesús omokyreʼỹ kuri idisipulokuérape, heʼívo: “Ani pekyhyje, peẽ che ovechakuéra mbovymi, pende Ru odesidíma omeʼẽtaha peẽme pe Rréino” (Lucas 12:32). Upéicharõ, umi “ovechakuéra mbovymi” haʼe hína umi Jesús ombyatýtava peteĩ kora pyahúpe, “oikove hag̃ua hikuái opa árare”. ¡Ajépa iporãite pe priviléhio orekóva umi oĩva ko ovecha atýpe!

Jesús osegi heʼi: “Areko ambue ovechakuéra, oĩva ótro korápe, umívape avei aguerúta ha ohendúta che ñeʼẽ, péicha oikóta chuguikuéra peteĩ ovecha aty ha peteĩ ovecharerekua” (Juan 10:16). Koʼã “ambue ovechakuéra” oĩ hína “ótro korápe”. Upéva heʼise noĩriha hikuái umi “ovechakuéra mbovymi” apytépe, ohótava yvágape ogoverna hag̃ua pe Rréinope. Péicha jahecha koʼã mokõi ovecha aty orekoha diferénte esperánsa. Upéicharõ jepe, mokõive grúpo oñevenefisia Jesús sakrifísiogui. Haʼe heʼi voi: “Pe Túva cherayhu, ameʼẽ rupi che rekove” (Juan 10:17).

Umi hénte apytépe oĩ heʼíva: “Kóvango oñendemonia ha itarováma”. Upéicharõ jepe, oĩ avei umi ojapysaka porãva hese ha oĩva dispuésto osegívo ko Ovecharerekua Imbaʼeporãvape. Haʼekuéra heʼi: “Péicha noñeʼẽmoʼãi peteĩ endemoniádo. Peteĩ demónio ndaikatúi omonguera peteĩ isiégovape, ¿ajépa?” (Juan 10:20, 21). Oiméne haʼekuéra heʼi péicha pórke ramoiténte Jesús omonguera kuri peteĩ kuimbaʼe onase vaʼekuépe siégo.