¿Mbaʼéichapa jahechauka ‘ñamoirũseha Jesúspe’?

1, 2. ¿Mbaʼépa pe invitasión iñimportantevéva oñemeʼẽva yvyporakuérape? ¿Mbaʼépa iporã ñañeporandu?

¿MBAʼÉICHAPA reñeñandúne peteĩ ne amigoite omendátaramo ha neinvita ikasamientohápe? Katuete ningo revyʼáta imanduʼa haguére nderehe, ¿ajépa? Rehecháta haʼe nemombaʼeha ha nderayhuha avei. Péro revyʼáramo jepe koʼã mbaʼére, oĩ hína peteĩ mbaʼe iporãitevéva ha enterovete ñañeinvita upearã. Ko mbaʼe tuichaiterei ikatu okambia ñande rekove. Upévare jaʼekuaa haʼeha pe invitasión iñimportantevéva.

² ¿Mávapa ñaneinvita ha maʼerãpa? Jesucristo, Ñandejára Ipuʼakapáva Raʼy ñaneinvita, ha la Biblia omombeʼu ñandéve maʼerãpa Marcos 10:21-pe. Upépe Jesús heʼi entéro yvypórape: “Eju chemoirũ”. Upévare iporã ñañeporandu: “¿Apenátapa hese?”. Katuete oĩne heʼíva: “¿Ha máva piko nomoirũsemoʼãi Jesúspe?”. Péro hetaiterei oĩ ndojaposéiva Jesús heʼíva. Jahechamína mbaʼérepa.

3, 4. a) ¿Mbaʼérepa umi hénte omombaʼe pe kuimbaʼépe oñeʼẽ vaʼekue Jesús ndive? b) ¿Mbaʼérepa Jesús omombaʼéne raʼe chupe?

³ Ojapo 2.000 áñorupi Jesús oinvita hague peteĩ kuimbaʼépe omoirũ hag̃ua chupe. Jahechamína mbaʼépa ojapo. Ko kuimbaʼépe ningo opavavénte omombaʼeguasu ivállepe. La Biblia heʼi voi haʼeha peteĩ “mitãkariaʼy”, “governánte” ha ‘ipláta hetaitereiha’. Jaikuaaháicha heta héntepe g̃uarã iñimportanteterei koʼã mbaʼe (Mateo 19:20; Lucas 18:18, 23). Péro oĩ peteĩ mbaʼe iporãvéva ikatúva jaʼe ko mitãkariaʼýre: haʼe ohenduse vaʼekue Mboʼehára Guasúpe ha oguerohory upe heʼíva.

⁴ Upérõ umi governánte pyʼỹi oapoʼi Jesúspe (Juan 7:48; 12:42). Péro ko mitãkariaʼy ndahaʼeiete upéicha. La Biblia heʼi: “Jesús osẽvo oho hag̃ua, peteĩ kuimbaʼe odipara ou oñesũ henondépe, ha oporandu chupe: ‘Mboʼehára, nde ningo nevuenoiterei, eremína chéve, ¿mbaʼépa ajapo vaʼerã ahupyty hag̃ua jeikove opaveʼỹva?’” (Marcos 10:17). Jahechaháicha ko kuimbaʼe oñeʼẽseterei Jesúsndi. Odipara hendápe ojapo haguéicha umi hénte imboriahumíva. Hiʼarive oñesũ voi henondépe. Jaʼekuaa hese ndaijejapói hague ha ohechakuaa avei tekotevẽha oikuaave Ñandejárape. Jesús ningo omombaʼeterei umichaguápe (Mateo 5:3; 18:4). Upévare la Biblia heʼi: ‘Jesús omaña pe kuimbaʼére ha ohayhu chupe’ (Marcos 10:21). ¿Mbaʼépa ojapo Jesús upémarõ?

 5. ¿Mbaʼépa heʼi Jesús pe kuimbaʼépe? ¿Mbaʼéichapa jaikuaa ndeʼiriha chupe opyta hag̃ua mboriahu apĩ? (Ehecha avei pe nóta).

⁵ Jesús omomanduʼa pe kuimbaʼépe Jehová heʼíma hague Iñeʼẽme mbaʼépa ojapo vaʼerã umi oikoséva opa ára g̃uarã. Ha pe mitãkariaʼy heʼi haʼe okumpli porãha Moisés léi. Péro jaikuaaháicha Jesús ñandepyʼakuaa ha ohecha mbaʼépepa iprovléma ko governánte iplataitéva (Juan 2:25). Ohecha oĩha peteĩ mbaʼe ombyaíva chupe ha upévare ndaikatuiha oĩ porã Jehovándi. Upémarõ heʼi pe governántepe: “Tekotevẽ gueteri rejapo peteĩ mbaʼe: tereho evende nde kosakuéra ha emeʼẽ pe pláta umi imboriahúvape” (Marcos 10:21). ¿Heʼisépa raʼe Jesús jaservi hag̃ua Ñandejárape japyta vaʼerãha ñanemboriahu apĩ? Nahániri.a Haʼe ningo ohechaukasénte peteĩ mbaʼe iñimportantetereíva.

 6. ¿Mbaʼe iporãmba jepévapa Jesús ojerure pe kuimbaʼépe? ¿Mbaʼéichapa pe ojapóvare ohechauka ikorasõme oĩva?

⁶ Jesús oipota pe mitãkariaʼy ojehesapeʼa ha opilla mbaʼépa ojapove vaʼerã. Upévare ojerure chupe peteĩ mbaʼe iporãmba jepéva: “Eju chemoirũ”. Ñapensamíntena, Jesús ningo Ñandejára Ipuʼakapáva Raʼy ha ojerure ko kuimbaʼépe omoirũ hag̃ua chupe. Ha iporãveha katu, opromete peteĩ mbaʼe haʼe oimoʼãʼỹva: “Péicha reguerekóta tesóro yvágape”. Ohendúvo upéva, ¿mbaʼépa ojapo ko governánte iplataitéva? La Biblia omombeʼu: “Ohendúvo upéva pe mitãkariaʼy ombyasy ha oñesenti ohóvo, pórke haʼe oguereko hetaiterei mbaʼe” (Marcos 10:21, 22). Péicha Jesús ohechauka mbaʼépa oĩ vai pe kuimbaʼe korasõme. Hakateʼỹeterei ipláta ha umi mbaʼeta orekóvare, ha oipota umi hénte omombaʼe chupe. Ñambyasýramo jepe haʼe ohayhuve umi mbaʼeta Jehová ha Jesúspe rangue, ha ndohejaséi mbaʼeve hesehapekuéra. Upévare nomoirũi Jesúspe. ¿Mbaʼépa ñanemboʼe ko mbaʼe?

 7. ¿Mbaʼérepa jaʼekuaa Jesús ojerureha enterovetévape omoirũ hag̃ua chupe?

⁷ Jesús noñeʼẽi upe kuimbaʼépente térã mbovymi tapichápe. Haʼe “heʼi enterovépe: ‘Oĩramo chemoirũséva, [...] tachemoirũ meme’” (Lucas 9:23). Jahecha ‘enterove’ ikatuha omoirũ Jesucrístope, ojaposéma guive upéva ipyʼaite guive. Ñandejára ningo oipytyvõ umi ipyʼaporãvape oñemoag̃ui hag̃ua Itaʼýrare (Juan 6:44). Jesús noñeʼẽi iplátava térã imboriahúvapente, nomañái avei ñane retãre, ñanehũ térã ñanemorotĩpa, térãpa mbaʼe tiémpope ñanase raʼe. Haʼe ojerure enterovetévape omoirũ hag̃ua chupe. Upévare káda uno jadesidi vaʼerã ‘ñamoirũtapa’ Jesúspe. Koʼág̃a jahechamíta mbaʼérepa ñamoirũ vaʼerã chupe ha mbaʼéichapa jajapokuaa upéva.

 8. ¿Mbaʼépa ñaikotevẽ entéro yvypóra, ha mbaʼérepa?

⁸ Nañandegustáiramo jepe oĩ peteĩ mbaʼe ndaikatúiva ñanega: enterove ñaikotevẽ peteĩ ñanemoakãva ha heʼíva ñandéve mbaʼépa iporãve jajapo. Proféta Jeremías ohechakuaa vaʼekue upéva heʼívo: “Jehová, che aikuaa porã yvypórape ndotokaiha omaneha hape, ha yvypóra ndorekoiha derécho ni odirihívo hekove ijehegui rei” (Jeremías 10:23). Yvyporakuéra ndorekói derécho oñegovernávo ha ndojapokuaái voi upéva. Jahecha ymaite guive governantekuéra akã rasýmante ogueruha (Eclesiastés 8:9). Jesús oĩrõ guare ko yvy ape ári umi governánte ojopy, oreko asy ha ombotavy hapichakuérape. Upévare haʼe heʼi umi hénte ojoguaha “umi ovecha ndorekóivape pastór” (Marcos 6:34). Ha upeichaite avei koʼág̃arupi, enterovénte ñaikotevẽ ñanemoakã peteĩ tapicha jeroviaha ikatu vaʼerã jarrespeta. ¿Ikatúnepa Jesús ñanemoakã porã? Jahechami mbaʼérepa jaʼekuaa ikatuha.

 9. ¿Mbaʼérepa jaʼekuaa Jesús idiferenteha umi ótro governantekuéragui?

⁹ Ñepyrũrã Ñandejára Jehová voi oiporavo Jesúspe. Umi governantekuérape ningo oiporavo yvypóra imperfékto haʼekueraichagua jeýnte. Ha iñimperfékto rupi umi hénte oiporavo vai katuete. Jesús katu peteĩ governánte idiferénteva. Chupe oñehenói Cristo ha Mesías, heʼiséva “Ojeporavo vaʼekue”. Jesúspe oiporavo pe Governánte Tuichavéva yvága ha yvýpe, ha omeʼẽ chupe peteĩ tembiapo iñimportantetereíva. Upeichaite ningo, Ñandejára Jehová heʼi vaʼekue Itaʼýrare: “¡Pemañami! Kóva ningo che siérvo, haʼe che elehído. Che ahayhu ha aguerohory chupe. Amoĩta che espíritu hiʼári” (Mateo 12:18). Ñande Apohare oikuaa porãiteve oimeraẽvagui mbaʼeichagua tapichápa ñaikotevẽ ñanemoakã hag̃ua. Avei Jehová arandu ndaijojahái, upévare ikatu jajerovia hese (Proverbios 3:5, 6).

10. ¿Mbaʼérepa Jesús omoĩ pe ehémplo iporãvéva ñandéve g̃uarã?

¹⁰ Mokõiha katu, Jesús oheja ñandéve peteĩ ehémplo ñanemokyreʼỹva jajapo hag̃ua iporãva. Enterove jaipota ñanemoakã peteĩ tapicha hekopotĩva, omoĩva ñandéve ehémplo iporãva ha ñanepytyvõva ñasẽ porã hag̃ua. Ñapensamína, ¿mbaʼépa jaguerohoryvéne peteĩ tapicha ñanemoakãvare? Katuete jaipotáne ipyʼaguasu, iñarandu ha ñandeporiahuvereko. Ha oiméramo ombohovái vaʼerã provléma, ndajaipotái ikangy. Jaipota guei ombohovake ha ipuʼaka hesekuéra. Ha Jesús orekopaite koʼã mbaʼe, ha hetave mbaʼe porã jaʼekuaa hese. Haʼe ningo ojoguaiterei Itúa Jehovápe. Upévare opensa, oñeʼẽ ha ojapo opaite mbaʼe Jehová ojapohaichaite. Jesucrístore ndaipóri mbaʼeve ivaíva. Upéicha rupi iporã jasegi iñehémplo opa mbaʼe ojapóvape. La Biblia heʼi haʼe ‘oheja hague ñandéve peteĩ ehémplo jasegi porã hag̃ua ha jaguata hag̃ua ipyporére’ (1 Pedro 2:21, nóta).

11. ¿Mbaʼéichapa Jesús ohechauka haʼeha pe “pastór imbaʼeporãva”?

¹¹ Ha mbohapyha, Jesús ohechauka haʼeha pe “pastór imbaʼeporãva” (Juan 10:14). Umi hénte Jesús tiémpope guare ontende porã mbaʼépa heʼise upéva. Yma ningo umi pastór heta ombaʼapo oñangareko hag̃ua ijovechakuérare, ha ‘imbaʼeporãramo’ añete ojepyʼapyve hymbakuérare opensa rangue ijehe. Péicha vaʼekue peteĩ Jesús ypykue hérava David. Haʼe heta vése haimete mete omano osalva hag̃ua ijovechakuéra umi mymba ñarõgui (1 Samuel 17:34-36). Péro Jesús ojapóva yvyporakuérare tuichave upévagui: haʼe omeʼẽ voi hekove ñanderehehápe (Juan 10:15). ¿Ikatúpa jaʼe umi governantekuéra ojaposéne hag̃ua avei upéva?

12, 13. a) ¿Mbaʼéichapa pe pastór oikuaa ijovechakuérape, ha mbaʼéichapa haʼekuéra oikuaa chupe? b) ¿Mbaʼérepa reipota negoverna pe Pastór Imbaʼeporãva?

¹² Jesús haʼe avei pe “pastór imbaʼeporãva” oikuaa porã rupi ijovechakuérape. Haʼe heʼi vaʼekue: “Che aikuaa che ovechakuérape ha umi che ovecha chekuaa avei chéve” (Juan 10:14). Ñantendeve hag̃ua ñapensami ko mbaʼére: ñamoĩ chupe ñamañaha peteĩ ovecha atýre. Ñandéve g̃uarã umíva una partída mymba okorréva pérupi. Péro pe pastór nopensái upéicha. Haʼe oikuaa peteĩteĩ umi ovecha: mávapa hyeguasu ha tekotevẽta oñepytyvõ chupe imemby hag̃ua, mávapa ikangy térã onase ramoite ha ndaikatumoʼãi oguata ijehegui rei. Umi mymba oikuaa avei ipastórpe, oikuaa iñeʼẽ ha opilla ndahaʼéi jave haʼe la oñeʼẽva. Pe pastór ñeʼẽre opilla hikuái oĩpa pelígro ha tekotevẽtapa oho pyaʼe upégui. Umi mymba oho hapykuéri toho ohohápe. Pe pastór ningo oikuaa moõpa oĩ kapiʼipe iporãvéva, ysyry ipiroʼyvéva ha ndaiporihápe mymba ñarõ. Haʼe ojesareko aja hesekuéra umi ovecha ndokyhyjéi mbaʼevégui (Salmo 23).

¹³ ¡Máva piko ndoipotamoʼãi péicha oñeñangareko hese! Péicha pe Pastór Imbaʼeporãva ohechauka oñangarekoha idisipulokuérare. Haʼe ñanegovernáta jaiko hag̃ua vyʼápe koʼág̃ama voi, ha upéi katu omeʼẽta ñandéve pe oportunida jaikove hag̃ua pára siémpre (Juan 10:10, 11; Apocalipsis 7:16, 17). Upévare tekotevẽ ñantende porã mbaʼéichapa ikatu ñamoirũ Jesucrístope.

14, 15. ¿Mbaʼérepa nomoirũi Jesúspe umi heʼínteva ijehe kristianoha?

¹⁴ Hetaiterei hénte ningo heʼi ijehe kristianoha ha oimoʼã péicha omoirũmaha hína Jesúspe. Koʼãva apytépe oĩ umi osegínteva ituakuéra rrelihión. Oĩ avei heʼínteva ohayhuha Jesúspe ha ojeroviaha osalvataha chupekuéra. Péro, ¿añetehápe piko omoirũ hikuái Jesucrístope? ¿Oipotápa raʼe Jesús jaʼénte jajeroviaha hese? Nahániri, haʼe oipota jajapo hetave mbaʼe.

¹⁵ Ñapensamíntena mbaʼépa oiko hína umi tetã hetavehápe umi rrelihión heʼíva osegiha Crístope. ¿Ikatúpa jaʼe umi hénte koʼã tetãmegua ojapoha Jesús omboʼe vaʼekue? ¿Térãpa jahecha mbaʼéichapa iñaña hikuái, ndaijaʼéi hapicháre, imonda ha oporotrata vai?

16, 17. ¿Mbaʼérepa oĩ hetaite heʼíva ojeroviaha Jesúsre ha upéi katu ndojapói Ñandejára rembipota? ¿Mbaʼépa ojapo umi añetehápe ohayhúva Jesúspe?

¹⁶ Jesús heʼi vaʼekue umi idisípulo teéva ojekuaataha hembiapokue rupi. Peteĩ jey heʼi: “Naentéroi heʼíva chéve: ‘Señór, Señór’, oikéta pe Rréino yvagapeguápe. Síno umi ojapóva che Ru yvagapegua rembipota añoite oikéta” (Mateo 7:21). ¿Mbaʼérepa oĩ hetaite heʼíva ojeroviaha Jesúsre ha upéi katu ndojapói Ñandejára rembipota? Ikatu ojehu chupekuéra pe governánte iplataitévape ojehu vaʼekue. Haʼekuéra ndohayhúi ipyʼaite guive Jesúspe ni Itúape.

¹⁷ ¿Mbaʼérepa jaʼe upéva? ¿Noĩri guaʼu piko hetaiterei hénte heʼíva kristianoha ha ohayhúva Crístope? Añetehápe ningo oĩ, péro ndahaʼéi ñande jurúpente jahayhu vaʼerã Jehová ha Jesúspe. Cristo heʼi vaʼekue: “Pe persóna cherayhúva ojapóta che haʼéva” (Juan 14:23). Ha oñeʼẽvo ijovechakuérare heʼi: “Che ovechakuéra ohendu che ñeʼẽ ha ou che rapykuéri, ha che aikuaa chupekuéra” (Juan 10:27). Jahechaháicha, Jesús ohechauka ñanderayhuha umi mbaʼe ojapóvare, ndahaʼéi ijurúpente.

18, 19. a) ¿Mbaʼérepa ñañehaʼã vaʼerã jaikuaa porã Jesúspe? b) ¿Mbaʼépa jahecháta ko lívrope, ha mbaʼéichapa ñanepytyvõta?

¹⁸ Umi mbaʼe jajapóva ningo ohechauka mbaʼépa jareko ñane korasõme. Upévare ñamoirũ hag̃ua Jesúspe ñañehaʼã vaʼerã ñakambia ñande pyʼapýpe oĩva. Haʼe heʼi vaʼekue: “Umi hénte oikove hag̃ua pára siémpre tekotevẽ ndekuaa ndéve, nde hína Ñandejára teete ha peteĩetéva. Oikuaa vaʼerã avei Jesucrístope, upe nde rembou vaʼekue” (Juan 17:3). Ñañehaʼãkena jaikuaa porã Jesúspe ha jajepyʼamongeta hekovére. Upéva opokóta ñane korasõre, ha akóinte jahayhuvéta ha ñamoirũséta chupe.

¹⁹ Ko lívrope ndajahechamoʼãi opa mbaʼe Jesús heʼi ha ojapo vaʼekue ko yvy ape ári. Jahecháta guei mbaʼéichapa ñamoirũ vaʼerã chupe.b Avei ñanepytyvõta jaipuru hag̃ua la Biblia haʼeramoguáicha peteĩ espého ha upéi ñañeporandu: “¿Amoirũpa Jesúspe hekoitépe?” (Santiago 1:23-25). Ikatu yma guivéma jaiko pe Pastór Imbaʼeporãva rapykuéri. Péro heta mbaʼe ikatu jajapo porãve. La Biblia heʼi voi: “Pesegíkena peñatende pendejehe pehecha hag̃ua peikópa hína heʼiháicha umi enseñánsa Cristo omeʼẽ vaʼekue. Pesegíkena pehecha mbaʼeichagua persónapa peẽ” (2 Corintios 13:5). Iporãitereíta ningo ñañehaʼãramo ñamoirũ Jesucrístope hekopete. Haʼe ningo pe Pastór Imbaʼeporãva ha Jehová voi omoĩ chupe oñangareko hag̃ua ñanderehe.

20. ¿Mbaʼépa ñahesaʼỹijóta kapítulo 2-pe?

²⁰ Jastudiávo ko lívro jahayhuvéta Jehová ha Jesúspe. Upéva ñanepytyvõta jaiko hag̃ua pyʼaguapýpe ñaiméramo jepe ko múndo añáme. Iporãveha katu, amo gotyove ikatúta jaikove opa ára g̃uarã ha siémpre ñamombaʼeguasúta Jehovápe omeʼẽ haguére ñandéve pe Pastór Imbaʼeporãva. Jaikuaa hag̃ua Jesucrístope jahecha raẽ vaʼerã mbaʼépa haʼe ojapo oiko hag̃ua Jehová rembipota yvágape ha yvy ape ári. Upéva ñahesaʼỹijóta kapítulo 2-pe.