LEKSIÓN 59
Nde ikatu ndefiél, oĩramo jepe oñemoĩva nderehe
Heta hénte ndoipotái jaservi Jehovápe, upévare oñemoĩtante voi ñanderehe ha ikatu voi ñanembosufri upévare. ¿Jakyhyje vaʼerãpa chuguikuéra?
1. ¿Mbaʼérepa nañanesorprendéi vaʼerã oĩramo oñemoĩva ñanderehe?
La Biblia heʼi: “Enterove oadoraséva Ñandejárape ipyʼaite guive [...], ojepersegíta” (2 Timoteo 3:12). Heta hénte oñemoĩ vaʼekue Jesúsre, haʼe ndoikói rupi umi hénte ko mundopegua oikoháicha. Ñande upéichante avei, upévare nañanesorprendéi umi goviérno térã umi ótro rrelihión oñemoĩramo ñanderehe (Juan 15:18, 19).
2. ¿Mbaʼépa jajapo vaʼerã pono ñanemokangy pe persekusión?
Tekotevẽ koʼág̃ama voi jajerovia mbarete Jehováre. Upearã ñamboyke vaʼerã káda día ñane tiémpo ñañemboʼe hag̃ua chupe ha jalee hag̃ua Iñeʼẽ. Ha avei jaha meme vaʼerã rreunionhápe. Entéro koʼã mbaʼe ñanembopyʼaguasu ha ñanepytyvõta ñaaguanta hag̃ua oĩ jave oñemoĩva ñanderehe, tahaʼe jepe raʼe ñane hentekuéra. Upéva oipytyvõ vaʼekue apóstol Páblope oĩrõ guare oñemoĩva hese, upévare haʼe heʼi vaʼekue: “Jehová chepytyvõ hína, ndakyhyjemoʼãi asy” (Hebreos 13:6).
Ñandepyʼaguasuve hag̃ua japredika meme vaʼerã avei. Upéicha jajeroviavéta Jehováre ha ndajakyhyjemoʼãi ñande rapichágui (Proverbios 29:25). Koʼág̃ama voi ñandepyʼaguasúrõ japredika hag̃ua, ndajakyhyjemoʼãi jajapo hag̃ua upéva pe goviérno oproivíramo jepe (1 Tesalonicenses 2:2).
3. ¿Mbaʼéichapa ñanepytyvõ ñaaguantáramo pe persekusión?
Ndaigústoiko legálmente oĩramo oñemoĩva ñanderehe, péro ñaaguantáramo ñande jerovia imbaretevéta. Avei ñañemoag̃uivéta Jehováre, pórke jahecháta mbaʼéichapa haʼe ñanepytyvõ, koʼýte ñapensávo nañameʼẽveimaha (elee Santiago 1:2-4). Jehovápe hasy asy ohechávo jasufriha, péro ovyʼa avei ohechávo nañañentregaiha. La Biblia heʼi voi: “Pehasa asýramo pejapo haguére iporãva ha peaguanta, upéva Ñandejára oguerohory” (1 Pedro 2:20). ¿Ha mbaʼépa Jehová omeʼẽta umi oaguantávape ha osegívape ifiél chupe? Ikatúta oiko pára siémpre peteĩ paraísope ha upépe ndaiporimoʼãvéima ni peteĩ enemígo oñemoĩva hesekuéra (Mateo 24:13).
EJEPYʼAMONGETAMÍNA
Jahechamína mbaʼérepa jaʼekuaa ikatuha jasegi ñandefiél Jehovápe oĩramo jepe oñemoĩva ñanderehe, ha mbaʼéichapa haʼe ñanevendesíta upe haguére.
4. Nde ikatu reaguanta, ne hentekuéra oñemoĩramo jepe nderehe
Jesús isinséro vaʼekue ha heʼi porã ñane hentekuéra apytépe oĩtaha umi ndoipotáiva jaservi Jehovápe. Elee Mateo 10:34-36, ha upéi erresponde ko porandu:
Oĩramo peteĩ persóna odesidíva oservitaha Jehovápe, ¿mbaʼépa ikatu hína heʼi térã ojapo ihentekuéra?
Jahechamína peteĩ ehémplo. Ehecha pe VIDÉO, ha upéi erresponde ko porandu:
¿Mbaʼépa nde ikatu rejapo oiméramo peteĩ ne hénte térã ne amígo ndoipotavéi reservi Jehovápe?
Elee Salmo 27:10 ha Marcos 10:29, 30. Elee rire káda téxto, erresponde ko porandu:
¿Mbaʼéichapa ko promésa ikatu nepytyvõ reaguanta hag̃ua oñemoĩ jave nderehe ne hénte térã ne amigokuéra?
5. Esegíkena eservi Jehovápe, oĩramo jepe oñemoĩva nderehe
Oĩramo ndoipotáiva jaservi Jehovápe, ñandepyʼaguasu vaʼerã jasegi hag̃ua jaservi chupe lomímonte. Ehecha pe VIDÉO, ha upéi erresponde ko porandu:
¿Mbaʼe mbaʼépa ndegustave pe vidéogui nepytyvõtava ndepyʼaguasu hag̃ua?
Elee Hechos 5:27-29 ha Hebreos 10:24, 25. Elee rire káda téxto, erresponde ko porandu:
¿Mbaʼérepa iñimportantete jasegi jaservi Jehovápe, pe goviérno oproivíramo jepe ñandehegui ñañembyaty térã japredika?
6. Jehová nepytyvõta reaguanta hag̃ua
Ko múndo tuichakuére hetaiterei Testígo, tahaʼe imitãva térã ijedáva, osegi ifiél Jehovápe oĩramo jepe oñemoĩva hesekuéra. Reikuaa hag̃ua mbaʼéichapa ikatu ojapo hikuái upéva ehecha pe VIDÉO. Upéi erresponde ko porandu:
¿Mbaʼépa oipytyvõ koʼã ermánope oaguanta hag̃ua oĩrõ guare oñemoĩva hesekuéra?
Elee Romanos 8:35, 37-39 ha Filipenses 4:13. Elee rire káda téxto, erresponde ko porandu:
¿Mbaʼéichapa ko téxto nepytyvõ reĩ hag̃ua segúro nde ikatuha reaguanta oimehaichagua pruéva?
Elee Mateo 5:10-12, ha upéi erresponde ko porandu:
¿Mbaʼérepa ikatu revyʼa oĩramo jepe ndepersegíva rejapo haguére iporãva?
Hetaiterei testígo de Jehová oaguanta oĩ jave oñemoĩva hesekuéra. ¡Nde ikatu avei reaguanta!
OĨRAMO HEʼÍVA: “Che ndaikatuichéne aaguanta oĩramo oñemoĩva cherehe”.
¿Mbaʼe téxto bíblicopa oipytyvõne umi opensávape upéicha?
RRESÚMEN
Jehová ovaloraiterei ohecháramo ñañehaʼãmbaiteha oĩ jave oñemoĩva ñanderehe. Haʼe ñanepytyvõta katuete ñaaguanta hag̃ua.
Rrepáso
¿Mbaʼérepa nañanesorprendéi vaʼerã oĩramo oñemoĩva ñanderehe?
¿Mbaʼépa jajapo vaʼerã pono ñanemokangy pe persekusión?
¿Mbaʼérepa nde reime segúro ikatuha resegi reservi Jehovápe oĩramo jepe oñemoĩva nderehe?
EINVESTIGA HAG̃UA
Ehechamína mbaʼéichapa Jehová oipytyvõ peteĩ mitãrusúpe oĩ vaʼekue kárselpe oservi rupi chupe.
Ehechamína mbaʼépa oipytyvõ vaʼekue peteĩ matrimóniope osegi hag̃ua oservi fiélmente Jehovápe, oĩramo jepe oñemoĩva hesekuéra.
Ehecha mbaʼéichapa ikatu ndepyʼaguasu reaguanta hag̃ua oĩramo oñemoĩva nderehe.
“Jajepreparákena koʼág̃a pórke oĩta ñandepersegíva” (Ñemañaha julio de 2019)
¿Mbaʼépa ikatu rejapo oĩramo ne hentekuéra apytépe oñemoĩva nderehe?
“¿Mbaʼérepa pe añetegua ndoguerúi pyʼaguapy síno joavy?” (Ñemañaha octubre de 2017)