LEKSIÓN 15
¿Mávapa Jesús?
Jesús ningo haʼe pe persóna ikonosidovéva ko yvy ape ári. Péro heta hénte añetehápe ndoikuaaporãi chupe, hérante la oikuaáva. Ha káda uno oreko diferénte opinión hese. Péro, ¿mbaʼépa heʼi la Biblia Jesúsre?
1. ¿Mávapa Jesús?
Jesús haʼe peteĩ ánhel ipoderósova oikóva yvágape. Ñandejára Jehová okrea chupe raẽvete. Upévare la Biblia heʼi haʼeha “pe Taʼýra ypykue ojejapo vaʼekue opaite mbaʼe mboyve” (Colosenses 1:15). Heʼi avei haʼeha Ñandejára ‘Raʼy peteĩete’, pórke Jehová haʼeñoite okrea vaʼekue chupe (Juan 3:16). Jesús ombaʼapo vaʼekue Itúa Jehová ykerete ha oipytyvõ chupe okrea hag̃ua entéro mbaʼe (elee Proverbios 8:30). Jesús osegi ovyʼa Jehová ykére ha siémpre ifiél chupe. Upéi Ñandejára ojevale hese oñeʼẽ hag̃ua hesehápe, upévare la Bíbliape oñehenói voi chupe “pe Ñeʼẽ” (Juan 1:14).
2. ¿Mbaʼérepa Jesús ou vaʼekue ko yvy ape ári?
Ojapo 2.000 áño rasami Jehová ijespíritu sánto rupive ojapo hague peteĩ milágro: omoĩ Itaʼýra rekove peteĩ kuñataĩ vírhen hérava María retepýpe. Ha péicha Jesús ou onase peteĩ mitãicha (elee Lucas 1:34, 35). Jesús ou vaʼekue ko yvy ape ári oiko hag̃ua chugui pe Mesías térã Cristo ha ñandesalva hag̃ua.a Entéro umi profesía oĩva la Bíbliape oñeʼẽva pe Mesías rehe oñekumplipaite Jesúsre. Upévare jaʼekuaa haʼe haʼeha “pe Cristo, Ñandejára oikovéva Raʼy” (Mateo 16:16).
3. ¿Moõpa oĩ Jesús koʼág̃a?
Jesús omano rire ko yvy ape ári, Ñandejára orresusita chupe yvágape oiko jey hag̃ua chugui peteĩ ánhel. Upépe “Ñandejára ombotuicha Jesúspe ha omeʼẽ chupe peteĩ puésto ijyvatevéva” (Filipenses 2:9). Koʼág̃a Jesús haʼe peteĩ ánhel ipoderosoitereíva, Jehová añoite ipoderosove chugui.
EJEPYʼAMONGETAMÍNA
Jahechavemína mávapa añetehápe Jesús ha mbaʼérepa iñimportantete jaikuaa porã chupe.
4. Jesús ndahaʼéi Ñandejára Todopoderóso
La Biblia ohechauka Jesús ipoderosoitereíramo jepe oñemoĩha Itúa Jehová poguýpe, ¿mbaʼérepa ikatu jaʼe upéva? La Biblia ohechauka Jesús ha Jehová idiferenteteha ojuehegui. Ehecha pe VIDÉO reikuaa hag̃ua mbaʼépepa idiferénte hikuái.
Koʼã téxto bíblico nepytyvõta reikuaa hag̃ua mbaʼépepa idiferénte Jehová ha Jesús. Elee káda téxto ha erresponde umi porandu oĩva upe rire:
Elee Lucas 1:30-32.
Asegún pe ánhel heʼíva, ¿mbaʼérepa jaʼekuaa ndahaʼeiha la mísma persóna Jesús ha “Ñandejára Ndaijojaháiva” Jehová?
Elee Mateo 3:16, 17.
Jesús ojevautisa rire, ¿mbaʼépa oñehendu yvágagui?
Ñandejára voi ningo la oñeʼẽ vaʼekue pe yvágagui, ¿ikatúpa jaʼe upéicharõ Ñandejára ha Jesús haʼeha la mísma persóna?
Elee Juan 14:28.
¿Mávapa ijedave ha orekove autorida: pe taʼýra térãpa itúa?
Jesús heʼi Jehová haʼeha Itúa, ¿mbaʼépa ñanemboʼe upéva?
Elee Juan 12:49.
¿Omboʼépa Jesús haʼe ha Itúa haʼeha la mísma persóna? ¿Mbaʼépa nde repensa upévare?
5. ¿Mbaʼérepa ikatu ñaime segúro Jesús haʼe hague pe Mesías?
La Bíbliape jatopa hetaiterei profesía ohechaukáva mávapa añetehápe pe Mesías. Ehecha pe VIDÉO reikuaa hag̃ua unas kuánta profesía oñekumpli vaʼekue Jesúsre oĩrõ guare ko yvy ape ári.
Elee koʼã profesía bíblica ha erresponde umi porandu oĩva upe rire:
Elee Miqueas 5:2 reikuaa hag̃ua moõpa pe Mesías onase vaʼerã kuri.b
¿Oñekumplípa Jesúsre ko profesía? (Mateo 2:1).
Elee Salmo 34:20 ha Zacarías 12:10 rehecha hag̃ua mbaʼépa oikóta kuri pe Mesíasre omano rire.
¿Oñekumplípa koʼã profesía? (Juan 19:33-37).
¿Ndépa ere Jesús ikatúne hague okontrola umi mbaʼe oikóva onase mboyve térã omano rire oñekumpli hag̃ua hese umi profesía?
¿Mbaʼépa nemboʼe upéva Jesúsgui?
6. ¿Mbaʼépepa ideprovécho ñandéve jaikuaa Jesúspe?
La Biblia ohechauka iñimportantetereiha jaikuaa porã Jesúspe ha umi mbaʼe ojapóva okumpli hag̃ua Ñandejára volunta. Elee Juan 14:6 ha 17:3, ha upéi erresponde ko porandu:
¿Mbaʼérepa tekotevẽterei jaikuaa porã Jesúspe?
Jesús ohechauka pe tape ñanemoag̃uíva Ñandejárare, omboʼe pe añetegua Itúagui ha haʼe rupive ikatúta jaiko pára siémpre
OĨRAMO HEʼÍVA: “Umi testígo de Jehová ndojeroviái Jesúsre”.
¿Mbaʼéichapa nde errespondéne chupe?
RRESÚMEN
Jesús haʼe peteĩ ánhel ipoderosoitereíva, haʼe Ñandejára Raʼy ha pe Mesías.
Rrepáso
¿Mbaʼérepa ojeʼe Jesúsre haʼeha “pe Taʼýra ypykue ojejapo vaʼekue opaite mbaʼe mboyve”?
¿Mbaʼépa Jesús ojapo vaʼekue ou mboyve ko yvy ape ári?
¿Mbaʼérepa ikatu ñaime segúro Jesús haʼeha pe Mesías?
EINVESTIGA HAG̃UA
¿Mbaʼeichagua profesíapa oñekumpli pe Mesíasre?
“¿Ohechaukápa umi profesía bíblica Jesús haʼeha pe Mesías?” (Artíkulo oĩva jw-pe)
La Bíbliape heʼi Jesús haʼeha Ñandejára Raʼy, ehecha mbaʼépa heʼise upéva.
“¿Mbaʼére oñehenói Jesúspe Ñandejára Raʼy?” (Artíkulo oĩva jw-pe)
¿Omboʼépa la Biblia pe trinida?
“Ikatúpa jaʼe Jesús ha Ñandejára peteĩnteha?” (Ñemañaha Abril-Junio de 2009)
Ehecha mbaʼéichapa peteĩ kuñakarai okambiaite opensa lája Jesúsre oinvestiga rire la Biblia heʼíva.
“Peteĩ kuña judía omombeʼu mbaʼérepa okambia irrelihión” (¡Despertad! Mayo de 2013)
a Mesías térã Cristo heʼise Ñandejára oiporavo hague chupe ñandesalva hag̃ua. Leksión 26 ha 27-pe jahecháta mbaʼéguipa tekotevẽ jajesalva, ha mbaʼéichapa Jesús ojapo upéva.