Ñapensa memékena “umi mbaʼe yvagapeguáre”

1, 2. a) ¿Mbaʼérepa naiporãmbái kuri pe situasión pe kongregasión Colosasguápe? b) ¿Mbaʼe konséhopa omeʼẽ Pablo umi kristiáno Colosasguápe?

SÍGLO primérope, pe kongregasión Colosasguápe naiporãmbái kuri pe situasión. Oĩ vaʼekue ijapytepekuéra umi odividíva ermanokuérape, heʼi rupi tekotevẽha gueteri oñekumpli pe Léi Mosáika. Oĩ avei umi heʼíva kristianokuéra ndovaleiha ovyʼa, síno ikuentaveha ohasa asýnte. Pablo ohechauka hag̃ua noĩporãiha umi mbaʼe omboʼéva hikuái, ohai peteĩ kárta pe kongregasiónpe. Haʼe heʼi: “Peñatendéke ani avave oiporu yvypóra arandu, ni heʼi peẽme vyrorei penembotavy hag̃ua ha pendereity iñuhãme. Haʼekuéra ojevale umi kostúmbre kuimbaʼekuéra omboʼévare ha umi mbaʼe oñepensávare ko múndope, ha ndoiporúi Cristo omboʼéva” (Col. 2:8).

² Umi kristiáno openárire ‘umi mbaʼe oñepensávare ko múndope’, omboykéta kuri Ñandejára ojapóva osalva hag̃ua chupekuéra (Col. 2:20-23). Ikatu hag̃uáicha akóinte oĩ porã hikuái Jehovándi, Pablo heʼi chupekuéra: “Pepensa memékena umi mbaʼe yvagapeguáre ha ani umi mbaʼe ko yvy arigua rehe” (Col. 3:2). Jahechaháicha, Cristo ermanokuéra tekotevẽ kuri opensa meme pe esperánsa orekóvare hikuái “yvágape” (Col. 1:4, 5).

 3. a) ¿Mbaʼe esperánsarepa opensa meme umi kristiáno unhído? b) ¿Mbaʼe mbaʼépa ñahesaʼỹijóta ko artíkulope?

³ Umi kristiáno unhído ñane tiempopegua opensa meme Ñandejára Rréino yvagapeguáre ha ‘pe erénsiare’, oñemeʼẽtava chupekuéra Cristo ndive (Rom. 8:14-17). Péro, ¿mbaʼépa jaʼekuaa umi ‘ambue ovechakuérare’, orekóva esperánsa oikovévo opa árare ko yvy ape ári? ¿Mbaʼéichapa umi “ambue ovechakuéra” ikatu ojapo Pablo heʼi vaʼekue? ¿Mbaʼéichapa haʼekuéra ikatúta opensa meme “umi mbaʼe yvagapeguáre”? (Juan 10:16.) Abrahán ha Moisés ningo opensa meme vaʼekue “umi mbaʼe yvagapeguáre”, ohasárõ jepe heta mbaʼe ijetuʼúva. ¿Mbaʼépa ikatu ñaaprende chuguikuéra?

 4. ¿Mbaʼéichapa ambue ovechakuéra ikatu opensa meme umi mbaʼe yvagapeguáre?

⁴ Umi ambue ovechakuéra ndohomoʼãiramo jepe yvágape, ikatúnte avei opensa “umi mbaʼe yvagapeguáre”. ¿Mbaʼéichapa ojapo hikuái upéva? Omotenondévo Jehovápe ha Irréino (Luc. 10:25-27). Jesús ojapo vaʼekue upéicha ha ñande jasegi vaʼerã iñehémplo (1 Ped. 2:21). Síglo primérope guaréicha, koʼág̃a avei ko múndope oñemombaʼeterei umi mbaʼerepy, oĩ enseñánsa japu ha hetave mbaʼe oúva Satanásgui ha ikatúva ñandegueraha vai (elee 2 Corintios 10:5). Péro Jesús ojapo haguéicha, ñañatende ha ñañeñangareko vaʼerã ani hag̃ua jajapo mbaʼeve ikatúva ñanemoĩ vai Jehovándi.

 5. ¿Mbaʼéichapa japilláta oiméramo ova ñanderehe ko múndope oñepensáva?

⁵ ¿Ipuʼakápa ñanderehe pe múndo ha ñañepyrũma ñapensa umi hénteicha pe plátare ha umi mbaʼerepýre? ¿Mbaʼéichapa ikatu jaikuaa mbaʼe mbaʼépa hína iñimportanteve ñandéve g̃uarã? Ñañatende vaʼerã ñapensa ha jajapóvare. Jesús heʼi: “Ne mbaʼerepy oĩháme, upépe avei oĩta ne korasõ” (Mat. 6:21). Upévare jajepyʼamongeta vaʼerã jaikuaa hag̃ua mbaʼépa jareko ñane korasõme. Ikatu ñañeporandu: “¿Apensaitereípa plátarente, umi traváho oñegana porãvévare térã negósiore? ¿Hiʼãitereípa chéve aiko kómodamente, térãpa añekontenta arekomívarente ha añeinteresave umi mbaʼe omombaretévare che jerovia?” (Mat. 6:22). Jesús heʼi vaʼekue ikatuha ñamboyke Jehovápe jaikóramo ñambyaty “mbaʼerepy ko yvy ape ári” (Mat. 6:19, 20, 24).

 6. ¿Mbaʼépa jajapo vaʼerã ani hag̃ua ipuʼaka ñanderehe umi mbaʼe vai jajaposéva?

⁶ Ñaneimperfékto rupi, ndahasyiete jajapo hag̃ua ivaíva (elee Romanos 7:21-25). Ñandejára espíritu ndaiporivéiramo ñanendive, ikatu hína jaju jajapo ‘umi tembiapo pytũmbypegua’, por ehémplo “jafarrea itarovávaicha”, “ñandekaʼu”, “ñanderekovai” térã jaiko “ñanerembiapo vai ñatĩʼỹre” (Rom. 13:12, 13). Ikatu hag̃uáicha ñandepuʼaka “umi mbaʼe ko yvy arigua rehe”, térã umi mbaʼe ñandestirávare ñaneimperfékto rupi, tekotevẽ ñapensa meme “umi mbaʼe yvagapeguáre”. Péro upéva heta vése ijetuʼu. Upévare apóstol Pablo heʼi: “Chepuʼaka che retére ha areko che rembiguáiramo” (1 Cor. 9:27). Upéicharõ, jaipotáramo Ñandejára ñandeguerohory, tekotevẽ jajopyʼimi ñanendive voi. Jahechamína mbaʼépa ojapo vaʼekue Abrahán ha Moisés osegi hag̃ua iñeʼẽrendu Ñandejárape ipyʼaite guive (Heb. 11:6).

7, 8. a) ¿Mbaʼépa ohasa vaʼekue Abrahán ha Sara osẽ rire Úrgui? b) ¿Mbaʼérehepa Abrahán opensa meme vaʼekue?

⁷ Jehová ojerurérõ guare Abrahánpe ova hag̃ua Canaánpe haʼe ha hogayguakuéra, pyaʼe ojapo Ñandejára heʼíva chupe. Jehová ohechávo mbaʼéichapa Abrahán ojerovia ha iñeʼẽrendu, ojapo hendive peteĩ pákto. Opromete chupe: “Ajapóta ndehegui peteĩ tetã ndetuicháva” (Gén. 12:2, ÑÑB). Péro upéi ohasa pe tiémpo, ha Abrahán ha Sara ndorekói gueteri ni peteĩ mitã. Oiméne haʼekuéra oñeporandu rakaʼe noiméipa Jehová hesarái mbaʼe ipromésagui. Katuete ijetuʼúne raʼe Abrahán ha Sárape oheja hag̃ua iparientekuéra ha hóga oĩva Úrpe. Upépe ningo oiko porã vaʼekue hikuái. Péro haʼekuéra iñeʼẽrendu ha oviaha 1.600 kilómetro rasa og̃uahẽ hag̃ua Canaánpe. Upépe oiko hikuái óga kárpape, ohasa ñembyahýi ha ojekuida vaʼerã umi mondahágui (Gén. 12:5, 10; 13:18; 14:10-16). Upéicharõ jepe, ni nopensái hikuái oho jeývo Úrpe oiko porãve hag̃ua (elee Hebreos 11:8-12, 15).

⁸ Abrahán nopensái vaʼekue “umi mbaʼe ko yvy arigua rehe”, upéva rangue ‘ojerovia Ñandejárare’ (Gén. 15:6, ÑÑB). Haʼe opensa meme umi mbaʼe yvagapeguáre, térã Jehová promesakuérare. Ha Ñandejára ohechávo mbaʼéichapa isiérvo ojerovia hese, ojaparese chupe ha heʼi: ‘Emaʼẽmína yvágare ha eñehaʼã eipapa umi mbyjaita, jahecha ikatúpa. Péicha hetáta ne ñemoñare’ (Gén. 15:5). Oiméne omokyreʼỹete raʼe chupe upéva. Jehová ndahesaráiri ipromésagui. Abrahán omaña vovénte pe yvága ha umi estrellaita ojajaipávare, imanduʼáta Jehová opromete vaʼekuére chupe. Upéi og̃uahẽ sapyʼa pe tiémpo, ha Abrahán ha Sara oreko peteĩ mitã (Gén. 21:1, 2).

 9. ¿Mbaʼépa ñaaprende Abrahán ehémplogui?

⁹ Ñande avei koʼág̃a ñahaʼarõ hína oñekumpli Ñandejára promesakuéra, Abrahán ohaʼarõ haguéicha (2 Ped. 3:13). Upévare ñapensa meme vaʼerã umi mbaʼe yvagapeguáre, ha pyaʼeterei og̃uahẽta pe tiémpo ñahaʼarõva. Péro ndajajapóiramo upéicha, ikatu hína ñanekaneʼõ ha nañanekyreʼỹvéi jaservívo Jehovápe. ¿Ndépa reheja vaʼekue heta mbaʼe ikatu hag̃uáicha reservi kómo prekursór térã rejapove hag̃ua ambue mbaʼe Jehovápe g̃uarã? Oimérõ upéicha, ¡rejapo porã hína! Péro ¿mbaʼépa erekuaa koʼág̃a nde servísio rehe? Nemanduʼa vaʼerã Abrahán osegi hague omaña meme ‘pe siuda oguerekóvare simiénto teete’, térã umi mbaʼe porãita ohupytýtavare tenonderãme (Heb. 11:10). “Abrahán ojerovia Jehováre ha upévare ojeʼe hese hekojojaha” (Rom. 4:3).

10. ¿Mbaʼéichapa oñehekomboʼe vaʼekue Moiséspe imitãrusúpe?

¹⁰ Moisés opensa meme vaʼekue avei umi mbaʼe yvagapeguáre. Imitãrusúpe “oñehekomboʼe opaite umi Egiptogua arandúpe”. Upéva hína pe edukasión ijyvatevéva ikatúva ojehupyty upe tiémpope. Hiʼarive opertenese vaʼekue pe faraón famíliape. Jahechaháicha, Moisés ijestúdio porã vaʼekue. Ndareíri voi ojeʼe hese ojapo hague ‘heta mbaʼe ndaijojaháiva ha iñeʼẽkuaaha’ (Hech. 7:22). Haʼe ikatu kuri ohupyty heta mbaʼe ko múndo oikuaveʼẽva. Péro chupe g̃uarã iñimportanteve vaʼekue ojapo Ñandejára rembipota.

11, 12. ¿Mbaʼeichagua edukasiónpa iñimportanteve vaʼekue Moiséspe g̃uarã, ha mbaʼéichapa ohechauka upéva?

¹¹ Moisés sy tee hérava Jokébed, katuete oñeʼẽne raʼe chupe michĩete guive umi evréo Járare. Ha Moiséspe g̃uarã iñimportanteterei vaʼekue umi mbaʼe oaprendéva Jehovágui. Upéicha rupi haʼe ohejapaite umi mbaʼerepy ha autorida orekóva Egíptope (elee Hebreos 11:24-27). Moisés ojerovia mbarete Jehováre, ha umi mbaʼe oaprendéva chugui imitã guive oipytyvõ chupe opensa meme hag̃ua umi mbaʼe yvagapeguáre.

¹² Moisés orresivi vaʼekue pe edukasión ijyvatevéva ikatu vaʼekue oñemeʼẽ upe tiémpope, péro ndoipurúi upéva oñemofamóso ha ohupyty hag̃ua heta mbaʼerepy Egíptope. La Biblia heʼi voi Moisés rehe: “Ndoipotái vaʼekue ojeʼe hese haʼeha Faraón niéto. Odesidi ikuentaveha ojetrata vai chupe Ñandejára puévlondi, oiko rangue ovyʼa sapyʼami opeka aja”. Moisés oaprende rupi heta mbaʼe Ñandejáragui, tiémpo rire haʼe oipuru chupe omoakã hag̃ua tetã Israélpe.

13, 14. a) ¿Mbaʼépa tekotevẽ vaʼekue oaprende raẽ Moisés omosãso hag̃ua umi isrraelítape? b) ¿Mbaʼépa ñande avei tekotevẽ jajapo?

¹³ Moisés ohayhu vaʼekue Jehovápe ha umi isrraelíta oĩvape esklávoramo Egíptope. Haʼe orekórõ guare 40 áño, opensa kuri oĩmaha preparádo omosãso hag̃ua umi isrraelítape (Hech. 7:23-25). Péro Jehová oikuaa porã ndaupeichaiha. Heta mbaʼe gueteri ofalta chupe upérõ, pór ehémplo tekotevẽ gueteri ojejokokuaave, hekomirĩ, ipasiénsia ha hetave mbaʼe (Prov. 15:33). ¿Maʼerãpa tekotevẽ vaʼekue oaprende raẽ umi mbaʼe? Ikatu hag̃uáicha ogueropuʼaka opa mbaʼe ijetuʼúva ohasátava tenonderãme. Moisés oñangareko vaʼekue 40 áño umi ovecha rehe pe ñúre, oaprende hag̃ua umi kualida.

¹⁴ Añetehápe upéva tuicha oipytyvõ vaʼekue chupe. La Biblia heʼi Moisés rehe: “Haʼeichagua ipyʼaporãva [térã ivuénova] ndaipóri yvy ári” (Núm. 12:3). Moisés iñumílde rupi, ipasiénsia vaʼekue umi isrraelítare ha oñehaʼã ontende káda únope ha umi mbaʼe ohasáva (Éx. 18:26). Upéicha avei ñande tekotevẽ ñaaprende umi kualida ñanepytyvõtava jagueropuʼaka hag̃ua pe ‘jehasa asy guasu’ ha jaike hag̃ua pe múndo pyahúpe (Apoc. 7:14). Ñapensamína, ¿ñañehaʼãpa jajogueraha porã opaichagua tapichándi, tahaʼe umi ipochyreívandi jepe? Apóstol Pedro heʼi vaʼekue: “Pemombaʼe opaichagua yvypórape, pehayhu enterove ermánope” (1 Ped. 2:17).

15, 16. a) ¿Mbaʼérepa tekotevẽ ñapensa meme umi mbaʼe yvagapeguáre? b) ¿Mbaʼérepa iñimportantete jajeporta porã?

¹⁵ Koʼág̃a ningo jaiko “umi ára pahápe” ha jahasa heta situasión ‘ijetuʼu ha hasýva jagueropuʼaka hag̃ua’ (2 Tim. 3:1). Upévare tekotevẽ ñapensa meme Ñandejára promesakuérare, upéicharõmante ñañatende porãta ha ñamombaretéta ñande jerovia (1 Tes. 5:6-9). Jahechamína mbaʼéichapa ikatu jahechauka ñapensa memeha umi mbaʼe yvagapeguáre.

¹⁶ Jaiko lájare: ¿Mbaʼérepa iñimportantete jajeporta porã? Pedro heʼi: “Akóinte penderekoporã vaʼerã umi hénte ko mundopegua apytépe, péicha haʼekuéra [...] ohecháta umi mbaʼe porã pejapóva ha upe haguére ombotuicháta hikuái Ñandejárape” (1 Ped. 2:12). Ñaime ñaimehápe, tahaʼe ñande rógape, ñande travahohápe, koléhiope, predikasiónpe térã ambue hendápe, jaiko vaʼerã ñamombaʼeguasu hag̃uáicha Jehovápe. Upéicharõ jepe, sapyʼánte enterovéva ikatu jajavy (Rom. 3:23). Péro jasegíramo ñañorairõ “pe ñorairõ iporãva ñadefende hag̃ua ñande jerovia”, katuete ñandepuʼakáta umi mbaʼe vai jajaposévare ñaneimperfékto rupi (1 Tim. 6:12).

17. ¿Mbaʼéichapa ikatu jasegi Jesús ehémplo? (Ehecha pe taʼanga oĩva iñepyrũme.)

¹⁷ Ñapensa lájare: Ikatu hag̃uáicha jajeporta porã, tekotevẽ avei ñapensa umi mbaʼe iporãvare. Apóstol Pablo heʼi: “Pesegíkena pepensa Cristo Jesús opensa haguéicha” (Filip. 2:5). ¿Mbaʼéichapa Cristo opensa vaʼekue ijehe? Haʼe noñembotuichái vaʼekue, síno iñumílde, ha upéva omomýi chupe oñemeʼẽmbaite hag̃ua Jehová rehehápe. Haʼe oaprovechapaite vaʼekue opa oportunida orekóva oñeʼẽ hag̃ua umi héntepe Ñandejára Rréinore (Mar. 1:38; 13:10). Avei, chupe g̃uarã Ñandejára Ñeʼẽ iñimportanteve opa mbaʼégui (Juan 7:16; 8:28). Upévare ohesaʼỹijo porã, oipuru meme, odefende ha omyesakã. Jasegíkena iñehémplo ha jastudia la Biblia, kyreʼỹme japredika, ha ani ñañembotuicha.

18. ¿Mbaʼéichapa ikatu ñaipytyvõ Jehovápe?

¹⁸ Ñaipytyvõ lájare: Jehová ningo oipota ‘Jesús rérape oñesũ enterovéva umi oĩva yvágape, ha umi oĩva yvy ape ári’ (Filip. 2:9-11). Jesús orekóramo jepe tuicha autorida yvágape, siémpre ohechauka iñumílde ha oñemoĩha Itúva poguýpe. Ha ñande jajapo vaʼerã avei upéva (1 Cor. 15:28). Upearã tekotevẽ kyreʼỹme jajapo pe tembiapo Jehová omeʼẽva ñandéve: ñaipytyvõ “opa tetãyguápe oiko hag̃ua chuguikuéra [...] disípulo” (Mat. 28:19). Avei jaaprovecha vaʼerã opa oportunida jajapo hag̃ua “iporãva opavave rehehápe”, tahaʼe ñane ermáno ha ambue tapichakuéra rehehápe (Gál. 6:10).

19. ¿Mbaʼépa ñaaprende ko estúdiope?

¹⁹ Ajépa jaagradesete Jehovápe ñanemomanduʼa haguére ñapensa meme hag̃ua umi mbaʼe yvagapeguáre. Upéva ñanepytyvõta “jadipara meme [hag̃ua] kaneʼõʼỹre pe karréra oñemoĩva ñane renonderãme” (Heb. 12:1). Jajapókena opa mbaʼe “Jehovápe g̃uarãicha”, ha haʼe ipo renyhẽ omeʼẽta ñandéve opa mbaʼe porã (Col. 3:23, 24).