Oñemombarete umi kongregasiónpe

1-3. a) ¿Mávapa omoirũta Páblope isegúndo viáhe de predikasiónpe, ha mbaʼépa jaikuaa upe mitãrusúgui? b) ¿Mbaʼépa ñaaprendéta ko kapítulope?

OGUATA aja ohóvo hikuái peteĩ tape yvy reíre, Pablo omaña mimi jepi ikostádope ha ojepyʼamongetaʼi pe mitãrusu ohóvare hína ijykére. Ko mitãrusu héra Timoteo. Haʼe kyreʼỹ memete, mitãrusu ipórtepe, ha oreko amo 20 áñorupi térã omboty potaite hína. Amedída ke oho hese hikuái, mombyryvéma opyta Timotéogui la hóga. Omañávo hapykue gotyo, pe kaʼaru ládo, apenaiténtema ojekuaa Listra ha Iconio. ¿Mbaʼépa oñepresentáta chupekuéra henonderãme? Pablo oime vaʼerã oikuaa mimíma upéva, pórke kóvare 2 veseháma haʼe ojapóta hína koichagua viáhe de predikasión. Pablo oikuaáma kuri pe viáhe ijetuʼutaha ha heta iprovlemataha hikuái. ¿Péro mbaʼépa ojapóta Timoteo umícha jave?

² Timoteo ningo iñumildeterei vaʼekue ha ni haʼe ndojeroviái vaʼekue ijehe la Pablo ojeroviaháicha hese. Umi mbaʼe oiko ramoite vaʼekuére, Pablo oikuaa porãma kuri ndaikatuiha oimeraẽvapente oraha hendive ko viáhepe. Haʼekuéra ningo ovisitáta hína umi kongregasión omombarete hag̃ua umi ermánope, upévare pe omoirũva Páblope iguápo ha ombaʼapokuaa vaʼerã peteĩ ñeʼẽme. ¿Mbaʼérepa oiméne Pablo opensa raʼe upéicha? Pórke ramoiténte tuichaʼi ojoavy kuri Bernabéndi ha upéicha rupi ojesepara hikuái.

³ Ko kapítulope jahecháta mbaʼépa jajapo vaʼerã oĩ jave joavy ñande apytépe. Jahecháta avei mbaʼérepa apóstol Pablo oelehi kuri Timotéope omoirũ hag̃ua chupe iviahekuérape. Ha ñaaprendéta mbaʼeichaitépa iñimportánte pe traváho ojapóva umi superintendénte de sirkuíto ñane tiémpope.

 4. ¿Maʼerãpa Pablo ojapose raʼe isegúndo viáhe de predikasión?

⁴ Pe kapítulo 14-pe jahecha kuri Pablo, Bernabé, Judas ha Silas tuichaiterei omombarete hague pe kongregasión oĩvape Antioquíape, omombeʼúvo chupekuéra mbaʼépa odesidi pe kuérpo governánte pe sirkunsisiónre. ¿Mbaʼépa ojapo Pablo upéi? Haʼe osẽ heʼi Bernabépe: “Jaha jeýpy javisita umi ermanokuéra oĩvape umi siuda jaikuaauka haguépe Jehová ñeʼẽ, jahecha hag̃ua mbaʼéichapa oĩ hikuái” (Hech. 15:36). Pablo ndahaʼéi vaʼekue ohoséva ovisita umi kristiáno pyahúpe ojepasea hag̃uánte ha oikuaa hag̃uánte mbaʼe novedápa oĩ. Lívro de Héchospe oñemombeʼu porã ñandéve maʼerãpa haʼe ojapose vaʼekue isegúndo viáhe de predikasión. Primero, osegi hag̃ua omombeʼu umi ótro kongregasiónpe la odesidi vaʼekue pe kuérpo governánte (Hech. 16:4). Ha segundo, oipytyvõ hag̃ua umi ermáno ha ermanakuérape imbareteve ha ojeroviave hag̃ua hikuái (Rom. 1:11, 12). ¿Mbaʼéichapa ko ñane tiémpope Jehová organisasión osegi koʼã kristianokuéra ehémplo?

 5. ¿Mbaʼéichapa pe Kuérpo Governánte koʼag̃agua ogia ha omokyreʼỹ ermanokuérape?

⁵ Ko ñane tiémpope Jesús ojevale hína pe Kuérpo Governántere odirihi hag̃ua kompletoite Jehová puévlope. Pe Kuérpo Governánte omokyreʼỹ ha ogia enteroite kongregasiónpe hetaiterei hendáicha, tahaʼe oipurúvo umi kárta, puvlikasionkuéra, umi informasión osẽva Internétpe ha rreunionkuéra. Haʼekuéra ningo oikuaase avei mbaʼéichapa oho hese káda kongregasión, ha upearã ojevale umi ermáno oviahávare ovisita hag̃ua umi kongregasión. Upévare voi pe Kuérpo Governánte oelehíma hetaiterei ermánope oservi hag̃ua superintendénte de sirkuítoramo.

6, 7. ¿Mbaʼe mbaʼépa ojapo umi superintendénte de sirkuíto?

⁶ Umi superintendénte katu oñeinteresa káda uno umi ermáno ha ermána oĩvare kongregasiónpe, ha oñehaʼãmbaite omombarete enterovéva jerovia. Upearã ojapo hikuái la Pablo voi heʼi vaʼekue Timotéope, ymave oviaháva avei hendive ovisita hag̃ua umi kongregasión. Haʼe heʼi chupe: “Epredikákena Ñandejára ñeʼẽ, ha ejapóke upéva kyreʼỹme tahaʼe iporã térã ivai jave la situasión, ehechauka ótrope mbaʼépepa ojavy, eñemoñeʼẽ mbarete porã, emeʼẽ konsého, nepasiénsiakena rejapo hag̃ua entéro koʼã mbaʼe ha ndevaléke reporomboʼe hag̃ua. […] Esegi epredika umi notísia porã” (2 Tim. 4:2, 5).

⁷ Umi superintendénte okumpli la heʼíva ko téxto, upévare omoirũ umi puvlikadórpe predikasiónpe ha avei ojapo rrevisíta ha kúrso bíblico hendivekuéra. Ha oiméramo omenda katu, hembireko osẽ avei hendivekuéra. Koʼã ermáno ningo ikyreʼỹeterei predikasiónpe ha oipurukuaaiterei la Biblia oporomboʼe hag̃ua, upéicha omoĩ hikuái ehémplo porã enterovépe ha omokyreʼỹ ermanokuérape (Rom. 12:11; 2 Tim. 2:15). Umi superintendéntepe ojekuaa avei oporohayhukuaaiterei haguére ha nopensái haguére ijehénte. Haʼekuéra vyʼápe oipytyvõ umi oikotevẽvape, ha ivaíramo jepe la tiémpo térã ipeligrósoramo jepe la sónape, haʼekuéra lomímonte oviaha hendapekuéra (Filip. 2:3, 4). Umi superintendénte de sirkuíto omboʼe, okorrehi ha omokyreʼỹ avei enterovévape idiskursokuéra rupive. Entéro oĩva kongregasiónpe ojapo porãta ojesarekóramo koʼã ermánore osegi hag̃ua iñehémplo ha ikyreʼỹ avei haʼekuéraicha (Heb. 13:7).

 8. ¿Mbaʼépa opensa raʼe Bernabé la Pablo heʼi vaʼekuére chupe?

⁸ Bernabépe ogustaiterei la Pablo heʼíva chupe ha ohose avei ‘ovisita umi ermanokuérape’ (Hech. 15:36). Mokõivéva ningo oviaháma vaʼekue voi oñondive ha oikuaapáma hikuái moõ moõpa oho vaʼerã ha máva mávapepa oho vaʼerã ovisita (Hech. 13:2–14:28). Opyta porãitereíta kuri chupekuéra oho jeýramo oñondive, péro upéi oñembyai hikuái. Bernabé “oguerahase katuete hendivekuéra Juánpe, oñehenóiva avei Marcos” (Hech. 15:37). Haʼe ndahaʼéi oporandu mbaʼéva Páblope ikatúpa ogueraha Márcospe, haʼe “oguerahase katuete” iprímope ko viáhepe.

 9. ¿Mbaʼérepa Páblope ndogustái raʼe la Bernabé ojaposéva?

⁹ Páblope katu ndogustaiete voi upéva. ¿Mbaʼérepa? La Biblia heʼi: “Pablo ndoguerahaséi chupe, oheja rei haguére chupekuéra Panfíliape, ha ndohói hendivekuéra opredika” (Hech. 15:38). Marcos ningo ohóma vaʼekue hendivekuéra pe primer viáhe de predikasiónpe, péro oheja rei kuri chupekuéra tapére (Hech. 12:25; 13:13). Oñepyrũ ramo léntope la viáhe, Marcos ohejáma chupekuéra Panfíliape ha ojevy jeýnte hógape Jerusalénpe. La Biblia nomombeʼúi ñandéve mbaʼérepa haʼe ojapo kuri upéva, péro por lo vísto Pablo opensáma hese iñirresponsavleha ha ndaikatuiha jajerovia hese.

10. ¿Mbaʼérepa noñontendéi raʼe Pablo ha Bernabé, ha mbaʼépa oiko upe haguére?

¹⁰ Bernabé katu ndoikuaaséi mbaʼeve ha oguerahase katuete Márcospe, péro Pablo ndojaposéi upéva ha ndorahaseiete voi chupe la viáhepe. Upévare heʼiháicha Hechos 15:39-pe “tuicha oiko vai ha ojesepara hikuái”. Bernabé ojagarra peteĩ várko ha osẽ oho ivállepe, Ísla de Chíprepe, ha ogueraha hendive Márcospe. Pablo osẽ avei oho ha “oiporavo Sílaspe, ha umi ermáno ojerure rire Jehovápe oñangareko hag̃ua hese, oho upégui” (Hech. 15:40). Pablo ha Silas oviaha oñondive “Siria ha Cilíciarupi omombarete hag̃ua umi kongregasiónpe” (Hech. 15:41).

11. ¿Mbaʼépa ñanepytyvõta ani hag̃ua japyta ñandepyʼaro oĩramo ñanemoñeñandu vaíva?

¹¹ Ko rreláto ñanemomanduʼa enterovéva ñaneimperfektoha. Pablo ha Bernabépe ningo ojeelehi kuri orrepresenta hag̃ua pe kuérpo governántepe. Ha tiémpo rire, posívlemente Páblope voi ojeelehi oservi hag̃ua pe kuérpo governántepe. Upéicharõ jepe, ko vuéltape tuicha ojavy hikuái iñimperfékto rupi. ¿Serápa opytátama ipyʼaro hikuái pára siémpre? Nahániri. Iñimperféktoramo jepe hikuái, Pablo ha Bernabé iñumílde vaʼekue ha opensa Jesús opensaháicha. Upéicha rupi tiémpo rire, mokõivéva ohechauka ojoayhuha ha oñoperdonamaha (Efes. 4:1-3). Tiémpo rire, Pablo ha Marcos ombaʼapo jeýma kuri oñondive Jehová servísiope (Col. 4:10).a

12. ¿Mbaʼéichapa umi ansiáno ha umi superintendénte ikatu osegi Pablo ha Bernabé ehémplo?

¹² Pablo ha Bernabé ipochyete voi kuri oñondive, péro haʼekuéra ndahaʼéi vaʼekue umi ipochypa reíva rehegua. Bernabé ikonosído vaʼekue pórke imbaʼeporã ha ipojera enterovévandi. Upévare umi apóstol oikuaáramo jepe haʼe heraha José, ombohéra vaʼekue chupe Bernabé, heʼiséva “peteĩ oporomokyreʼỹva” (Hech. 4:36). Ha Pablo katu ikonosído vaʼekue avei imbaʼeporãiterei ha otrata porã rupi ermanokuérape (1 Tes. 2:7, 8). Ojapo haguéicha Pablo ha Bernabé, umi ansiáno ha umi superintendénte koʼag̃agua oñehaʼãmbaite vaʼerã avei iñumílde, ojotrata porã ha okuida porã ermanokuérare (1 Ped. 5:2, 3).

13, 14. a) ¿Mávapa rakaʼe Timoteo, ha mbaʼéichapa oiméne Pablo oikuaa raʼe chupe? b) ¿Mbaʼérepa Pablo oipota kuri Timoteo omoirũ chupekuéra iviáhepe? c) ¿Mbaʼépa ojejerure Timotéope ojapo hag̃ua?

¹³ Oñepyrũ rire isegúndo viáhe de predikasión, Pablo ovisita unos kuánto kongregasión opytáva Galáciape. Upe tiémpope ko lugár oĩ vaʼekue Roma poguýpe. Upe rire “Pablo og̃uahẽ Dérbepe ha avei Lístrape”, ha upépe otopa “peteĩ disípulo hérava Timoteo”. Ko mitãrusu sy ningo “peteĩ disípula judía, péro itúa griego” (Hech. 16:1).b

¹⁴ Mbyky oime Pablo oikuaáma voi raʼe Timoteo ha ihentekuérape áño 47-pe rupi, ovisitárõ guare upe sóna iprimér viáhe de predikasiónpe. Koʼág̃a ohasávo 2 térã 3 áñorupi, ojapokuévo isegúndo viáhe de predikasión, Pablo opensáma oinvitávo Timotéope omoirũ hag̃ua chupe. ¿Mbaʼérepa? Pórke umi ermáno “oñeʼẽ porãiterei hese”, ndahaʼéi voi ikongregasiónpente síno avei umi ótra kongregasiónpe. La Biblia heʼi umi ermáno oĩva Lístrape oñeʼẽ porã hague hese, ha umi Iconiogua upéicha avei, opytáramo jepe 30 kilómetrorupi ivállegui (Hech. 16:2). Espíritu sánto rupive, umi ansiáno omeʼẽ Timotéope peteĩ rresponsavilida iñimportantetereíva. Heʼi chupe hikuái oipytyvõ hag̃ua Pablo ha Sílaspe iviahekuérape (Hech. 16:3).

15, 16. ¿Mbaʼérepa oñeñeʼẽ porãite vaʼekue Timotéore?

¹⁵ ¿Mbaʼérepa oiméne oñeñeʼẽ porãite raʼe Timotéore imitãitiramo jepe? ¿Noiméi piko pórke iñakãporãiterei, ipínta porã térã ivaleterei rupi? La majoría ningo omombaʼeterei jepi koʼã mbaʼe, proféta Samuel jepe péicha vaʼekue. Peteĩ vuéltape, haʼe ojesegi vaʼekue avei la ohechávarente ha omombaʼeterei la ohecháva Jesé raʼýre, péro Jehová heʼi chupe: “Che ahecha lája umi héntepe idiferénte. Peẽ pejesegi la pehechávarente, péro Jehová ohecha umi hénte korasõme oĩva” (1 Sam. 16:7). Umi ermáno oñeʼẽ porã vaʼekue Timotéore, ndahaʼéi ojesegi rupi umi mbaʼe ohechávarente, síno oikuaa rupi mbaʼeichagua persónapa haʼe ha avei umi kualida porã orekóva.

¹⁶ Unos kuánto áño upe rire, apóstol Pablo omombeʼu vaʼekue mbaʼeichagua kristiánopa Timoteo. Pablo heʼi vaʼekue hese ijaktitu porãha, oĩha ojapo hag̃uáicha oimeraẽ mbaʼe oporohayhu rupi ha okumpli porãha oñemeʼẽva guive chupe (Filip. 2:20-22). Ha Timotéore ojeʼe vaʼekue avei ojeroviaha “tovamokõiʼỹre” (2 Tim. 1:5).

17. ¿Ojoguápa Timotéope umi mitãrusu ha mitãkuña koʼag̃agua?

¹⁷ Ñane tiémpope oĩ avei heta mitãrusu ha mitãkuña ojoguáva Timotéope ha orekóva avei heta kualida porã. Imitãitiramo jepe hikuái, haʼekuéra oñehaʼãmbaite avei oñeñeʼẽ porã hag̃ua hesekuéra ha Jehová oguerohory hag̃ua chupekuéra (Prov. 22:1; 1 Tim. 4:15). Timotéoicha avei, haʼekuéra ojerovia “tovamokõiʼỹre”, ha ndoikói ojapo kañyháme umi mbaʼe ndogustáiva Jehovápe (Sal. 26:4). Koʼãichagua mitãrusu ha mitãkuña ideprovechoiterei kongregasiónpe, ideprovécho haguéicha avei Timoteo ymave. Enterovévante ovyʼaiterei umi imitãvagui oiko jave puvlikadór, ha koʼytevéntema ojevyʼa oñemeʼẽ jave hikuái Jehovápe ha ojevautisa.

18. a) ¿Mbaʼéichapa Pablo ha Timoteo oipytyvõ vaʼekue pe kuérpo governántepe? b) ¿Mbaʼépa ohupyty umi kongregasión iñeʼẽrendu rupi?

¹⁸ Pablo ha Timoteo ombaʼapo vaʼekue oñondive heta áñore. Haʼekuéra heta oviaha vaʼekue pe kuérpo governánte ojerure rupi chupekuéra. La Biblia heʼi voi: “Haʼekuéra oviahávo ohóvo umi siudárupi, omombeʼu umi ermáno upepeguápe mbaʼépa odesidi raʼe umi apóstol ha ansianokuéra oĩva Jerusalénpe, ikatu hag̃uáicha okumpli hikuái umi mbaʼe” (Hech. 16:4). Ojekuaa porãiterei avei umi kongregasión ojapo hague la heʼíva pe kuérpo governánte oĩva Jerusalénpe. Upéicha rupi “osegi ojerovia mbareteve ha káda día heta hetave hikuái” (Hech. 16:5).

19, 20. ¿Mbaʼérepa ñaneñeʼẽrendu vaʼerã umi ñandegiávape?

¹⁹ Koʼág̃arupi avei, ñande kyreʼỹme jajapo jave la heʼíva ‘umi ñandegiáva’, enterovévante jahupyty heta mbaʼe porã kongregasiónpe (Heb. 13:17). Umi mbaʼe “oikóva ko múndope okambia hína” ohóvo, upévare iñimportanteterei jajapo la heʼíva ñandéve “pe esklávo de konfiánsa ha iñarandúva”. Ha ndahaʼéi voi upévante, ñañehaʼã vaʼerã avei pyaʼe voi jaikuaa ha ñantende porã umi informasión ipyahuvéva omog̃uahẽva ñandéve pe esklávo de konfiánsa (Mat. 24:45; 1 Cor. 7:29-31, nóta). Koʼã mbaʼe ñanepytyvõta jasegi hag̃ua jajerovia mbarete Jehováre ha “ani hag̃ua ko múndo ñanemongyʼa” (Sant. 1:27).

²⁰ Jaikuaaháicha, enterovéva umi ansiáno iñimperfékto, umi oĩva pe Kuérpo Governántepe entéro. Ha upeichaiténte vaʼekue avei ymave umi ansiáno, por ehémplo Pablo, Bernabé, Marcos ha hetave ótro unhído (Rom. 5:12; Sant. 3:2). ¿Ikatúpa upéicharõ jajerovia pe Kuérpo Governántere? Si, pórke haʼekuéra ojegia la Biblia heʼívare ha ojapo entéro mbaʼe ojapo haguéicha umi kristiáno yma guare (2 Tim. 1:13, 14). Upéicha rupi, umi oĩva kongregasiónpe imbarete ha osegi ojerovia Jehováre.