Jehová ñanemosãso

‘Emaʼẽ porã pe léi hekoitepegua ha ñanemosãsóvare.’ (SANT. 1:25)

¿MBAʼÉICHAPA REMBOHOVÁITA?

¿Mbaʼe léipa ñandeprepara ñanesãso hag̃ua, ha máva mávapepa oipytyvõ upéva?

¿Mbaʼépa tekotevẽ jajapo jajuhu hag̃ua pe liverta?

¿Mbaʼeichagua livertápa ohupytýta umi akóinte ojapóva Ñandejára rembipota?

1, 2. a) ¿Mbaʼérepa umi hénte ndorekovéi liverta? b) ¿Mbaʼeichagua livertápa ohupytýta Ñandejára rembiguaikuéra?

JAIKO ningo peteĩ tiémpo oĩháme heta hetave umi iñañáva, itaryrýiva ha ojahéiva hapicháre (2 Tim. 3:1-5). Upévare umi goviérno oguenohẽve heta léi ipyahúva, omoĩ hetave polisía ha kámara de vihilánsia ojokove hag̃ua koʼã mbaʼe. Ha opárupi umi hénte omoĩ hógape alárma, sérka eléktrika ha oñembolláve joʼapa. Oĩ avei nosẽiva hógagui pyharekue ha ndohejái ifamiliakuéra ohuga haʼeño kállepe ni arakue jepe. Opa umívare, umi hénte ndorekovéi liverta, ha haʼete voi ivaivétava ohóvo ñane situasión.

² ¿Mbaʼépa upéicharõ ñaikotevẽ ñanesãso hag̃ua? Hardín de Edénpe, Satanás heʼivaʼekue tekotevẽha ñamboyke Jehovápe jareko hag̃ua liverta. ¡Ajépa ijapuete Satanás! Añetehápe, umi hénte ndojapóivo Ñandejára heʼíva ha oñemomombyrývo chugui, koʼýte opavave ohasa asy. Ha ñande jaservíva Jehovápe jahasa asy avei upevakuére. Péro la Biblia omeʼẽ ñandéve peteĩ esperánsa ñanembovyʼáva. Heʼi pype ikatuha jajei pekádo ha ñehundi poguýgui ha jahupyty “Ñandejára raʼykuéra liverta ijojahaʼỹva” (Rom. 8:21, NM). Ha Jehová koʼág̃a ñandepreparáma jahupyty hag̃ua upe liverta. ¿Mbaʼéichapa ojapo upéva?

 3. ¿Mbaʼe léipa Jehová omeʼẽ kristianokuérape, ha mbaʼe porandúpa ñambohováita?

³ Ikatu hag̃uáicha jahupyty pe liverta, Jehová omeʼẽ ñandéve ‘pe léi hekoitepegua ha ñanemosãsóva’, Santiago heʼi haguéicha (elee Santiago 1:25). Péro heta tapicha ohendúvo oñeñeʼẽha léi rehe, nopensái oguerekovetaha liverta, síno oimoʼã ojejopyve reiha chupekuéra. ¿Mbaʼépa upéicharõ heʼise ‘pe léi hekoitepegua ha ñanemosãsóva’? ¿Mbaʼéichapa upéva omeʼẽ ñandéve liverta?

PE LÉI ÑANEMOSÃSÓVA

 4. ¿Mbaʼépa hína ‘pe léi hekoitepegua ha ñanemosãsóva’, ha máva mávapepa oipytyvõ?

⁴ ‘Pe léi hekoitepegua ha ñanemosãsóva’ ndahaʼéi hína pe Léi oñemeʼẽvaʼekue Moisés rupive. Upéva ningo oñemoĩ “ohechauka hag̃ua umi pekádo”, ha umi profesía oĩva pype oñekumplipa Jesúsre (Mat. 5:17; Gál. 3:19, BNP). Santiago oñeʼẽvaʼekue “Cristo léi” rehe, oñehenóiva avei “léi jerovia rehegua” ha “pe puévlo isãsóva léi” (Gál. 6:2, BNP; Rom. 3:27, NM; Sant. 2:12, NM). Upéicharamo, ko léi hekoitepeguávape oĩ opa mbaʼe Jehová ohaʼarõva ñandehegui. Ko léi oipytyvõ umi unhídope ha avei ‘ambue ovechakuérape’ (Juan 10:16, NM).

 5. ¿Mbaʼérepa ndahasýi ñakumpli pe léi ñanemosãsóva?

⁵ Umi léi oñemoĩva heta tetãme ojerure heta mbaʼe ha hasy jepi oñekumpli hag̃ua. Péro ‘pe léi hekoitepeguávape’ oĩ umi konsého ha mandáto ndahasýiva ñantende ha jajapo hag̃ua (1 Juan 5:3). Jesús heʼivaʼekue: “Che júgo napendeforsamoʼãi ha che kárga ivevýi” (Mat. 11:29, 30, NM). Avei ‘pe léi hekoitepeguáva’ oñemopyenda mborayhúpe ha noĩri pype kondéna térã kastígo. Ojehai ñane akã ha ñande pyʼapýpe, ndahaʼéi itáre, ojehai haguéicha umi diez mandamiénto (elee Hebreos 8:6, 10).

MBAʼÉICHAPA ÑANEMOSÃSO ‘PE LÉI HEKOITEPEGUÁVA’

6, 7. a) ¿Mbaʼépa jaʼekuaa umi konsého ha mandáto Jehová omeʼẽvare? b) ¿Mbaʼéichapa ñanemosãso ‘pe léi hekoitepeguáva’?

⁶ Jehová heʼi ñandéve mbaʼépa ikatu jajapo térã ndovaléi jajapo, ha umíva ñanepytyvõ ñañeñangareko hag̃ua. Ñapensamíntena umi léi naturál Jehová omoĩvare, pór ehémplo pe léi de la graveda. Oĩ rupi graveda, umi mbaʼe ndoikói ovevyipa opárupi, síno opa mbaʼe oĩ ha opyta hendaitépe. ¿Máva piko heʼíne ko léi oipeʼaha ñandehegui liverta? Ñande ningo jarrespeta koʼãichagua léi ha jahechakuaa ideprovechoitereiha. Péicha avei, umi konsého ha mandáto Jehová omoĩva pe ‘léi hekoitepeguávape’ térã ‘Cristo léipe’, katuete ñanepytyvõ ha ou porã ñandéve.

⁷ Pe léi ñanemosãsóva oñangareko ñanderehe, ha avei oheja jajapo umi mbaʼe ñandegustáva oĩva hekópe jajeperhudikaʼỹre ñande ni ñande rapichakuérape. Upéicharõ, ikatu hag̃uáicha jahupyty liverta, térã jajapo hag̃ua jajaposéva, ñandegustavaʼerã umi mbaʼe hekopeguávante ha Jehová oguerohorýva. Upéva heʼise jahayhuvaʼerãha opa mbaʼe Ñandejára ohayhúva ha ndajachaʼeivaʼerã haʼe ndaijaʼéivare. Ha pe léi ñanemosãsóva ñanemboʼe koʼã mbaʼe (Amós 5:15).

8, 9. ¿Mbaʼépa jahupyty jaikóramo pe léi ñanemosãsóva ojerureháicha? Emoĩ peteĩ ehémplo.

⁸ Ñaneimperfékto aja hasýta ñandéve jajejokokuaa hag̃ua opa mbaʼépe. Péro ñaneñeʼẽrendúramo Jehovápe ha jasegi pe léi ñanemosãsóva, katuete ñañandúta jarekoha liverta koʼág̃ama voi. Péva ohechauka Jay ehémplo. Oñepyrũrõ guare ostudia la Biblia haʼe opitavaʼekue, péro upéi ohechakuaa Ñandejárape ndogustaiha pe vísio. Upe rire odesidimavaʼerã mbaʼépa ojapóta: ohejátapa ko vísio ipuʼaka hese, térãpa ojapóta Jehová oipotáva. Ipahápe, odesidi oservi Ñandejárape ha oñehaʼãmbaite oheja pe vísio vaiete. ¿Mbaʼéichapa oñeñandu oheja rire pe sigarríllo? Jay heʼi: “Añeñandu porã ha avyʼaiterei chesãsóma haguére”.

⁹ Jay oaprende peteĩ mbaʼe iñimportantetereíva: pe liverta ko múndo oikuaveʼẽva, heʼiséva “ñapensa meme ñande rete rembipotáre”, añetehápe ñandereko tembiguáiramo; péro pe liverta omeʼẽva ñandéve Jehová, heʼiséva “ñapensa meme espíritu sánto oguerohorývare”, ñanemosãso ha omeʼẽ ñandéve ‘jeikove ha pyʼaguapy’ (Rom. 8:5, 6, NM). ¿Mbaʼépa oipytyvõ Jáype oheja hag̃ua pe vísio? Jehová omombarete chupe. Ha haʼe omombeʼu mbaʼépa ojapo: “Astudia meme la Biblia, ajerure Ñandejárape ijespíritu sánto ha aheja umi ermáno oĩva kongregasiónpe chepytyvõ”. Jahechamína koʼág̃a mbaʼéichapa koʼã mbohapy mbaʼe ikatu avei ñanepytyvõ ñanesãso hag̃ua.

ÑAHESAʼỸIJO PORÃ VAʼERÃ ÑANDEJÁRA ÑEʼẼ

10. ¿Mbaʼépa heʼise pe ñeʼẽ “omaʼẽ porãva” Ñandejára léi rehe?

¹⁰ Santiago 1:25 opromete: ‘Omaʼẽ porãva pe léi hekoitepegua ha ñanemosãsóvare, ha oñehaʼãmbaitéva ojapo, ovyʼáta ojapo haguére upéva’. Pe ñeʼẽ griégo koʼápe ojetradusíva “omaʼẽ porãva”, heʼise “ojayvy omaña hag̃ua” ha ohechauka oñehaʼã ha ojesareko porãha. Upéicharõ, ikatu hag̃uáicha pe léi ñanemosãsóva ipuʼaka ñapensávare ha opoko ñane korasõre, tekotevẽ jastudia porã la Biblia, jajepyʼamongeta hese ha ñañemboʼe (1 Tim. 4:15).

11, 12. a) ¿Mbaʼéichapa Jesús ohechauka tekotevẽha ojekuaa jaiko lájare jajapoha Jehová rembipota? b) Jahechaháicha umi taʼanga yvateguápe, ¿mbaʼéguipa oñeñangarekovaʼerã umi imitãva?

¹¹ Péicha avei, akóinte jajapovaʼerã Ñandejára Ñeʼẽ heʼíva ha ojekuaavaʼerã jaiko lájare jajapoha Jehová rembipota. Jesús heʼi avei hemimboʼekuérape: “Pejapo meméramo che haʼéva, peẽ añetehápe che remimboʼe. Peikuaáta pe añetegua ha pe añetegua penemosãsóta” (Juan 8:31, 32, NM). Heʼiháicha peteĩ diksionário, pe ñeʼẽ “peikuaa”, ndeʼiséi jaikuaanteha peteĩ mbaʼe, síno “ñamombaʼeha” upe jaikuaáva ha iñimportantetereiha ñandéve g̃uarã. Ha jahechauka hag̃ua jaikuaaha pe añetegua, tekotevẽ jaiko la Biblia heʼiháichaite ha ñamombaʼe heʼíva pype. Upéichamante jaʼekuaa ‘Ñandejára Ñeʼẽ ombaʼapoha’ ñanderehe ñahaʼanga hag̃ua ñande Ru yvagayguápe (1 Tes. 2:13, ÑÑB).

¹² Ñañeporanduvaʼerã: “¿Aikuaa porãpa hína Ñandejára Ñeʼẽ omboʼéva? ¿Ahechaukápa che rekovépe aikoha Jehová oipotaháicha? ¿Térãpa aguerohory gueteri umi liverta ko múndo oikuaveʼẽva?”. Peteĩ ermána okakuaavaʼekue peteĩ família kristiánape, imanduʼa oikovaʼekuére hese imitãvérõ guare. Haʼe omombeʼu: “Jakakuaáramo peteĩ família Testígope, jaguerovia Jehová oĩha, upéicharõ jepe, che ndaikuaaporãiva Chupe. Aguerohory umi mbaʼe Ñandejárape ndogustáiva, apensa haʼe ndojepyʼapyiha cherehe, ha cheprovléma jave ni nañemboʼéi chupe. Chevyraiterei ningo aimoʼãgui aikuaaha heta mbaʼe, péro añetehápe mbaʼevete ndaikuaái”. Ko ermána haʼetépe ohechakuaa ojavyha, ha tuicha okambia. Upe rire oiko avei chugui prekursóra rregulár.

PE ESPÍRITU SÁNTO ÑANEPYTYVÕ ÑANESÃSO HAG̃UA

13. ¿Mbaʼéichapa pe espíritu sánto ñanepytyvõ ñanesãso hag̃ua?

¹³ La Biblia heʼi 2 Corintios 3:17-pe: “Ñandejára espíritu oĩháme, upépe oĩ [liverta]”. ¿Mbaʼéichapa pe espíritu sánto ñanepytyvõ ñanesãso hag̃ua? Pór ehémplo, chugui ou “mborayhu, vyʼa, pyʼaguapy, pasiénsia, mbaʼeporã, pyʼaporã, jerovia, pochyʼỹ ha jejokokuaa” (Gál. 5:22, 23, NM). Ko múndope ndaikatumoʼãi jareko liverta ndaipóriramo koʼã mbaʼe porãite, koʼýte pe mborayhu. Pablo omombeʼu rire umi mbaʼe porã oúva espíritu sántogui, heʼi: “Ndaipóri léi oñemoĩva koʼã mbaʼére”. Upeichaite, ndaipóri koʼág̃a ni ndaiporimoʼãi arakaʼeve mbaʼeveichagua léi ikatúva ñandejoko jahechauka hag̃ua koʼã mbaʼe porãite (Gál. 5:18). Jehová oipota opa árare jahechauka jaiko lájare umi mbaʼe porã oúva espíritu sántogui, mbaʼeve ñandejokoʼỹre.

14. ¿Mbaʼéichapa ko múndo oreko tembiguáiramo umi hénte oñemoĩvape ipoguýpe?

¹⁴ Umi tapicha ohejáva ko múndo oisãmbyhy chupekuéra ha ojapóva ojaposéva guive, oimoʼã orekoha liverta (elee 2 Pedro 2:18, 19). Péro añetehápe ningo oiko chuguikuéra tembiguái. Upévare oñemoĩ heta léi ikatu hag̃uáicha ojejokove umi hénte oikosévape iñakãre. Pablo heʼivaʼekue: ‘Mbaʼeveichagua léi noñemeʼẽi umi hembiapo porãvape g̃uarã. Pe léi oĩ umi heko añáva ha naiñeʼẽrendúivape g̃uarã’ (1 Tim. 1:9, 10). Avei oĩ hikuái pekádo poguýpe, oiko rupi ‘hete rembipota rapykuéri’, ha upéva oreko asy chupekuéra (Efe. 2:1-3, JMP). Jaʼe porãsérõ g̃uarã haʼete mberu eírare, ogustaitereígui chupekuéra hoʼa jepi pype ha ndaikatuvéima osẽ (Sant. 1:14, 15).

PE KONGREGASIÓN ÑANEPYTYVÕ ÑANESÃSO HAG̃UA

15, 16. ¿Mbaʼépa jahupyty ñaime haguére kongregasiónpe, ha mbaʼéichapa ñañeñandu upépe?

¹⁵ Ñande ningo ñaime kongregasiónpe Jehová ñandegueru haguére, ndahaʼéi ñandejehegui reínte jajúva, ku ñañeinskrivirõguáicha peteĩ klúv sosiálpe (Juan 6:44). ¿Mbaʼérepa Jehová ojapo upéva? ¿Oime piko ñanderekojoja ha ñaneñeʼẽrendúma voi raʼe? Nahániri. Upéicharõ, ¿mbaʼépa ohecha ñanderehe? Ohecha ñande pyʼapy iporãha, jajapotaha ñande pyʼaite guive haʼe oipotáva, ha ñañemoĩtaha pe léi ñanemosãsóva poguýpe. Ñaimévo kongregasiónpe, Ñandejára ñanerekomboʼe, ñanemosãso umi japu oñemboʼévagui rrelihionkuérape ha ohechauka ñandéve mbaʼéichapa jaikovaʼerã (elee Efesios 4:22-24). Jehová rehe ae, koʼág̃a ñaime ‘pe puévlo isãsóvape’ (Sant. 2:12).

¹⁶ ¿Mbaʼéichapa ñañeñandu ñaime jave umi ohayhúva ndive Jehovápe? Ndajakyhyjéi ha nañapensái ojejapotaha ñanderehe mbaʼeve ivaíva. Jaha jave Salón del Réinope katu ndajaikói ñamaña oĩpa opokóva ñande kartérare, upéva rangue ñañandu jarekoha liverta ha ndajajepyʼapýi mbaʼevére. ¡Ajépa idiferentete ñaiméramo ótro lugárpe! Ha hiʼarive, pe liverta jarekóva koʼág̃a Jehová puévlope ohechauka mbaʼeichaitépa jaikóta Ñandejára múndo pyahúpe.

“ÑANDEJÁRA RAʼYKUÉRA LIVERTA IJOJAHAʼỸVA”

17. ¿Mbaʼépa heʼise ‘ojehechaukataha Ñandejára raʼykuéra’ ha omosãso yvyporakuérape?

¹⁷ Pablo omyesakã mbaʼeichagua livertápa ohaʼarõ Jehová rembiguaikuérape oikóva ko yvy ape ári. Haʼe ohaivaʼekue: “Ñandejára kreasión ohaʼarõitereíma pe tiémpo Ñandejára raʼykuéra ojekuaauka hag̃ua”. Ha upe rire heʼi avei: “Yvyporakuéra ojeíta ñehundi poguýgui ha ohupytýta Ñandejára raʼykuéra liverta ijojahaʼỹva” (Rom. 8:19-21, NM). Koʼápe heʼívo “yvyporakuéra”, oñeʼẽhína umi oikótavare opa ára g̃uarã ko yvy ape ári. Haʼekuéra ohupytýta heta mbaʼe porã Ñandejára raʼykuéra, térã umi unhído, “ojehechauka” vove. Upéva oñepyrũta umi unhído, oĩmbátamava yvágape, oipytyvõ vove Crístope oipeʼa hag̃ua opa mbaʼe vai ko Yvýgui ha omoinge pe ‘aty guasúpe’ peteĩ múndo pyahúpe (Rev. 7:9, 14, ÑÑB).

18. ¿Mbaʼéichapa isãsóta ohóvo yvyporakuéra iñeʼẽrendúva ha mbaʼeichagua livertápa ohupytýta hikuái?

¹⁸ Opa yvypóra ohupytýta pe liverta ipyahúva, ojeíta hikuái Satanás ha idemoniokuéra poguýgui (Rev. 20:1-3). ¡Ajépa iporãite upéva! Upe rire, umi 144.000 rréi ha saserdóte oiporúta Jesucristo sakrifísio repykue ikatu hag̃uáicha saʼi saʼípe yvyporakuéra ojei imperfeksión ha pekádo poguýgui (Rev. 5:9, 10). Upéi katu yvyporakuéra ohasáta peteĩ pruéva rehe ohechauka hag̃ua ijerovia, ha upe rire ae ohupytýta pe liverta Jehová omeʼẽséva chupekuéra, térã “Ñandejára raʼykuéra liverta ijojahaʼỹva”. ¡Epensamíntena! Ndajajaposemoʼãvéima umi mbaʼe vai, síno oikóta ñandehegui yvypóra perfékto ha ñapensáta Ñandejára opensaháicha.

19. ¿Mbaʼépa jajapovaʼerã jahupytyséramo pe liverta?

¹⁹ ¿Rehupytysépa “Ñandejára raʼykuéra liverta ijojahaʼỹva”? Oiméramo péicha, eheja tanesãmbyhy ‘pe léi hekoitepegua ha ñanemosãsóva’. Ára ha ára ehesaʼỹijo porã Ñandejára Ñeʼẽ, ejapo umi mbaʼe reaprendéva, ha ejerure Jehovápe ijespíritu sánto. Ani reñemomombyry kongregasióngui ha eaprovechapaite umi mbaʼe Jehová omeʼẽva ñamombarete hag̃ua ñande jerovia. Ani reheja Satanás ogueroviauka ndéve hasyetereiha rekumpli hag̃ua Ñandejára rembipota, Eva rehe ojapo haguéicha. Añetehápe ningo Satanás oporombotavykuaa, péro jahechataháicha pe artíkulo oúvape, ñande ikatu jagueropuʼaka umi mbaʼe omoĩva ñane renonderãme ‘jaikuaa porãiterei rupi umi iñuhã’ (2 Cor. 2:11, BNP).

[Nóta oĩva taʼanga ndive páhina 9]

¿Aguerohorýpa gueteri umi liverta ko múndo oikuaveʼẽva?

[Nóta oĩva taʼanga ndive páhina 9]

¿Ahechaukápa aikoha la Biblia heʼiháicha?