Ndépa reguata pe tape porãre?

‘ÑANDEJÁRA niko mborayhu.’ Péicha apóstol Pablo ohechauka Ñandejára oporohayhuetereiha (1 Juan 4:8). Upévare ñande ikatu ñañemoag̃ui hese ha jaiko iñamígoramo. Mbaʼépa ikatu avei jajapo haʼe ñanderayhu rupi? Ojeʼéva ningo umi jahayhúva lája ovaha ñanderehe. Upéicha rupi amo ipahápe jajoguáma chupekuéra. Ha Ñandejára ñande apo rupi ijoguaháramo, ñande avei ikatu japorohayhu (Gén. 1:27). Upévare pe apóstol Juan heʼivaʼekue jahayhuha Ñandejárape ‘haʼe raẽ ñanderayhu rupi’ (1 Juan 4:19).

Cuatro ñeʼẽ ohechaukáva mbaʼépa heʼise mborayhu

Apóstol Pablo heʼi pe mborayhu haʼeha pe “tape iporãvéva” (1 Cor. 12:31). Mbaʼérepa heʼi upéva? Mbaʼeichagua mborayhúrepa oñeʼẽhína? Jaikuaa hag̃ua ñahesaʼỹijomína mbaʼépa heʼise pe ñeʼẽ mborayhu.

Yma ningo umi griégo oiporuvaʼekue cuatro palávra heʼi hag̃ua mborayhu: storgué, eros, filía ha agápe. La Biblia oiporu agápe heʼi hag̃ua ‘Ñandejára haʼeha mborayhu’.a Profesór William Barclay heʼi peteĩ ilívrope ko mborayhúre: “Agápe jahechauka hag̃ua ñamombaʼapo ñaneakã. Ndahaʼéi peteĩ mbaʼe ñañandu reínteva ñandepyʼapýpe, agápe ningo ñanepytyvõ jaikuaa hag̃ua mbaʼéichapa jaikovaʼerã ha ojekuaa umi mbaʼe jajapóvare”. Koʼápe agápe haʼe peteĩ mborayhu jahechaukáva jajepyʼamongeta ha jahechakuaa rire mbaʼépa iporã jajapo. Péro upéva ndeʼiséi nañañandumoʼãiha voi mbaʼeve ni ñañemomombyrytaha. Jahechakuaavaʼerã avei naiporãiha opa mbaʼe ñapensáva. Upévare, jahechaukavaʼerã ñane mborayhu la Bíbliape heʼiháicha. Hesakãve hag̃ua ñandéve mbaʼeichaitépa iñimportánte ko mborayhu agápe, ñahesaʼỹijomiéna umi palávra ojeporúva oñeñeʼẽ hag̃ua mborayhúre.

Pe mborayhu jahechaukáva ñande rogayguáre

Javyʼaite ningo jaikóramo joayhu ha vyʼápe ñande rogapýpe! Pe ñeʼẽ griégo storgué ojeporu la Bíbliape oñeñeʼẽ hag̃ua pe mborayhu ñañandúvare ñande rogayguáre. Ñande ningo ñañehaʼãmbaite jahayhu ñande rogayguakuérape, péro koʼág̃a rupi opavaveléntoma ndohayhuvéi ihentekuérape. Apóstol Pablo heʼi hagueichaite oiko (2 Tim. 3:​1, 3).b

Ha mbaʼérepa oĩ hetaiterei kuña oitykáva imemby? Mbaʼérepa oĩ hetaite noñangarekóiva umi ihénte ijedámavare? Mbaʼérepa hetaite omendáva ojopoi? Koʼã mbaʼe oiko avave ‘ndohayhuvéigui’ hogayguápe.

Pe mborayhu storgué ningo osẽ ñane korasõgui ha la Biblia heʼi voi ñane korasõre ‘hovamokõi ha iñañaha’. Upévare ñañatendevaʼerã jahechauka hag̃ua ko mborayhu (Jer. 17:9). Jahechakuaa avei apóstol Pablo heʼírõ guare menakuérape ohayhu hag̃ua hembirekópe oiporu hague pe ñeʼẽ agápe. Ha heʼi voi chupekuéra ohayhu hag̃ua hembirekópe Jesucristo ohayhuháicha kongregasiónpe (Efe. 5:​28, 29). Pe mborayhu agápe jahechauka hag̃ua ningo jajapovaʼerã Jehová heʼíva.

Ko mborayhu oipytyvõta avei tuvakuérape ani hag̃ua ombojeroviaiterei ha ndokorrehíri ifamiliakuérape. Ohechakuaáta avei hikuái mbaʼéichapa ohekomboʼe, oñangareko ha okorrehivaʼerã hekopete ifamiliakuérape (Efe. 6:​1-4). Ha enterovépe ñanepytyvõ koʼã mborayhu ñañangareko porã hag̃ua ñande tuvakuéra ijedámavare.

Mbaʼépa heʼi la Biblia pe mborayhu oñandúvare ojuehe kuña ha kuimbaʼe?

Pe mborayhu oñandúva ojuehe peteĩ kuña ha kuimbaʼe ningo peteĩ rregálo omeʼẽva Ñandejára (Pro. 5:​15-17). Upéicharõ jepe, umi ohaivaʼekue la Biblia ndoiporúi pe palávra eros oñeʼẽ hag̃ua peichagua mborayhúre. Mbaʼérepa ndoiporúi hikuái? Aremíma hína pe rrevísta La Atalaya heʼi hague: “Koʼág̃a rupi haʼete enterove ojavyvahína umi griégo ojavy haguéicha. Haʼekuéra ningo omombaʼeguasu pe Eros ñandejáraicha, oñesũ hikuái ijaltár renondépe ha ojapo chupe sakrifísio. [...] Upéicha oñemombaʼeguasueterei rupi pe eros, ymaite guive umi hénte itieʼỹ, hekovai, oiko iñakãre ha ndojejokokuaái. Oiméne voi upévare umi ohaivaʼekue la Biblia ndoiporuirakaʼe pe ñeʼẽ eros”. Upéicharõ ani hag̃ua jaʼa upe ñuhãme, jahechaukavaʼerã pe mborayhu eros ha agápe oñondive. Jajapoñaína upéicha?

Peteĩ edápe ningo umi mitãrusuʼi ha mitãkuña oikosetereive oñondive, ha imbareteve voi pe oñandúva hikuái. Upévare haʼekuéra oñehaʼãmbaitevaʼerã ojapo la Biblia heʼíva ani hag̃ua hekokyʼa (1 Cor. 7:36; Col. 3:5). Ñandéve g̃uarã ningo pe ñemenda haʼe peteĩ jopói omeʼẽva Jehová. Jesús heʼivaʼekue voi umi omendávare: ‘Yvypóra ndoipeʼaivaʼerã ojuehegui Ñandejára ombojoajuvaʼekue’ (Mat. 19:6). Ñande ningo ñamombaʼeterei pe ñemenda. Upévare ndahaʼéi ñamendáva sapyʼaite g̃uarã, ñane akãraku ajánte. Ha oĩ jave provléma katu, ñañehaʼã ñasolusiona ndahaʼéi jajopoíntemava. Upearã jajapovaʼerã Ñandejára heʼíva. Koʼã mbaʼe ningo ñanepytyvõta akóinte javyʼa hag̃ua (Efe. 5:33; Heb. 13:4).

Pe mborayhu jahechaukáva ñane amígore

Ndajavyʼaieténe piko nañaneamígoiramo! Peteĩ téysto ningo heʼi voi: ‘Oĩ ñane amígo ñanderayhuvéva ñane ermánogui’ (Pro. 18:24). Jehová oipota jareko amígo añetetéva. Pór ehémplo oñoamigoitevaʼekue David ha Jonatán (1 Sam. 18:1). La Biblia heʼi avei Jesús ‘ohayhu hague’ Juánpe (Juan 20:2). Pe palávra griéga filía ojeporu ojeʼe hag̃ua angirũ térã amísta. Jahayhúramo jepe péicha ñane ermanokuérape, 2 Pedro 1:7 heʼi ñandéve ‘jajoayhu hag̃ua oñopehẽnguéicha’ (pe griégope filadelfía, heʼiséva fílos [mborayhu] ha adelfós [ermáno]) ha upévape omoirũvaʼerã mborayhu agápe. Upévare jaiko porãséramo heta tiémpo ñane amígo ndive, jajapovaʼerã Pedro heʼivaʼekue. Ha iporãta avei ñañeporandumi jahayhupañaína ñane amigokuérape Jehová oipotaháicha.

Jajapóramo la Biblia heʼíva ningo nañambojeroviavemoʼãi ñane amigokuérape heta mbaʼépe, ndajahejamoʼãi ojapo oimeraẽ vyrorei ha ndajajopyetereimoʼãi ambue ñande rapichándi. Ndajaikomoʼãi avei ñaporombojuruheʼẽ ñakonsegi hag̃ua ñane amigorã. Upéva rangue, jaiporavo porã vaʼerã ñane amigorã ha ani jajeheʼa umi ñandegueraha vaítavare (1 Cor. 15:33).

Jajoayhu rupi jaiko porã oñondive

Pe mborayhu ñañandúva ermanokuérare ningo ndaijojahái. Apóstol Pablo heʼi voi: ‘Pejoayhúke añetehápe [agápe]. Pejoayhu oñopehẽnguéicha, peñombojerovia ha peñomombaʼe’ (Rom. 12:​9, 10). Upeichaite ningo, ñande jahayhu ñande pyʼaite guive ñane ermanokuérape. Ndahaʼéi jajohecharamónteva, jajoayhu katu añetehápe la Bíbliape heʼiháicha. Ko téystope Pablo heʼi “pejoayhu oñopehẽnguéicha” (filadelfía), ha heʼi avei “peñembojerovia ha peñemombaʼe” (filóstorgos heʼiséva fílos ha storgué). Peteĩ karai iñarandúva heʼi umi tapicha péicha oporohayhúva “hory, imbaʼeporã, oporoporiahuvereko ha imbaʼerechakuaaha”. Ko mborayhu ñamoirũramo pe agápe ndive jaiko porãitereíta ermanokuéra ndive (1 Tes. 4:​9, 10). Ha pe ñeʼẽ filóstorgos jatopa peteĩ hendápente la Bíbliape ha ohechauka mbaʼéichapa jajoayhu ha jajepokuaa ñande rogayguáre.c

Ñande ningo jaiko porã oñondivepa jahechaukágui pe mborayhu storgué, filía ha agápe. Péicha rupi kongregasiónpe jaha ñamombaʼeguasu hag̃ua oñondivepa Jehovápe. Umi oñembyatývape ñanendive jaʼe ermáno, pórke haʼete voi ñande rogaygua mbaʼéva hikuái ha ñaneamigoite avei. Upévare akóinte jatrata porã ñane ermanokuérape la Bíbliape heʼiháicha. Upéicharõ, pe mborayhu haʼehína pe “tape iporãvéva”. Ha jasegíkena koʼẽ koʼẽre jajoayhuve ha tojekuaa ñanderehe oñoermanoha ha jaiko porãha oñondivepa (Juan 13:35).

[Nóta]

[Komentário oĩva páhina 12-pe]

Mbaʼépa nde rejapo pejoayhuve hag̃ua ermanokuéra ndive?