Ñane esperánsa oñekumplíta katuete

 1. ¿Mbaʼérepa jaʼekuaa Abrahán ikatu hague ojerovia ipyʼaite guive iñesperánsare?

JEHOVÁ opromete vaʼekue iñamígo Abrahánpe itaʼyrataha, ha ifamília rupive oñevendesitaha entéro nasión oĩva ko yvy ape ári (Gén. 15:5; 22:18). Abrahán ojeroviaiterei rupi Ñandejárare, ndodudái vaʼekue oñekumplíta hague upe promésa. Upéicharõ jepe Abrahán orekórõ guare 100 áño ha Sara katu 90, haʼekuéra neʼĩra gueteri ifamília (Gén. 21:​1-7). Péro la Biblia heʼi Abrahán rehe: “Abrahán ohaʼarõkuaa ha ojerovia hetaiterei nasión outaha chugui. Ojeʼe haguéicha chupe” (Rom. 4:18). Ñande jaikuaa la Abrahán ohaʼarõ vaʼekue oñekumpli hague ha ou ifamília. Péicha onase Isaac, upe mitã haʼe ohaʼarõite vaʼekue. ¿Péro mbaʼérepa Abrahán ojeroviaite Jehová okumplíta hague ipromésa?

 2. ¿Mbaʼérepa Abrahán ojeroviaite vaʼekue Jehová promésa oñekumplitaha?

² Abrahán oikuaa porãiterei rupi Jehovápe “ndodudái haʼe okumplitaha katuete entéro mbaʼe oprometéva” (Rom. 4:21). Jehová oguerohory vaʼekue Abrahánpe ha heʼi hese ihustoha pórke Abrahán ojerovia hese (Sant. 2:23). Jahechaháicha Romanos 4:​18-pe Abrahán ojerovia vaʼekue Ñandejárare ha avei oreko vaʼekue esperánsa. Jahechamína koʼág̃a mbaʼépa apóstol Pablo heʼi pe esperánsare Romanos kapítulo 5-pe.

 3. ¿Mbaʼépa Pablo oexplika vaʼekue pe esperánsare?

³ Apóstol Pablo oexplika vaʼekue mbaʼérepa ‘ikatu jajerovia ñane esperánsa núnka nañanemotĩmoʼãiha’ (Rom. 5:5). La haʼe heʼi vaʼekue ñanepytyvõ avei ñantende hag̃ua mbaʼéichapa ikatu jajeroviave jahávo ñane esperánsare. Jastudia aja Romanos 5:​1-5 ñapensami mbaʼéichapa ñande kásope oikóma upéva. Avei jahecháta mbaʼéichapa ikatu jajeroviave jahávo ñane esperánsare. Primero jahechami peteĩ esperánsa porãite Pablo heʼi vaʼekue nañanemotĩmoʼãiha.

 4. ¿Mbaʼe rehepa oñeñeʼẽ Romanos 5:​1, 2-pe?

⁴ (Elee Romanos 5:​1, 2). Pablo oskrivi vaʼekue koʼã mbaʼe umi kristiáno Romaguápe. Haʼekuéra oikuaáma kuri Jehová ha Jesúspe, ojerovia hesekuéra ha oikóma chuguikuéra kristiáno. Jehová heʼíma vaʼekue koʼã kristiánore ‘ihustoha ojerovia rupi’, ha ounhi chupekuéra espíritu sánto rupive. Péicha oñemeʼẽ koʼã kristiánope peteĩ esperánsa iporãitereíva ha ikatu kuri oĩ hikuái segúro orresivitaha upéva.

 5. ¿Mbaʼe esperánsapa oreko umi kristiáno unhído?

⁵ Upe rire Pablo oskrivi umi kristiáno unhído Efesoguápe oñeʼẽ hag̃ua pe esperánsa Ñandejára omeʼẽ vaʼekuére chupekuéra. Haʼekuéra orresivi pe esperánsa ‘oñepromete vaʼekue umi ojeporavo vaʼekuépe’ (Efes. 1:18). Ha umi kristiáno Colosasguápe, Pablo oexplika moõpa orresivíta hikuái iñesperánsa. Heʼi chupekuéra ‘pe esperánsa Ñandejára oñongatuha chupekuéra g̃uarã yvágape’ (Col. 1:​4, 5). Upéicharõ, ¿mbaʼe esperánsapa oreko umi kristiáno unhído? Haʼekuéra orresusitáta yvágape oiko hag̃ua pára siémpre, ha upépe ogovernáta Jesucristo ndive (1 Tes. 4:​13-17; Apoc. 20:6).

 6. ¿Mbaʼépa heʼi vaʼekue peteĩ ermáno unhído iñesperánsare?

⁶ Umi kristiáno unhído ovaloraiterei upe esperánsa. Peteĩ ermáno unhído hérava Frederick Franz omombeʼu vaʼekue la oñandúva. Haʼe heʼi vaʼekue: “Ore esperánsa oñekumplíta katuete. Káda uno roiméva umi 144.000 apytépe, rorresivíta la Ñandejára opromete vaʼekue oréve. La haʼe omeʼẽtava oréve iporãitevéta la ore ikatúvagui roñeimahina”. Ermáno Franz oservi vaʼekue Ñandejárape fiélmente heta áñore, ha 1991-pe haʼe heʼi: “Ore rosegi romombaʼe ore esperánsa. Amedída ke rohaʼarõ, rovaloraiteve voi. Tekotevẽramo jepe rohaʼarõ un millón de áño oñekumpli hag̃ua, ovale la péna la rohaʼarõva. Koʼág̃a che amombaʼevéntema la che esperánsa yma guarégui”.

7, 8. ¿Mbaʼe esperánsapa jareko la majoría jaservíva Jehovápe? (Romanos 8:​20, 21).

⁷ Koʼág̃a la majoría jaservíva Jehovápe jareko ótra esperánsa. Upe esperánsa oreko vaʼekue avei Abrahán. Upéva hína jaiko pára siémpre ko yvy ape ári Ñandejára goviérno poguýpe (Heb. 11:​8-10, 13). Pablo oñeʼẽ vaʼekue umi mbaʼe porãite ñaneraʼarõvare (elee Romanos 8:​20, 21). Ñaaprende ypýrõ guare la Biblia oprometéva, ¿mbaʼépa la jaipotave vaʼekue oñekumpli? Ikatu oime hiʼãitereíma ñandéve kuri ñandeperfékto ha ndajapekavéi. Térã jaipotaitereíma kuri orresusita umi jahayhúva omano vaʼekue oiko hag̃ua peteĩ paraísope ko yvy ape ári. Ñandejára ‘omeʼẽ rupi ñandéve peteĩ esperánsa’ iporãitereíva ikatu ñahaʼarõ oñekumplitaha heta mbaʼe ijojahaʼỹva.

⁸ Ikatu oime jareko la esperánsa jaikotaha yvágape térã ko yvy ape ári. Tahaʼe haʼeháicha, ñanembovyʼaiterei la ñaneraʼarõva, ha káda día ikatu ñaimeve segúro oñekumplitaha katuete. Pablo oexplika vaʼekue mbaʼéichapa ikatu jajeroviave ñane esperánsare. Jahechamína la haʼe heʼi vaʼekue.

9, 10. Oiko haguéicha apóstol Páblore, ¿mbaʼépa kristianokuéra ikatu ñahaʼarõ? (Romanos 5:​3, 4). (Ehecha umi taʼanga).

⁹ (Elee Romanos 5:3). Pablo heʼi vaʼekue umi jehasa asy ikatuha ñanepytyvõ jajeroviave hag̃ua ñane esperánsare. Upéva primerorã ikatu ñanesorprende. Péro jaikuaa entéro Jesús segidór ohasataha heta mbaʼe ijetuʼúva. Jahechamína la Pablo ohasa vaʼekue. Umi ermáno oĩvape Tesalónicape haʼe heʼi vaʼekue: “Roimérõ guare penendive, roʼéma vaʼekue voi peẽme jahasa asy vaʼerãha, ha upéva voi la oiko vaʼekue” (1 Tes. 3:4). Ha umi ermáno Corintoguápe heʼi vaʼekue: ‘Roipota peikuaa ermanokuéra mbaʼéichapa rohasa asy. Ore ropensáma voi ikatuha romano’ (2 Cor. 1:8; 11:​23-27).

¹⁰ Koʼág̃a avei entéro kristiáno ikatu ñahaʼarõ jahasataha opaichagua provléma (2 Tim. 3:12). Ñapensamína ñande kásope. Ikatu oime oĩ ñandepersegíva ñañepyrũ haguére jajerovia Jesúsre ha jajapo haguére haʼe heʼíva. Por ehémplo ikatu oime ñane amigokuéra térã ñane hénte oñembohory ñanderehe ha ñandetrata vai. Térã ñande travahohápe ikatu ñane patrón térã ñane kompañerokuéra ipochy ñanendive ñañehaʼã haguére ñaneonrrádo entéro mbaʼépe (Heb. 13:18). Ikatu avei umi goviérno oñemoĩ ñane kóntrape japredika haguére. Tahaʼe haʼéva la jahasáva, Pablo heʼi vaʼekue javyʼa vaʼerãha. ¿Mbaʼérepa?

11. ¿Mbaʼérepa jajedesidi vaʼerã ñaaguantataha opaichagua provléma?

¹¹ Jahasáramo jepe peteĩ situasión ijetuʼúva, ikatu javyʼa pórke jaikuaa upéva ñanepytyvõtaha ñamehora hag̃ua. Romanos 5:3 heʼi “pe jehasa asy ñanepytyvõha ñaaguantakuaa hag̃ua”. Entéro kristiáno jarekóta provléma, upévare jajedesidi vaʼerã ñaaguantataha tahaʼe haʼéva la jahasáva. Ñaaguantárõ añoite ha jasegírõ jaservi Jehovápe, jarresivíta umi mbaʼe porã ñahaʼarõitéva. Jesús omoĩ vaʼekue peteĩ ehémplo, ha heʼi vaʼekue oĩha hénte ojoguáva umi semílla hoʼávape ita ári. Ñande ndajajoguaséi umichagua persónape, pórke umíva primerorã vyʼápe orresivi pe mensáhe porãite péro upéi “ohasa asy térã oĩvo oñemoĩva hese pe mensáhe káusare, pyaʼe oguevi jey” (Mat. 13:​5, 6, 20, 21). Ñarrekonose ningo ndaigustoiha jahasa asy jave, péro jaikuaa avei ñasẽ porãtaha ñaaguantáramo. ¿Mbaʼérepa jaʼe upéva?

12. ¿Mbaʼe iporãvapa jahupyty ñaaguantakuaáramo?

¹² Santiago heʼi vaʼekue mbaʼe mbaʼépa jahupytýta ñaaguantakuaáramo. Haʼe oskrivi vaʼekue: “Peaguanta meme rupi peñentrena porã hína, péicha perekopaitéta opa mbaʼe peikotevẽva, ha pejapo porãta entéro mbaʼe ha ndofaltamoʼãi peẽme mbaʼevete” (Sant. 1:​2-4). Upéicharõ Santiago heʼi vaʼekue pe aguánte ñanepytyvõha jahupyty hag̃ua álgo iporãva. Ñanepytyvõ hína ikatu hag̃uáicha ñanepasiensiave, jajerovia mbareteve ha ñakonfiave hag̃ua Jehováre. Péro oĩ álgo iporãvéva hína ñakonsegítava ñaaguantakuaáramo.

13, 14. ¿Mbaʼépa oikóta ñaneaguánteramo, ha mbaʼéichapa upéva ñanepytyvõ? (Romanos 5:4).

¹³ (Elee Romanos 5:4). Pablo heʼi vaʼekue ‘pe aguánte ñanepytyvõha ñaime porã hag̃ua Ñandejárandi’. Upéicharõ Jehová ñandeguerohorýta ñaaguantakuaáramo. Upéva ndeʼiséi Ñandejára ovyʼaha jahasa asy térã ñaneprovléma heta jave, síno haʼe ovyʼa ñaaguanta haguére fiélmente. ¡Ajépa ojapo porãite ñanderehe jaikuaávo ñane aguánte ombovyʼaha Jehovápe! (Sal. 5:12).

¹⁴ Ñanemanduʼa vaʼerã Abrahán oaguanta hague heta mbaʼe ijetuʼúva ha Jehová oguerohory hague chupe upévare. Ñandejára heʼi vaʼekue voi hese haʼeha iñamígo ha ihustoha (Gén. 15:6; Rom. 4:​13, 22). Ñande kásope avei ikatu upéicha. Ñandejára ñandeguerohory hag̃ua nodependéi hína jajapópa heta mbaʼe iservísiope térã mbaʼe priviléhiopa jareko. Haʼe ovyʼa ñandereheve jaservíma guive chupe fiélmente jahasáramo jepe heta provléma. Ñanemitã térã ñandeedáramo, tahaʼe haʼéva ñane situasión térã pe kapasida jarekóva, enterovéva ikatu ñaneaguánte. ¿Jahasápa hína koʼag̃aite peteĩ situasión ijetuʼúva tekotevẽhápe ñaneaguánte? Oimérõ upéicha, ñanemanduʼáke ñambovyʼaha hína Jehovápe. Jaikuaa rupi Jehová ñandeguerohoryha, jajeroviave rei ñane esperánsare.

15. ¿Mbaʼépa heʼi Pablo Romanos 5:​4, 5-pe, ha mbaʼépa ikatu algúno oñeporandu?

¹⁵ Jahechaháicha, Pablo heʼi Ñandejára ñandeguerohorytaha ñaaguantáramo fiélmente umi provléma. Upéi heʼi ñaime porãrõ Ñandejárandi ‘upéva omeʼẽha ñandéve esperánsa’. Ha ikatu jajerovia ñane esperánsare pórke “núnka nañanemotĩmoʼãi” (Rom. 5:​4, 5). Primerorã ikatu nañantendepái la heʼíva. ¿Mbaʼérepa? Pórke Romanos 5:​2-pe Pablo heʼíma vaʼekue umi kristiáno Romaguápe orekomaha hikuái esperánsa: ‘Pe esperánsa Ñandejára omeʼẽtaha chupekuéra peteĩ puésto iñimportantetereíva’. Upéicha rupi ikatu oĩ oñeporandúva: Oimérõ umi kristiáno orekóma voi esperánsa, ¿mbaʼérepa Pablo oñeʼẽ jey upévare upéi?

16. ¿Mbaʼéichapa pe esperánsa ikatu okakuaa ha imbareteve? (Ehecha umi taʼanga).

¹⁶ Ikatu ñantende la Pablo heʼise vaʼekue jarekóvo enkuénta ikatutaha jajeroviave jahávo ñane esperánsare. Por ehémplo ñapensamíntena: Oiméne ñanemanduʼa pe primera ves ñahendúrõ guare pe esperánsa porãite oĩva la Bíbliape heʼíva jaikotaha pára siémpre ko yvy ape ári. Oiméne ñandegustaiterei rakaʼe, péro upérõ ndajagueroviapái la oikótapa katuete. Péro amedída ke jaikuaa Jehovápe ha umi promésa porãite oĩva la Bíbliape, jagueroviavéntema oñekumplitaha katuete ko esperánsa jarekóva.

17. ¿Mbaʼéichapa ñane esperánsa imbareteve jajevautisa rire jepe?

¹⁷ Ñañemeʼẽ rire Jehovápe ha jajevautisa, jasegi jajeroviave ñane esperánsare pórke jaikuaa porãve ha jahayhuve jahávo Ñandejárape (Heb. 5:13–6:1). Ñanderehe oñekumplíma la heʼíva Romanos 5:​2-4. Jahasa heta situasión ijetuʼúvare, péro ñaaguanta umíva ha upéicha rupi ñañandu Jehová ñandeguerohoryha. Jaikuaa rupi Ñandejára ovyʼaha ñandereheve, jagueroviavéntema jarresivitaha umi mbaʼe porã oñepromete vaʼekue ñandéve. Jahechakuaa mbaʼeichaitépa jajeroviave koʼág̃a ñane esperánsare la yma guarégui. Koʼág̃a ñamombaʼeve ñane esperánsa ha ndajadudái ni michĩmi oñekumplitaha, ha upéva ogia entéro mbaʼe jajapóva. Upévare jatrata porãve ñane famíliape, jadesidi porãve ha jaipuru porãve ñane tiémpo.

18. ¿Mbaʼe garantíapa Jehová omeʼẽ?

¹⁸ Ñañandu rire Ñandejára ñandeguerohoryha jajeroviavéntema ñane esperánsare. Pablo oexplika rire upéva, heʼi avei ótra kósa iñimportánteva. Haʼe oasegura ñandéve ñane esperánsa katuete oñekumplitaha. ¿Mbaʼérepa ikatu jaguerovia upéva? Pablo omeʼẽ vaʼekue umi kristiánope peteĩ garantía oúva Ñandejáragui. Haʼe heʼi: “Ikatu jajerovia ñane esperánsare, núnka nañanemotĩmoʼãi, pórke Ñandejára ojevale pe espíritu sánto omeʼẽvare ñandéve ohechauka hag̃ua ñanderayhuha” (Rom. 5:5). Ndaipóri jaduda hag̃ua, ñande ikatu ñakonfia pe esperánsa Jehová omeʼẽvare ñandéve.

19. ¿Mbaʼépa ñaĩ segúro oikotaha?

¹⁹ Ñapensa memékena pe promésa Jehová ojapo vaʼekuére Abrahánpe. Ñandejára oguerohory vaʼekue chupe ha heʼi hese iñamigoha. Ha umi mbaʼe Abrahán ohaʼarõ vaʼekue oñekumplipaite. La Biblia heʼi: “Abrahán ohechauka rire ipasiensiaha, ohupyty pe promésa” (Heb. 6:15; 11:​9, 18; Rom. 4:​20-22). Abrahán noñemotĩri vaʼekue oreko haguére peteĩ esperánsa. Ñande avei ikatu ñaĩ segúro jarresivitaha umi mbaʼe ñahaʼarõitéva jasegíramo jaservi Jehovápe fiélmente. Ikatu javyʼa ñande pyʼaite guive jaikuaágui oñekumplitaha umi promésa ha nañañemotĩmoʼãiha jareko haguére esperánsa (Rom. 12:12). Apóstol Pablo heʼi vaʼekue: “Ajerure Ñandejára omeʼẽva esperánsa tomyenyhẽ pene korasõ tuicha vyʼa ha pyʼaguapýgui pórke peẽ pejerovia hese, ha pe espíritu sánto tomyenyhẽ pene korasõ esperánsagui” (Rom. 15:13).