Ñaipytyvõ ñande rapichápe iñeʼẽrendu hag̃ua ipyʼaite guive
1. Mbaʼépa Jehová ojerure isiervokuérape?
1 Jehová oguerohory hag̃ua pe adorasión ñameʼẽva chupe ñaneñeʼẽrendumantevaʼerã (Deu. 12:28; 1 Ped. 1:14-16). Koʼẽrõitéma Ñandejára huísio oúta ‘umi Ñandejárape ndoikuaáivape ha umi nohendúiva pe marandu porã ñane Señór Jesucristo reheguápe’ (2 Tes. 1:8). Mbaʼéichapa ikatu ñaipytyvõ ñande rapichakuérape ‘iñeʼẽrendu hag̃ua ipyʼaite guive’ pe Ñandejára Ñeʼẽ omboʼévape? (Rom. 6:17).
2. Mbaʼérepa iñimportánte ñaipytyvõ ñande rapichápe omongakuaa hag̃ua ijerovia?
2 Emombarete pe jerovia ha pe mborayhu. Ñandejára Ñeʼẽ ohechauka pe ñeʼẽrendu ha jerovia ombaʼapoha oñondive. Pe apóstol Pablo heʼi oĩha “pe tembiapoukapy omeʼẽvaʼekue Ñandejára opa aragua, oñemokyreʼỹ hag̃ua pe ñeʼẽrendu osẽva pe jeroviágui” (Rom. 16:26). Hebreos kapítulo 11-pe oĩ heta ehémplo umi ojeroviavaʼekuégui, ha umíva apytépe heta oĩ ojapovaʼekue umi mbaʼe Jehová ojeruréva chupekuéra añoite (Heb. 11:7, 8, 17). Péro, ohechauka pe ñeʼẽrenduʼỹ ha jeroviaʼỹ ombaʼapoha avei oñondive (Juan 3:36; Heb. 3:18, 19). Ñañehaʼãvaʼerã ñandekatupyry jaiporúvo Ñandejára Ñeʼẽ, ikatu hag̃uáicha ñaipytyvõ ñande rapichápe omongakuaa hag̃ua pe jerovia omokyreʼỹtava chupe iñeʼẽrendu hag̃ua (2 Tim. 2:15; Sant. 2:14, 17).
3. a) Mbaʼéichapa pe ñeʼẽrendu ha mborayhu ombaʼapo oñondive? b) Mbaʼéichapa ikatu ñaipytyvõ ñane estudiántepe ohayhuve hag̃ua Jehovápe?
3 Pe ñeʼẽrendu ha pe mborayhu Ñandejárare ombaʼapo avei oñondive (Deu. 5:10; 11:1, 22; 30:16). “Kóva heʼise pe Ñandejárape jahayhu”, heʼi 1 Juan 5:3, “jajapo umi mbaʼe ojeruréva; ha iñeʼẽ jajapo hag̃ua katu ndaipohýiri”. Mbaʼéichapa ikatu ñaipytyvõ peteĩ estudiántepe ohayhuve hag̃ua Jehovápe? Pe estúdio rejapo aja, ehecha mbaʼéichapa ikatu reipytyvõ chupe oguerohoryve hag̃ua umi Jehová kualida. Ehechauka mbaʼeichaitépa nde voi reguerohory Ñandejárape. Eipytyvõ ne estudiántepe opensa hag̃ua mbaʼépa ikatu ojapo oĩ porã hag̃ua Jehová ndive. Pe mborayhu oguerekóva Jehováre oipytyvõvéta chupe opaite mbaʼégui —ha ñandéve avei— iñeñeʼẽrendu hag̃ua Ñandejárape ipyʼaite guive (Mat. 22:37).
4. a) Mbaʼérepa iñimportánte pe ehémplo ñamoĩva? b) Mbaʼépa jajapovaʼerã ñamongakuaa hag̃ua peteĩ ‘korasõ iñeʼẽrendúva’?
4 Pe ehémplo ñamoĩva. Ñane ehémplo rupive tuicha ikatu ñamokyreʼỹ ñande rapichakuérape iñeʼẽrendu hag̃ua pe marandu porãme. Péro ñande voi heta ñañehaʼãvaʼerã ñamongakuaa hag̃ua ‘peteĩ korasõ iñeʼẽrendúva’ (1 Re. 3:9; Pro. 4:23). Mbaʼéichapa ikatu jajapo upéva? Emoheñói ne korasõme umi mbaʼe espirituál. Upearã restudia meme vaʼerã Ñandejára Ñeʼẽ ha reho meme vaʼerã ñane rreunionkuérape (Sal. 1:1, 2; Heb. 10:24, 25). Eñehaʼã eiporavo ne irũrã umi ikorasõ kompléto reheve oĩva pe adorasión añeteguápe (Pro. 13:20). Esẽ meme predikasionhápe, reipytyvõségui nde pyʼaite guive nde rapichakuérape. Eñemboʼe Jehovápe tanepytyvõ remoheñói hag̃ua peteĩ korasõ iporãva (Sal. 86:11). Ejehekýi umi mbaʼe ikatúvagui ombyai ne korasõ, pór ehémplo umi vyʼarã ohechaukáva inmoralida térã violénsia. Eñehaʼã rehupyty umi mbaʼe nemoag̃uivétava Ñandejárare, ha omombaretevétava ne rrelasión hendive (Sant. 4:7, 8).
5. Mbaʼéichapa oñevendesi umi iñeʼẽrendúvape?
5 Jehová heʼivaʼekue ipuévlo ymaguarépe tuichaiterei ovendesitaha chupekuéra iñeʼẽrendúramo (Deu. 28:1, 2). Upéicha avei, koʼág̃a Jehová tuicha ovendesi umi ‘Ñandejárape iñeʼẽrendúva igovernánteramo’ (Hech. 5:32). Upévare, umi ñamboʼéva rupive, ha pe ehémplo ñamoĩva rupive, ñaipytyvõkena ñande rapichakuérape iñeʼẽrendu hag̃ua ipyʼaite guive.