Ñandejára ningo “upe omongakuaáva”

‘Upéicha rupi pe oñotỹva térã orregáva ndahaʼéi mbaʼeve. Ñandejára ningo upe omongakuaáva.’ (1 COR. 3:7, JMP.)

 1. Mbaʼépepa ñaipytyvõ Ñandejárape?

APÓSTOL Pablo heʼi jaguerekoha peteĩ tembiapo ijojahaʼỹva: ‘ñaipytyvõ Ñandejárape’ (jaleemína 1 Corintios 3:5-9). Mbaʼépepa ñaipytyvõ Ñandejárape? Ñaipytyvõ chupe ñamboʼévo ñande rapichápe oiko hag̃ua chugui Jesús remimboʼe. Pablo ombojoja ko tembiapo peteĩ oñemitỹvare. Péro ñanemanduʼavaʼerã Jehová omongakuaaha pe ñañotỹva. Upéicha, jahechakuaa ñaikotevẽha Jehová ñanepytyvõ, osẽ porã hag̃ua pe ñañotỹva.

 2. Mbaʼérepa ndovaléi ñañemombaʼeguasu?

² Ñanemanduʼáramo Jehová rupínte okakuaaha opa mbaʼe, ñaneumíldeta ha jajapo porãta ñanerembiapo. Ñandekatupyrýramo jepe japredika ha ñaporomboʼe hag̃ua, ndovaléi ñañemombaʼeguasu. Ñande ningo ni ñañehaʼãvéramo ndaikatumoʼãi jaikuaa mbaʼéichapa okakuaa peteĩ plánta. Upévare rréi Salomón hesakuaitépe ojapi heʼívo, ñande ‘ndajaikuaaiha Ñandejára rembiapo’ (Ecl. 11:5, ÑÑB).

 3. Mbaʼérepa ojogua ñanerembiapo peteĩ oñemitỹvape?

³ Ñande ningo javyʼa jajapóvo ñanerembiapo ndajaikuaáiramo jepe mbaʼéichapa okakuaa. Salomón heʼivaʼekue: ‘Eñemitỹ pyharevekue ha kaʼarukue avei. Ndajaikuaáiko osẽ porãtapa pe oñeñotỹ raẽva térã upe rireguáva, térãpa mokõivéva osẽ porãta’ (Ecl. 11:6). Peteĩ chokokue oñemitỹ jave ndoikuaái heñóitapa upe oñotỹva térã moõpa osẽ porãta. Upéicha avei oiko japredika jave. Ha Marcos kapítulo 4-pe oĩ mokõi ehémplo ohechaukáva upeichaha. Jahechami mbaʼépa ñanemboʼe.

Opaichagua yvy

4, 5. Mbaʼe rehépa oñeʼẽ Jesús Marcos 4:1-9-pe?

⁴ Jesús oñeʼẽ Marcos 4:1-9-pe, peteĩ oñemitỹvare opaichagua yvýpe. Haʼe heʼi: ‘Peteĩ jey oĩ osẽva oñemitỹ hag̃ua. Ha oñemitỹvo oĩ semílla hoʼáva tape yképe, ha ou guyrakuéra ha hoʼupa. Ha oĩ hoʼáva itatýpe, yvy pokãháme, ha voi heñói, pe yvy ipererĩgui upépe. Péro kuarahy osẽvo ohapy, ha ndahapói rupi ipiru. Ha oĩ hoʼáva ñuatĩndýpe, ha pe ñuatĩ okakuaa ha ojahoʼipa, ha upévare ndahiʼái. Ha oĩ hoʼáva yvy porãháme, ha hiʼa ha okakuaa porã, oĩ hiʼáva treinta, sesenta ha ambue cien’.

⁵ Jesús tiémpope pe oñemitỹva ogueraha pe semílla ijao ruguáipe térã peteĩ vosápe ha omyasãi ipópe. Jahechakuaa upéicha pe oñemitỹva ndahaʼéi oitységui hoʼáva pe semílla opaichagua yvýpe. Omyasãivo pe yvytu omosarambi oparupiete ha upévare hoʼa opaichagua yvýpe.

 6. Mbaʼéichapa omyesakã Jesús pe ehémplo omoĩvaʼekue?

⁶ Jesús omyesakã Marcos 4:14-20-pe mbaʼépa heʼise upe ehémplo: ‘Pe oñemitỹvahína pe oikuaaukáva Ñandejára ñeʼẽ. Ha pe tape yképe hoʼavaʼekue niko umi ohendúva upe ñeʼẽ, ha upe riremínte ou Satanás ha oipeʼa ipyʼapýgui. Oĩ avei pe itatýpe oñeñotỹva, umíva hína pe ñeʼẽ ohendúva ha ogueroviáva torypápe. Ha ndahapo pypukúigui ndopytahatãi. Upévare oiko asy térã ojejopy vaíramo oguerovia haguére Ñandejára ñeʼẽ, pyaʼe oheja. Ha umi hoʼáva ñuatĩndýpe, umíva hína umi ohendúva pe ñeʼẽ. Péro ojepyʼapy umi mbaʼe yvy arigua rehe, ha oiko pláta rapykuéri. Koʼã mbaʼe ojahoʼi ha ojuka pe ñeʼẽ, ha upévagui ndaikatúi hiʼa. Umi oñeñotỹva yvy porãme katu ojogua umi ohendúva Ñandejára ñeʼẽ ha omombaʼéva. Upéi hiʼa porã, oĩ hiʼáva treinta, oĩ sesenta ha ambue katu cien’.

 7. Mbaʼépa pe semílla? Ha mbaʼépa heʼise umi yvy?

⁷ Jesús ndeʼíri pe oñemitỹva oiporuha opaichagua semílla. Haʼe heʼi pe semílla hoʼaha opaichagua yvýpe ha upévare ojoavypa. Oñeʼẽ cuatro lája yvy rehe: hatãva, ndaipypukúiva, ñuatĩndy ha yvy porãre. Ha upe yvy porãme hoʼáva añoite hiʼa (Luc. 8:8). Mbaʼépa pe semílla? Pe marandu porã Ñandejára Rréino rehegua (Mat. 13:19). Ha mbaʼépa heʼise umi yvy? Umi mbaʼe jarekóva ñandepyʼapýpe térã ñane korasõme (jaleemína Lucas 8:12, 15).

 8. a) Mávapa umi oñemitỹva? b) Mbaʼérepa naentéroi ohendu pe marandu porã?

⁸ Mávapa umi oñemitỹva? Umi opredikáva marandu porã. Haʼekuéra ningo oñotỹ ha orrega, Pablo ha Apolos ojapo haguéicha. Ha oñehaʼãramo jepe hikuái naentéroi ohendu pe marandu porã. Mbaʼérepa upéva? Naentéroi ningo ipyʼaporã, ha Jesús heʼi haguéicha pe oñemitỹva ndaikatúi voi omongakuaa pe oñotỹva. Upéva ñanembopyʼaguapy, koʼýte oĩmerõ heta áñorema japredika ha haʼete ku nañamonoʼõiva mbaʼeve.a

 9. Mbaʼépa heʼivaʼekue apóstol Pablo ha Jesús?

⁹ Jehová nomañái mboýpa ñamonoʼõ ñandeguerohory hag̃ua. Upéicha heʼi apóstol Pablo ‘Peteĩteĩme ojehepymeʼẽvaʼerã hembiapokuére’ (1 Cor. 3:8). Jehová ohepymeʼẽ isiervokuérape ombaʼapo haguére chupe g̃uarã ndahaʼéi heta omonoʼõ haguére. Upéva, Jesús omomanduʼa idisipulokuérape ou rire opredikahágui. Haʼekuéra ningo ovyʼaiterei umi demónio oñemoĩ haguére ipoguypekuéra. Oĩ porãramo jepe ovyʼa upévare, Jesús heʼi chupekuéra: ‘Ani pe vyʼa umi demónio ojapo haguére pejéva. Pevyʼa guei ojehai haguére pende réra yvágape’ (Luc. 10:17-20). Ikatu peteĩ ermáno opredika meme péro nomonoʼõi umi ótroicha. Upéva ndeʼiséi haʼekuéra ivaleveha térã ojeroviaveha chugui. Osẽ porã hag̃ua pe ñañotỹva odepende mbaʼépa oreko ipyʼapýpe umi ñanerendúva. Ha aníkena ñanderesarái Jehová omongakuaaha pe ñañotỹva.

Mbaʼépa ojapovaʼerã umi ohendúva pe marandu porã

10. Mbaʼépa odesidivaʼerã umi ohendúva pe marandu porã?

¹⁰ Ikatu piko jaʼe umi ohendúvare pe marandu porã nokambiamoʼãiha voi? Nahániri, haʼekuéra ohendu rire pe marandu porã odesidivaʼerã ojoguátapa pe yvy porãme térãpa nahániri. Aníkena ñanderesarái ñande rapichakuéra ikatuha okambia (Rom. 6:17). Jesús heʼivaʼekue oĩha ohendúva pe marandu porã ha upe riremi ‘ou Satanás oipeʼa ipyʼapýgui’. Péro kóva ningo ndeʼiséi oikotaha katuete upéva. Santiago 4:7-pe ñanemokyreʼỹ ñañemoĩ hag̃ua Satanás rehe ha haʼe ñanderejáta. Jesús heʼi avei oĩha ohendúva pe marandu porã vyʼápe, péro ‘ndahapo pypukuígui’ ipiru. Péro Ñandejára Ñeʼẽ heʼi umi oserviséva Jehovápe tekotevẽha omombarete ijerovia ikatu hag̃uáicha oikuaa mbaʼeichaitépa Jesucristo ñanderayhu (Efe. 3:17-19; Col. 2:6, 7).

11. Mbaʼépa ikatu ojapo umi ñanerendúva ani hag̃ua oiko pláta rapykuéri?

¹¹ Jesús heʼi avei oĩha ohendúva pe marandu porã. Péro ‘ojepyʼapýgui umi mbaʼe yvy arigua rehe, ha oiko pláta rapykuéri, koʼã mbaʼe ojahoʼi ha ojuka pe ñeʼẽ’ (1 Tim. 6:9, 10). Mbaʼépa ikatu ojapo hikuái ani hag̃ua oiko hesekuéra upéicha? Pablo heʼi: ‘ Aníkena peiko pláta rapykuéri, pevyʼa guei umi mbaʼe perekóvare, Ñandejára niko heʼivaʼekue: “Ndorohejaichéne ha noromotyreʼỹichéne arakaʼeve”’ (Heb. 13:5).

12. Mbaʼérepa ndaikatúi ñamonoʼõ peteĩchapa?

¹² Ipahaitépe Jesús heʼi umi oñeñotỹva yvy porãme hiʼa porãitereiha, ‘oĩ hiʼáva treinta, sesenta ha ambue cien’. Upéicha jahechakuaa oĩha ipyʼaporãva ha hiʼáva. Péro ñanemanduʼavaʼerã oĩha heta ermáno itiempovéva opredika hag̃ua ha upévare ndaikatúi ñamonoʼõ peteĩchapa. Pór ehémplo, heta ermáno opredikasevéramo jepe ndaikatúi ojapo, ijedáma térã asy katu rupi (embojojami Marcos 12:43, 44-re). Umi mbaʼe ningo ñande ndaikatúi ñarremedia. Péro javyʼaiterei jahechávo mbaʼéichapa Jehová ñanderovasa ha hetaitereive oĩ oservíva chupe (jaleemína Salmo 126:5, 6).

Pe oñemitỹva ha oke

13, 14. a) Emombeʼumi pe ehémplo jatopáva Marcos 4: 26-29-pe? b) Mávapa pe oñemitỹva ha mbaʼépa pe semílla?

¹³ Marcos 4:26-29-pe jatopa ótro ehémplo: ‘Ñandejára Rréino niko ojogua peteĩ kuimbaʼe oñemitỹvape ha upéi oho oke. Ára ha pyhare pe semílla heñói ha okakuaa, haʼe ohechakuaaʼỹre. Pe yvy hiʼa ijehegui voi: heñói raẽ, okakuaa, ipoty, upéi hiʼa. Ha otyarõmaramo, haʼe omonoʼõ, og̃uahẽmagui oñembyaty hag̃ua ára’.

¹⁴ Mávapa pe oñemitỹva? Oĩ heʼíva haʼeha Jesucristo. Péro ndaikatúi ningo jaʼe Jesús ohoha oke ha ndoikuaái mbaʼéichapa pe semílla heñói ha okakuaa. Katuete ningo haʼe oikuaa porã mbaʼeichaitépa okakuaa opa mbaʼe. Jahechakuaa upéicha pe oñemitỹva haʼeha umi opredikáva. Ha pe semílla katu pe marandu porã Ñandejára Rréino rehegua.b

15, 16. Mbaʼépa ñanemboʼe Jesús heʼivaʼekue pe oñemitỹvare ha upéi oke?

¹⁵ Jesús heʼi ‘pe kuimbaʼe oñemitỹ ha upéi oho oke’. Upéva ningo ndeʼiséi ojapoha hembiapo vai vaínte. Heʼise guei ombaʼapoha arakuépe ha oke pyharekue opavave ojapoháicha. Upe aja ‘pe semílla heñói ha okakuaa ohóvo haʼe ohechakuaaʼỹre’. Ko ehémplope ojeʼe jey jey ‘pe yvy hiʼaha ijehegui voi’.c

¹⁶ Mbaʼépa ñanemboʼe Jesús heʼivaʼekue pe oñemitỹvare ha upéi oke? Pe plánta okakuaaha ohóvo mbeguekatúpe. Heʼi ‘pe yvy hiʼa ijehegui voi: heñói raẽ, okakuaa, ipoty, upéi hiʼa. Ha otyarõmaramo, oñemonoʼõ.’ (Mar. 4:28.) Peteĩ plánta ningo okakuaa mbeguekatúpe. Ñande ndaikatúi ñamboapura chupe okakuaa pyaʼeve hag̃ua. Upéicha avei oiko ñane estudiantekuérare. Umi ipyʼaporãva oikuaávo Jehovápe, mbeguekatúpe oñakãrapuʼã ohóvo iservísiope (Hech. 13:48; Heb. 6:1).

17. Mbaʼérepa ovyʼa pe oñemitỹva ha pe omonoʼõva avei?

¹⁷ Jesús heʼi: ‘Ha otyarõmaramo katu, haʼe omonoʼõ, oguahẽmagui oñembyaty hag̃ua ára’. Upéicha jahecha pe oñemitỹva omonoʼõha avei. Mbaʼérepa jaʼe ojapoha upéicha? Jahecháma haguéicha Jehová oipytyvõ umi ipyʼaporãvape omombarete hag̃ua ijerovia. Ha upe rire ohayhúgui Jehovápe oñemeʼẽ chupe ha ojevautisa. Ha umi kuimbaʼe katu ikatupyryvévo Jehová servísiope, ikatúta oñemeʼẽ chupekuéra hetave tembiapo kongregasiónpe. Oĩ jave peteĩ ojevautisáva, ovyʼa pe omboʼevaʼekue chupe ha opavave kongregasionpegua (jaleemína Juan 4:36-38). Upévare Ñandejára Ñeʼẽ heʼi “pe oñemitỹva ovyʼa avei umi omonoʼõva ndive”.

Mbaʼépa ñanemboʼe

18, 19. a) Mbaʼe mbaʼépa ñanemboʼe umi mokõi ehémplo jatopáva Marcos kapítulo 4-pe? b) Mbaʼépa jahecháta pe artíkulo oúvape?

¹⁸ Mbaʼépa ñanemboʼe umi mokõi ehémplo jatopáva Marcos kapítulo 4-pe? Ohechauka jaikuaaukavaʼerãha pe marandu porã oparupiete. Upévare, aníkena ñaneateʼỹ japredika hag̃ua térã jakyhyje oikóramo g̃uarã ñanderehe ivaíva (Ecl. 11:4). Jahechákuri ñande ‘ñaipytyvõha Ñandejárape’, upéva ningo peteĩ tembiapo ijojahaʼỹva. Avei Jehová ñanepytyvõha okakuaa hag̃ua pe ñañotỹva. Jahecha avei ndaikatuiha ñamboapura ñane estudiantekuérape oñakãrapuʼã hag̃ua Jehová servísiope. Ñanembopyʼaguapy ningo jaikuaávo Jehová nomañaiha mboýpa ñamonoʼõ ñandeguerohory hag̃ua. Ha aníkena ñanekangy naheñóiramo pe ñañotỹva. Pe iñimportantevéva Jehovápe g̃uarã ningo, ‘ñamosarambi pe marandu porã Ñandejára rréino rehegua oparupiete’ (Mat. 24:14).

¹⁹ Pe artíkulo oúvape jahechavéta mbaʼéichapa ikatu ñaipytyvõve umi ipyahúvape oñakãrapuʼã hag̃ua Jehová servísiope ha mbaʼépa Jesús ñanemboʼe Ñandejára Rréinore.

[Nóta]

Ñanemanduʼápa?

• Mbaʼérepa ojogua ñanerembiapo peteĩ oñemitỹvape?

• Mbaʼérepa Jehová nomañái mboýpa ñamonoʼõ ñandeguerohory hag̃ua?

• Mbaʼérepa ndaikatúi ñamboapura ñane estudiantekuérape oñakãrapuʼã hag̃ua Jehová servísiope?

• Mbaʼérepa ovyʼa pe oñemitỹva ha pe omonoʼõva avei?

[Nóta oĩva taʼanga ndive páhina 20]

Mbaʼérepa ojogua ñanerembiapo peteĩ oñemitỹvape?

[Nóta oĩva taʼanga ndive páhina 22]

Umi oñeñotỹva yvy porãme hiʼa porãiterei, upévare opredika kyreʼỹme ijahápe chupekuéra

[Nóta oĩva taʼanga ndive páhina 23]

Ñandejára ningo upe omongakuaáva